Яков 3 - Бур Юӧр 2019

¹ Менам воннэзӧ, унаӧн эд керсьӧ велӧтіссезнас. Тӧдат эд, миянкӧт, велӧтіссескӧт, суд вылас Еныс пондас чорытжыка бӧрйисьны.

² Мийӧ быдӧнным уна керам умӧльсӧ. Мортыс оз кӧ пыр умӧляс аслас кыв кузя, сія вермӧ асьсӧ быдсӧн видзны быд умӧль керӧмись. Сэтшӧмыс быд ладорсянь ни бур морт.

³ Вӧввес миянӧс медбы кывзісисӧ, мийӧ ӧманыс нылӧ сюйыштам ӧмлӧс. Сы отсӧтӧн веськӧтлам быдсӧн вывтырнас.

⁴ Корабллес ӧддьӧн ыджытӧсь. Вына тӧлыс нійӧ новйӧтӧ саридзӧттяс. Но, кытчӧ колӧ, веськӧтлісьыс учӧтик рульӧн туйдӧтӧ.

⁵ Сідз и миян кывным: вывтырын сія учӧтик торок, но уна керӧ. Видзӧт, учӧтик биыс кытшӧм уна вӧр сотӧ!

⁶ И кылыс ─ би, умӧльсӧ ӧктісь. Кылыс вывтыраным быд торрез коласын сідз сулалӧ, нельки быдсӧн вывтырнымӧс сэрпӧсьтӧ. Сія ӧзйӧ адсяняс да сотӧ миянлісь быдӧс оланнымӧс.

⁷ Мортыс вермӧ раммӧтны да видзны киас вӧрпаэсӧ, кайесӧ, виклясиссесӧ да ваын оліссесӧ.

⁸ А кывсӧ раммӧтны некин оз вермы. Сія лёк керись, виян ядӧн тырӧм.

⁹ Кывнаным ошкам Ен Айнымӧс. Сійӧн жӧ ёрдам Еныс сьӧрті аркмӧтӧм отирсӧ.

¹⁰ Ӧтік ӧмись петӧ ошкӧм да ёрдӧм. Воннэзӧ, сідз оз ков керны.

¹¹ Му пытшксис ӧтіклаын вермас я петны чӧскыт да курыт ва?

¹² Менам воннэзӧ, инжир пу оз вермы вайны виягӧд. Виноград вылын оз быдмы инжир. Сідз и ӧтіклаись оз вермы петны чӧскыт да курыт ва.

Бур мывкыд йылісь

¹³ Кин ылӧса да мывкыда тіян коласісь, ась мыччалӧ мывкыдсӧ аслас оланӧн. Ась быдӧс керӧ бур мывкыдсянь рама видзсьӧмӧн.

¹⁴ Но мӧдік вылӧ видзӧттӧн тіян завид кутӧмнытсянь кӧ сьӧлӧмныт пизьӧ, тійӧ кӧ дзир асьнытӧ радейтат, сэк эд ошшасьӧ. Асланыт бӧбӧтчӧмӧн быльсӧ мӧдӧрӧ эд бергӧтӧ.

¹⁵ Сэтшӧм мывкыдыс абу сетӧм вылісянь. Сія му вылісь отирсянь да сэрпӧсь ловвезсянь.

¹⁶ Кытӧн эм завидуйтӧм, дзир асьӧс радейтӧм, сэтчин быдӧс арттӧм, уна умӧльыс.

¹⁷ Вылісянь сетӧм мывкыдыс сӧстӧм, лӧнь, рам, кывзісьӧ, небыт сьӧлӧмсянь бурсӧ керӧ, оз лыддьы ӧтіккезӧс мӧддэзся буржыккезӧн, оз ылӧтлы.

¹⁸ Отирсӧ ӧтамӧдкӧт бурӧтіссес-лӧньсьӧтіссес кӧдзӧны лӧнь оланлісь кӧдзыссӧ. Сэтісь воӧмыс ─ Ен сьӧрті веськыта олӧм.