2 Corintios 12 - Kaqchikel Santo Domingo (Xenacoj)

Ri nimalej ruchuqꞌaꞌ ri Dios ndiqꞌalajin pa rukꞌaslen ri Pablo

¹ Hermanos, riyin wetaman chi nixta jun utz ndukꞌen pe si niyaꞌ nuqꞌij, pero roma rix kin ndiqaꞌ chiwech ngeꞌiwakꞌaxaj ri ndikiyalaꞌ kiqꞌij, riyin chuqaꞌ niyaꞌ jubꞌaꞌ nuqꞌij y ngichꞌaꞌa pa ruwiꞌ ri achel teq achikꞌ y ri nojel teq achike ruqꞌalajrisan ri Ajaw.

² Ja laꞌeq jun 14 junaꞌ wokami, chi jun achi ri xe jun rubꞌanun rikꞌin ri Cristo Jesús, xukꞌuꞌex e kꞌa pa rox kaj y xtzolij chi pe jumbꞌey. Riyin wetaman ruwech ri achi riꞌ. Ri ma wetaman ta, ja si xukꞌuꞌex pa ru-cuerpo o xaxe ri ránima, riꞌ kin xe ri Dios etamayon.

³ Y riyin wetaman chi ri achi riꞌ xukꞌuꞌex e, pero si xukꞌuꞌex pa ru-cuerpo o xaxe ri ránima, riꞌ kin xe ri Dios etamayon.

⁴ Rijaꞌ xukꞌuꞌex pa jun qꞌusqꞌuj lugar rubꞌiniꞌan paraíso apeꞌ kꞌo ri Dios, y xbꞌerakꞌaxaj tzij ri maneq rubꞌixik chochꞌulew, ri ma yoꞌon ta qꞌij chake wineq chi ndikiyaꞌ rutzijol.

⁵ Riyin kꞌo cheꞌel niyaꞌ ruqꞌij ri achi riꞌ roma ri xbꞌerakꞌaxaj, pero nuyon chinuwech ma niyaꞌ ta qa nuqꞌij. Pero si niyaꞌ jubꞌaꞌ nuqꞌij, ngichꞌaꞌa pa ruwiꞌ ri nuqꞌasan pa nukꞌaslen ri ngekꞌutu chi xa yin relik wineq y maneq ok wuchuqꞌaꞌ.

⁶ Porque si riyin niwojoꞌ niyaꞌ jubꞌaꞌ nuqꞌij, ma yin ta achel jun wineq ri ma runojin ta ri ngerubꞌilaꞌ, porque kin ja ri qetzij nibꞌij. Pero niqꞌet wiꞌ chi niyaꞌ nuqꞌij, chin ma tikinojij ri wineq chi kin kꞌo más nuqꞌij ke chuwech ri ndikitzꞌet pa nukꞌaslen o chuwech ri ndikakꞌaxaj chi nitzijoj.

⁷ Kin nimalej teq achike ri xeqꞌalajrisex chinuwech chupan ri achel teq achikꞌ. Y chin ma tinyaꞌ más nuqꞌij, ri Ajaw xuyaꞌ qꞌij chare ri itzel chi xuyaꞌ jun achel kꞌix pa nu-cuerpo ri ngiruyaꞌ pa kꞌayew chin ma ninimrisaj ta más wiꞌ.

⁸ Y riyin oxmul nukꞌutun chare ri Ajaw chi tirelesaj e pa nu-cuerpo.

⁹ Pero ri Ajaw rubꞌiꞌin chuwa: Kelaꞌ na tubꞌanaꞌ ri akꞌaslen. Maske maneq ok awuchuqꞌaꞌ, xa kin kꞌo ri nu-favor pa awiꞌ. Keriꞌ nibꞌij chawa porque ri wuchuqꞌaꞌ ndiqꞌalajin pa kikꞌaslen ri maneq ok kuchuqꞌaꞌ, xchajeꞌ. Romariꞌ, si niyaꞌ jubꞌaꞌ nuqꞌij, niyaꞌ nuqꞌij rikꞌin ri nuqꞌasan pa nukꞌaslen ri ngekꞌutu chi xa yin relik wineq y maneq ok wuchuqꞌaꞌ, chin keriꞌ nditzꞌetetej ruchuqꞌaꞌ ri Cristo pa nukꞌaslen.

¹⁰ Romariꞌ, riyin ngikikot rikꞌin ri niqꞌasaj pa nukꞌaslen ri ngekꞌutu chi maneq ok wuchuqꞌaꞌ, achel ri yoqꞌonik teq tzij ngebꞌan chuwij, ri maneq ndutzꞌen nuqꞌaꞌ, ri ngitzeqlebꞌex chin ndibꞌan itzel chuwa, y ri jalajaj teq kꞌayew niqꞌasaj roma nibꞌen rusamaj ri Cristo. Porque atoq maneq ok wuchuqꞌaꞌ, kin ndiqꞌalajin ruchuqꞌaꞌ rijaꞌ pa nukꞌaslen.

¹¹ Qetzij wi kin achel yin jun achi ri ma ndunojij ta ri ngerubꞌilaꞌ ngiqꞌalajin chiwech, pero ja rix ri xixok chuwa chi xkꞌatzin xinyaꞌ jubꞌaꞌ nuqꞌij. Porque ja ta rix ri xkꞌatzin chi xibꞌij chi kꞌo nuqꞌij, roma riyin ma wíta ta weqalen ke chikiwech ri ndikibꞌij chi enimalej teq apóstoles. Keriꞌ nibꞌij chiwa maske wetaman chi maneq ok nuqꞌij.

¹² Rix xkꞌatzin ta chi xibꞌij chi kꞌo jubꞌaꞌ nuqꞌij, porque junan rikꞌin ri kꞌayew xinqꞌasaj ri xinkachꞌ nuwech chupan, ri Dios xirukusaj chin xebꞌanatej chinuqꞌaꞌ nimalej teq retal ruchuqꞌaꞌ, nimalej teq achike ri nixta jumbꞌey etzꞌeton y milagros chiꞌikajal ri ngeqꞌalajrisan chi qetzij yin apóstol.

¹³ Y riyin ma xinok ta jun eqaꞌ chiwij chin ta xiyaꞌ ri xkꞌatzin chuwa, achel kiyoꞌon ri chꞌaqa chik bꞌotzaj teq ralkꞌuaꞌl ri Dios chuwa. Si rix ndinaꞌ chi maneq iweqalen xinbꞌen chiwa roma ma xinok ta jun eqaꞌ chiwij, ¡tikuyuꞌ kꞌa ri numak!

Ri Pablo ndirajoꞌ ngebꞌerutzꞌetaꞌ ri aj Corinto

¹⁴ Tiyaꞌ kꞌa pa cuenta re nibꞌij chiwa: Riyin nubꞌanun chik nukꞌojlen chin ngibꞌa chiꞌitzꞌetik, y ja rox mul rikꞌin reꞌ ri ngibꞌa apu, y kin ma xkinok ta jun eqaꞌ chiwij. Porque riyin ma ja ta ri ichajin ri bꞌaneq wánima chirij. Ri achoq chirij bꞌaneq ri wánima, ja rix. Porque ma keqaꞌ ta ri alkꞌualaxelaꞌ chin ndikimal ruchiꞌ méra chin ndikiyaꞌ chake ri kite-kitataꞌ, xa kin ja ri teꞌej-tataꞌatz ri ngemolo ruchiꞌ méra chin ndikiyaꞌ kan chake ri kalkꞌuaꞌl.

¹⁵ Riyin rikꞌin nojel wánima nikusaj ri nuchajin y hasta niyaꞌ wiꞌ pa samaj chin kꞌo utz ndukꞌen pe chare ri iwánima. Si riyin qꞌij-qꞌij más ndikꞌiy pa wánima chi ngixinwojoꞌ, ¿pa ruchojmil kami ndibꞌen chi qꞌij-qꞌij más ndikꞌis qa pa iwánima chi nginiwojoꞌ?

¹⁶ Rix iwetaman chi riyin ma yin okuneq ta jun eqaꞌ chiwij. Pero ekꞌo jujun chiꞌikajal ri ngebꞌiꞌin chi keriꞌ xinbꞌen roma xkaney nunoꞌoj chi rikꞌin chꞌakatinik xtinwelesaj méra chiꞌiqꞌaꞌ.

¹⁷ ¿Xenkusaj kami ri hermanos xenteq chiꞌitzꞌetik chin xixinchꞌakatij? Ma ke ta riꞌ.

¹⁸ Chare ri Tito xinkꞌutuj chi xixbꞌerutzꞌetaꞌ y rikꞌin rijaꞌ xinteq ri jun chik hermano. ¿Xbꞌerelesaj kami méra chiꞌiqꞌaꞌ ri Tito? Ma ke ta riꞌ. Porque junan qánima y qanoꞌoj qabꞌanun rikꞌin ri Tito pa rusamaj ri Ajaw.

¹⁹ Rikꞌin jubꞌaꞌ rix ndinojij chi qabꞌiꞌin nojel reꞌ roma ndiqajoꞌ ndiqatoꞌ qiꞌ chiwech, pero ma ke ta riꞌ. Xa kin qetzij ri ndiqabꞌij roma xe jun qabꞌanun rikꞌin ri Cristo y kin chuwech ri Dios ngojchꞌaꞌa wi. Y nojel ri ngojtajin chubꞌixik chiwa rix ri tzꞌan ngixqajoꞌ, xa kin chin ngixkꞌiy chupan ri kꞌakꞌakꞌ kꞌaslen ruyoꞌon ri Dios chiwa.

²⁰ Riyin nurayin chi atoq xkixbꞌentzꞌetaꞌ, chojmilej ta chi kꞌaslen ikꞌuan, pero xa nuxibꞌin wiꞌ, porque rikꞌin jubꞌaꞌ ma ke ta riꞌ ri kꞌaslen ikꞌuan atoq xkibꞌeqaqa apeꞌ rixkꞌo. Y riꞌ xtubꞌen chi ma xtenbꞌanaꞌ ta chiꞌikajal achel ri iwoyobꞌen chuwa. Porque ma kꞌateꞌ ngixbꞌenwilaꞌ chi ngixtajin rikꞌin oyowal, o ekꞌo ri itzel ndikinaꞌ chare roma utz kibꞌanun chꞌaqa chik, o ekꞌo ri ndiququt kánima chikij wineq, o ekꞌo ndikibꞌen xe ri kꞌo utz ndukꞌen pe chake, o ekꞌo ri ndikibꞌilaꞌ itzel teq tzij chikij chꞌaqa chik, o ekꞌo ri ngechꞌaꞌa chikij wineq, o ekꞌo ri nim ndikinaꞌ kiꞌ o kꞌo ngebꞌanatej chiꞌikajal ri ma pa ruchojmil ta.

²¹ Riyin nuxibꞌin wiꞌ chi atoq xkixbꞌentzꞌetaꞌ, ri Dios xtubꞌen chuwa chi xkikꞌix iwoma, y xtubꞌen chuwa chi xkinoqꞌ komak ekꞌiy chiꞌikajal ri kꞌo chik tiempo ekꞌo pa mak y ma kiyoꞌon ta kan ri itzel teq rayinik ndurayij ri ki-cuerpo, ndikikꞌamalaꞌ qa kiꞌ xa achoq na ikꞌin chin ndikibꞌen mak, y chuqaꞌ ma kiyoꞌon ta kan ri itzel teq achike ngekibꞌanalaꞌ.