2 Corintios 3 - Kaqchikel Santo Domingo (Xenacoj)

Ri Pablo jun samajel chin ri kꞌakꞌakꞌ pacto

¹ Atoq ndiqabꞌij chi ja ri Dios taqayon qichin, ¿pa itzij rix chi jumbꞌey chik qayon chiqawech ndiqayaꞌ qaqꞌij? ¿Ndikꞌatzin kami jun wuj apeꞌ ndubꞌij chi roj rusamajelaꞌ ri Dios chin ta ndikꞌen apu qawech? O, ¿ndikꞌatzin kami ndiqakꞌutuj jun wuj chiwa chin ndikꞌan qawech jukꞌan chik apeꞌ, achel ndikibꞌen jujun? ¡Ma ndikꞌatzin ta!

² Porque konojel wineq kiyoꞌon cuenta chare ri utzulej samaj rubꞌanun ri Cristo pa ikꞌaslen roma ri samaj qabꞌanun chiꞌikajal. Y romariꞌ rix, rix achel jun wuj tzꞌibꞌan pa qánima ri kin qꞌalej ri achike ndubꞌij.

³ Kin ndiqꞌalajin chi rix, rix achel jun wuj taqon roma ri Cristo, y ja roj ri roj rukusan ri Dios chin keriꞌ ri wuj riꞌ nditzꞌetetej koma ri wineq. Y ma tzꞌibꞌan ta chuwech tzꞌalen teq abꞌej, nixta rikꞌin tzꞌibꞌabꞌel, xa kin rikꞌin ri Espíritu chin ri Kꞌaslik Dios tzꞌibꞌan pa kánima ri kitaqin rijaꞌ.

⁴ Y chuwech ri Dios ndiqabꞌij chi kin kuqul qakꞌuꞌx chi keriꞌ wi, roma ri samaj xubꞌen ri Cristo chiqaqꞌaꞌ chiꞌikajal.

⁵ Ma ndiqabꞌij ta chi qayon chiqawech ngojtiker ndiqabꞌen ri samaj, xa kin nojel ri ndiqabꞌen, ja ri Dios ndibꞌanun chaqe chi ngojtiker ndiqabꞌen.

⁶ Ja rijaꞌ bꞌanayon chaqe chi ngojtiker ndiqabꞌen ri samaj chupan ri kꞌakꞌakꞌ pacto. Y ri rukꞌuꞌx ri pacto riꞌ, kin ja ri Espíritu Santo, y ma ja ta ri ndubꞌij chupan ri ley xyoꞌox chare ri Moisés. Porque chupan ri ley riꞌ ndubꞌij chi ndiqaqa kamik pa kiwiꞌ ri ngebꞌanun mak, pero ri Espíritu Santo nduyaꞌ kꞌaslen.

⁷ Y ri ley ri ndubꞌij chi ndiqaqa kamik pa kiwiꞌ ri ngebꞌanun mak, xtzꞌibꞌex chuwech tzꞌalen teq abꞌej, y xqꞌalajin chi kin kꞌo nimalej ruqꞌij atoq xyoꞌox chare ri Moisés. Romariꞌ ri israelitas ma xetiker ta xkitzꞌet ruwech ri Moisés, porque kin ndiyikꞌilan ri ruwech y ri yikꞌinik riꞌ xa eqal-eqal xkꞌis qa chiruwech ri Moisés.

⁸ Si keriꞌ ruqꞌij ri ley xqꞌalajin atoq xyoꞌox chare ri Moisés, kin más wi nim ruqꞌij ri samaj ndubꞌen ri Espíritu Santo chiqakajal.

⁹ Porque si ri ojer pacto ri xa castigo ndukꞌen pe xqꞌalajin chi kin kꞌo nimalej ruqꞌij, más nimalej ruqꞌij ri kꞌakꞌakꞌ pacto ri ndubꞌen chi nixta jun qamak ndiqeqalej chuwech ri Dios.

¹⁰ Keriꞌ nibꞌij, porque ri ojer pacto kin xkꞌojeꞌ ruqꞌij, pero ri kꞌakꞌakꞌ pacto xqꞌax ri nimalej ruqꞌij chuwech ri ojer pacto, y romariꞌ ri ojer pacto achel xa maneq ta ruqꞌij keriꞌ.

¹¹ Porque si ri ojer pacto xkꞌojeꞌ ruqꞌij y xa ma chin ta jumul ndikꞌojeꞌ, kin más wi nim ruqꞌij ri kꞌakꞌakꞌ pacto ri kin chin jumul ndikꞌojeꞌ.

¹² Y roma kuqul qakꞌuꞌx chi ri kꞌakꞌakꞌ pacto riꞌ jumul kꞌo ruqꞌij, roj ma ndiqaxibꞌij ta qiꞌ ndiqayaꞌ rutzijol.

¹³ Y ma ndiqabꞌen ta achel xubꞌen ri Moisés, ri xkꞌatzin chi xutzꞌapij ruwech rikꞌin jun kꞌul, chin keriꞌ ri israelitas ma ndikitzꞌet ta atoq ndikꞌis qa ri ndiyikꞌan chupalej.

¹⁴ Pero ri nuwinaqul israelitas xtzꞌapitej ruwech ri kinoꞌoj, romariꞌ ma xkikꞌoxomaj ta rubꞌeyal reꞌ, y kꞌa keriꞌ kibꞌanun wokami. Atoq ndibꞌan leer ri ojer pacto chikiwech, ma ndikikꞌoxomaj ta, xa kin achel tzꞌapin kiwech rikꞌin ri kꞌul riꞌ, porque kꞌaja na atoq jun ndabꞌen rikꞌin ri Cristo, ndel e ri kꞌul riꞌ.

¹⁵ Y kꞌa keriꞌ na wokami, atoq ndibꞌan leer chikiwech ri ley xyoꞌox chare ri Moisés, kꞌo jun achel kꞌul tzꞌapiyon ri kinojibꞌal, romariꞌ ma ndikikꞌoxomaj ta.

¹⁶ Pero atoq jun wineq ndutaqij ri Ajaw, ri kꞌul tzꞌapiyon ruwech ndikꞌan e.

¹⁷ Porque ri Ajaw riꞌ, ja ri Espíritu y ri wineq ri kꞌo ri Espíritu chin ri Ajaw pa ránima, ma jun achike ndiqꞌato richin chin ndukꞌoxomaj ri ndirajoꞌ ri Dios.

¹⁸ Y romariꞌ, roj ri qataqin ri Ajaw, maneq chik kꞌul tzꞌapiyon qawech, y ndiqatzꞌet rijaꞌ achel pa jun espejo apeꞌ ndiyikꞌan ruqꞌij, y qꞌij-qꞌij ndijalatej ri qakꞌaslen chin nderubꞌanaꞌ achel rukꞌaslen rijaꞌ, y riꞌ roma ri samaj ndubꞌen ri Ajaw pa qakꞌaslen, y ri Ajaw riꞌ, ja ri Espíritu.