1 Corintios 10 - Kaqchikel Santo Domingo (Xenacoj)

Ri xkikꞌulwachij ri israelitas kꞌo ndukꞌut chiqawech wokami

¹ Hermanos, riyin niwojoꞌ chi ndikꞌuxlaꞌaj chi konojel ri ojer teq qatit-qamamaꞌ roj israelitas, xukꞌuꞌex kibꞌey roma ri nube ri xuyaꞌ ri Dios pa kiwiꞌ, y ri Dios chuqaꞌ xubꞌen chi xjaqatej ri mar keq chikiwech, chin xeꞌeqꞌax chupan chikaqen.

² Atoq konojel rejeꞌ xekꞌojeꞌ chuxeꞌ ri nube ri xukꞌuan kibꞌey y xeꞌeqꞌax chupan ri mar, kin achel ta pa rubꞌiꞌ ri Moisés xebꞌan bautizar keriꞌ, porque xkijech kiꞌ chin ndikinimaj ri ndubꞌij rijaꞌ chake.

³ Konojel chuqaꞌ rejeꞌ xkikꞌux ri maná ri xtaq pe chikaj roma ri Dios.

⁴ Konojel chuqaꞌ xkitij ri yaꞌ ri xuyaꞌ ri Dios chake, roma xkitij ri yaꞌ xel pe chupan ri abꞌej y ri abꞌej riꞌ, jun etal chi ri Cristo bꞌaneq chikij.

⁵ Pero ma rikꞌin ta keriꞌ xubꞌen chake, jubꞌama konojel ma utz ta xkibꞌen, romariꞌ ma xeqaꞌ ta chuwech ri Dios. Keriꞌ ndiqꞌalajin, porque xeken y xepokꞌeꞌ kan ri ki-cuerpos pa chaqiꞌj y tzꞌiran ulew.

⁶ Y nojel ri xbꞌanatej kikꞌin rejeꞌ, okuneq ejemplo chaqe chin ma tibꞌa qánima chirij ri itzel teq rayinik, achel xkibꞌen rejeꞌ.

⁷ Ma tiyaꞌ kiqꞌij tiox, achel xkibꞌen ekꞌiy chikikajal rejeꞌ, achel tzꞌibꞌan kan chupan ri rutzij ri Dios ri kereꞌ ndubꞌij: Ri tinamit xetzꞌuyeꞌ chin xewaꞌ y xkitij yaꞌ, y atoq xekolaj, xeyakatej y xkibꞌen itzel teq etzꞌanin chikiwech. Keriꞌ tzꞌibꞌan kan.

⁸ Ma tiqabꞌen achel xkibꞌen ekꞌiy chikikajal rejeꞌ, xkikꞌamalaꞌ qa kiꞌ chin xkibꞌen mak xa achoq na ikꞌin, y romariꞌ 23,000 xeken xe pa jun qꞌij.

⁹ Ma tiqayek chuqaꞌ royowal ri Ajaw pa qawiꞌ, achel xkibꞌen ekꞌiy chikikajal rejeꞌ y xeken roma xetiꞌox koma kumetz.

¹⁰ Y ma kixchꞌaꞌa chirij ri Dios, achel xkibꞌen ekꞌiy chikikajal rejeꞌ, y romariꞌ xeken pa ruqꞌaꞌ ri kamisanel ángel ri xtaq pe roma ri Dios.

¹¹ Nojel re xkikꞌulwachij rejeꞌ ojer kan, xtzꞌibꞌex kan chupan ri rutzij ri Dios chin ndiqetamaj roj ri rojkꞌo chupan ri rukꞌisibꞌel teq tiempos chi ma tiqabꞌen achel xkibꞌen rejeꞌ.

¹² Romariꞌ, ri pa rutzij chi kꞌo ruchuqꞌaꞌ ránima rikꞌin ri Ajaw, tuchajij ri rukꞌaslen chin ma nditzaq pa mak.

¹³ Nikꞌuxlaꞌaj keriꞌ chiwa, porque atoq ngixtojtobꞌex, ma tibꞌij chi xe rix ndiqꞌasaj keriꞌ, porque keriꞌ chuqaꞌ ndikiqꞌasaj konojel wineq. Pero ri Dios ri ma ndujel ta ruwech rutzij, kin ndubꞌen wi ri rubꞌiꞌin, romariꞌ ma nduyaꞌ ta qꞌij chi ndipuꞌun más ruchuqꞌaꞌ ri kꞌayew ndiqꞌasaj ke chuwech ri janipeꞌ ngixtiker ndikachꞌ, y atoq nduqaqa ri kꞌayew, rijaꞌ ndukꞌut ri bꞌey chiwech chin ngixel chuwech.

Tiqabꞌanaꞌ cuenta qiꞌ chuwech ri ndisujeꞌ chake ri itzel teq espíritu

¹⁴ Romariꞌ, hermanos, riyin ri tzꞌan ngixinwojoꞌ, nibꞌij chiwa chi tibꞌanaꞌ chi ma jun i-cuenta chare ruyaꞌik kiqꞌij tiox.

¹⁵ Ngichꞌaꞌa chiwa achel ngichꞌaꞌa chake wineq ri ketaman ngenojin utz. Tinukuꞌ utz-utz ri ngitajin chubꞌixik chiwa.

¹⁶ Chupan ri waꞌin kꞌuxlabꞌel rukamik ri Ajaw, atoq ndiqatij ri vino chin matioxinik chare ri Dios, ri rutijik ri vino riꞌ ndukꞌuxlaꞌaj chaqe chi xe jun qabꞌanun rikꞌin ri Cristo roma ri rukikꞌel ri xbꞌiyin cho cruz qoma. Y atoq ndiqaper ri kaxlan wey chin junan ndiqakꞌux, ri rukꞌuxik ri kaxlan wey riꞌ ndukꞌuxlaꞌaj chaqe chi xe jun qabꞌanun chiqawech roj ri roj ru-cuerpo ri Cristo.

¹⁷ Y roma xaxe jun ri kaxlan wey kꞌuxlabꞌel rukamik ri Ajaw ri ndiqaper y ndiqakꞌux, riꞌ ndukꞌut chiqawech chi roj ri roj santienta, xe jun cuerpo qabꞌanun, roma qonojel ndiqakꞌux jubꞌaꞌ chare ri jun kaxlan wey riꞌ.

¹⁸ Titzꞌetaꞌ ri ndikibꞌen ri israelitas. Rejeꞌ atoq ndikisuj awej pariꞌ ri altar chirachoch ri Dios, ndikimal kiꞌ kikꞌin ri sacerdotes chin ndikikꞌux jubꞌaꞌ ruchꞌakul ri awej kamisan. Y atoq ndikikꞌux ri tiꞌij riꞌ, xe jun kánima kibꞌanun konojel chin ndikiyaꞌ ruqꞌij ri Dios.

¹⁹ Rikꞌin ri keriꞌ nibꞌij, ma ndubꞌij ta tzij chi kꞌo reqalen ri achike ndisujeꞌ chikiwech tiox, nixta ndubꞌij tzij chi jun tiox kꞌo chuqaꞌ reqalen.

²⁰ Ri niwojoꞌ nibꞌij jareꞌ: Ri achike ngesuj chikiwech tiox, xa chake itzel teq espíritu ngesuj, y ma chare ta ri Dios. Y riyin ma niwojoꞌ ta chi rix ndikꞌux ri achike ngesuj chikiwech tiox, porque riꞌ ndubꞌij tzij chi xe jun ndibꞌen kikꞌin ri itzel teq espíritu.

²¹ Rix ri nditij ri kꞌo chupan ri copa kꞌuxlabꞌel rukamik ri Ajaw, ma utz ta nditij chuqaꞌ ri kꞌo chupan ri copa ri ndisujeꞌ chake ri itzel teq espíritu. Keriꞌ chuqaꞌ si ndikꞌux ri kaxlan wey kꞌuxlabꞌel rukamik ri Ajaw, ma utz ta ndikꞌux chuqaꞌ ri ndisujeꞌ chake ri itzel teq espíritu.

²² Porque atoq ndiqakꞌux ri achike ngesuj chikiwech ri itzel teq espíritu, ndiqayek royowal ri Ajaw. Y si keriꞌ ta ndiqabꞌen, ¿kꞌo kami más quchuqꞌaꞌ ke chuwech rijaꞌ chin ta ndiqatoꞌ qiꞌ chuwech? ¡Maneq!

Tiqabꞌanaꞌ ri kꞌo utz ndukꞌen pe chake chꞌaqa

²³ Ekꞌo kereꞌ ngebꞌiꞌin: Pa nuqꞌaꞌ yin kꞌo chin nichaꞌ ri niwojoꞌ nibꞌen, ngechajeꞌ. Riꞌ qetzij, pero ma nojel ta kꞌo utz ndukꞌen pe. Kin qetzij chi pa nuqꞌaꞌ yin kꞌo chin nichaꞌ ri niwojoꞌ nibꞌen, pero ma nojel ta ndubꞌen chaqe roj ri qataqin ri Ajaw chi ngojkꞌiy pa qakꞌaslen.

²⁴ Romariꞌ ma jun tikanon xe ri kꞌo utz ndukꞌen pe chare rijaꞌ, xa kin tukanoj chuqaꞌ ri kꞌo utz ndukꞌen pe chake ri kitaqin ri Ajaw.

²⁵ Ri jalajaj teq kiwech tiꞌij ngekꞌayix pa teq kꞌayibꞌel, utz chin ndilaqꞌ y ndikꞌux, y ma tikꞌutuj razón si sujun chuwech jun tiox, chin ma chꞌil-chꞌil tunaꞌ ri iwánima chuwech ri Dios.

²⁶ Porque ri rochꞌulew y nojel ri kꞌo chuwech, kin richin ri Ajaw.

²⁷ Si jun wineq ma rutaqin ta ri Ajaw ngixroyoj chin ngixbꞌewaꞌ rikꞌin, kixbꞌiyin si ndiwojoꞌ. Tikꞌuxuꞌ nojel ri nduyaꞌ pe chiwech, y ma tikꞌutuj razón si ri nduyaꞌ pe chiwa sujun chikiwech tiox, chin ma chꞌil-chꞌil tunaꞌ ri ránima rijaꞌ.

²⁸ Pero si kꞌo jun chiriꞌ ndubꞌij chiwa: Re rikil reꞌ xsuj chikiwech tiox, ndichajeꞌ, rix ma tikꞌux ri rikil riꞌ, roma ri xbꞌiꞌin keriꞌ chiwa, chin keriꞌ nixta jun chꞌil-chꞌil xtunaꞌ ránima.

²⁹ Ma nibꞌij ta chiwa chi ja ri iwánima rix ri chꞌil-chꞌil xtunaꞌ atoq ndikꞌux ri rikil ri sujun chikiwech tiox, xa ja ri ránima ri xbꞌiꞌin keriꞌ chiwa. Maneq cheꞌel chi ja ri ndunaꞌ ránima jun chik wineq ri ndibꞌiꞌin chaqe ri ndikꞌatzin chi ndiqabꞌen.

³⁰ Porque si riyin nimatioxij chare ri Dios ri rikil nikꞌux, ¿achike roma ndibꞌix chuwa chi ma utz ta ri nibꞌen atoq nikꞌux jun rikil, xu nimatioxij chare ri Dios?

³¹ Romariꞌ, si ngojwaꞌ, si ndiqatij qayaꞌ o achike na jun chik ndiqabꞌen, tiqabꞌanaꞌ chin ndiqayaꞌ ruqꞌij ri Dios.

³² Ma jun achike tibꞌen ri ndubꞌen chake israelitas, chake ma israelitas ta, o chake ri eralkꞌuaꞌl ri Dios, chi ndikil jun roma ndikiyaꞌ kan ri Dios.

³³ Xa kin tibꞌanaꞌ achel nibꞌen riyin, nitij nuqꞌij chi nojel ri nibꞌen pa nukꞌaslen ndiqaꞌ chikiwech konojel. Riꞌ ndubꞌij tzij chi ma nibꞌen ta ri xe chuwa riyin kꞌo utz ndukꞌen pe, xa kin nibꞌen chuqaꞌ ri kꞌo utz ndukꞌen pe chake chꞌaqa, roma niwojoꞌ chi ngekolotej chuqaꞌ rejeꞌ.