Осьтӧм 16 - Бур Юӧр 2019

¹ Сэк ме кылі Вежа Керкусис гора шы. Сизимнан ангеллӧ сія висьталіс: «Мунӧ, кисьтӧ му вылас Енлісь лӧгсӧ сизим доз».

² Медодзза ангел муніс да кисьтіс аслас дозісь Енлісь лӧгсӧ му вылас. Енлӧн лӧгсянь отирыс ӧдісӧ ӧддьӧн зубыт орсялан дойманнэзӧн. Ӧдісӧ дзир нія, кӧдна вылын вӧлі вӧрпаыслӧн пасыс да кӧдна копрасисӧ вӧрпаыс кодьӧ керӧмыслӧ.

³ Мӧдік ангел кисьтіс аслас дозісь саридзӧ. Саридзыс лоис кулӧмлӧн вир кодь. Быдӧс ловьяыс саридзсис куліс.

⁴ Куимӧт ангел кисьтіс аслас дозісь юэзӧ да ва петаніннэзӧ. Ваэс пӧртчисӧ вирӧ.

⁵ Сэк ме кылі ваэзлӧн ангеллісь висьталӧмсӧ: ─ Дӧсвидзисьным, Тэ веськыта Керись. Тэ Сія, Кӧда вӧлі и эм, Тэ вежа, Тэ эд веськыта судитін.

⁶ Нія кисьтісӧ вирсӧ вежа отирлісь да Тэсянь юӧртіссезлісь. Сы понда Тэ сетін нылӧ юны вирсӧ. Тэ нылӧ вештін керӧмныс сьӧрті.

⁷ Езъяланіныс дынсянь кыліс мӧдіклӧн баитӧм: ─ Сідз, Дӧсвидзись Енным, Дӧсвермисьным, судитікат Тэ он сорась, Тэ веськыта мыжьян.

⁸ Нёльӧт ангел кисьтіс аслас дозісь шонді вылӧ. Шондіыслӧ вӧлі сетӧм вын сотны отирсӧ биӧн.

⁹ Сылӧн ёна пӧжӧмсянь отирыс сотчисӧ. Нія видісӧ Енсӧ, Кинсянь локтісӧ этна умӧллес. Отирыс эзӧ бергӧтчӧ Енлань, медбы ошкыны Сійӧ.

¹⁰ Витӧт ангел кисьтіс аслас дозісь вӧрпалӧн юралан пукӧс вылӧ. Вӧрпаыслӧн юраланінас пемдіс. Отирыс зубытсяняс курччалісӧ ассиныс кыввезнысӧ.

¹¹ Нія ёрдісӧ енӧжись Енсӧ дойманнэзсяняс маитчӧмныс понда. Асланыс умӧль керӧммез кузя нія эзӧ тӧждісьӧ.

¹² Кватьӧт ангел кисьтіс аслас дозісь ыджыт Евфрат юӧ. Сэтісь ваыс косьмис. Сідз вӧлі лӧсьӧтӧм асыввылісь ӧксуэзлӧ туйыс.

¹³ Сэсся ме адззылі: гундыр ӧмись, вӧрпа ӧмись да бӧбӧтчись юӧртісь ӧмись петісӧ лягуша кодьӧсь куим сэрпӧсь лов.

¹⁴ Нія ─ кульлӧн ловвез, керӧны мыччалан пассэз. Нія иньдӧтчисӧ му вылісь ӧксуэз дынӧ, медбы ӧктыны нійӧ тышкасьны Дӧсвермись Енлӧн ыджыт тышкасян лунӧ.

¹⁵ «То, Ме локта гусясись моз видзчисьтӧг. Шуда мортыс, кӧда олӧ лӧсьӧтчӧмӧн да видзӧтӧ аслас паськӧм сьӧрын. Сія оз понды ветлӧтны ляч пасьтӧг, и оз сюр рожа кулянас».

¹⁶ Сэрпӧсь ловвес ӧктісӧ му вывсис ӧксуэсӧ ӧтіклаӧ. Сія местаыс шусьӧ еврей кыв вылын Армагеддон.

¹⁷ Сизимӧт ангел кисьтіс аслас дозісь руас. Сэк енӧжись Вежа Керкусис юралан пукӧсыс дынсянь кыліс горӧн висьталӧм: «Быдӧс керсис!»

¹⁸ Сэтӧн пондіс вирдавны да гымавны, кылісӧ гора шыэз, муыс пондіс ӧддьӧн зэгавны. Мортлӧн му вылас олӧм коста сэтшӧм ыджыт му зэгалӧмыс эз на вӧвлы. Сэтшӧм вынӧн зэгаліс муыс!

¹⁹ Ыджыт карыс паськаліс куим тор вылӧ. Быд муын каррес разьсисӧ. Еныс уськӧтіс тӧдвылас ыджыт Вавилон карсӧ да сетіс сылӧ юны Аслас лӧгӧн тыртӧм вина дозсӧ.

²⁰ Ва шӧрись муэс быдӧс ӧшисӧ. Керӧссэс эзӧ лоӧ.

²¹ Отирыс вылӧ енӧжсис усис ӧддьӧн гырись шер. Сія вӧлі ӧтік талант сьӧкыта. Отирыс видісӧ Енсӧ усьӧм шерыс понда. Сія умӧльыс эд отирсӧ ӧддьӧн дойдіс.