Осьтӧм 20 - Бур Юӧр 2019

¹ Ме казялі ангелӧс, сія лэдзчӧ вӧлі енӧжись. Киас сылӧн вӧлі пыдӧстӧминісь ключ да ыджыт цеп.

² Сія кутіс гундырсӧ, важ кыйсӧ да дорис сійӧ сюрс во кежӧ. Сійӧ гундырсӧ шуӧны «куль» да «сотана».

³ Ангелыс шентіс сійӧ пыдӧстӧминас да игналіс ыбӧссӧ. Сэтчӧ пуктіс пас, медбы сія эз бӧбӧтлы отирсӧ, кытчӧдз оз чулав сюрс во. Сыбӧрын сійӧ колас лэдзлыны недыр кежӧ.

⁴ Сэсся ме казялі юралан пукӧссэз. Ны вылын пукалісӧ отир, кӧдналӧ вӧлі сетӧм судитан вын. Сэтӧн вӧлісӧ отирлӧн ловвез, кӧдналісь юррезнысӧ орӧтісӧ Исусыс йылісь висьтасьӧм понда да Ен Кыв понда. Нія эзӧ копрасьӧ вӧрпаыслӧ да сы кодь керӧмыслӧ, эзӧ пуктӧ сылісь пассӧ кымӧс выланыс да ки выланыс. Нія ловзисӧ да юралісӧ ӧтлаын Кристосыскӧт сюрс во сьӧрна.

⁵ Но мӧд кулӧммес эзӧ ловзьӧ, кытчӧдз эз чулав сюрс воыс. Сія медодзза ловзьӧтӧм.

⁶ Шудаӧсь да вежаӧсь нія, кӧдна ловзясӧ медодзза ловзьӧтӧм коста. Мӧдік кулӧмыс ны бердӧ оз ни вермы павкӧтчыны. Нія лоасӧ Енлӧн да Кристослӧн вежауджаліссезӧн да пондасӧ ӧтлаын Кристоскӧт юравны сюрс во сьӧрна.

Кульӧс мыжйӧм

⁷ Сюрс во чулалӧм бӧрті сотанасӧ пыдӧстӧминсис лэдзасӧ. Сія иньдӧтчас бӧбӧтлыны муыс пасьта нёльнан ладорсис отирсӧ, Гог да Магог йӧзсӧ. Сія ӧктас нійӧ тышкасьны. Лоасӧ нія сымда, мымда саридз дорас песӧкыс.

⁸ Нія паськӧтчасӧ муыс пасьта, кытшӧвтасӧ вежа отирлісь оланінсӧ да Енлісь дона карсӧ.

⁹ Сэтӧн енӧжсис Еныссянь усяс би да ньылыштас нійӧ.

¹⁰ А отирсӧ ылӧтлісь кульсӧ шупкасӧ биӧн сотчан истӧгись тыӧ. Сэтчӧ вӧлі шупкӧмась ни вӧрпасӧ да бӧбӧтчись юӧртісьсӧ. Сэтӧн нійӧ пондасӧ маитны ой и лун, пырся-пыр.

Енлӧн медбӧрья суд чулӧтӧм

¹¹ Сэсся ме казялі ыджыт чочком юралан пукӧс да сы вылын Пукалісьсӧ. Муыс да енӧжыс Сы син одзись пышшисӧ и некытчӧ нылӧ вӧлі воштісьны.

¹² Ме адззылі кулӧммесӧ: ыджыттэс и учӧттэс сулалісӧ Ен одзын. Сэтӧн вӧлісӧ осьта небӧггез. Осьтісӧ эшӧ ӧтік небӧг. Сія вӧлі Олан небӧгыс. Кулӧммескӧт бӧрйисисӧ оліканыс керӧм сьӧрті, мый вӧлі гижӧм небӧггезас.

¹³ Сэк саридзыс, кулӧмыс да адыс сетісӧ кулӧммесӧ, кӧдна сэтчин вӧлісӧ. Быд морткӧт суд вылас бӧрйисисӧ олікас керӧм сьӧрті.

¹⁴ Кулӧмсӧ да адсӧ шентісӧ биа тыӧ. Сія ─ мӧдпырись кулӧмыс.

¹⁵ Киннэз эзӧ вӧлӧ гижӧмӧсь Олан небӧгас, нійӧ чапкисӧ биа тыӧ.