Римын оліссезлӧ 2 - Бур Юӧр 2019

¹ Он вермы дорйыны асьтӧ, мӧдікӧс осудитісь морт. Мӧдікӧс осудитӧмыт эд висьталӧ ас йывсит. Тэ эд ачыт сійӧ жӧ керан.

² Мийӧ тӧдам, сідз кериссесӧ Еныс веськыта судитӧ.

³ Тэ осудитан сэтшӧма кериссесӧ, ачыт тай сідз жӧ керан. Он я тэ видз юрат: ог пӧ сюр Енлӧн суд вылӧ.

⁴ Поди, тэ абутӧм туйӧ пуктан Еныслісь небыт сьӧлӧмсянь бур керӧмсӧ да мылаыс быртӧг дыр видзчисьӧмсӧ, а ачыт тай он вежӧрт керсьӧмсӧ. Еныслӧн небыт сьӧлӧмсянь керӧмыс эд вайӧтӧ тэнӧ умӧль керӧммет дынісь Енлань бергӧтчӧмӧдз.

⁵ Тэ он тӧждісь умӧльсӧ керӧмыт кузя. Аслат мугсьӧм понда тэ ачыт аслыт ӧктан лӧгсӧ, кӧда локтас тэ вылӧ Лӧг лунас Еныслӧн веськыта судитӧм коста.

⁶ Еныс эд быд мортлӧ сетас олікӧ керӧмыс сьӧрті.

⁷ Пырся олансӧ Сія сетас бурсӧ дугдывтӧг керись отирлӧ. Нія эд кошшӧны ошкӧмсӧ, бурӧ пуктӧмсӧ да пырсясӧ.

⁸ А лёкыс да лӧгыс дӧнзясӧ асьнысӧ вылына лэбтіссеслӧ. Нія озӧ кывзісьӧ Еныслісь быльсӧ, лэдзчисьӧмась ылӧтчыны.

⁹ Шогсьӧм-мырсьӧм дӧнзяс быд лёк керись мортлӧ: медодз ─ иудейезлӧ, сэсся ─ мӧдіккезлӧ.

¹⁰ Бурӧ пуктӧм, ошкӧм да лӧнь олан босьтасӧ бурсӧ кериссес: медодз ─ иудейес, сэсся ─ мӧдіккес.

¹¹ Еныс эд оз видзӧт чужӧм сьӧрті.

Туйдӧт сьӧрті да сытӧг олӧм

¹² Шуам: мортыс керис умӧльӧ. Сія Моисейлӧн Туйдӧтісь тшӧктӧммесӧ эз тӧд. Сылӧн оланыс Туйдӧтыстӧг и орас. Моисейлӧн Туйдӧтісь тшӧктӧммесӧ мортыс тӧдӧ кӧ, да керӧ умӧльсӧ ─ сійӧ Туйдӧтыс сьӧрті и пондасӧ судитны.

¹³ Ен сьӧрті веськыта оліссес нія, кӧдна олӧны Туйдӧтыс сьӧрті. Абу нія, кӧдна дзир кывзӧны Туйдӧтсис тшӧктӧммесӧ.

¹⁴ Туйдӧтыс эм дзир Израиль отирлӧн, мӧдік отирлӧн сія абу. Асланыс оланныс тай мунӧ Туйдӧтас висьталӧм сьӧрті. Сійӧн нія мыччалӧны: нія Туйдӧттӧг тӧдӧны, мый позьӧ керны, мый оз.

¹⁵ Мийӧ адззам: Туйдӧтыслӧн тшӧктӧммес гижӧмась нылӧн сьӧлӧманыс. Эта йылісь и висьталӧ нылӧн сьӧлӧмныс. Юраныс пуктӧммезныс керӧмныс понда кӧр видӧны, кӧр дорйӧны мортсӧ.

¹⁶ Но лоас лун, кӧр Кристос Исус отсӧтӧн Еныс пондас судитны отирсӧ гусьӧна керӧммезныс понда. Эта йылісь ме баитлі Бур Юӧрсӧ висьтасьӧмӧ коста.

Иудейез да Туйдӧт

¹⁷ Тэ шуан, ме пӧ иудей. Асьтӧ дорьян Туйдӧтыс бердӧ видзсьӧмнат, ошшасян Енӧн.

¹⁸ Тӧдан, кыдз керны Еныс сьӧрті, оланын кужан бӧрйыны буржыксӧ. Этаӧ тэ велалін Туйдӧтісь тшӧктӧммезсянь.

¹⁹ Ачыт юрат тай видзан: «Ме синтӧммесӧ новйӧта, пемытас оліссеслӧ югдӧта,

²⁰ етша тӧдіссесӧ туйдӧта, поснит челядьсӧ велӧта». Тэ тӧдан: Туйдӧтас эд быдӧс висьталӧм, кыдз тэныт овны.

²¹ Мыля нӧ тэ мӧдіккезӧс велӧттӧн он велӧт асьтӧ?

²² Велӧтан гусясьтӧг овны, ачыт тай гусясян. Тэ шуан: «Гозйӧн овтӧн ӧтамӧдныт сайсянь эд ветлӧтӧ», а ачыт ветлӧтан. Ас керӧм еннэз вылӧ он вермы видзӧтны, ачыт нылісь кейманіннэзнысӧ петкӧтан-куштан.

²³ Тэ ошшасян Туйдӧтнас, ачыт тай Туйдӧтас видзӧттӧг керӧмнат Енсӧ абутӧм туйӧ пуктан.

²⁴ Сідз гижӧм Вежа Гижӧтас: «Тіян кузя мӧдік отир умӧля баитӧны Еныс йылісь».

²⁵ Вундыштыштӧмыс колӧ, олан кӧ Туйдӧтыс сьӧрті. Он кӧ ов Туйдӧтас сетӧм тшӧктӧммез сьӧрті, сэк тэнат вундыштыштӧмыт абутӧм туйӧ.

²⁶ Шуам: мортыс абу вундыштыштӧм. Ачыс тай олӧ Туйдӧтас тшӧктӧммез сьӧрті. Сэк оз я позь мортыс йылісь шуны, сія пӧ вундыштыштӧм?

²⁷ Мортыс абу вундыштыштӧм, а олӧ Туйдӧтыс сьӧрті. Тэ тай колан кадӧ вундыштыштӧм, тӧдан Туйдӧтсӧ, а ачыт он ов сы сьӧрті. Оз я вермы сія мортыс осудитны тэнӧ?

²⁸ Абу сія иудей, кӧда шогмис иудейӧн. Абу сія вундыштыштӧм, кӧда вывтыр вылас керӧм.

²⁹ Былись иудейыс сія, кӧда сьӧлӧмнас сэтшӧм. Былись вундыштыштӧмыс абу керӧм Туйдӧтас гижӧм сьӧрті, а керӧм Ен Ловсянь, морт сьӧлӧмын. Сэтшӧм мортсӧ оз ошкы отир, Еныс ошкӧ.