1 Pedro 3 - Kaqchikel Santo Domingo (Xenacoj)

Ri ndikꞌatzin ndikibꞌen ri ekꞌulan

¹ Keriꞌ chuqaꞌ rix ixoqiꞌ, chiꞌijununal tinimaj kitzij ri iwachijil, chin keriꞌ si ekꞌo jujun ri ma kitaqin ta ri Dios, atoq ndikitzꞌet ri ikꞌaslen rix, rejeꞌ ndikitaqij ri utzulej teq tzij chin kolotajik, maske rix ma jun tzij ndibꞌij chake pa ruwiꞌ ri kolotajik riꞌ.

² Porque ri iwachijil ndikitzꞌet ri chꞌajchꞌaj ikꞌaslen ikꞌuan y ndikiyaꞌ cuenta chare chi kin ngixniman wi.

³ Atoq ndiweq iwiꞌ, ma tibꞌen rukꞌojlen ri iwiꞌ xe chin ndibꞌananelaꞌ, y ma tibꞌa iwánima chirij rukusaxik joyas ebꞌanun rikꞌin qꞌanapueq, nixta pa ruwiꞌ jabꞌel teq tzieq santienta kajel.

⁴ Ri iweqbꞌel ndikꞌatzin, ja ri ndikꞌuaj jun jabꞌel yalan noꞌoj y ki-kiꞌ iwánima. Jun weqbꞌel keriꞌ, kin santienta reqalen chuwech ri Dios.

⁵ Porque keriꞌ ruweqbꞌel kánima xkibꞌen ri loqꞌolej teq ixoqiꞌ ojer, xkikuqubꞌaꞌ kikꞌuꞌx rikꞌin ri Dios y xeniman chikiwech ri kachijil.

⁶ Achel xubꞌen ri Sara ojer kan, xunimaj rutzij ri Abraham ri rachijil y xubꞌij wajaw chare. Y rix, rix achel ral ri Sara, si ndibꞌen ri utz y ma ndixibꞌij ta iwiꞌ ndiqꞌasaj kꞌayew pa ikꞌaslen.

⁷ Keriꞌ chuqaꞌ rix achiꞌaꞌ, rikꞌin utzulej noꞌoj tikꞌuaj ri kꞌaslen rikꞌin ri iwixjayil. Tiyaꞌ keqalen, tikꞌuxlaꞌaj chi más jubꞌaꞌ ok kuchuqꞌaꞌ ke chiwech rix, y chi junan kikꞌin rejeꞌ ndikochij ri kꞌaslen ri nduyaꞌ ri Dios chiwa roma ri ru-favor. Keriꞌ tibꞌanaꞌ kikꞌin, chin nixta jun achike ndiqꞌato ri i-oración.

Ri ndikꞌatzin ndikibꞌen konojel ri kitaqin ri Ajaw

⁸ Ri rukꞌuꞌx nojel re ngitajin chutzꞌibꞌaxik chiwa, jareꞌ: Xe jun iwánima tibꞌanaꞌ rix iwonojel, kixpoqonan, tiwojoꞌ iwiꞌ chiwech, utz inoꞌoj tibꞌanaꞌ y ma tinimrisaj iwiꞌ.

⁹ Ma titzolij rukꞌexel ri itzel ndibꞌan chiwa, nixta titzolij rukꞌexel ri mal teq tzij ndibꞌix chiwa. Pa rukꞌexel riꞌ, tikꞌutuj chare ri Dios chi tuyaꞌ ru-favor pa kiwiꞌ ri ngebꞌanun keriꞌ chiwa. Porque ri Dios rix royon chin nduyaꞌ ru-favor pa iwiꞌ.

¹⁰ Porque ri rutzij ri Dios tzꞌibꞌan kan, kereꞌ ndubꞌij: Ri ndirajoꞌ ndukꞌuaj jun yalan kꞌaslen chochꞌulew y ndirajoꞌ ndikikot, Tuqꞌataꞌ riꞌ chin ma ngerubꞌilaꞌ mal teq tzij chake chꞌaqa chik, Y ma tukusaj ruchiꞌ chin ndichꞌakatin.

¹¹ Tuyaꞌ kan ri itzel kꞌaslen, y tubꞌanaꞌ ri utz, Tukanoj nojel ri ndukꞌen pe uxlanen chikikajal ri wineq y ja ri kꞌaslen chin uxlanen tiroqaj.

¹² Porque ri Ajaw ngerutzutzaꞌ pe ri kikꞌuan jun chojmilej kꞌaslen chin ngeruchajij, Y ndirakꞌaxaj ri oraciones ndikibꞌen. Pero yakatajneq royowal chake ri ndikibꞌanalaꞌ itzel teq achike. Keriꞌ tzꞌibꞌan kan.

¹³ Si jumul nditij iqꞌij ndibꞌen ri utz chake chꞌaqa chik, nixta jun ndibꞌanun itzel chiwa.

¹⁴ Pero si roma ndikꞌuaj jun chojmilej kꞌaslen ndibꞌan chiwa chi ndiqꞌasaj kꞌayew, ¡kin jabꞌel roꞌiqꞌij! Ma tixibꞌij iwiꞌ chikiwech ri keriꞌ ngebꞌanun chiwa, nixta tichꞌujrisaj iwiꞌ chunojixik.

¹⁵ Pa iwánima tinimrisaj ruqꞌij ri Cristo, rikꞌin ndibꞌen chare chi ja rijaꞌ rajaw ri ikꞌaslen. Kin jumul kꞌes inoꞌoj chin nditzolij ruwech kitzij ri ngekꞌutun razón chiwa chi achike roma kuqul ikꞌuꞌx iwoyobꞌen ri rusujun kan ri Dios.

¹⁶ Pero atoq nditzolij ruwech kitzij, tibꞌanaꞌ rikꞌin jun iwánima ri nixta jun oyowal ndurayij y rikꞌin yalan teq tzij. Tikꞌuaj jun chꞌajchꞌaj kꞌaslen, chin ma itzel tunaꞌ ri iwánima, chin keriꞌ ri ngewalal chirij ri utzulej kꞌaslen ikꞌuan roma itaqin ri Cristo, xa kiyon ndikikꞌixbꞌisaj qa kiꞌ roma ri tzij ndikibꞌilaꞌ chiwij.

¹⁷ Porque más utz ndiqꞌasaj kꞌayew roma ndibꞌen ri utz, si jariꞌ ri rurayibꞌel ri Dios chi ndiqꞌasaj pa ikꞌaslen, ke chuwech ndiqꞌasaj kꞌayew roma ndibꞌen ri ma utz ta.

¹⁸ Tikꞌuxlaꞌaj chi ri Cristo xe jumbꞌey xkꞌatzin xken chin xutaj ri qamak. Rijaꞌ nixta jun mak rubꞌanun, y xuqꞌasaj kꞌayew qoma roj ri roj aj mak, chin xujeq bꞌey chiqawech chin kꞌo cheꞌel ngojok rikꞌin ri Dios. Ri aj rochꞌulew ru-cuerpo ri Cristo xken, pero ri ru-espíritu kin kꞌes wi.

¹⁹ Y pa ru-espíritu xbꞌa apeꞌ etzꞌapel ri espíritus y xbꞌetzijon chikiwech.

²⁰ Ri espíritus riꞌ, ja ri ma xeniman ta chupan teq ri qꞌij atoq ri Noé ndajin rikꞌin ri nimalej barco. Atoq riꞌ, ri Dios layaj xeroyobꞌej ri wineq chin ta xtzolij kánima rikꞌin, pero xa waqxaqiꞌ ok wineq xkikal kiꞌ, porque xeꞌok chupan ri barco ri xuliꞌej ri yaꞌ.

²¹ Y achel xkibꞌen ri wineq ojer ri xkikal kiꞌ chupan ri yaꞌ, roj wokami ndiqabꞌen bautizar qiꞌ, chin ndiqakꞌut chi xojkolotej yan chuwech ri castigo nduyaꞌ ri Dios. Ri bautismo ma chin ta nduchꞌajchꞌojrisaj ri qa-cuerpo. Ri bautismo ndukꞌut chi ndiqajoꞌ chi jumul utz rubꞌanun ri qánima chuwech ri Dios, y chi rijaꞌ roj rukolon roma ri Jesucristo xkꞌastej pe chikikajal ri animaꞌiꞌ.

²² Ri Jesucristo atoq xbꞌa e chikaj, xbꞌekꞌojeꞌ pa rikiqꞌaꞌ ri Dios y chuxeꞌ rutzij ekꞌo ángeles, ekꞌo chuqaꞌ ri chꞌaqa chik espíritus ri kꞌo uchuqꞌaꞌ pa kiqꞌaꞌ, y ekꞌo chuqaꞌ ri nimalej kuchuqꞌaꞌ.