1 Pedro 4 - Kaqchikel Santo Domingo (Xenacoj)

¹ Roma kꞌa riꞌ, achel ri Cristo xuqꞌasaj kꞌayew pa ru-cuerpo, rix tiyaꞌ pa iwánima chi keriꞌ ndikꞌatzin ndiqꞌasaj chuqaꞌ, porque si jun hermano nduqꞌasaj kꞌayew pa ru-cuerpo roma rutaqin ri Cristo, maneq chik más ruchuqꞌaꞌ ri mak pa rukꞌaslen.

² Keriꞌ tiyaꞌ pa iwánima, chin keriꞌ ri janipeꞌ chik qꞌij ngixkꞌaseꞌ e chochꞌulew, ma tukꞌuꞌex ri ikꞌaslen roma ri itzel teq rayinik ri ndalex pe pa iwánima, y xa kin tibꞌanaꞌ ri rurayibꞌel ri Dios.

³ Rix jumbꞌey kan, kꞌiy tiempo xikꞌuaj jun kꞌaslen achel kikꞌaslen ri wineq ma kitaqin ta ri Dios. Ma xixtiker ta xiqꞌet iwiꞌ chuwech ri ma utz ta ndurayij ri i-cuerpo, kin xbꞌa iwánima chirij itzel teq rayinik, xeꞌibꞌen nimaqꞌij apeꞌ xixwayilaꞌ y xiqꞌabꞌarisaj iwiꞌ, santienta awariénta xitijlaꞌ, y xiyalaꞌ kiqꞌij tiox ri kin ndimulu rukꞌuꞌx ri Dios rikꞌin.

⁴ Wokami ri wineq ri ma kitaqin ta ri Dios, ndisach kikꞌuꞌx chiwij, roma rix ma ndibꞌen chi ta achel ndikibꞌen rejeꞌ, chi kikꞌuan jun itzel kꞌaslen, y romariꞌ itzel ngechꞌaꞌa chiwij.

⁵ Pero ri wineq riꞌ, ndeqaqa jun qꞌij ndekibꞌij ri xkibꞌen pa kikꞌaslen chuwech ri Cristo ri kin runabꞌan chik riꞌ chin nduqꞌet tzij pa kiwiꞌ ri ekꞌes y ri ekamineq.

⁶ Romariꞌ xtzijox chuqaꞌ ri utzulej teq tzij chin kolotajik chake ri ekamineq, chin ndikꞌojeꞌ rukꞌaslen ri ki-espíritu, achel kꞌo rukꞌaslen ri Dios ri kin espíritu wi, maske chireꞌ chochꞌulew ri wineq riꞌ xeken wi e, achel qꞌaton pa kiwiꞌ konojel wineq.

Utz rukusaxik tiqabꞌanaꞌ ri loqꞌolej teq sipanik ngeruyaꞌ ri Dios

⁷ Ri rukꞌisibꞌel chin nojel ri ndajin chochꞌulew nduqaqa yan, romariꞌ titzꞌetaꞌ utz-utz ri ndibꞌen pa ikꞌaslen, y titijaꞌ iqꞌij chi jumul ndibꞌen orar.

⁸ Y pa ruwiꞌ nojel ri ndibꞌen pa ikꞌaslen, ri más ndikꞌatzin ja ri ndiwojoꞌ iwiꞌ rikꞌin nojel iwánima. Porque ri ngixojowan ndubꞌen chiwa chi ndikuy santienta mak.

⁹ Atoq ndikꞌatzin ndikꞌen apu kiwech pa iwachoch ri epataneq jukꞌan chik apeꞌ, tibꞌanaꞌ rikꞌin nojel iwánima, y ma kixwalal ri keriꞌ ndibꞌen.

¹⁰ Chiꞌijununal tikusaj ri loqꞌolej sipanik yoꞌon chiwa roma ri Dios chin ngeꞌitoꞌ ri chꞌaqa chik hermanos. Kin ta qꞌalej chi rikꞌin nojibꞌel ndikusaj ri jalajaj ruwech loqꞌolej sipanik ngeruyaꞌ ri Dios roma ri nimalej ru-favor.

¹¹ Ri hermano ri yoꞌon loqꞌolej sipanik chare chi ndipixabꞌan, kin tukusaj tzij ri pataneq rikꞌin ri Dios. Atoq jun ngerutoꞌ ri ndikꞌatzin kitoꞌik, tiqꞌalajin rikꞌin chi ja ri Dios yoyon uchuqꞌaꞌ chare chin nditoꞌon. Nojel ri ndibꞌen, tibꞌanaꞌ chin ndiyoꞌox ruqꞌij ri Dios roma ri xubꞌen ri Jesucristo. Rijaꞌ kin nimalej ruqꞌij y nimalej ruchuqꞌaꞌ chin jumul. Amén.

Tikikot qánima chupan ri kꞌayew ndiqaqꞌasaj roma qataqin ri Dios

¹² Hermanos, riyin tzꞌan ngixinwojoꞌ, y nibꞌij chiwa chi ma tisach ikꞌuꞌx roma ri kꞌayew ndiqꞌasaj, porque ri kꞌayew riꞌ chin nditojtobꞌex ri iwánima si qetzij kuqul ikꞌuꞌx rikꞌin ri Dios. Y ma tinaꞌ chi ja rix ri nabꞌey ndikꞌulwachij jun kꞌayew keriꞌ.

¹³ Pa rukꞌexel chi ndisach ikꞌuꞌx, xa kixkikot chi jajun rix ndiqꞌasaj jubꞌaꞌ kꞌayew achel xuqꞌasaj ri Cristo iwoma, chin keriꞌ atoq nduruqꞌalajrisaj riꞌ chupan ri nimalej ruqꞌij, rix chuqaꞌ kin santienta xkixkikot rikꞌin.

¹⁴ Jabꞌel roꞌiqꞌij atoq ndibꞌix itzel teq tzij chiwa roma itaqin ri Cristo, porque ri Espíritu chin ri Dios ri kꞌo nimalej ruqꞌij kin kꞌo wi pa iwiꞌ rix.

¹⁵ Man ta ndibꞌanatej chi jun chiꞌikajal rix nduqꞌasaj kꞌayew roma xubꞌen jun kamik, o jun eleqꞌ, o jun chꞌaꞌoj, o rujuꞌun apu riꞌ apeꞌ ma oyon ta.

¹⁶ Pero si kꞌo jun nduqꞌasaj kꞌayew roma rutaqin ri Cristo, ma tikꞌix, xa kin tuyaꞌ ruqꞌij ri Dios roma rutaqin ri Cristo.

¹⁷ Roma ja tiempo chik chi ri Dios nduqꞌet tzij pa kiwiꞌ ri wineq, pero ri nabꞌey keriꞌ ndibꞌan chaqe, ja roj ri qataqin rijaꞌ, chin ndichojmirisex ri qakꞌaslen. Y si ndiqꞌat tzij nabꞌey pa qawiꞌ roj ri qataqin chik, tinojij na kꞌa janipeꞌ chi castigo ndiyoꞌox chake ri ma ndikinimaj ta ri utzulej teq tzij chin kolotajik ri nduyaꞌ ri Dios.

¹⁸ Achel ndubꞌij ri rutzij ri Dios tzꞌibꞌan kan: Si ri kikꞌuan jun chojmilej kꞌaslen chuwech ri Dios, cuesta ngekolotej, ¿achike xtibꞌanatej kikꞌin ri wineq maneq Dios pa kiwech, y jumul ndikibꞌen mak? Keriꞌ tzꞌibꞌan kan.

¹⁹ Roma kꞌa riꞌ, roj ri ndiqaqꞌasaj kꞌayew roma ndiqabꞌen ri rurayibꞌel ri Dios, ma tiqayaꞌ kan chi ndiqabꞌen ri utz y jumul tiqajachaꞌ qánima pa ruqꞌaꞌ ri Dios ri bꞌanayon qichin, y kin ndubꞌen wi ri ndubꞌij.