Осьтӧм 18 - Бур Юӧр 2019

¹ Сыбӧрын ме казялі: енӧжсяняс лэдзчӧ вӧлі мӧдік ангел. Сылӧн вӧлі ыджыт вын. Сы югьялӧмсянь му вылас лоис югыт.

² Сія горася-горӧн горӧтіс: ─ Разьсис, разьсис ыджыт Вавилоныс! Лоис сія оланінӧн лёк ловвезлӧ, быдпӧлӧс сэрпӧсь ловвезлӧ сувтчанінӧн, быдкодь сэрпӧсь да нёштӧм кайезлӧ ӧксянінӧн. Сія эд быдӧс отирсӧ юкталіс, кыдз винаӧн кодззӧтліс аслас пӧтлытӧг кыскасьӧмӧн.

³ Му вылісь ӧксуэс кыскасисӧ сыкӧт. А вузасиссес сылӧн ёна гажӧтчӧммезсянь сьӧмнысӧ ӧктісӧ.

⁴ Сэтӧн ме кылі енӧжсис мӧдік висьталӧм шы: ─ Менам отирӧ, петӧ сія карись, медбы эдӧ керӧ сылісь умӧль керӧммесӧ и сійӧ мыжйӧмыс ась оз усь тіян вылӧ.

⁵ Сылӧн умӧль керӧммес путриктісӧ-кайисӧ енӧжӧдззас, и Еныс уськӧтіс нійӧ тӧдвылас.

⁶ Вештісьӧ сылӧ сійӧн жӧ, мый сія керис мӧдіккезлӧ. Кыкись унажык вештӧ сылӧн керӧм понда. Лӧсьӧтӧ сылӧ винасӧ кыкись курытжыкӧ сы винася, кӧдӧ сія лӧсьӧтліс мӧдіккезлӧ.

⁷ Сетӧ сылӧ шогсӧ да мырсьӧмсӧ сымда, мымда сылӧн вӧлі гажӧтчӧмыс да ошкӧмыс. Сія эд ас йывсис баитӧ: ме пукала инь ӧксу моз, ме абу дӧва и некӧр ог понды тӧждыны.

⁸ Сы понда сійӧ ӧтік лунӧ вӧтас быдкодь умӧльыс: кулӧмыс, шогыс, тшыгьялӧмыс. Сійӧ сотасӧ биын. Сійӧ Судитісьыс, Дӧсвидзись Еныс, вына эд!

⁹ Му вылісь ӧксуэс пондасӧ горзыны, герьявны сы понда, кӧр казяласӧ сы сотчӧмсянь кайӧм тшынсӧ. Нія эд сыкӧт кыскасисӧ да гажӧтчисӧ.

¹⁰ Сылісь маитчӧмсӧ адззӧмсянь повзьӧмувьяныс ылынкодь сулавтӧн нія пондасӧ шуны: ─ Умӧль, умӧль тэныт, Вавилон кар, ыджыт вына кар! Ӧтік час сьӧрна тэнӧ вӧтіс мыжйӧмыс!

¹¹ Сэк быдӧс вузасиссес пондасӧ горзыны да тӧждыны сы понда. Сэсся некин ни оз неб нылісь вузалан берсясӧ:

¹² зарнисӧ, эзысьсӧ, дона иззэсӧ да жемчугсӧ, вӧснит сӧдз дӧрасӧ, пемыт-гӧрд да югыт-гӧрд дӧраэсӧ, шёлксӧ, чӧскыт руа пуэсӧ. Оз небӧ слон лыись, дона пуись, ыргӧнісь, кӧртісь да мраморись берсясӧ.

¹³ Оз небӧ нылісь корицасӧ, чӧскыт руа сирсӧ, смирнасӧ, ладансӧ, винасӧ да висӧ, пизьсӧ да шогдісӧ, мӧссэсӧ да баляэсӧ, вӧввесӧ да телегаэсӧ, раббесӧ да мӧдік отирсӧ.

¹⁴ Быдӧс, мыйӧн тэ бурмӧтлін сьӧлӧмтӧ, тэнат абу ни, бурыт, пежьяланаыт тэнат ӧшис. Тэ сійӧ сэсся некӧр ни он адззы.

¹⁵ Вузасиссес сійӧ быдӧс вузалісӧ сылӧ да сысянь богатсялісӧ. Нія сылісь маитчӧмсӧ адззӧмсянь повзьӧмувьяныс ылын сулавтӧн пондасӧ горзыны да герьясьны сы понда.

¹⁶ Нія шуасӧ: ─ Умӧль! Умӧль ыджыт карлӧ! Сылӧн паськӧмыс вӧлі вӧснит сӧдз дӧраись, пемыт-гӧрд да югыт-гӧрд рӧма, зарнисянь, дона иззэзсянь да жемчугсянь пежьяліс.

¹⁷ Быдӧс сія дона берсяыс ӧтдруг тай ӧшис! Сэк корабллезӧн веськӧтліссес, ныкӧт уяліссес, корабллез вылын мукӧд уджаліссес да саридз вылын вузасиссес ылӧ сувтчисӧ.

¹⁸ Нія видзӧтісӧ сотчан карсяняс лэбтісян тшыныс вылӧ да ойзӧмӧн баитісӧ: «Эм я кытӧнкӧ эта ыджыт кар кодь мӧдік карыс?»

¹⁹ Нія юррез выланыс киськалісӧ пӧимсӧ, горзісӧ, горӧтлӧмӧн герьясисӧ: ─ Умӧль! Умӧль ыджыт карыслӧ! Быдӧнныс, кинлӧн вӧлісӧ саридз вылын корабллез, богатсялісӧ сысянь. Ӧтік час сьӧрна тай сія кушмуӧ пӧрис!

²⁰ ─ Гажӧтчы сысянь, енӧж! Гажӧтчӧ, вежа апостоллэз да Енсянь юӧртіссез! Тіян понда сійӧ карсӧ Еныс мыжйис, лёк керӧмыс понда вештісис.

²¹ Сэтӧн вына ангел босьтіс изын кодь ыджыт из да шупкис сійӧ саридзас сэтшӧм кыввезӧн: ─ Сідз лоас шентӧм ыджыт Вавилон карыс. Сія сэсся оз ни ло.

²² Некӧр сэсся сэтӧн оз понды кывны сиа орсан вылын орсӧмыс, сьыліссезлӧн сьылӧмыс, пӧляннэз вылын да буксаннэз вылын орсан шыэс. Некӧр сэтчӧ оз пет уджавны кужись морт. Некӧр ни оз понды кывны изыннэзлӧн шыыс.

²³ Некӧр оз ӧзйы бивидзанын би. Некӧр сэсся оз понды кывны гӧтрасись зонкалӧн да невесталӧн шыныс. Тэнат вузасиссет ыждалісӧ му вылас. Аслат тшыкӧтчӧмӧн быдӧс отирсӧ тэ ылӧтін.

²⁴ Енсянь юӧртіссеслӧн, вежа отирлӧн да му вылын быдӧс вийӧммеслӧн вирныс киссис эта карын.