1 Juan 4 - Kaqchikel Santo Domingo (Xenacoj)

Kin ngeqꞌalajin ri erichin ri Dios y ri ma erichin ta

¹ Rix ri tzꞌan ngixinwojoꞌ, nibꞌij chiwa chi nabꞌey keꞌitojtobꞌej ri ngebꞌiꞌin chi rikꞌin ri Dios pataneq ri ndikibꞌij, chin nditzꞌet si qetzij ri ndikibꞌij o xa eꞌukꞌuan roma jun espíritu ri ma richin ta ri Dios. Keriꞌ nibꞌij chiwa porque chochꞌulew ebꞌaneq ekꞌiy ri ndikiqꞌabꞌaj kiꞌ chi eru-profetas ri Dios.

² Y jareꞌ ri rubꞌeyal chin ndiwetamaj achike ri ukꞌuan roma ri Espíritu Santo: Ri ndibꞌiꞌin chi ri Jesucristo xuqaqa chochꞌulew y xkꞌojeꞌ ru-cuerpo achel qa-cuerpo roj wineq, qꞌalej chi rikꞌin ri Dios pataneq ri ndubꞌij.

³ Pero si jun ndubꞌij chi ri Jesús ma xuqaqa ta chochꞌulew, nixta xkꞌojeꞌ ru-cuerpo achel qa-cuerpo roj wineq, ri jun riꞌ ma ja ta ri Espíritu Santo ukꞌuayon richin, xa ja ri espíritu chin ri jun ri yakatajneq chirij ri Cristo. Y rix iwakꞌaxan pe chi ri itzel espíritu riꞌ nduqaqa wi, y wokami kꞌo chik chochꞌulew.

⁴ Rix ri kin achel rix walkꞌuaꞌl keriꞌ, rix richin ri Dios, y xixtiker yan pa kiqꞌaꞌ ri kiqꞌabꞌan kiꞌ chi e-profetas, porque ri Espíritu Santo ri kꞌo pa iwánima más kꞌo ruchuqꞌaꞌ ke chuwech ri itzel ri rajawal ri rochꞌulew.

⁵ Ri kiqꞌabꞌan kiꞌ chi e-profetas, xa eꞌaj rochꞌulew y aj rochꞌulew teq nojibꞌel ndikibꞌilaꞌ. Romariꞌ ri wineq erichin ri rochꞌulew ndikitaqij ri ndikibꞌij.

⁶ Jakꞌa roj, roj richin ri Dios, y ri wineq ri ketaman runoꞌoj ri Dios ndikitaqij ri ndiqabꞌij, pero ri wineq ri ma erichin ta ri Dios ma ndikitaqij ta ri ndiqabꞌij. Rikꞌin reꞌ ndiqetamaj achike jun kꞌo ri Espíritu chin ri qetzij pa ránima, y achike jun kꞌo ri espíritu chin chꞌakatinik pa ránima.

Ri ndiqajoꞌ qiꞌ, retal chi xe jun qabꞌanun rikꞌin ri Dios

⁷ Rix ri tzꞌan ngixinwojoꞌ, nibꞌij chiwa: Tiqajoꞌ qiꞌ chiqawech, porque rikꞌin ri Dios pataneq chi ngojojowan. Y konojel ri ngeꞌojowan, kikꞌuan chik ri kꞌaslen nduyaꞌ ri Dios y ketaman runoꞌoj ri Dios.

⁸ Jakꞌa ri ma ndojowan ta, ma retaman ta runoꞌoj ri Dios, porque ri Dios kin richin wi chi ndojowan.

⁹ Y ri Dios xukꞌut chi santienta ngojrajoꞌ, porque xuteq pe ri junayon Rukꞌajol chochꞌulew, chin keriꞌ roma rijaꞌ kꞌo kꞌakꞌakꞌ qakꞌaslen.

¹⁰ Ri rukꞌuꞌx ri ajowabꞌel jareꞌ: Ri Dios xojrajoꞌ nabꞌey, y ma ja ta roj ri xojojowan richin rijaꞌ. Y roma xojrajoꞌ, xuteq pe ri Rukꞌajol chin xujech rukꞌaslen pa kamik pa qakꞌexel, chin xkꞌis royowal ri Dios ri yakatajneq pa qawiꞌ roma ri qamak.

¹¹ Rix ri tzꞌan ngixinwojoꞌ, nibꞌij chiwa: Si ri Dios keriꞌ xubꞌen chin xukꞌut chi ngojrajoꞌ, roj chuqaꞌ ndikꞌatzin ndiqajoꞌ qiꞌ chiqawech.

¹² Ri Dios ma jumbꞌey tzꞌeton ruwech roma jun wineq, pero si ndiqajoꞌ qiꞌ chiqawech, rijaꞌ jumul xe jun rubꞌanun qikꞌin, y keriꞌ qetaman chi tzꞌaqet ngojojowan.

¹³ Qetaman chi jumul xe jun qabꞌanun rikꞌin ri Dios y rijaꞌ jumul xe jun rubꞌanun qikꞌin, roma ruyoꞌon ri Espíritu Santo pa qánima.

¹⁴ Y roj rikꞌin qawech qatzꞌeton ri Rukꞌajol ri Dios y ndiqatzijoj chi ja ri Tataꞌaj Dios taqayon pe chin xuꞌok Kolonel qichin roj wineq.

¹⁵ Xa achike na jun ri ndutaqij chi ja ri Jesús ri Rukꞌajol ri Dios, jumul xe jun rubꞌanun rikꞌin ri Dios, y ri Dios jumul xe jun rubꞌanun rikꞌin rijaꞌ.

¹⁶ Y roj qetaman y ndiqataqij chi ri Dios ngojrajoꞌ. Ri Dios kin richin wi chi ndojowan, y ri jun ri jumul ndojowan, jumul xe jun rubꞌanun rikꞌin ri Dios, y ri Dios jumul xe jun rubꞌanun rikꞌin rijaꞌ.

¹⁷ Y rikꞌin ri jumul xe jun qabꞌanun rikꞌin ri Dios, nditzꞌaqet ri ajowabꞌel pa qánima, y riꞌ ndubꞌen chaqe chi kuqul qakꞌuꞌx chi ma ndiyoꞌox chi ta castigo chaqe chupan ri qꞌij atoq ri Dios nduqꞌet tzij. Kuqul qakꞌuꞌx porque achel ndojowan ri Cristo, keriꞌ chuqaꞌ ngojojowan roj chochꞌulew.

¹⁸ Si ngojojowan achel ndojowan rijaꞌ, maneq roma ndiqaxibꞌij qiꞌ, porque ri tzꞌaqet ajowabꞌel ndirelesaj ri xibꞌriꞌil. Ri wineq ri kꞌa nduxibꞌij riꞌ chi ri Dios nduyaꞌ castigo chare, kꞌajani tzꞌaqet ndojowan.

¹⁹ Roj ngojojowan, porque ri Dios xojrajoꞌ nabꞌey.

²⁰ Si kꞌo jun ri kereꞌ ndubꞌij: Riyin niwojoꞌ ri Dios, ndichajeꞌ, pero xa itzel ndutzꞌet ruwech ri ru-hermano, xa ndireqꞌon. Porque si ma ndirajoꞌ ta ri ru-hermano ri kin ndutzꞌet wi ruwech, ma nditiker ta chuqaꞌ ndirajoꞌ ri Dios, ri ma jumbꞌey rutzꞌeton.

²¹ Y jareꞌ ri mandamiento ri ruyoꞌon kan ri Cristo: Ri ndirajoꞌ ri Dios, tirajoꞌ chuqaꞌ ri ru-hermano.