Осьтӧм 19 - Бур Юӧр 2019

¹ Сыбӧрын енӧжсис ме кылі гора шы, жыв баитісӧ уна отир. Нія шувлісӧ: ─ Аллилуйя! Мезмӧмыс, югьялӧмыс, ошкӧмыс да выныс миян Енлӧн.

² Судитӧ Сія быль сьӧрті да веськыта. Сія судитіс ыджыт карсӧ, кыскасись инькасӧ, кӧда аслас кыскасьӧмӧн сэрпӧсьтіс мусӧ. Сія мыжйис кыскасись инькасӧ да сідз вештісис Аслас раббезлӧн кисьтӧм вир понда.

³ Нія бӧра шуисӧ: ─ Аллилуйя! Сылӧн тшыныс пыр пондас кайны!

⁴ Сэк кыкдас нёль пӧрисьыс да енӧжын нёль олісьыс уськӧтчисӧ юралан пукӧс вылын пукалісь Ен одзӧ да копыртчисӧ Сылӧ. Нія шувлісӧ: ─ Аминь! Аллилуйя!

⁵ Сэтӧн Енлӧн юралан пукӧс дынсянь кыліс шы. Сія висьталіс: ─ Ошкӧ миянлісь Енсӧ быдӧнныт, Сылӧн раббез да Сыись поліссез, учӧттэз да ыджыттэз!

⁶ Сэк ме кылі жыв уна отирлісь шы. Сія вачкисис уна ва усянлӧн шы вылӧ, горӧн гымалан шы вылӧ. Нія шувлісӧ: ─ Аллилуйя! Дӧсвидзись Еныс, Дӧсвермисьыс, ӧні пондіс юравны Ӧксуӧн!

⁷ Гажмам да пондам гажӧтчыны, лэбтам-ошкам Енсӧ. Дзельыслӧн гӧтрасян кадыс локтіс. Сылӧн невестаыс асьсӧ лӧсьӧтӧм ни,

⁸ пасьтасьӧм сӧстӧм, свиттялан чочком сӧдз лёнісь паськӧмӧ. Сӧдз лёнісь паськӧмыс ─ вежа отирлӧн веськыта керӧмныс.

⁹ Ангелыс меным висьталіс: «Гиж: "Шудаӧсь Дзельыслісь гӧтрасьӧмсӧ порйӧтӧм вылӧ корӧммес"». Сэтчӧ сія висьталіс: «Этна кыввес былись Еныслӧн».

¹⁰ Сэк ме уськӧтчи сылӧ коккезас копыртчыны. Сія меным висьталіс: «Видзӧт, эн кер сідз! Ме эд Енлӧн уджалісь, кыдз тэ да тэнат воннэт, кӧдна висьтасьӧны Исусыс йылісь. Еныслӧ копыртчы! Исусыс йылісь висьтасиссес эд баитӧны Енсянь юӧртан Ловсянь».

Чочком вӧв вылын верзьӧмӧн Пукалісь

¹¹ Сэк ме казялі осьта енӧжсӧ, чочком вӧлӧс да сы вылын Пукалісьӧс. Сылӧн нимыс Надейнӧй да Быль. Сія эд судитӧ да тышкасьӧ веськыта.

¹² Сылӧн синнэс ӧгралан би кодьӧсь. Юр вылас Сылӧн уна юркытшшез. Пукалісьыс вылын гижӧм Сылӧн нимыс, кӧдӧ некин оз тӧд. Тӧдӧ нимсӧ дзир Сія Ачыс.

¹³ Сы вылын паськӧмыс вӧлі вирӧсь. А нимыс Сылӧн ─ Енлӧн Кыв.

¹⁴ Сы бӧрсянь чочком вӧввез вылын верзьӧмӧн муніс енӧжсис тышкасян выныс. Нія пасьтасьӧмась вӧснит лёнісь сӧстӧм чочком паськӧмӧ.

¹⁵ Вӧлыс вылын Пукалісьыс ӧмись петӧ лэчыт шыпурт, медбы сійӧн пӧрӧтны отирсӧ. Сія пондас веськӧтлыны ныӧн кӧрт бедьӧн. Виноград пичканінас Сія пичкӧ Дӧсвермись Енлісь лӧгся-лӧг винасӧ.

¹⁶ Сылӧн нимыс вӧлі гижӧм паськӧм вылас да викляч вылас: «Ӧксуэзлӧн Ӧксу да юраліссезлӧн Юралісь».

¹⁷ Сэсся ме казялі шонді вылын сулалісь ангелӧс. Сія горӧн корис вылына лэбалісь кайесӧ: «Локтӧ, лэбзьӧ быдӧнныт ӧтлаӧ Енлӧн ыджыт гажӧтчӧм вылӧ.

¹⁸ Ӧксьӧ сёйны шойесӧ ӧксуэзлісь, вынаэзлісь, сюрс воинӧн веськӧтліссезлісь, вӧввезлісь, верзьӧмаэзлісь, кӧзяиннэзлісь да раббезлісь, учӧттэзлісь да ыджыттэзлісь».

¹⁹ Сэтӧн ме казялі вӧрпасӧ, му вылісь ӧксуэсӧ да нылісь тышкасись йӧзсӧ. Нія ӧксьӧмась тышкасьны вӧв вылас Пукаліськӧт да Сылӧн тышкасян вынкӧт.

²⁰ Вӧрпасӧ ӧтлаын бӧбӧтчись юӧртісьыскӧт кутісӧ. Бӧбӧтчись юӧртісьыс керліс адззывлытӧммесӧ вӧрпаыс нимӧн. Нійӧн сія ылӧтліс быдӧннысӧ, кӧдна вылын вӧлі вӧрпаыслӧн пасыс да кӧдна копрасисӧ сы вылӧ вачкисяна керӧмыслӧ. Кыкнаннысӧ нійӧ ловйӧн шентісӧ биӧн сотчан истӧгись тыӧ.

²¹ Мӧддэс вӧлісӧ вийӧмӧсь шыпуртӧн, кӧда петіс вӧв вылын Пукалісьыс ӧмись. Быдӧс кайес пӧттӧдз сёйисӧ шойесӧ.