1 Corintios 8 - Kaqchikel Santo Domingo (Xenacoj)

Ri Pablo kꞌo ndubꞌij pa ruwiꞌ rukꞌuxik ri tiꞌij sujun chikiwech tiox

¹ Wokami niwojoꞌ ngichꞌaꞌa pa ruwiꞌ ri ikꞌutun pe razón chuwa si utz ndikꞌuxeꞌ o naq ri tiꞌij sujun chikiwech tiox. Kin qetzij chi qonojel kꞌo qetaman, pero ri achike qetaman kꞌiy mul ndubꞌen chaqe chi nim ndiqanaꞌ chare. Jakꞌa atoq ngeqajoꞌ ri erichin ri rutinamit ri Dios, riꞌ ndukꞌen pe kꞌiyilen chaqe roj qonojel.

² Y si jun nim ndunaꞌ chare roma ri retaman, ndubꞌij tzij chi kꞌajani tiretamaj utz-utz ri ndikꞌatzin chi ndiretamaj.

³ Pero si jun ndojowan, ri jun riꞌ etaman ruwech roma ri Dios.

⁴ Roma kꞌa riꞌ, pa ruwiꞌ rukꞌuxik ri sujun chikiwech tiox, roj qetaman chi jun tiox maneq rukꞌaslen, y kin qetaman chi xe jun Dios kꞌo y maneq chik jun.

⁵ Porque maske chikaj y chochꞌulew ekꞌo ri ndibꞌix dios chake, y kin qetzij wi chi ekꞌiy dios ekꞌo, y ekꞌiy ajaw chuqaꞌ,

⁶ pero chaqe roj, xa kin xe jun Dios kꞌo, y riꞌ ja ri Tataꞌaj Dios. Rikꞌin rijaꞌ pataneq wi nojel, y roj richin rijaꞌ. Y xe jun Ajaw kꞌo chuqaꞌ, y riꞌ ja ri Jesucristo, ri bꞌanayon nojel ri kꞌo, y roma rijaꞌ kꞌo qakꞌaslen.

Ma tiqabꞌen chare jun hermano chi ndiril achike roma nduyaꞌ kan ri Dios

⁷ Pero ma konojel ta okuneq pa kánima chi jun tiox ma jun nditiker ndubꞌen, porque jumbꞌey kan ekꞌo jujun xkiyalaꞌ kiqꞌij tiox, y wokami atoq ndikikꞌux ri tiꞌij sujun chikiwech ri tiox riꞌ, ndikinaꞌ chi kꞌa keriꞌ na ndikiyalaꞌ kiqꞌij ri tiox. Y roma kꞌajani ok ruchuqꞌaꞌ kánima rikꞌin ri Dios, ndikinaꞌ chi xa mak ngetajin rikꞌin.

⁸ Kin qetzij chi ri tiꞌij sujun chikiwech ri tiox, o xa achike na ri ndiqakꞌux, ma ndubꞌen ta chaqe chi más ndojowex qawech roma ri Dios. Si ndiqakꞌux o naq, ma ndubꞌen ta chaqe chi ma utz ta ngojtzꞌat roma ri Dios chuqaꞌ.

⁹ Pero titzꞌetaꞌ chi ri achike ndikꞌux ma tubꞌen chi ndikil jun achike roma ndikiyaꞌ kan ri Dios ri hermanos ri kꞌajani ok ruchuqꞌaꞌ kánima rikꞌin rijaꞌ.

¹⁰ Porque rat ri awetaman chi nojel yoꞌon qꞌij chawa chin ndakꞌux, y xa ngarutzꞌet jun hermano ri kꞌajani ok ruchuqꞌaꞌ ránima rikꞌin ri Dios chi ngawaꞌ pa kachoch tiox, kin ndabꞌen chare ri hermano riꞌ chi ndurayij ndukꞌux chuqaꞌ ri tiꞌij sujun chikiwech ri tiox riꞌ, maske pa ruwech rijaꞌ kꞌa mak ri ndubꞌen.

¹¹ Y keriꞌ rat roma awetaman chi ma jun ndubꞌen ndakꞌux ri tiꞌij sujun chikiwech tiox, ndabꞌen chare ri hermano ri kꞌajani ok ruchuqꞌaꞌ ránima chi nduyaꞌ kan ri Dios, jun hermano ri achoq roma xken ri Cristo.

¹² Y atoq jun mak keriꞌ ndabꞌen chake ri hermanos, xa ndisokotej kánima ri kꞌajani ok kuchuqꞌaꞌ rikꞌin ri Dios, y keriꞌ, rat kin chare ri Cristo ndabꞌen mak.

¹³ Roma kꞌa riꞌ, si riyin roma nikꞌux tiꞌij sujun chikiwech tiox nibꞌen chare jun hermano chi ndiril jun achike roma nduyaꞌ kan ri Dios, xa más utz chi ma jumbꞌey chik nikꞌux tiꞌij sujun chikiwech tiox.