Матвей 21 - Бур Юӧр 2019

¹ Ерусалимӧ мунӧм коста Исус велӧтчиссескӧт сибӧтчис Виффагия посад дынӧ, кӧда сулаліс Виягӧд керӧс увтын. Исусыс кык велӧтчисьӧс ыстіс одзлань.

² Нылӧ висьталіс: «Мунӧ паныт сулалан посадӧ. Сэтчӧ пырикӧ тійӧ адззат дом йылын иньпӧв осёлӧс чаньнас. Домӧтсӧ пӧрччалӧ да вайӧтӧ нійӧ Ме дынӧ.

³ Тіянлӧ мыйкӧ шуасӧ кӧ, висьталӧ, нія пӧ колӧны Дӧсвидзисьнымлӧ. Нійӧ тіянлӧ бӧр вайӧтасӧ».

⁴ Быдӧс аркмис Енсянь юӧртісьлӧн висьталӧм сьӧрті:

⁵ ─ Висьталӧ Сион нывлӧ: Видзӧт, Ӧксуыт локтӧ тэ дынӧ! Рам Сія, верзьӧмӧн осёл вылын локтӧ, сийӧсалӧм осёллӧн чань вылын.

⁶ Велӧтчиссес мунісӧ да керисӧ тшӧктӧмыс сьӧрті.

⁷ Иньпӧв осёлсӧ чаньнас нія вайӧтісӧ, ны вылӧ пуктісӧ ассиныс паськӧмнысӧ. Сэсся Исусыс пуксис.

⁸ Отирыс коласісь унаӧн ассиныс паськӧмнысӧ ольсалісӧ туй вылас. Мукӧдыс чеглалісӧ пу уввез да тэчисӧ туй вылас.

⁹ Сы бӧрын да одзас мунісь отирыс горӧтлісӧ: Осанна! Ошкӧм Давид Зонлӧ! Бласлӧвитӧм Дӧсвидзись нимӧн Локтісьыс! Ошкам Медвылісь Енсӧ!

¹⁰ Исуслӧн Ерусалимӧ пырӧм бӧрын быдсӧн карыс вӧрзис. Быдӧнныс юасисӧ: «Кин Сія?»

¹¹ Отирыс висьтавлісӧ: «Сія Галилея муись, Назарет карись Енсянь юӧртісь Исус».

Вежа Керкуись вузасиссезӧс вашӧтӧм

¹² Исусыс пырис Вежа Керкуас да пондіс сэтчинісь вашӧтны вузасиссесӧ да небиссесӧ. Сія пӧрлаліс сьӧм вежиссеслісь пызаннэсӧ да дуді вузаліссеслісь лабиччесӧ.

¹³ Сэсся нылӧ висьталіс: «Гижӧм тай: "Менчим керкуӧс пондасӧ шуны кейман керку". А тійӧ сійӧ лёк кериссеслӧ позӧ пӧртіт!»

¹⁴ Вежа Керкуас Исуссӧ гӧгӧртісӧ синтӧммез да чотіссез. Сія нійӧ веськӧтіс.

¹⁵ Аркирейез да Туйдӧтӧ велӧтіссез син одзын Исусыс керис адззывлытӧмсӧ. Ны син одзын Вежа Керкуас челядьыс горӧтлісӧ: «Ошкӧм Давид Зонлӧ!» Сысянь нія лӧгасисӧ.

¹⁶ Нія Исусыслӧ висьталісӧ: «Кылан, мый челядьыс горӧтлӧны?» Исусыс нылӧ висьталіс: «Кыла. Тійӧ разь некӧр эдӧ лыддьӧтлӧ этнӧ кыввесӧ: "Тэ Аслыт ошкӧмсӧ лӧсьӧтін кагаэзсянь да челядьсянь"?»

¹⁷ Исусыс нійӧ колис да муніс карсис. Сія локтіс Вифания посадӧ. Сэтчин чулӧтіс ойсӧ.

Инжир пу ёрдӧм

¹⁸ Асъяпоннас карас бертӧм коста Исуслӧн пондӧм симавны кынӧмыс.

¹⁹ Туй дорсис Сія казяліс инжир пу да сибӧтчис. Но сы вылісь ӧтік воӧм эз адззы. Сія пуыслӧ висьталіс: «Тэ вылын сэсся некӧр оз ло воӧмыс». Инжир пуыс сэтӧн жӧ косьмис.

²⁰ Сійӧ адззӧмсянь велӧтчиссесӧ диво кутіс. Нія шуисӧ: «Кыдз сэтшӧм чожа косьмис пуыс?»

²¹ Исусыс нылӧ висьталіс: «Веськыта тіянлӧ висьтала: лоас кӧ тіян веритӧмныт да одӧ кӧ падмӧ, тійӧ керат эта пуыскӧт керӧмся унажык. Тійӧ эта керӧслӧ висьталат кӧ: "Лэбтісь да уськӧтчы саридзӧ" ─ лоас сідз.

²² Мый корат кеймиканыт веритӧмӧн, босьтатӧ».

Исуслӧн вын йылісь юасьӧм

²³ Исусыс локтіс Вежа Керкуӧ да велӧтіс. Сы дынӧ сибӧтчисӧ аркирейез бӧрйӧм пӧриссезкӧт. Нія юалісӧ Исуслісь: «Кытшӧм вынӧн Тэ быдӧс керан? Кин Тэнӧ сувтӧтіс сійӧ быдӧс керны?»

²⁴ Исусыс нылӧ шуис: «Ме и Ачым юала тіянлісь. Висьталат кӧ Меным юалӧмӧс, сэк и Ме висьтала, кытшӧм вынӧн быдӧс кера.

²⁵ Кытісь локтіс Иоанлӧн пыртчӧмыс? Енӧжсянь али мортсянь?» Нія ас коласаныс пондісӧ баитны: «Висьталам кӧ, енӧжсянь пӧ, Сія шуас: "Мыля нӧ тійӧ сылӧ эдӧ веритӧ?"

²⁶ Висьталам кӧ, мортсянь пӧ, отирсис полӧм петӧ, быдӧнныс эд Иоансӧ Енсянь юӧртісьӧ пуктӧны».

²⁷ Сэк нія висьталісӧ: «Огӧ тӧдӧ». Сэк Исусыс шуис: «И Ме тіянлӧ ог висьтав, кытшӧм вынӧн быдӧс кера».

Кык зон йылісь велӧтан висьт

²⁸ «Мый тійӧ этчӧ висьталат? Ӧтік мортлӧн вӧлӧмась кык зон. Сія локтӧм ӧт зоныс дынӧ да шуӧм: "Зонӧ, мун талун уджавны менам виноград йӧрын".

²⁹ Зоныс висьталас: "Ме ог мун". Сэсся сылӧ умӧль лоас сьӧлӧм вылас и сія мунас уджавны.

³⁰ Айыс сибӧтчас мӧд зоныс дынӧ да сідз жӧ висьталас. Зоныс шуас: "Муна, айӧ". Ачыс оз мун.

³¹ Кӧда зоныс айныс тшӧктӧм сьӧрті керис?» Нія шуисӧ: «Одззаыс». Исусыс нылӧ висьталіс: «Ме тіянлӧ быльсӧ висьтала: лэдзчисьӧм инькаэс да вот ӧктіссес Енлӧн Юраланінӧ тіянся одзжык мунӧны.

³² Иоан локтіс тіянлӧ мыччавны Ен дынӧ туй. Тійӧ сылӧ эдӧ веритӧ. Лэдзчисьӧм инькаэс да вот ӧктіссес сылӧ веритісӧ. Нельки сійӧ быдӧс адззылӧм бӧрын тійӧ эдӧ бергӧтчӧ умӧльсӧ керӧммезныт дынісь да эдӧ веритӧ сылӧ».

Виноград вӧдитіссез йылісь велӧтан висьт

³³ «Кывзӧ мӧдік велӧтан висьт. Ӧтік морт аслас муӧ сюйыштас винограддэз да нійӧ йӧрьяс. Керас виноград пичканін. Вылына лэбтас виноград йӧр сьӧрын видзӧтланін. Сыбӧрын ассис йӧрсӧ виноград вӧдитіссезлӧ кӧртымӧ сетас. Ачыс мунас.

³⁴ Локтас виноград ӧктан кад. Сія иньдас ассис раббесӧ виноград вӧдитіссез дынӧ, медбы воӧм виноградсис босьтны ассис пайсӧ.

³⁵ Виноград вӧдитіссес раббесӧ кутасӧ: ӧтікӧс вартласӧ, мӧдікӧс ─ виясӧ, мукӧдсӧ ─ иззэзӧн шупкаласӧ.

³⁶ Мортыс бӧра ыстас ассис раббесӧ одззася унажык. И ныкӧт сідз керасӧ.

³⁷ Медбӧрын ны дынӧ ыстас ассис зонсӧ. Сія висьталас: "Менчим зонӧс нія озӧ лысьтӧ вӧрзьӧтны".

³⁸ Виноград вӧдитіссес казяласӧ зонсӧ да ӧтамӧдныслӧ шуасӧ: "Сылӧ быдӧс пажытьыс вуджас. Виям сійӧ. Сэк быдӧс миянлӧ дӧнзяс".

³⁹ Нія зонкасӧ кутасӧ, петкӧтасӧ виноград йӧрсис да виясӧ.

⁴⁰ Кӧзяиныс локтас да мый керас виноград вӧдитіссескӧт?»

⁴¹ Нія шуисӧ: «Лёк йӧзсӧ сія сетас сьӧкыта вийны. Виноград йӧрсӧ сетас мӧдік виноград вӧдитіссезлӧ. Нія воӧм ягӧдсӧ сылӧ пондасӧ сетны аскадӧ».

⁴² Исусыс нылӧ висьталіс: «Эдӧ я тійӧ некӧр лыддьӧтлӧ Вежа Гижӧтсис: ─ Изыс, кӧдӧ керку лэбтіссес абутӧм туйӧ пуктісӧ, лоис пельӧс изӧн. Сійӧ керис Дӧсвидзисьыс. Миян синнэзлӧ сія диво.

⁴³ Сійӧн ме тіянлӧ висьтала: Енлісь Юралӧмсӧ тіянлісь мырддясӧ. Сійӧ сетасӧ отирлӧ, кӧдна вайӧны Ен Юралӧмлісь воӧмсӧ.

⁴⁴ Быдыс, кин усяс сія из вылӧ, лыэсӧ чеглалас. Кин вылӧ изыс усяс, сійӧ личкас».

⁴⁵ Этнӧ велӧтан висьттэсӧ кылӧм бӧрын аркирейес фарисейескӧт вежӧртӧмась, Исусыс пӧ ны йылісь висьталіс.

⁴⁶ Нія Исуссӧ мӧдӧмась кутны, но полӧмась отирсис. Отирыс эд Исуссӧ лыддисӧ Енсянь Юӧртісьӧн.