1 Corintios 14 - Kaqchikel Santo Domingo (Xenacoj)

Ri loqꞌolej teq sipanik nduyaꞌ ri Espíritu Santo ngekꞌatzin chin ngekꞌiy ri hermanos pa kikꞌaslen chuwech ri Dios

¹ Nibꞌij kꞌa chiwa: Titijaꞌ iqꞌij kixojowan rikꞌin nojel iwánima, y santienta tiwojoꞌ chi ndiyoꞌox chiwa ri jalajaj loqꞌolej sipanik ri nduyaꞌ ri Espíritu Santo, pero más tiwojoꞌ chi ndiyoꞌox chiwa ri loqꞌolej sipanik ri ndibꞌanun chiwa chi ngixtiker ndiqꞌalajrisaj ri ndubꞌij pe ri Dios pa iwánima.

² Porque atoq kimolon kiꞌ ri eralkꞌuaꞌl ri Dios, si jun ndichꞌaꞌa pa jun chik chꞌabꞌel ri ma rutijon ta riꞌ rikꞌin, ma chake ta ri kimolon kiꞌ ndichꞌaꞌa wi, xa kin chare ri Dios. Keriꞌ nibꞌij chiwa, porque nixta jun chikikajal ri kimolon kiꞌ chiriꞌ xtukꞌoxomaj ri ndubꞌij, porque ndichꞌaꞌa tzij ri ma ngekꞌoxomex ta.

³ Jakꞌa ri ndiqꞌalajrisan ri ndubꞌij pe ri Dios pa ránima, chake ri kimolon kiꞌ ndichꞌaꞌa wi, chin ngekꞌiy pa kikꞌaslen chuwech ri Dios, chin nduyaꞌ chuqaꞌ ruchuqꞌaꞌ kánima y chin chuqaꞌ ngerubꞌochiꞌij pa rubꞌey ri Dios.

⁴ Ri ndichꞌaꞌa pa jun chik chꞌabꞌel ri ma rutijon ta riꞌ rikꞌin, ruyon rijaꞌ ndikꞌiy pa rukꞌaslen chuwech ri Dios. Pero ri ndiqꞌalajrisan ri ndubꞌij pe ri Dios pa ránima, ndubꞌen chake konojel ri kimolon kiꞌ chi ngekꞌiy pa kikꞌaslen chuwech ri Dios.

⁵ Riyin niwojoꞌ chi rix iwonojel ndiyoꞌox ta chiwa chi ngixtiker ngixchꞌaꞌa pa jalajaj teq chꞌabꞌel ri ma itijon ta iwiꞌ rikꞌin, pero más niwojoꞌ chi ndiyoꞌox ta chiwa rix iwonojel chi ngixtiker ndiqꞌalajrisaj ri ndubꞌij pe ri Dios pa iwánima. Porque ri loqꞌolej sipanik chin ndaqꞌalajrisaj ri ndubꞌij pe ri Dios pa awánima, más kꞌo reqalen ke chuwech ri loqꞌolej sipanik ri ndubꞌen chawa chi ngatiker ngachꞌaꞌa pa jun chik chꞌabꞌel ri ma atijon ta awiꞌ rikꞌin. Pero si ri ngechꞌaꞌa pa jalajaj teq chꞌabꞌel ndiqꞌalajrisex ri ndikibꞌij, riꞌ chuqaꞌ ndubꞌen chake ri kimolon kiꞌ chi ngekꞌiy pa kikꞌaslen chuwech ri Dios.

⁶ Wokami hermanos, si riyin ngibꞌa apeꞌ rixkꞌo y ngichꞌaꞌa chiwa pa jun chꞌabꞌel ri ma nutijon ta wiꞌ rikꞌin, ma jun ndikꞌatzin chiwa ri ngixbꞌentzꞌetaꞌ, porque ma ndikꞌoxomaj ta ri nebꞌij chiwa. Pero si pa ichꞌabꞌel niyaꞌ kan rubꞌixik ri ruqꞌalajrisan ri Dios chinuwech, o ngichꞌaꞌa jun nimalej etamabꞌel pataneq rikꞌin ri Dios, o niqꞌalajrisaj kan ri ndubꞌij pe ri Dios pa wánima, o niyaꞌ kan jun tijonik pa ruwiꞌ ri rutzij ri Dios, si keriꞌ nibꞌen, kin kꞌo ndikꞌatzin wi ri ngixbꞌentzꞌetaꞌ.

⁷ Niyaꞌ jun ejemplo chiwa: Atoq ngeqꞌojomex ri qꞌojon ri maneq kikꞌaslen achel ri xul y ri arpa, si ma pa rubꞌeyal ta ngeqꞌojomex, ma qꞌalej ta achike bꞌix ndiqꞌojomex.

⁸ Y si ma ndiqꞌojomex ta pa rubꞌeyal ri trompeta chikoyoxik soldados chin ngebꞌa pa guerra, nixta jun soldado ndunabꞌaꞌ riꞌ chin ndibꞌa.

⁹ Keriꞌ chuqaꞌ ndibꞌanatej chiꞌikajal rix, si ma ngixchꞌaꞌa ta rikꞌin tzij ri ngekꞌoxomex. Nixta jun xtikꞌoxoman ri ndibꞌij, xa achel ta pa kaqiqꞌ ngixchꞌaꞌa wi.

¹⁰ Qetzij chi chochꞌulew santienta ruwech chꞌabꞌel ekꞌo, y nojel re chꞌabꞌel reꞌ kꞌo rukꞌoxon.

¹¹ Y si riyin ma nikꞌoxomaj ta ri tzij ndubꞌij jun chik wineq, qꞌalej chinuwech chi rijaꞌ ma nuwinaqul ta, y qꞌalej chuwech rijaꞌ chi ma yin ta ruwinaqul.

¹² Keriꞌ chuqaꞌ ndibꞌanatej iwikꞌin rix atoq ma ndikꞌoxomaj ta ri ndubꞌij jun pa jun chik chꞌabꞌel. Romariꞌ, kꞌo kaꞌiꞌ achike niwojoꞌ nibꞌij chiwa: Nabꞌey, rix ri ndirayij chi ndiyoꞌox chiwa ri loqꞌolej teq sipanik ri nduyaꞌ ri Espíritu Santo, tirayij chi ndiyoꞌox chiwa ri loqꞌolej teq sipanik ri ndubꞌen chake ri eralkꞌuaꞌl ri Dios chi ngekꞌiy pa kikꞌaslen chuwech rijaꞌ.

¹³ Rukan, ri yoꞌon ri loqꞌolej sipanik chare chin nditiker ndichꞌaꞌa pa jun chik chꞌabꞌel ri ma rutijon ta riꞌ rikꞌin, tukꞌutuj pa oración chi ndiyoꞌox chare ri loqꞌolej sipanik chin nditiker nduqꞌalajrisaj ri ndubꞌij chupan ri chꞌabꞌel riꞌ.

¹⁴ Porque si riyin nibꞌen orar pa jun chik chꞌabꞌel ri ma nutijon ta wiꞌ rikꞌin, ri nu-espíritu ndichꞌaꞌa rikꞌin ri Dios, pero nixta jun nikꞌoxomaj chare ri nibꞌij.

¹⁵ Romariꞌ, ri más utz chi nibꞌen, jareꞌ: Nibꞌen orar rikꞌin ri chꞌabꞌel ri ma nutijon ta wiꞌ rikꞌin, ri nduyaꞌ ri Espíritu, y nibꞌen chuqaꞌ orar rikꞌin ri chꞌabꞌel ri nikꞌoxomaj. Ngibꞌixan rikꞌin ri chꞌabꞌel ri ma nutijon ta wiꞌ rikꞌin y ngibꞌixan chuqaꞌ rikꞌin ri chꞌabꞌel ri nikꞌoxomaj.

¹⁶ Porque si rat ndayaꞌ ruqꞌij ri Dios xe rikꞌin ri chꞌabꞌel ri ma atijon ta awiꞌ rikꞌin, y si kꞌo jun ngarakꞌaxaj y ma ndukꞌoxomaj ta ri ndabꞌij, rijaꞌ ma nditiker ta ndimatioxin chare ri Dios junan awikꞌin, roma ma xukꞌoxomaj ta ri xabꞌij.

¹⁷ Qetzij wi chi ri matioxinik ndayaꞌ chare ri Dios pa jun chik chꞌabꞌel ri ma atijon ta awiꞌ rikꞌin, kin utz, pero ma ndubꞌen ta chare ri ndakꞌaxan awichin chi ndikꞌiy pa rukꞌaslen chuwech ri Dios.

¹⁸ Riyin nimatioxij chare ri Dios chi ri Espíritu Santo rubꞌanun chuwa chi más ngichꞌaꞌa pa teq chꞌabꞌel ri ma nutijon ta wiꞌ rikꞌin, ke chiwech iwonojel rix.

¹⁹ Pero atoq yinkꞌo chikikajal ri eralkꞌuaꞌl ri Dios atoq kimolon kiꞌ, más niwojoꞌ nikusaj jun woꞌoꞌ tzij ri ndikikꞌoxomaj chin ngentijoj, ke chuwech ngenkusaj 10,000 tzij pa jun chik chꞌabꞌel ri ma ndikikꞌoxomaj ta.

²⁰ Hermanos, pa kiwiꞌ ri loqꞌolej sipanik nduyaꞌ ri Espíritu, ma kixnojin achel ngenojin ri chꞌuteq akꞌolaꞌ, roma rejeꞌ kꞌajani tzꞌaqet ngenojin, xa kixnojin pa ruchojmil. Rix ndikꞌatzin ngixok achel chꞌuteq akꞌolaꞌ ri ma ndikiyek ta itzel teq achike pa kánima chikij chꞌaqa chik.

²¹ Chupan ri rutzij ri Dios tzꞌibꞌan kan ndubꞌij: Pa chꞌaqa chik chꞌabꞌel y pa kichiꞌ wineq aj jukꞌan chik apeꞌ ngichꞌaꞌa chare ri nutinamit, pero nixta keriꞌ ndikitaqij ri nibꞌij chake. Keriꞌ ndubꞌij ri Ajaw.

²² Roma kꞌa riꞌ, ri ngachꞌaꞌa pa jun chik chꞌabꞌel ri ma atijon ta awiꞌ rikꞌin, kin jun etal chake ri ma kitaqin ta ri Dios y ma chake ta ri kitaqin ri Dios. Pero ri ndaqꞌalajrisaj ri ndubꞌij pe ri Dios pa awánima, kin jun etal chake ri kitaqin chik ri Dios y ma chake ta ri ma kitaqin ta.

²³ Y keriꞌ kꞌa, si rix ri rix ralkꞌuaꞌl ri Dios imolon iwiꞌ jun apeꞌ, y rix iwonojel ngixchꞌaꞌa pa teq chꞌabꞌel ri ma itijon ta iwiꞌ rikꞌin, y ja atoq riꞌ ngebꞌeqaqa chiriꞌ wineq ri ma ketaman ta rubꞌeyal ri ndibꞌanatej iwikꞌin o wineq ri ma kitaqin ta ri Ajaw, rejeꞌ xa xtikibꞌij chi rix xa rix chꞌujulej teq wineq.

²⁴ Pero atoq imolon iwiꞌ, si rix iwonojel ndiqꞌalajrisaj ri ndubꞌij pe ri Dios pa iwánima, y ndeqaqa chiriꞌ jun ri ma retaman ta rubꞌeyal ri ndibꞌanatej iwikꞌin o jun ri ma rutaqin ta ri Ajaw, ri jun riꞌ kin xtunaꞌ qa riꞌ chi aj mak chuwech ri Dios, roma ri ndiqꞌalajrisaj rix.

²⁵ Y nojel ri rewan riꞌ pa ránima rijaꞌ, ndeqꞌalajin pe chuwech, y keriꞌ ndixukeꞌ, nduqasaj rujolon chuwech ri Dios y nduyaꞌ ruqꞌij y ndubꞌij chi qetzij wi chi ri Dios kꞌo chiꞌikajal.

Tijonik pa ruwiꞌ kikusaxik jujun loqꞌolej sipanik ri nduyaꞌ ri Espíritu Santo

²⁶ Pa ruwiꞌ ri nubꞌiꞌin pe, ndikꞌatzin ndibꞌen kereꞌ: Atoq ndimal iwiꞌ pa rubꞌiꞌ ri Ajaw, ri kꞌo bꞌix pa ránima, tibꞌixan; ri kꞌo tijonik yoꞌon chare, titijon pa ruwiꞌ ri rutzij ri Dios; ri kꞌo ruqꞌalajrisan ri Dios pa ránima chin ndubꞌij, tubꞌij pe; y ri ngechꞌaꞌa pa jalajaj teq chꞌabꞌel ri ma kitijon ta kiꞌ rikꞌin, y ri ngeqꞌalajrisan ri ndibꞌix chupan ri chꞌabꞌel riꞌ, kechꞌaꞌa. Pero nojel riꞌ, tibꞌanatej chin ngekꞌiy pa kikꞌaslen chuwech ri Dios ri kimolon kiꞌ pa rubꞌiꞌ.

²⁷ Si ekꞌo ngechꞌaꞌa pa jun chik chꞌabꞌel ri ma kitijon ta kiꞌ rikꞌin, xe ekaꞌiꞌ o eꞌoxiꞌ ri kechꞌaꞌa, y tikoyobꞌej chi nditaneꞌ qa ri jun, chin ndichꞌaꞌa chik jun, y tikꞌojeꞌ chuqaꞌ jun ri ndiqꞌalajrisan ri ndikibꞌilaꞌ rejeꞌ.

²⁸ Pero si chikikajal ri kimolon kiꞌ pa rubꞌiꞌ ri Dios nixta jun ndiqꞌalajrisan ri ndibꞌix pa jun chik chꞌabꞌel, ma kechꞌaꞌa ri ngechꞌaꞌa pa jun chik chꞌabꞌel ri ma kitijon ta kiꞌ rikꞌin, xaxe pa kánima kechꞌaꞌa chare ri Dios.

²⁹ Y keriꞌ chuqaꞌ, si ekꞌo ngeqꞌalajrisan ri ndubꞌij pe ri Dios pa kánima, xe ekaꞌiꞌ o eꞌoxiꞌ ri kechꞌaꞌa, y konojel ri kimolon kiꞌ pa rubꞌiꞌ ri Dios tikitzꞌetaꞌ utz-utz si rikꞌin ri Dios pataneq o naq ri ngetajin chubꞌixik.

³⁰ Y si kꞌo jun chiꞌikajal ndajin chubꞌixik ri nduqꞌalajrisaj pe ri Dios pa ránima, y ja atoq riꞌ jun chik ri tzꞌuyul chiriꞌ, kꞌo ndiqꞌalajrisex pe pa ránima roma ri Dios, ri nabꞌey titzꞌuyeꞌ y tuyaꞌ qꞌij chare ri jun chik hermano chi ndichꞌaꞌa.

³¹ Y keriꞌ chi jujun chi jujun kꞌo cheꞌel ndiqꞌalajrisaj ri ndubꞌij pe ri Dios pa iwánima, chin keriꞌ rix iwonojel kꞌo ndiwetamaj y ndibꞌochiꞌix chuqaꞌ iwánima pa rubꞌey ri Dios.

³² Porque ri ngeqꞌalajrisan ri ndubꞌij pe ri Dios pa kánima, ndikꞌatzin chi ndikiqꞌet kiꞌ chin ma ngechꞌaꞌa atoq jun chik ndichꞌaꞌa.

³³ Keriꞌ nibꞌij chiwa, porque ri qa-Dios, ma jun achike ndubꞌen ri ma pa rubꞌeyal ta, rijaꞌ jun Dios ri ndiyoꞌon uxlanen chiqakajal roj ri qataqin. Nibꞌij chiwa, chi rix ndikꞌatzin ndibꞌen chuqaꞌ achel ndikibꞌen ri hermanos ri ndikimal kiꞌ pa rubꞌiꞌ ri Ajaw pa chꞌaqa chik tinamit:

³⁴ Atoq kimolon kiꞌ ri eralkꞌuaꞌl ri Dios, ri ixoqiꞌ ma kechꞌaꞌa apu, porque ma yoꞌon ta qꞌij chi keriꞌ ndikibꞌen, xa kin keniman achel ndubꞌij ri ley xyoꞌox chare ri Moisés.

³⁵ Si ri ixaq kꞌo ndirajoꞌ ndiretamaj, tukꞌutuj razón chare ri rachijil atoq ekꞌo chikachoch. Porque ma utz ta chi jun ixaq ndichꞌaꞌa apu chikikajal ri ndikimal kiꞌ pa rubꞌiꞌ ri Ajaw.

³⁶ Keriꞌ nibꞌij chiwa, porque ma iwikꞌin ta rix xtzꞌukutej e rutzijoxik ri rutzij ri Dios, nixta xe chiwa rix tzijon kan.

³⁷ Si kꞌo jun ndunaꞌ chi ri Dios rusipan chare chi nduqꞌalajrisaj ri ndubꞌij pe ri Dios pa ránima, y ndunaꞌ chi ukꞌuan roma ri Espíritu Santo chubꞌixik, tuyaꞌ pa cuenta chi re nitzꞌibꞌaj e chiwa, jun mandamiento chin ri Ajaw.

³⁸ Y si kꞌo jun ma ndirajoꞌ ta nduyaꞌ pa cuenta ri mandamiento ruyoꞌon kan ri Ajaw, rijaꞌ chuqaꞌ ma ndiyoꞌox ta pa cuenta roma ri Ajaw.

³⁹ Romariꞌ hermanos, santienta tirayij chi ndiyoꞌox chiwa ri loqꞌolej sipanik chin ndiqꞌalajrisaj ri ndubꞌij pe ri Dios pa iwánima, y ma keꞌiqꞌet ri ngechꞌaꞌa pa jun chik chꞌabꞌel ri ma kitijon ta kiꞌ rikꞌin;

⁴⁰ pero atoq imolon iwiꞌ pa rubꞌiꞌ ri Ajaw, tibꞌanaꞌ nojel reꞌ pa rubꞌeyal y pa ruchojmil.