1 Corintios 9 - Kaqchikel Santo Domingo (Xenacoj)

Jun apóstol rukꞌulun chi ndiyoꞌox ri ndikꞌatzin chare

¹ Rix iwetaman chi riyin libre, chi riyin jun apóstol, y chi nutzꞌeton ruwech ri Jesús ri Qajaw. Y rix ri xe jun ibꞌanun rikꞌin rijaꞌ, rix retal ri samaj nubꞌanun.

² Si chake chꞌaqa ma riyin ta apóstol, chiwa rix riyin apóstol wi. Porque ri etal ri ndikꞌutu chi riyin jun apóstol, ja rix ri xe jun ibꞌanun rikꞌin ri Ajaw ri xitaqij pa iwánima.

³ Y chake ri ndikibꞌij chi ma riyin ta apóstol kereꞌ nibꞌij:

⁴ Roj kin rukꞌulun chi ngojtzuq roma ri samaj ndiqabꞌen pa rubꞌiꞌ ri Ajaw.

⁵ Rukꞌulun chuqaꞌ chi ndiqabꞌen achel ndubꞌen ri Pedro, y ri eruchaqꞌ ri Ajaw, y ri chꞌaqa chik apóstoles. Rejeꞌ chikijununal ndikikꞌuaj kixjayil ri kitaqin chuqaꞌ ri Ajaw apejeꞌ ngebꞌa chin ndekibꞌanaꞌ rusamaj ri Ajaw.

⁶ Romariꞌ nibꞌij chiwa: ¿Pa ruchojmil kami chi xaxe riyin y ri Bernabé ndikꞌatzin ngojsamej rikꞌin qaqꞌaꞌ chin ndiqachꞌek ri ndikꞌatzin chaqe pa qakꞌaslen? Ma pa ruchojmil ta.

⁷ Porque jun soldado pa cuartel ma ruméra ta rijaꞌ ndukusaj chin ndutzuq riꞌ, xa nditzuq chiriꞌ pa cuartel. Keriꞌ chuqaꞌ jun tikoy uva, kin ndukꞌux jubꞌaꞌ ruwech ri uva atoq ndiwachin, y keriꞌ chuqaꞌ jun yuqꞌunel kichin awej, atoq nduyitzꞌ ri ki-leche, kin ndutij jubꞌaꞌ.

⁸ Rix ma tinojij chi ri nibꞌij chiwa xa jun relik aj rochꞌulew noꞌoj. Porque keriꞌ chuqaꞌ ndubꞌij ri ley ri xuyaꞌ ri Dios chare ri Moisés.

⁹ Porque chupan ri ley riꞌ ndubꞌij: Ma tayaꞌ ruwosal ri wakx atoq ndupetzelaꞌ ri trigo chin ndipochꞌotej, chin kꞌo cheꞌel ndukꞌux jubꞌaꞌ. ¿Xe kami chikij wakx keriꞌ rubꞌiꞌin kan ri Dios?

¹⁰ ¿O xubꞌij chuqaꞌ keriꞌ qoma roj? Porque qoma roj tzꞌibꞌan kan chi ri ngetikon y ri ngebꞌanun ri samaj chin ndipochꞌotej ruwech ri tikoꞌ, ndikꞌatzin ndikiyaꞌ pa kánima chi nderilaꞌ qꞌij atoq ndiyoꞌox jubꞌaꞌ ruwech ri tikoꞌ chake.

¹¹ Y si roj qatikon pa iwánima rutzij ri Dios, xa ma nim ta reqalen si ndiqakꞌutuj chiwa chi ngojitoꞌ jubꞌaꞌ rikꞌin ri ndikꞌatzin chaqe chin ndiqaqꞌasaj ri qakꞌaslen.

¹² Porque si chꞌaqa chik rusamajelaꞌ ri Dios kꞌo kitoꞌik iyoꞌon rix, roj más rukꞌulun chi ndiyaꞌ qatoꞌik. Pero roj ma ndiqakꞌutuj ta qatoꞌik chiwa, xa kin ndiqakachꞌ qawech, porque ma kꞌateꞌ roma kꞌo ndiqakꞌutuj, ma xtitaqix ta ri utzulej teq tzij chin kolotajik ri rukꞌamon pe ri Jesucristo.

¹³ Rix iwetaman chi ri samajelaꞌ pa rachoch ri Dios ngetzuq roma ri samaj ndikibꞌen, y ri ngebꞌanun ri samaj chuwech ri altar ndikikꞌen kan jubꞌaꞌ chare ruchꞌakul ri chikap y ri chꞌaqa chik sipanik chin ndikikꞌux.

¹⁴ Keriꞌ chuqaꞌ ri Ajaw rubꞌanun kan mandar chi ri ngetzijon ri utzulej teq tzij chin kolotajik, kin tiyoꞌox chake ri ndikꞌatzin pa kikꞌaslen, roma ri samaj ndikibꞌen.

¹⁵ Pero riyin, ma nukꞌutun ta chiwa ri rukꞌulun chi ndiyoꞌox chuwa, y nitzꞌibꞌaj e reꞌ ma chin ta niwojoꞌ nginiwilij. Porque chuwa riyin, xa más utz ngiken pa rukꞌexel chi nikꞌutuj nutoꞌik chiwa, roma ri rutzijoxik ri rutzij ri Dios ri nibꞌen chiꞌikajal, porque xa ta nikꞌutuj, maneq chik cheꞌel ngikikot chi ma jun nutoꞌik nukꞌutun chiwa.

¹⁶ Riyin ma jun roma xtinyaꞌ nuqꞌij roma nitzijoj ri utzulej teq tzij chin kolotajik. Porque ri Dios ruchilabꞌen chuwa chin nibꞌen, y juyo nuwech, si ma xtintzijoj ta.

¹⁷ Si ri samaj ngitajin rikꞌin ja ta riyin xiyoꞌon pa wánima chin nibꞌen, kꞌo ta cheꞌel niwoyobꞌej chi ndiyoꞌox rajel-rukꞌexel chuwa, pero ma yin ta yoyon pa wánima chin nibꞌen. Xa kin ja ri Dios chilabꞌeyon pe chuwa ri samaj ngitajin rikꞌin.

¹⁸ Romariꞌ, ¿achike kꞌa rajel-rukꞌexel ndiyoꞌox chuwa? Ri rajel-rukꞌexel ndiyoꞌox chuwa, ja ri ngikikot nitzijoj re utzulej teq tzij reꞌ, y ma nikꞌutuj ta ri rukꞌulun chi ndiyoꞌox chuwa.

¹⁹ Y roma nixta jun achoq chin nikꞌutuj nutoꞌik, nixta jun achoq ikꞌin yin ximil, y riꞌ rubꞌanun chuwa chi kꞌo cheꞌel yin okuneq samajel kichin konojel, chin keriꞌ más ekꞌiy ndikitaqij ri Cristo.

²⁰ Romariꞌ atoq yinkꞌo chikikajal ri israelitas, nibꞌen chare ri nukꞌaslen achel rukꞌaslen jun israelita keriꞌ, chin keriꞌ kolopeꞌ xtikitaqij ri Jesús. Kikꞌin ri ekꞌo chuxeꞌ ri ley xyoꞌox chare ri Moisés, nibꞌen chare ri nukꞌaslen achel ta yinkꞌo chuxeꞌ ri ley riꞌ, maske ma yinkꞌo ta chik chuxeꞌ. Pero keriꞌ nibꞌen, chin keriꞌ kolopeꞌ xtikitaqij ri Jesús.

²¹ Jakꞌa atoq yinkꞌo chikikajal ri ma ekꞌo ta chuxeꞌ ri ley xyoꞌox chare ri Moisés, nibꞌen chare ri nukꞌaslen achel ma wetaman ta rubꞌeyal ri ley riꞌ, chin keriꞌ kolopeꞌ xtikitaqij ri Jesús. Pero riꞌ ma ndubꞌij ta tzij chi riyin ma ninimaj ta ri ley ruyoꞌon kan ri Dios, porque riyin kin nibꞌen ri ndubꞌij ri ley ruyoꞌon kan ri Cristo.

²² Chikikajal ri kꞌajani ok ruchuqꞌaꞌ kánima rikꞌin ri Ajaw, ma nibꞌen ta ri pa kiwech rejeꞌ xa xajan, chin keriꞌ ma ndikil ta jun roma ndikiyaꞌ kan rijaꞌ. Y keriꞌ nubꞌanun pe chare ri nukꞌaslen chikikajal konojel, chin keriꞌ kolopeꞌ ekꞌo jujun chikikajal xtikitaqij ri Jesús.

²³ Y nojel reꞌ nibꞌen, porque niwojoꞌ chi ri utzulej teq tzij chin kolotajik ndibꞌa más rutzijol, chin keriꞌ junan kikꞌin ekꞌiy ndiqil ri favor nduyaꞌ ri Dios ri ndukꞌen pe ri utzulej tzij riꞌ.

²⁴ Rix iwetaman chi pa jun maratón, konojel ndikitij kiqꞌij chin ndikichꞌek ri premio ndiyoꞌox, pero xaxe jun ri ndichꞌakon richin. Keriꞌ kꞌa chuqaꞌ rix, titijaꞌ iqꞌij chi pa ruchojmil tikꞌuaj ri ikꞌaslen, chin keriꞌ ndichꞌek ri nduyaꞌ ri Dios chiwa chikaj.

²⁵ Konojel ri ndikitijlaꞌ kanin pa jun etzꞌanin, ndikijekꞌ kiꞌ chuwech ri ma utz ta ndubꞌen chare ri ki-cuerpo. Keriꞌ ndikibꞌen chin ndikichꞌek jun premio ri xa ndikꞌis, jakꞌa roj ndiqatij qaqꞌij chi ndiqachꞌek jun nimalej rajel-rukꞌexel ri ma ndikꞌis ta.

²⁶ Roma kꞌa riꞌ, riyin ma nibꞌen ta achel jun ri kꞌo pa jun maratón ri ma retaman ta apeꞌ kꞌo ri meta, pa rukꞌexel riꞌ, kin nuchꞌikon nuwech chirij ri meta ruyoꞌon ri Dios chuwa. Y ma nibꞌen ta achel jun ri xe pa kaqiqꞌ ndeqꞌax wi ruqꞌaꞌ atoq ndikichꞌey kiꞌ rikꞌin jun chik.

²⁷ Porque riyin niyaꞌ pa kꞌayew ri nu-cuerpo y nibꞌen chare chi tunimaj nutzij, porque ma kꞌateꞌ xa xkinelesex kan pa maratón, maske enutijon ekꞌiy chin ndikil ri rajel-rukꞌexel nduyaꞌ ri Dios.