Яков 5 - Бур Юӧр 2019

¹ Ӧні кывзӧ тійӧ, бура оліссез, горзӧ да герьялӧ сьӧкытыс-умӧльыс кузя, кӧда локтӧ тіян вылӧ.

² Тіян ӧктӧмныт быдӧс сісьмӧм. Паськӧмнытӧ кор кералӧм.

³ Зарниныт да эзысьныт тіян сімӧм. Нылӧн сімыс тіян умӧль керӧммез йылісь висьтасьны пондас, тіянлісь вывтырнытӧ би моз сёяс. Тійӧ сьӧмнытӧ ӧктіт медбӧрья луннэз кежӧ.

⁴ Тіянлісь ыббезнытӧ уджаліссес вундісӧ. Нылісь шедтӧмсӧ тійӧ эдӧ вештӧ, колит аслыныт. Кольӧм сьӧмыс горӧтлӧ. Вундіссеслӧн горзан-норасян шыэзныс локтісӧ Дӧсвидзись Саваоф дынӧдз.

⁵ Тійӧ му вылас оліт кокнита, быдпӧлӧснас асьнытӧ чӧсмӧтіт, жыв подаӧс начкисян лун кежӧ асьнытӧ вердіт.

⁶ Ме вичкуыслӧ гижлі ни, но нылӧн асьсӧ ыджытӧ пуктісь Диотрефыс оз лэдз миянӧс локны. Тійӧ судитіт да вийит Ен сьӧрті веськыта олісьсӧ. Сія тіянлӧ паныт эз лэбтісь.

Дӧсвидзисьлӧн локтӧмыс матын

⁷ Воннэзӧ, тійӧ видзчисят Дӧсвидзисьлісь бертӧмсӧ. Сідзкӧ, видзчисьны мыланыт ась оз быр. Босьтам му вылын уджалісьӧс. Сія дыр видзчисьӧ тулысся да арся зэрресӧ, медбы му вывсис босьтны дона воӧмсӧ.

⁸ Ыджыт мылаӧн видзчисьӧ и тійӧ. Вынсьӧтӧ ассиныт сьӧлӧммезнытӧ, Дӧсвидзисьлӧн локтӧмыс сибалӧ.

⁹ Воннэзӧ, ӧтамӧдныт вылӧ эд норасьӧ, медбы Еныс эз судит тіянӧс. Судитісьыс эд сулалӧ ыбӧс дорас.

¹⁰ Менам воннэзӧ, вайӧтӧ тӧдвыланыт Енсянь юӧртіссесӧ, кӧдна кӧркӧ баитлӧмась Дӧсвидзись нимсянь. Велӧтчӧ нысянь. Нія пессьӧм-мырсьӧм коста видзсьӧмась ыджыт мылаӧн.

¹¹ Мийӧ бурнас касьтылам нійӧ, кӧдна ыджыт мылаӧн вермӧмась видзсьыны. Тійӧ кывлітӧ Иовыслісь ыджыт мылаӧн видзсьӧм йылісь да тӧдатӧ, мый сетӧм сылӧ Дӧсвидзисьыс медбӧрын. Дӧсвидзисьыс эд жалейтӧ отирсӧ, Сія небыт сьӧлӧма.

¹² Менам воннэзӧ, кывнытӧ эд сетӧ немӧн: енӧжӧн, муӧн да и мыйӧнкӧ мӧдікӧн. Шуатӧ кӧ «ну», сэтчӧ нем эд содтӧ. Шуатӧ кӧ «ог», сэтчӧ нем эд содтӧ. Сэк тійӧ одӧ сюрӧ суд вылас.

Кеймӧмлӧн вын

¹³ Тіян коласісь кин пессьӧ-мырсьӧ кӧ, ась кеймӧ. Кинлӧ гаж, ась ошкӧ-сьылӧтӧ Енсӧ.

¹⁴ Тіян коласісь кин шогалӧ кӧ, ась корӧ Вичкусис веськӧтліссесӧ. Нія Дӧсвидзись нимӧн мавтыштасӧ шогалісьсӧ виӧн да кеймасӧ сы понда.

¹⁵ Веритӧмӧн кеймӧмыс веськӧтас шогалісьсӧ. Дӧсвидзисьыс сійӧ лэбтас. Умӧльӧ кӧ мый керис, сійӧ проститас.

¹⁶ Ӧтамӧдныт одзын висьталӧ умӧль керӧмнытӧ. Кеймӧ ӧтамӧдныт понда, медбы тійӧ веськаліт. Уна вермӧ керны Ен сьӧрті веськыта олісьлӧн вына кеймӧмыс.

¹⁷ Енсянь юӧртісь Илляыс вӧлӧм миян кодь морт. Сія кеймисьӧмӧн корӧм, ась пӧ му вылас оз ло зэрыс. Зэрыс му вылас сэк абу вӧлӧм куим во да квать тӧлісь сьӧрна.

¹⁸ Илляыс бӧра кеймӧм. Енӧжсянь локтӧм зэрыс. Муыс быдтӧм быдмассэсӧ.

Ылалӧм мортӧс бергӧтӧм

¹⁹ Воннэзӧ, тіян коласісь кинкӧ ылалас кӧ быльыс дынісь, а мӧдік сійӧ бӧр бергӧтас,

²⁰ тӧдӧ: ылалӧм туй вывсис умӧль керисьсӧ бергӧтісьыс мездас сылісь ловсӧ да вевттяс уна умӧль керӧм.