Осьтӧм 7 - Бур Юӧр 2019

¹ Сыбӧрын ме адззылі нёль ангелӧс. Нія сулалісӧ му вылас нёльнан пельӧсас да видзисӧ муыслісь нёльнан тӧвсӧ, медбы тӧлыс эз пӧльт му вылӧ, саридз вылӧ да пуэз вылӧ.

² Сэсся ме казялі витӧт ангелӧс. Сія локтіс асыввыв ладорсянь, киас видзис ловья Еныслісь пас пуктан. Сія горӧтіс нёль ангелыслӧ. Нылӧ вӧлі сетӧм вын тшыкӧтны мусӧ да саридзсӧ. Сія висьталіс:

³ «Эдӧ на керӧ умӧльсӧ муыслӧ, саридзыслӧ да пуэслӧ! Видзчисьыштӧ, кытчӧдз огӧ тэчӧ пассэсӧ кымӧссэзаныс миян Енлӧн раббезлӧ».

⁴ Сэк ме кылі, кыным мортлӧ пуктасӧ пассӧ: сё нёльдас нёль сюрс мортлӧ. Нія отирыс Израильлӧн быд увтырись:

⁵ Иуда увтырись ─ даскык сюрс, Рувим увтырись ─ даскык сюрс, Гад увтырись ─ даскык сюрс,

⁶ Асир увтырись ─ даскык сюрс, Неффалим увтырись ─ даскык сюрс, Манассия увтырись ─ даскык сюрс,

⁷ Симеон увтырись ─ даскык сюрс, Левий увтырись ─ даскык сюрс, Иссакар увтырись ─ даскык сюрс,

⁸ Завулон увтырись ─ даскык сюрс, Ӧсип увтырись ─ даскык сюрс, Вениамин увтырись ─ даскык сюрс.

Пукалісь да Дзель одзын лыдтӧм отир чукӧр

⁹ Сыбӧрын ме видзӧтышті да казялі: юралан пукӧсыс одзын да Дзельыс одзын сулалісӧ унася-уна отир. Сымдасӧ некин оз вермы лыддьыны. Отирыс сэтӧн вӧлісӧ быд чужан вужись да увтырись, быд отирись да быд кыла йӧзісь. Нія вӧлісӧ чочком паськӧмаӧсь. Киэзаныс нія видзисӧ пальмапу уввез.

¹⁰ Отирыс горӧн шувлісӧ сэтшӧм кыввез: ─ Мезмӧмыс ─ миян Енсянь, юралан пукӧс вылас Пукалісьсянь да Дзельсянь!

¹¹ Быдӧс ангеллэс сулалісӧ юралан пукӧс гӧгӧрын, пӧриссес да нёль енӧжись олісь гӧгӧр. Сэк нія быдӧнныс уськӧтчисӧ кыминь юралан пукӧсыс одзӧ да копыртчисӧ Еныслӧ.

¹² Нія шуисӧ: ─ Аминь! Ошкӧм да югьялӧм, мывкыд, буркывтӧм, вылына лэбтӧм, вын да юралӧм миян Енлӧ пырся-пыр. Аминь!

¹³ Сэк пӧриссес коласісь ӧтік юаліс менчим: «Киннэз этна чочком паськӧмаэс? Кысянь нія локтісӧ?»

¹⁴ Ме сылӧ шуи: «Бур мортӧй, ог тӧд, но тэ тӧдан». Сэк сія висьталіс меным: ─ Этна морттэс ёна пессьӧм-мырсьӧмись локтісӧ. Дзель вирӧн нія паськӧмнысӧ миссьӧтісӧ. Паськӧмныс нылӧн лоис чочком.

¹⁵ Сійӧн ӧні сулалӧны нія Енлӧн юралан пукӧс одзын да лун и ой Сылӧн Вежа Керкуын кысъялӧны Сылӧ. Юралан пукӧс вылас Пукалісьыс пондас овны ныкӧт да пыр пондас видзны нійӧ.

¹⁶ Некӧр сэсся нія озӧ пондӧ тшыгьявны, некӧр оз понды косьмыны горшныс. Некӧр нійӧ оз понды сотны шонді, оз понды пӧжны луншӧрӧн.

¹⁷ Юралан пукӧс одзас сулалісь Дзельыс пондас видзӧтны ны сьӧрын. Визывтан ловья ва дорӧ пондас вайӧтлыны. Еныс чышкас нылісь быд синва вотьсӧ.