Римын оліссезлӧ 4 - Бур Юӧр 2019

¹ Мый шуам Авраам айным йылісь? Мый сія босьтіс олікас?

² Авраамсӧ Еныс шуӧм кӧ веськыта олісьӧн мыйкӧ керӧм понда, сэк сылӧн вӧлі мыйӧн ошшасьны отирыс одзын. А Еныс одзын тай ошшасьны абу вӧлӧм мыйӧн.

³ Мый шуӧ Вежа Гижӧтыс? «Авраамыс веритӧм Еныслӧ. Эта понда Еныс сійӧ шуӧм веськыта олісьӧн».

⁴ Уджалісьлӧ вештӧмыс абу козин, сылӧ вештӧны керӧм удж понда.

⁵ Шуам, мортыс оз надейтчы аслас керӧм вылӧ, но веритӧ Енлӧ, Кӧда керӧ умӧль керисьсӧ веськыта олісьӧн. Сэк сылісь веритӧмсӧ Еныс шуӧ веськыта олӧмӧн.

⁶ Эта йылісь и висьтавлӧм кӧркӧ Давидыс. Сія шуӧм шудаӧн сійӧ мортсӧ, кӧдӧ Еныс шуӧ веськыта олісьӧн мортлӧн керӧм вылӧ видзӧттӧг:

⁷ ─ Шудаӧсь нія, кӧдналісь лёк керӧммезнысӧ Еныс проститіс. Шудаӧсь, кӧдналісь умӧль керӧммесӧ Сія лэдзис.

⁸ Шуда мортыс, оз кӧ Еныс вайӧт сы юр вылӧ умӧль керӧмсӧ.

⁹ Эта шудыс дзир нылӧ, кӧдна вундыштыштӧмӧсь? Сетӧм я сія и мӧдіккезлӧ, кӧдна абу вундыштыштӧмӧсь? Мийӧ шуам: веритӧмыс понда Авраамсӧ Еныс шуӧм веськыта олісьӧн.

¹⁰ Кӧр Авраамыс вӧлі шуӧм веськыта олісьӧн? Вундыштыштӧм одзас, сы бӧрын я? Эта вӧлӧм эшӧ сы одзын.

¹¹ Веськыта олісьӧн сія лоӧм вундыштыштӧм одзас веритӧмыс понда. А вундыштыштӧмыс вӧлі сетӧм тыдалан пасӧн бӧрынжык. Сэк сійӧ Еныс шуӧм ни вӧлі веськыта олісьнас. Сійӧн ӧні Авраамыс ай быдӧнныслӧн, кӧдна абу вундыштыштӧмӧсь да веритӧны Кристослӧ, медбы и нійӧ веритӧмныс понда Еныс шуис веськыта оліссезӧн.

¹² Авраамыс ай и вундыштыштӧммеслӧн, кӧдналӧн вундыштыштӧмысся эм и сэтшӧм веритӧм, кытшӧм вӧлі Авраам айнымлӧн вундыштыштӧм одзас.

Авраамлӧ кӧсйӧмыс ─ быд веритісьлӧ

¹³ Авраамыслӧ да сысянь йылӧм увтырлӧ Еныс кӧсйӧм сетны быдсӧн мусӧ. Сійӧ абу кӧсйӧм Туйдӧт сьӧрті олӧм понда, кӧсйӧм веритӧмыс понда. Веритӧмыс понда Авраамсӧ Еныс эд и шуӧм вӧлі веськыта олісьӧн.

¹⁴ Кӧсйӧмсӧ позьӧ кӧ босьтны Туйдӧт сьӧрті олӧмӧн, сэк веритӧмыс весись да и кӧсйӧмыс абутӧм туйӧ.

¹⁵ Туйдӧтыс вайӧ умӧль керӧм понда вештісьӧм. Абу кӧ Туйдӧтыс, сэк оз позь висьтавны, эта пӧ умӧль керӧм.

¹⁶ Эта кӧсйӧмыс веритӧм понда. Сія Енсянь бурсетӧм. Сія сетӧм Авраам увтырись быд мортлӧ. Сетӧм и Туйдӧт сьӧрті оліссезлӧ, сетӧм и Авраам моз веритіссезлӧ. Авраамыс эд миян быдӧннымлӧн ай.

¹⁷ Вежа Гижӧтас тай сідз висьталӧм: «Ме сувтӧті тэнӧ айӧн унася-уна быдкодь отирлӧ». Авраамыс эд веритӧм кулӧммесӧ Ловзьӧтісь Енлӧ, вӧвлытӧмсӧ оланӧ Пыртісьлӧ.

¹⁸ Авраамыс веритӧм да видзчисьӧм, кӧр нем ни вӧлӧм бурсӧ видзчисьны, но сія надейтчӧмӧн веритӧм Енлӧ. Сійӧн сія лоис айӧн уна отирлӧ Вежа Гижӧтісь кыввез сьӧрті: «Сэтшӧм уна лоас тэнат увтырыт!»

¹⁹ Авраамыс вежӧртӧм: сылӧн абу ни олан выныс, сылӧ эд чожа тырас сё во. И Сарра иньыс пӧрись ни ваясьны. Нельки и сэк сылӧн веритӧмыс абу бырӧм.

²⁰ Сія дугдывтӧг видзчисьӧм Еныслісь кӧсйӧмсӧ. Видзчисикас ёна веритӧм да ошкӧм Енсӧ.

²¹ Сія бура тӧдӧм: Еныс вермас аркмӧтны Ассис кӧсйӧмсӧ.

²² Сійӧн эта веритӧм понда Авраамсӧ Еныс и шуӧм веськыта олісьӧн.

²³ «Еныс шуис сійӧ веськыта олісьӧн» ─ эна кыввес висьталӧмась кыдз Авраамыс йылісь,

²⁴ сідз и миян йылісь. Миянӧс шуасӧ Ен сьӧрті веськыта оліссезӧн. Мийӧ эд веритам миянлісь Дӧсвидзись Исуссӧ Ловзьӧтісь Енлӧ.

²⁵ Исусыс вӧлі сетӧм вийны умӧль керӧммезным кузя. Сія ловзис, медбы мийӧ лоим Ен сьӧрті веськыта оліссезӧн.