Осьтӧм 11 - Бур Юӧр 2019

¹ Меным сетісӧ меряйтан бедь да висьталісӧ: «Чеччы да мун меряйт Еныслісь Вежа Керкусӧ да езъяланінсӧ. Лыддьы сэтчинісь юрбитіссесӧ.

² Вежа Керкуыслісь ӧтӧрланись йӧрсӧ эн видзӧт, эн меряйт сійӧ. Сія сетӧм ентӧдтӧммеслӧ. Нія пондасӧ тальны вежа карсӧ нёльдас кык тӧлісь сьӧрна.

³ Ме ыста Ассим кык висьтавлісьӧс. Нія пасьтасясӧ чорыт паськӧмӧ да пондасӧ Месянь юӧртны сюрс кыксё кватьдас лун сьӧрна».

⁴ Нія висьтавліссес ─ кык випу да кык бивидзан. Нія сулалӧны мусӧ видзись Ен одзын.

⁵ Пондылас кӧ кинкӧ нылӧ умӧльсӧ керны, сэк висьтавліссес ӧмись петас би да сотас ны вылӧ лэбтісьӧм мортсӧ. Сідз кулас быд морт, кӧда лӧсьӧтчас нылӧ керны умӧльсӧ.

⁶ Нылӧн эм вын игнавны енӧжсӧ, медбы эз вӧв зэрыс Енсянь юӧртӧмныс коста. Нія вермӧны васӧ пӧртны вирӧ. Нылӧ кӧ колас, вермасӧ мусӧ тшыкӧтны быдкодь умӧльнас.

⁷ Юӧртан кадныс чулалӧм бӧрын ны вылӧ уськӧтчас вӧрпа. Сія петас пыдӧстӧминсис да кутчас ныкӧт тышкасьны. Вӧрпаыс висьтавліссесӧ вермас да вияс.

⁸ Нылісь шойезнысӧ коляс куйлыны ыджыт кар шӧрас. Сійӧ карсӧ отирлӧн оланныс сьӧрті позьӧ шуны Содомӧн да Египетӧн. Висьтавліссеслӧн Дӧсвидзисьныс вӧлі дорӧм сія жӧ карын.

⁹ Быдкодь отирись, чужан вужжезісь, быдкодь кыв вылын баитісь йӧзісь, быдкодь увтыррезісь уна отир пондасӧ видзӧтны ны шойез вылӧ куим да джын лун. Озӧ лэдзӧ нійӧ дзебны.

¹⁰ Ны кулӧмсянь му вылын оліссес пондасӧ гажӧтчыны. Ӧтамӧдныслӧ козьналасӧ козиннэз. Этна кык висьтавлісьыс эд ёна маитісӧ му вылын оліссесӧ.

¹¹ Куим да джын лун бӧрті Енлӧн олан лолыс пырис висьтавліссес пытшкӧ. Нія кыкнанныс чеччисӧ. Ны вылӧ видзӧтіссес ӧддьӧн повзисӧ.

¹² Висьталіссес кылісӧ енӧжсис гора шы: «Лэбтісьӧ татчӧ!» Лёк кериссез син одзын нія лэбтісисӧ енӧжас кымӧр вылын.

¹³ Сэтӧн жӧ муыс ёна зэгаліс. Карыслӧн дасӧт торыс разьсис. Му зэгалӧмыс коста вийсисӧ сизим сюрс морт. Ловйӧн кольччӧммес ӧддьӧн повзисӧ да ошкисӧ енӧжсис Енсӧ.

¹⁴ Мӧдік умӧльыс чулаліс. Сибалӧ ни куимӧт ыджытся-ыджыт умӧльыс.

Сизимӧт ангеллӧн буксанӧ пӧльтӧм

¹⁵ Сизимӧт ангел пондіс пӧльтны аслас буксанӧ. Сэк енӧжас кылісӧ гора шыэз. Нія баитісӧ: ─ Быдӧс вылын Юралісьнас сувтіс миян Дӧсвидзисьным да Сылӧн Мавтӧмыс. Сія пондас юравны пырся-пыр.

¹⁶ Сэк кыкдас нёль пӧрисьыс, кӧдна пукалӧны Еныс одзын асланыс юралан пукӧссэз вылын, уськӧтчисӧ кыминь да копыртчисӧ Еныслӧ.

¹⁷ Нія шувлісӧ: ─ Буркывтам Тэнӧ, Дӧсвидзись Енным, Дӧсвермисьным, Тэ эм, Тэ вӧлін и лоан. Тэ мыччалін Ассит ыджыт вынтӧ да босьтін юралӧмсӧ.

¹⁸ Ентӧдтӧммес лёксялісӧ, а ӧні кадыс локтіс Тэныт лӧгасьны. Локтіс кад судитны кулӧммесӧ да сетавны козиннэсӧ раббетлӧ: Тэсянь юӧртіссезлӧ, Аслат вежа отирлӧ, Тэись поліссезлӧ: учӧттэслӧ да ыджыттэслӧ. Локтіс кад орӧтны оланнысӧ мусӧ тшыкӧтіссеслісь!

¹⁹ Енӧжас Еныслӧн Вежа Керкуыс оссис. Сэтчин пондіс тыдавны Еныслӧн Йитӧтнас коробьяыс. Сэк пондіс вирдавны, гымавны, муыс пондіс зэгавны, кылісӧ гора шыэз да усис гырись шер.