Яков 4 - Бур Юӧр 2019

¹ Кысянь тіян ӧтамӧдныткӧт лӧгалӧмныт да етшасьӧмныт? Нія этасянь: вывтыраныт ӧзйӧтчӧммес пессьӧны тіян пытшкын, зника озӧ сетӧ.

² Тіянлӧ мыйкӧ колӧ, но сія абу. Тійӧ виятӧ, завидуйтат, а колӧмсӧ одӧ вермӧ судзӧтны, сійӧн етшасятӧ да лӧгалатӧ. Но тіян абу, одӧ корӧ Еныслісь да.

³ Коратӧ, а корӧмныт абу сійӧн, мыля одӧ корӧ, медбы керны бурсӧ. Коратӧ дзир ас пондасиныт, медбы керны асланыт ӧзйӧтчӧм сьӧрті.

⁴ Енсӧ колиссез! Одӧ я тӧдӧ, му вылісьыскӧт ёртасьӧмыс ─ Еныс вылӧ лэбтісьӧм. Сідзкӧ, тійӧ кӧ ёртасит му вылісьыскӧт, сэк тійӧ Еныс вылӧ лэбтісит.

⁵ Юраныт поди видзат, Вежа Гижӧтас висьталӧм этадз весись: «Еныс миян пытшкӧ сетӧм ловсӧ радейтӧ вежӧктӧмӧдз»?

⁶ Сылӧн миянлӧ бурсетӧмыс ӧддьӧн уна, сійӧн сідз и Вежа Гижӧтас висьталӧм: ─ Асьнысӧ вылына лэбтіссеслӧ Еныс паныт сувтӧ. Рам сьӧлӧмаэслӧ козьналӧ бурсетӧмсӧ.

⁷ Сідзкӧ, сетчӧ Еныслӧ, а кульыслӧ лэбтісьӧ паныт! Сэк сія пышшас тіян дынісь.

⁸ Сибӧтчӧ Еныс дынӧ, и Сія сибӧтчас тіян дынӧ. Умӧльсӧ кериссез, миссьӧтӧ киэзнытӧ! Ылӧтчиссез, сӧстӧмтӧ сьӧлӧммезнытӧ!

⁹ Тӧждісьӧ, горзӧ, герьясьӧ! Сералӧмнытӧ ась вежӧ горзӧм, гажнытӧ ─ тӧждісьӧм.

¹⁰ Дӧсвидзисьыс одзын асьнытӧ лэдзӧ, раммӧтӧ, сэк Сія лэбтас тіянӧс.

¹¹ Воннэзӧ, ӧтамӧдныт йылісь эд баитӧ умӧля. Кин воныс йылісь умӧля баитӧ да сійӧ осудитӧ, сія Туйдӧтыс йылісь умӧля баитӧ, Туйдӧтсӧ осудитӧ. Сэк сія мортыс абу Туйдӧт сьӧрті олісь, но судитісь.

¹² Туйдӧтсӧ Сетісьыс да Судитісьыс эд ӧтік. Сія ӧтнас вермӧ мездыны да лов босьтны. А тэ, мӧдік йылісь умӧля баитісь, кин тэ сэтшӧмыс?

Ас вылӧ надейтчӧм йылісь

¹³ Мукӧдыс тай баитӧны: «Талун, ашын я мунам эта карӧ. Сэтчин олам ӧтік во. Пондам вузасьны да ӧктыны шедтӧм сьӧмсӧ». Ӧні кывзӧ, этадз баитіссез.

¹⁴ Тійӧ сідз баитат, а асьныт одӧ тӧдӧ, мый лоас ашын. Мый тіян оланныт? Сія чочком ру кодь, мыччасьӧ недыр кежӧ, сэсся ӧшӧ.

¹⁵ Сідз шуӧмныт туйӧ тіянлӧ колӧ висьтавны: «Дӧсвидзисьыс кӧ лэдзас да ловьяӧсь лоам, сэк керам этӧ, мӧдікӧ я».

¹⁶ Тійӧ асьнытӧ вылына лэбтӧмсянь ошшасят. Сэтшӧм быд ошшасьӧмыс ─ умӧль керӧм.

¹⁷ Сідзкӧ, кин вежӧртӧ бурсӧ керны, да оз кер, сія умӧльсӧ керись.