2 Tesalonicenses 3 - Kaqchikel Santo Domingo (Xenacoj)

Ri Pablo ndukꞌutuj chi ndibꞌan orar roma rijaꞌ y ri erachibꞌil

¹ Hermanos, jun chik achike niwojoꞌ nibꞌij chiwa, jareꞌ: Tibꞌanaꞌ orar qoma, chin keriꞌ chaꞌanin ndibꞌa rutzijoxik ri utzulej rutzij ri Ajaw chꞌaqa chik apeꞌ, y chi ri wineq ndikiyaꞌ nim reqalen ri utzulej teq tzij riꞌ, achel ndiyaꞌ reqalen rix.

² Tikꞌutuj chuqaꞌ chare ri Dios chi ma qojqaqa pa kiqꞌaꞌ itzel teq wineq ri kin emachꞌikilik chikibꞌanik. Keriꞌ nibꞌij chiwa, porque ma konojel ta wineq ndikitaqij ri utzulej teq tzij ri ndichꞌaꞌa pa ruwiꞌ ri kolotajik nduyaꞌ ri Ajaw.

³ Pero ri Ajaw kin ndubꞌen wi ri ndubꞌij. Rijaꞌ kin nduyaꞌ ruchuqꞌaꞌ ri iwánima y ngixrubꞌen cuenta, chin keriꞌ maneq ruqꞌaꞌ ri itzel chiwa.

⁴ Y roj kuqul qakꞌuꞌx rikꞌin ri Ajaw chi rix rutoꞌon y xkixrutoꞌ más apu chiqawech chin ndibꞌen ri ndiqabꞌen mandar chiwa.

⁵ Ja ta kꞌa ri Ajaw ndukꞌuan ri iwánima chin ngixojowan achel ndojowan ri Dios, y ndikachꞌ ri kꞌayew ndiqꞌasaj pa ikꞌaslen, achel ri Cristo xukachꞌ ri kꞌayew xuqꞌasaj.

Ri Pablo ndubꞌij chi kesamej ri hermanos

⁶ Hermanos, pa rubꞌiꞌ ri Qajaw Jesucristo ndiqabꞌen mandar chiwa, chi ma keꞌiwachibꞌilaj ri hermanos eqꞌoroy y ma ndikinimaj ta ri tijonik yoꞌon chaqe roj ri qabꞌiꞌin kan chake.

⁷ Porque rix iwetaman chi kin ndikꞌatzin ndikꞌuaj ri ikꞌaslen achel ri kꞌaslen qakꞌutun kan chiwech, porque atoq xojkꞌojeꞌ chiꞌikajal xojsamej y ma xojqꞌoran ta.

⁸ Ma jumbꞌey xqakꞌutuj chi xe ta keriꞌ xsipex jun rutzaꞌ qaway, pa rukꞌexel riꞌ xa kin chi chaqꞌaꞌ chi paqꞌij xqakosisaj qiꞌ pa samaj chin ma xojok ta jun eqaꞌ chiwa.

⁹ Roj kꞌo ta wi cheꞌel xqabꞌij chiwa chi xojitzuq, pero ma ke ta riꞌ xqabꞌen, xa kin xojsamej chin xqakꞌut chiwech chi keriꞌ chuqaꞌ tibꞌanaꞌ rix.

¹⁰ Porque atoq kꞌa rojkꞌo chiꞌikajal, xqayaꞌ kan re mandamiento reꞌ chiwa: Si jun ma ndirajoꞌ ta ndisamej, ma tiwaꞌ chuqaꞌ.

¹¹ Y wokami ndiqakamuluj rubꞌixik chiwa, porque qakꞌaxan chi ekꞌo jujun chiꞌikajal ri xe ngeqꞌorayaj y ma jun samaj ndikajoꞌ ndikibꞌen, xa ndikitzeq kiꞌ xa apejeꞌ na.

¹² Chake rejeꞌ ndiqachilabꞌej y ndiqabꞌen mandar pa rubꞌiꞌ ri Ajaw Jesucristo, chi chaj kesamej chin ndikichꞌek ri kiway.

¹³ Y chiwa rix hermanos, ndiqabꞌij chi ma kixkos ndibꞌen ri utz.

¹⁴ Si kꞌo jun chiꞌikajal ri ma ndirajoꞌ ta ndubꞌen ri qatzꞌibꞌan e chupan re wuj reꞌ, tibꞌanaꞌ chi ndiqꞌalajin chikiwech konojel achike ri ndibꞌanun keriꞌ y ma tiwachibꞌilaj, chin keriꞌ tikꞌix.

¹⁵ Pero rix ma titzꞌet achel ta jun yakatajneq chiwij keriꞌ, xa kin tipixabꞌaj achel ndipixabꞌaj xa achike na chi hermano.

Ri Pablo nduteq ruxunaqil kiwech ri hermanos

¹⁶ Ri Ajaw ri nduyaꞌ uxlanen, kin ja ta kꞌa rijaꞌ ndiyoꞌon uxlanen jumul pa iwánima chupan nojel ri ndiqꞌasaj pa ikꞌaslen. Kin ta xtikꞌojeꞌ ri Ajaw chiꞌikajal rix iwonojel.

¹⁷ Riyin Pablo rikꞌin nuqꞌaꞌ nitzꞌibꞌaj e ruxunaqil iwech. Keriꞌ nibꞌen chupan nojel wuj ri ngenteq chake ri hermanos, chin ndetamex chi ja riyin ri ngitaqon ri wuj.

¹⁸ Ri favor ri nduyaꞌ ri Qajaw Jesucristo kin ta xtikꞌojeꞌ pa iwiꞌ rix iwonojel.