2 Corintios 1 - Kaqchikel Santo Domingo (Xenacoj)

Ri Pablo nduteq ruxunaqil kiwech ri hermanos aj Corinto

¹ Riyin Pablo, apóstol chin ri Cristo Jesús roma jariꞌ rurayibꞌel ri Dios, junan rikꞌin ri hermano Timoteo ndiqatzꞌibꞌaj e re wuj reꞌ chiwa rix ri ralkꞌuaꞌl ri Dios ri ndimal iwiꞌ pa rubꞌiꞌ pa tinamit Corinto, y chake konojel ri hermanos ekꞌo chiriꞌ pa rochꞌulew Acaya.

² Ri Qatataꞌ Dios y ri Ajaw Jesucristo kin ta xtikiyaꞌ ki-favor pa iwiꞌ y xtikiyaꞌ chuqaꞌ uxlanen pa iwánima.

Ri Dios ndubꞌochiꞌij qánima

³ Kin ta xtiyoꞌox ruqꞌij ri ru-Dios y Rutataꞌ ri Qajaw Jesucristo, porque rijaꞌ Tataꞌaj ri kin ndijoyowan, y Dios chuqaꞌ ri ngojrutoꞌ chupan nojel ri kꞌayew ndiqaqꞌasaj chin ndubꞌochiꞌij qánima.

⁴ Ja rijaꞌ ri ndibꞌochiꞌin qánima chupan nojel ri kꞌayew ndiqaqꞌasaj, chin keriꞌ rikꞌin ri bꞌochinik ruyoꞌon chaqe ngojtiker ndiqabꞌochiꞌij kánima ri ndikiqꞌasaj xa achike na chi kꞌayew.

⁵ Porque achel ndikꞌiyer ri kꞌayew pa qakꞌaslen roma qataqin ri Cristo, keriꞌ chuqaꞌ roma qataqin ri Cristo ndikꞌiyer ri toꞌonik nduyaꞌ ri Dios chin ndubꞌochiꞌij qánima.

⁶ Ri kꞌayew ndiqaqꞌasaj pa qakꞌaslen, chin ngojtijox chirij rubꞌochixik iwánima rix chin ngixkolotej. Y ri rubꞌochixik qánima ndubꞌen ri Dios, jariꞌ ri ndukusaj chin ndubꞌochiꞌij iwánima rix chin ngixtiker ndikachꞌ ri kꞌayew ri ndiqakachꞌ roj.

⁷ Kin kuqul qakꞌuꞌx chi rix roma ndiqꞌasaj kꞌayew, ri Dios ndubꞌochiꞌij chuqaꞌ iwánima, porque keriꞌ ndubꞌen qikꞌin roj. Atoq ndiqaqꞌasaj kꞌayew, rijaꞌ ndubꞌochiꞌij qánima.

⁸ Hermanos, roj ndiqajoꞌ chi rix ndiwetamaj ri kꞌayew xqaqꞌasaj pa rochꞌulew Asia. Tzꞌan chi kꞌayew xqaqꞌasaj chiriꞌ, hasta ya ma ndiqakachꞌ chi ta más y pa qatzij roj, xa chiriꞌ ngojken.

⁹ Y kin xqanaꞌ pa qánima chi ngojken, pero riꞌ chin ma tiqakuqubꞌaꞌ qakꞌuꞌx rikꞌin ok ri quchuqꞌaꞌ roj, xa kin rikꞌin ri Dios ri ngerukꞌastajbꞌaꞌ pe ri animaꞌiꞌ.

¹⁰ Y ja ri Dios xkolo qichin chuwech ri kꞌayew chi kamik riꞌ, y keriꞌ chuqaꞌ xtubꞌen más chiqawech apu, kin kuqul qakꞌuꞌx rikꞌin rijaꞌ chi ngojrukal.

¹¹ Y keriꞌ ndibꞌanatej si rix ngojitoꞌ pa oración. Si ekꞌiy ngebꞌanun orar qoma, ekꞌiy chuqaꞌ ngematioxin roma ri favor nduyaꞌ ri Dios pa qawiꞌ.

Ri Pablo ndubꞌij achike roma ma xebꞌerutzꞌetaꞌ ta ri aj Corinto

¹² Keriꞌ ndiqabꞌij chiwa porque ri ndibꞌanun chaqe chi ndikuqer qakꞌuꞌx, ja ri ndubꞌij ri qánima chaqe chi qakꞌuan jun chꞌajchꞌaj kꞌaslen y ndubꞌij chuqaꞌ chi nojel ri ndiqabꞌen kin qetzij wi, y más keriꞌ qabꞌanun chiwech rix. Roj ma ja ta ri aj rochꞌulew nojibꞌel ukꞌuayon qichin, xa kin ja ri ru-favor ri Dios ukꞌuayon qichin.

¹³ Chupan ri wuj qatzꞌibꞌan e, nixta jun achike kaꞌiꞌ ta rubꞌeyal rukꞌoxomaxik, xa kin ja achel ndibꞌen leer y ndikꞌoxomaj, jariꞌ ri rubꞌeyal. Y nirayij chi ndikꞌoxomaj ta nojel ri qatzꞌibꞌan e,

¹⁴ achel ikꞌoxoman chik jubꞌaꞌ ri achike roj, chi atoq nduqaqa chik jumbꞌey ri Ajaw Jesús, kin xkixkikot qoma, achel roj xqojkikot iwoma rix.

¹⁵ Y roma ikꞌoxoman jubꞌaꞌ nojel reꞌ, xinbꞌen ruwech chi ngineqꞌax nabꞌey iwikꞌin rix, y ngineqꞌax chik jumbꞌey iwikꞌin atoq xkitzolij pe, y keriꞌ rix kamul ndiyoꞌox chiwa ri favor nduyaꞌ ri Dios.

¹⁶ Riyin xinbꞌen ruwech chi ngiqꞌax iwikꞌin nabꞌey atoq ngibꞌa pa rochꞌulew Macedonia, y atoq xkitzolij pe, ngineqꞌax chi pe jumbꞌey iwikꞌin, chin keriꞌ nginitoꞌ e atoq nitzꞌen nubꞌey ngibꞌa pa rochꞌulew Judea.

¹⁷ Atoq xinyaꞌ pa wánima nojel reꞌ, ¿ndibꞌij rix chi yin ma xinnojij ta utz-utz? ¿Ndinojij rix chi nibꞌen achel ndubꞌen jun ri ma rutaqin ta ri Dios, ri ndubꞌij chi ndubꞌen jun achike y xa ma ndubꞌen ta?

¹⁸ Ri Dios ri ma ndujel ta ruwech rutzij retaman chi ri xinbꞌij e chiwa, kin jariꞌ kꞌo pa wánima chin ta xinbꞌen, y ma kaꞌiꞌ ta ruwech nutzij.

¹⁹ Porque ri Jesucristo, ri Rukꞌajol ri Dios, ma ndubꞌij ta jun achike ri ma ndubꞌen ta, rijaꞌ kin jumul wi ndubꞌen ri ndubꞌij, keriꞌ ri qatzijon kan riyin Pablo, ri Silvano y ri Timoteo chiwa, y rikꞌin ri Cristo nditzꞌetetej chi ri Dios kin jumul wi ndubꞌen ri ndubꞌij,

²⁰ porque nojel ri rusujun pe ri Dios, rikꞌin ri Cristo Jesús ndiqil wi. Roma kꞌa riꞌ, atoq ngojchꞌaꞌa chare ri Dios pa rubꞌiꞌ ri Cristo, ndiqabꞌij: Amén, kin qetzij wi chi ndabꞌen ri ndabꞌij, ngojchajeꞌ chare, chin ndiyoꞌox ruqꞌij qoma roj.

²¹ Y ja ri Dios ndibꞌanun chaqe roj y chiwa rix chi qꞌij-qꞌij más xe jun ndiqabꞌen rikꞌin ri Cristo, y roj ruchaꞌon chuqaꞌ chin ndiqabꞌen ri rusamaj.

²² Ja chuqaꞌ rijaꞌ xyoꞌon qetal chi roj richin. Ruyoꞌon ri Espíritu Santo pa qánima, retal chi qetzij chi kꞌo más nduyaꞌ chaqe.

²³ Pero ma yin bꞌaneq ta chiꞌitzꞌetik pa tinamit Corinto achel nunojin roma nipoqonaj iwech, y kin ja ta ri Dios xtok testigo chuwij y xtirelesaj ri nukꞌaslen, si ma qetzij ta ri nibꞌij.

²⁴ Ma tibꞌij rix chi roj kin kꞌo uchuqꞌaꞌ pa qaqꞌaꞌ chin ndiqabꞌij chiwa achike ri utz chi nditaqij, ma ke ta riꞌ, porque rix kin kuqul chik ikꞌuꞌx utz-utz rikꞌin ri Cristo. Ri ndiqajoꞌ roj, ja ri ngixqatoꞌ chin ndikikot más iwánima.