Матвей 4 - Бур Юӧр 2019

¹ Сыбӧрын Исуссӧ Лов нуӧтіс кушмуӧ, медбы кульыс Сійӧ ылӧтліс.

² Исусыс кӧслуналіс нёльдас лун, нёльдас ой да ӧддьӧн тшыгьяліс.

³ Сэк Сы дынӧ локтіс ылӧтлісь да шуис: «Тэ кӧ Енлӧн Зон, висьтав, этна иззэс ась пӧртчӧны няньӧ».

⁴ Исусыс сылӧ висьталіс: «Гижӧм: "Дзир ӧтік няньӧн оз понды овны мортыс, а Енсянь петӧм быд кылӧн"».

⁵ Сэсся кульыс вайӧтіс Исуссӧ вежа Ерусалим карӧ да сувтӧтіс Вежа Керку вылӧ.

⁶ Сылӧ висьталіс: «Тэ кӧ Енлӧн Зон, уськӧтчы тасянь улӧ. Гижӧм тай: "Ассис ангеллэсӧ тшӧктас видзӧтны Тэ сьӧрын. Киэз выланыс нуӧтасӧ Тэнӧ, медбы коктӧ из бердӧ эн дойд"».

⁷ Исусыс паныт висьталіс: «Сэтӧн гижӧм и сідз: "Аслат Дӧсвидзись Енлісь мыласӧ эн пешлы!"»

⁸ Кульыс сэк кайӧтіс Исуссӧ вылын керӧсӧ да мыччаліс быдӧс олан муэзсис быдпӧлӧс бурсӧ да басӧксӧ.

⁹ Сыбӧрын Исусыслӧ шуис: «Копыртчан кӧ меным муӧдззас, сэк нійӧ быдӧс Тэныт сета».

¹⁰ Исусыс висьталіс: «Вешшы ме дынісь, сотана! Вежа Гижӧтыс тай висьталӧ: "Аслат Дӧсвидзись Енлӧ копрась, Сылӧ ӧтнаслӧ кысъяв!"»

¹¹ Сэк кульыс колис Исуссӧ. А Сылӧ отсавны локтісӧ ангеллэз.

Исус мунӧ Галилея муӧ

¹² Иоансӧ пуксьӧтісӧ. Этія йылісь кылӧм бӧрын Исусыс бертіс Галилея муӧ.

¹³ Назаретсис Сія муніс овны Капернаум карӧ, Галилея ты дорӧ. Сія муыс вӧлі Завулон да Неффалим увтырлӧн.

¹⁴ Сідз керсис Енсянь юӧртісь Исай пыр висьтавлӧмыс:

¹⁵ ─ Завулонлӧн му, Неффалимлӧн му, саридз дорӧт туй вылын Иордан ю сайын, ентӧдтӧм отира Галилея му!

¹⁶ Пемытын олісь отир казяліс дзар югытсӧ. Кулан вуджӧр увтын оліссеслӧ югытыс югйӧвтіс.

¹⁷ Сія кадсянь Исусыс пондіс юӧртны-висьтавлыны: «Бергӧтчӧ умӧль керӧммезныт дынісь! Енӧжись Юралӧмыс матын ни!»

Медодзза велӧтчиссез

¹⁸ Галилея ты дынӧт мунікӧ Исусыс казяліс кык вонӧс: Симонӧс, кӧдалӧн мӧд нимыс Петра, да сылісь Ӧндрей вонсӧ. Кыкнанныс кыяннысӧ вӧтьӧны вӧлі ваас. Нія эд вӧлісӧ чери кыйиссез.

¹⁹ Исусыс нылӧ шуис: «Локтӧ Ме сьӧрӧ! Ме тіянӧс кера морт кыйиссезӧн».

²⁰ Кык вон сэк жӧ колисӧ кыяннысӧ да мунісӧ Сы бӧрсянь.

²¹ Одзлань мунікӧ Исус казяліс пыжись мӧдік кык вонӧс: Яковӧс да Иоанӧс. Ныкӧт вӧлӧм Зеведей айныс. Нія вочӧны вӧлі кыяннэсӧ. Исусыс корис и нійӧ.

²² Нія колисӧ пыжсӧ, айнысӧ да мунісӧ Исусыс сьӧрӧ.

²³ Исусыс ветлӧтіс Галилея муӧт, велӧтіс синагогаэзын. Сія висьтасис Енлӧн Юралӧм йылісь Бур Юӧрсӧ, отирсӧ веськӧтіс быдкодь висьӧмись да быд шогӧтісь.

²⁴ Сы йылісь юӧрыс паськаліс Сирия муыс пасьта. Исусыс дынӧ быдлаын вайӧтлісӧ быдкодь шогӧтӧн шогаліссесӧ: зубытсянь да сэрпӧсь ловсянь пессись-мырсиссесӧ, усяліссесӧ, параличӧн личкӧм отирӧс. Сія быдӧннысӧ веськӧтліс.

²⁵ Исусыс сьӧрын ветлӧтіс унася-уна отир: Галилеяись, Дас карлӧн муись, Иудеяись, Иордан ю сайын муись да Ерусалим карись.