1 Pedro 2 - Kaqchikel Santo Domingo (Xenacoj)

Ri kꞌakꞌakꞌ rutinamit ri Dios

¹ Romariꞌ, rix tiyaꞌ kan nojel ri itzel teq achike kꞌo pa iwánima chikij chꞌaqa, tiyaꞌ kan nojel ruwech chꞌakatinik, ri kaꞌiꞌ ipalej, ri itzel ndinaꞌ chare roma utz kibꞌanun chꞌaqa chik, y nojel itzel teq tzij ri ndikusaj chin ndiqasaj kiqꞌij chꞌaqa.

² Achel ri chꞌuteq akꞌolaꞌ ri kꞌa tzꞌun kipan tzꞌan ndikirayij ngetzꞌuman, keriꞌ tibꞌanaꞌ rix. Kin tirayij tikanoj rukꞌiyilen ri ikꞌaslen rikꞌin ri qetzij rutzij ri Dios, chin ngixkꞌiy pa ikꞌaslen, hasta kꞌa kixkolotej na e chin jumul,

³ Keriꞌ tibꞌanaꞌ, porque iwetaman chi ri Ajaw kin utz runoꞌoj iwikꞌin.

⁴ Kixjel apu rikꞌin ri Ajaw. Ja rijaꞌ ri kꞌaslik abꞌej, ri pa kiwech ri wineq, ma jun rikꞌaꞌtz chin ta xkusex, pero pa ruwech ri Dios, ri abꞌej riꞌ, kin chaꞌon wi y yalan reqalen.

⁵ Y rix chuqaꞌ rix achel kꞌaslik teq abꞌej, ri ndajin samaj pa iwánima chin ngixok rachoch ri Dios, ri apeꞌ ngixkusex chi loqꞌolej teq sacerdotes. Y keriꞌ rix ukꞌuan roma ri Espíritu Santo ndisuj sipanik ri ndiqaꞌ chuwech ri Dios roma ri Jesucristo.

⁶ Porque ri rutzij ri Dios tzꞌibꞌan kan kereꞌ ndubꞌij: Tiyaꞌ cuenta chare chi pa tinamit Sión riyin niyaꞌ jun nusamajel ri nijunumaj rikꞌin jun abꞌej Ri ndikꞌatzin chin ndok ruchuqꞌaꞌ ruxeꞌ ri jay, Jun abꞌej ri kin chaꞌon wi y yalan nim reqalen. Y ri nditaqin richin rijaꞌ, ma jumbꞌey xtikꞌixbꞌisex, porque kin ndiyoꞌox wi chare ri sujun kan. Keriꞌ tzꞌibꞌan kan.

⁷ Pa iwech rix ri ngixtaqin richin rijaꞌ, ri abꞌej riꞌ yalan reqalen, pero pa kiwech ri ma kitaqin ta, ma jun reqalen, achel ndubꞌij chupan ri rutzij ri Dios tzꞌibꞌan kan: Ri abꞌej ri pa kiwech ri bꞌanuy teq jay ma jun rikꞌaꞌtz chin ta xkikusaj, Ja abꞌej riꞌ, ri xkꞌatzin chin xok ruchuqꞌaꞌ ruxeꞌ ri jay.

⁸ Y chupan ri rutzij ri Dios tzꞌibꞌan kan ndubꞌij chuqaꞌ: Jun abꞌej ri achoq chuwech ndikipajkꞌij kaqen ri wineq, jun nimalej abꞌej ri achoq pariꞌ ngetzaq. Keriꞌ tzꞌibꞌan kan. Ri wineq riꞌ ndikipajkꞌij kaqen chuwech, porque keriꞌ bꞌiꞌin kan chi ndibꞌanatej kikꞌin, porque ma ndikitaqij ta ri utzulej teq tzij chin kolotajik.

⁹ Pero rix, rix jun tinamit chaꞌon roma ri Dios, rix sacerdotes ri ndibꞌen rusamaj ri Dios ri nimalej Rey, rix jun loqꞌolej tinamit y rix loqꞌon roma ri Dios. Keriꞌ rubꞌanun ri Dios chiwa, chin nditzijoj ri nimalej teq achike erubꞌanun rijaꞌ ri xoyon iwichin chin xixrelesaj pe chupan ri qꞌequꞌ y xixruyaꞌ chupan ri nimalej ru-luz rijaꞌ.

¹⁰ Rix jumbꞌey kan, nixta rix rutinamit ri Dios, pero wokami rix rutinamit. Jumbꞌey kan, ri Dios ma rujoyowan ta iwech, pero wokami kin rujoyowan iwech.

Tikꞌuaj jun utzulej kꞌaslen

¹¹ Hermanos, riyin tzꞌan ngixinwojoꞌ. Y roma ma chochꞌulew ta kꞌo ri qetzij iwachoch, y xaxe jubꞌaꞌ ngixkꞌojeꞌ e chuwech ri rochꞌulew, nikꞌutuj kamelal chiwa chi tiqꞌataꞌ iwiꞌ chuwech ri itzel teq achike ndurayij ri i-cuerpo, ri ndikajoꞌ ndikiyaꞌ ri iwánima chuxeꞌ ri kuchuqꞌaꞌ.

¹² Tikꞌuaj jun utzulej kꞌaslen chikikajal ri ma kitaqin ta ri Dios, chin keriꞌ maske ndikibꞌij chiwij chi rix bꞌanuy itzel teq achike, rejeꞌ roma ndikitzꞌet chi rix ndibꞌen ri utz chikitoꞌik ri wineq, kin xtikiyaꞌ ruqꞌij ri Dios chupan ri qꞌij atoq rijaꞌ nduyaꞌ qꞌij chake chi ndikitaqij ri utzulej teq tzij chin kolotajik.

Tinimaj kitzij ri kꞌo uchuqꞌaꞌ pa kiqꞌaꞌ pa ruwiꞌ ri itinamit

¹³ Rix roma itaqin ri Ajaw, ndikꞌatzin ndinimaj kitzij konojel ri kꞌo uchuqꞌaꞌ pa kiqꞌaꞌ pa ruwiꞌ ri itinamit. Tinimaj rutzij ri rey, porque ri rey jariꞌ ri más kꞌo ruqꞌij chikikajal ri kꞌo uchuqꞌaꞌ pa kiqꞌaꞌ chochꞌulew.

¹⁴ Tinimaj kitzij chuqaꞌ ri ngebꞌanun gobernar, porque rejeꞌ yoꞌon uchuqꞌaꞌ pa kiqꞌaꞌ pa kiwiꞌ ri tinamit roma ri rey chin ngekibꞌen castigar ri ngebꞌanun itzel teq achike, y chin chuqaꞌ ndikinimrisaj kibꞌiꞌ ri ngebꞌanun ri utz.

¹⁵ Porque ri rurayibꞌel ri Dios chiwa, ja ri ndibꞌen ri utz, chin keriꞌ ri wineq ri ma pa ruchojmil ta ngenojin y xetal ngekibꞌilaꞌ tzij chiwij, atoq ndikitzꞌet ri utz ngixtajin rikꞌin, ma jun chik achike xtikibꞌij chiwij.

¹⁶ Rix, rix libre chik, pero ma tikusaj ri libertad riꞌ chin ndibꞌen mak. Xa kin pa ruqꞌaꞌ ri Dios tijachaꞌ ri ikꞌaslen y tibꞌanaꞌ ri ndirajoꞌ rijaꞌ.

¹⁷ Tibꞌanaꞌ chi konojel wineq kꞌo keqalen pa iwech, keꞌiwojoꞌ ri hermanos, tinimaj rutzij ri Dios rikꞌin nojel iwánima, y tibꞌanaꞌ chi kꞌo reqalen pa iwech ri rey kꞌo pa ruwiꞌ ri itinamit.

Ri ndikꞌatzin ndikibꞌen ri ekꞌo chuxeꞌ kitzij chꞌaqa chik

¹⁸ Rix samajelaꞌ, chiꞌijununal tinimaj kitzij ri iwajaw chochꞌulew rikꞌin nojel iwánima, y ma xe tinimaj kitzij ri iwajaw ri ngixkajoꞌ y utz kinoꞌoj chiwa, xa kin ndikꞌatzin chuqaꞌ ndinimaj kitzij ri ma utz ta kinoꞌoj chiwa.

¹⁹ Porque si roma ndiwojoꞌ ndibꞌen ri ndirajoꞌ ri Dios ndikachꞌ qꞌaxomal ri maneq roma bꞌanun chiwa, riꞌ kin kꞌo reqalen chuwech ri Dios.

²⁰ Porque, ¿kꞌo kami reqalen ndiwil chuwech ri Dios si roma imak ngixchꞌay y ndikachꞌ? Ma jun. Pero si roma ndibꞌen ri utz ndiqꞌasaj keriꞌ y kin ndikachꞌ, reꞌ kin kꞌo reqalen chuwech ri Dios.

²¹ Porque xixoyox roma ri Dios chin ndiqꞌasaj jubꞌaꞌ kꞌayew roma ri utz ngixtajin rikꞌin, porque ri Cristo chuqaꞌ xuqꞌasaj kꞌayew iwoma, y keriꞌ xuyaꞌ kan ejemplo chiwech chi tiwoqaj ri achel xubꞌen rijaꞌ pa rukꞌaslen.

²² Rijaꞌ ma jun mak xubꞌen, y nixta jun chꞌakatinik xel pa ruchiꞌ.

²³ Atoq xebꞌix mal teq tzij chare, ma xutzolij ta rukꞌexel, y atoq xyoꞌox pa kꞌayew, ma xubꞌij ta chi ndutzolij rukꞌexel. Rijaꞌ xa kin xujech riꞌ pa ruqꞌaꞌ ri Dios ri pa ruchojmil nduqꞌet tzij pa kiwiꞌ ri wineq.

²⁴ Ri Cristo xreqalej ri qamak pa ru-cuerpo cho cruz, chin keriꞌ ngojken chuwech ri qamak y ndiqakꞌuaj jun chojmilej kꞌaslen. Ri Cristo xsokotej chin keriꞌ roj xojkꞌachꞌojrisex.

²⁵ Porque rix jumbꞌey kan, rix achel karneꞌl sachineq bꞌey chikiwech, pero wokami xtzolij pe iwánima rikꞌin ri Cristo ri Yuqꞌunel y Chajinel chin ri iwánima.