Осьтӧм 17 - Бур Юӧр 2019

¹ Ме дынӧ сибӧтчис ангел. Сія вӧлі ны коласісь, кӧдна видзисӧ сизим доз. Сія меным шуис: «Сибӧтчы, ме мыччала тэныт, кыдз судитасӧ кыскасись инькасӧ, кӧда пукалӧ ыджыт ваэз дорын.

² Му вылісь ӧксуэз кыскасисӧ сыкӧт. Му вылас оліссес кодззывлісӧ сы кыскасьӧмсянь, кыдз винасянь».

³ Сэк ме тыри Лолӧн, и ангелыс менӧ нуӧтіс кушмуӧ. Сэтчин ме казялі инькаӧс. Сія пукаліс гӧрд вӧрпа вылын. Вӧрпаыс вӧлі сизим юра да дас сюра. Сылӧн вывтыр вылас быдлаын вӧлісӧ Енсӧ умӧльтан ниммез.

⁴ Инькаыс вӧлі пасьтӧтӧм пемыт-гӧрд да югыт-гӧрд паськӧмӧ. Сы вылын югьялісӧ зарниись, дона иззэзісь да жемчугись баситчаннэз. Киас сылӧн вӧлі зарниись керӧм доз, кӧда вӧлі тыра сэрпнас да кыскасьӧмыссянь нятьнас.

⁵ Кымӧс вылас сылӧн вӧлі гижӧм ним, кӧдӧ оз позь тӧдны, мый сія лоӧ: «Ыджыт Вавилон кар ─ му вылісь быдкодь сэрпӧсьыслӧн да кыскасиссеслӧн мам».

⁶ Ме казялі: сія вӧлі код. Кодззӧм тай Енлӧн вежа отир вирӧн да Исус йылісь висьтасиссез вирӧн. Сійӧ казялӧмсянь менӧ ӧддьӧн диво кутіс.

⁷ Ангелыс юаліс менчим: «Мыйсянь тэнӧ сідз диво кутіс? Ме вежӧртӧта, мый тӧдлытӧмыс инькаас да сизим юра да дас сюра вӧрпаас, кӧда сійӧ новйӧтӧ.

⁸ Вӧрпаыс, кӧдӧ тэ адззылін, кӧркӧ вӧлі, но ӧні сія абу. Пыдӧстӧминсис сія лӧсьӧтчӧ петны. Сія петас да лоас вийӧм. Сэк му вылын оліссесӧ, кӧдналӧн ниммезныс быдӧс аркмӧтӧмсянь ӧнӧдз абу гижӧмӧсь Олан Небӧгас, вӧрпасӧ казялӧмсянь диво кутас. Сія эд кӧркӧ вӧлі, ӧні абу, да бӧра локтас.

⁹ Эстӧн колӧ вежӧр да мывкыд. Сизим юрыс ─ сизим керӧс, кӧдна вылын пукалӧ инькаыс.

¹⁰ Сизим юрыс висьталӧны и сизим ӧксу йылісь. Ны коласісь витыс кулісӧ ни. Ӧтікыс юралӧ. Медбӧрьяыс эз на лок, но кӧр локтас, оз понды дыр юравны.

¹¹ Вӧрпаыс, кӧда кӧркӧ вӧлӧм, а ӧні абу ─ кыкьямысӧт ӧксу, сія сизимыс коласісь. Сія лоас вийӧм.

¹² Дас сюрыс, кӧднӧ тэ адззан ─ дас ӧксу. Нія эз на кутчисьлӧ юравны. Нылӧ сетасӧ юравны ӧтлаын вӧрпаыскӧт, но кадсӧ сетасӧ етша.

¹³ Дас ӧксуыс баитчасӧ и сетасӧ вынсӧ да юралӧмсӧ вӧрпаыслӧ.

¹⁴ Нія пондасӧ тышкасьны Дзельыскӧт. Дзельыс нійӧ вермас. Сія эд юраліссез вылын Юралісь, ӧксуэз вылын Ӧксу. Сыкӧт ӧтлаын Сылӧн корӧммес, бӧрйӧммес, надейнӧйес».

¹⁵ Ангелыс меным висьталіс: «Тэ адззылін ваэз, кӧдна дорын пукалӧ кыскасись инькаыс. Нія ваэс ─ му вылісь йӧзыс: быдпӧлӧс отир, чужан вужжез да быд кыв вылын баитіссез.

¹⁶ Вӧрпаыслӧ да дас сюрыслӧ, кӧднӧ тэ сы вылісь адззылін, кыскасись инькаыс син выланыс оз понды ковны. Нія сылісь быдӧс мырддясӧ, асьсӧ кушӧтасӧ. Вывтырсӧ сылісь сёясӧ да сотасӧ биын.

¹⁷ Еныс эд пуктіс нылӧ сьӧлӧм выланыс керны Аслас лӧсьӧтӧм сьӧрті: ас коласаныс баитчыны да ассиныс юралӧмнысӧ сетны вӧрпаыслӧ. Сылӧн юралӧмыс кыссяс, кытчӧдз быдӧс оз керсьы Енлӧн висьталӧм сьӧрті.

¹⁸ Инькаыс, кӧдӧ тэ адззылін, ─ ыджыт кар. Сія юралӧ му вылісь ӧксуэз вылын».