Римын оліссезлӧ 3 - Бур Юӧр 2019

¹ Мый бурыс лоны иудейӧн? Мый сетӧ вундыштыштӧмыс?

² Сія ─ быд ладорсянь бур. Медодз висьтала: иудейеслӧ вӧлі сетӧм Еныслӧн Кылыс.

³ Иудейес коласісь мукӧдыс кӧ эзӧ пондӧ кывзыны Енсӧ, мый сэтісь? Ны ылалӧм кузя Еныс вежас разь Ассис кӧсйӧмсӧ?

⁴ Оз эд. Быд мортыс ─ бӧбӧтчись, но Еныс оз вежлы Ассис висьталӧмсӧ. Вежа Гижӧтас тай висьталӧм: ─ Тэ висьталан веськыта, кыдз эм. Аслат суд вылын бӧрйисьӧмыт коста тэ верман.

⁵ Миян умӧль керӧмным кӧ мыччалӧ Еныслісь бура керӧмсӧ, мый сэтчӧ шуам? Мукӧдыс баитӧны: «Еныс умӧльӧ керӧ, кӧр миян вылӧ вайӧтӧ Ассис лӧгсӧ».

⁶ Оз эд умӧльсӧ кер! Кыдз нӧ сэк Еныслӧ суд вылас быдӧнныскӧт бӧрйисьны?

⁷ Менам бӧбӧтӧмсянь Еныслӧн быльыс буржыка кӧ тыдалӧ, и сы понда ӧддьӧнжык ошкӧны Енсӧ, сэк мый понда менӧ судитны кыдз умӧль керисьӧс?

⁸ Мукӧдыс умӧльсӧ весись баитӧны миян йылісь. Мийӧ пӧ велӧтамӧ: «Пондам керны умӧльсӧ, медбы петіс бурыс». Сэтшӧма баитіссеслӧ дӧнзяс Енлӧн суд вылын веськыта мыжйӧм.

Некин оз кошшы Енсӧ

⁹ Мый нӧ сэк петӧ? Мийӧ, иудейес, мӧдіккезся буржыкӧсь? Абу эд. Мийӧ эта одзын висьталім тай: иудейес да и мӧдік отирыс быдӧнныс умӧль керӧмыс кипод увтын.

¹⁰ Вежа Гижӧтсис лыддьӧтам: ─ Ен сьӧрті веськыта олісьыс ӧтік абу.

¹¹ Абу вежӧртіссес, абу Енсӧ кошшиссес.

¹² Быдӧнныс ылалісӧ туй вывсис, ӧтікӧдз озӧ туйӧ. Абу бурсӧ кериссес, ӧтік абу.

¹³ Нылӧн горшныс ─ осьта шойна. Кыв выланыс ӧтік бӧбӧтчӧм. Асланыс кыввезӧн кый моз чушкӧны.

¹⁴ Ӧмсиныс петӧм ёрдӧмнаныс да лёк курыт кыввезнаныс дойдӧны.

¹⁵ Нія ӧддьӧн чожӧсь кисьтны вирсӧ.

¹⁶ Ны мунӧм бӧрын кольччӧ разьсьӧм да пессьӧм-мырсьӧм.

¹⁷ Лӧнь оланӧ вайӧтан туйсӧ нія озӧ тӧдӧ.

¹⁸ Сьӧлӧманыс нылӧн абу Енісь полӧмыс.

¹⁹ Мийӧ тӧдам: Туйдӧтас тшӧктӧммес висьталӧмась Туйдӧтыс кипод увтын оліссезлӧ. Отирыс сэтісь тӧдӧны, Еныс пондас бӧрйисьны быдӧнныскӧт. Сысянь быд ӧм пӧднассьӧ.

²⁰ Еныс одзын эд Туйдӧт сьӧрті олӧмнас мортыс оз ло Ен сьӧрті веськыта олісьӧн. Туйдӧтас висьталӧм сьӧрті дзир тӧдамӧ умӧль керӧмнымӧс.

Ен сьӧрті веськыта олӧмыс ─ веритӧмсянь

²¹ Ӧні Еныс отирыслӧ осьтіс: мортыс лоӧ Ен сьӧрті веськыта олісьӧн Туйдӧтыстӧг. Эта йылісь висьталӧны Туйдӧтыс да Енсянь юӧртіссезлӧн гижӧттэс.

²² Быд морт, кин бы сія эз вӧв, Кристос Исуслӧ веритӧмыс понда лоас Ен сьӧрті веськыта олісьӧн.

²³ Быдӧнныс эд умӧльсӧ керисӧ да ӧштісӧ Енлӧн югьялӧмын олӧмсӧ.

²⁴ Но Енлӧн бурсетӧмсянь отирыс лоасӧ Ен сьӧрті веськыта оліссезӧн. Нылӧ сы понда оз ков вештісьны. Кристос Исусыс эд быд морт туйӧ вештісис Аслас оланӧн.

²⁵ Отиркӧт бурасьӧм понда Еныс сетіс кисьтны Кристослісь вирсӧ. Сылӧн кисьтӧм вирыс мездӧ Сылӧ быд веритісьсӧ. Одззася умӧль керӧммезнымӧс Еныс проститіс.

²⁶ Мийӧ нійӧ керим, кӧр Еныс мылаыс быртӧг видзчисис отирсӧ. Ӧні Еныс мыччаліс ─ Сія быдӧс керис веськыта. Сія Ачыс веськыта Олісь и керӧ веськыта олісьӧн Исуслӧ быд веритісьсӧ.

²⁷ Кытӧн сія, мыйӧн позьӧ ошшасьны? Сія разьӧм. Мыйӧн? Туйдӧт сьӧрті керӧмнас? Абу, веритӧмӧн эд.

²⁸ Мийӧ вежӧртім: мортсӧ Еныс керӧ Сы сьӧрті веськыта олісьӧн Кристослӧ веритӧм понда, Туйдӧт сьӧрті керӧм вылӧ видзӧттӧг.

²⁹ Абу я Еныс дзир иудей отирлӧн Ен? Сія абу мӧдік отирлӧн Ен? Сія Ен и мӧдік отирлӧн!

³⁰ Еныс эд ӧтік. Сія иудейесӧ да и мӧдік отирсӧ керӧ веськыта оліссезӧн дзир веритӧмныс понда. Еныс оз видзӧт вундыштыштӧм вылӧ.

³¹ Сідзкӧ, огӧ я мийӧ разьӧ Туйдӧтсӧ веритӧмнаным? Огӧ эд. Мийӧ Туйдӧтсӧ вынсьӧтам.