Матвей 10 - Бур Юӧр 2019

¹ Исусыс корис дынас даскыкнан велӧтчисьсӧ, сетіс нылӧ вын вашӧтлыны сэрпӧсь ловвесӧ, веськӧтны быдкодь шогӧттэз да висьӧммез.

² Даскык апостоллӧн ниммезныс сэтшӧмӧсь: Симон, мӧд нимыс сылӧн Петра, сылӧн Ӧндрей вон, Зеведейлӧн Яков да Иоан зоннэз,

³ Филип, Варфоломей, Фома, вот ӧктісь Матвей, Алфей Яков, Леввей, мӧд нимыс сылӧн Фаддей,

⁴ Кананит Симон да Искариот Иуда, кӧда и вузаліс Исуссӧ.

Даскык велӧтчисьӧс удж вылӧ ыстӧм

⁵ Даскык велӧтчисьсӧ ыстікӧ Исусыс нійӧ велӧтіс: «Енсӧ тӧдтӧм отир дынӧт эд ветлӧтӧ, Самария каррезӧ эд пырӧ.

⁶ Мунӧ Израильлӧн ӧшӧм баляэз дынӧ.

⁷ Ветлӧтіканыт юӧртӧ: "Енӧжись Юралӧмыс матын ни".

⁸ Шогаліссесӧ веськӧтӧ, проказаӧссесӧ сӧстӧмтӧ, кулӧммесӧ ловзьӧтӧ, сэрпӧсь ловвесӧ вашӧтлӧ. Тійӧ весь босьтіт, весь и сеталӧ.

⁹ Туйӧ петікӧ зарни, эзысь, ыргӧн сьӧм кушаканыт эд сюйӧ.

¹⁰ Кӧзича, вежан паськӧм, кӧмкӧт, бедь эд босьтӧ. Уджалісьыс тшыгйӧн оз кольччы.

¹¹ Карӧ, посадӧ пыртӧн юасьӧ сэтісь туяна мортӧс, кӧда ордын позьӧ сувтчыны. Одзлань мунтӧдз олӧ сы ордын.

¹² Керкуас пыртӧн висьталӧ: "Лӧнь олан этія керкуын оліссезлӧ!"

¹³ Керкуын оліссес туяна отир кӧ, лӧнь оланыс сія керкуӧ пырас. Абу туянаӧсь кӧ, лӧнь оланыс тіянлӧ бертас.

¹⁴ Тіянӧс озӧ кӧ лэдзӧ да озӧ кывзӧ висьталӧм кыввезнытӧ, сэк керкуись али карись петтӧн коккезсиныт буссӧ пыркӧтӧ.

¹⁵ Ме тіянлӧ быльсӧ висьтала: Суд Лунӧ Содом да Гоморра каррезлӧ лоас кокнитжык нія каррезся».

Одзланься пессьӧм-мырсьӧм йылісь висьталӧм

¹⁶ «Ме тіянӧс ыста баляэзӧс моз кӧиннэз коласӧ. Кыйез моз лоӧ мывкыдаӧсь, дудіэз моз рамӧсь.

¹⁷ Отиркӧт видзсьӧ видзӧтчӧмӧн: нія тіянӧс пондасӧ вайӧтны судитаніннэзӧ, синагогаэзын тіянӧс пондасӧ вартлыны.

¹⁸ Ме понда тіянӧс сувтӧтасӧ юраліссез да ӧксуэз одзӧ, медбы тійӧ висьтасит нылӧ да ентӧдтӧммеслӧ Ме йылісь.

¹⁹ Кӧр тіянӧс вайӧтасӧ судитанінӧ, юраныт эд видзӧ, мый пондат баитны. Сія кадӧ тіянлӧ лоас сетӧм, мый висьтавны.

²⁰ Сэк тійӧ одӧ пондӧ баитны асьныт, тіян пытшкын пондас баитны Ен Айнытлӧн Лолыс.

²¹ Вон ассис вонсӧ сетас вийны, ай ─ ассис челядьсӧ, челядь лэбтісясӧ ай-мамныс вылӧ да нійӧ виясӧ.

²² Ме понда быдӧнныслӧ тійӧ син вылӧ одӧ пондӧ ковны. Кин медбӧрӧдз вермас видзсьыны, сія мезмас.

²³ Ӧтік карись тіянӧс вашӧтасӧ кӧ, пышшӧ мӧдік карӧ. Веськыта тіянлӧ висьтала: Израились и быдӧс карресӧ одӧ ештӧ кытшӧвтны, кыдз Морт Зоныс локтас.

²⁴ Велӧтчись велӧтісься абу сувтӧтӧм вылынжыка, сідз и кысъялісь аслас кӧзяинся.

²⁵ Велӧтчисьлӧ тырмӧ велӧтісьыс кодьӧдз быдмыны. Кысъялісьлӧ тырмӧ кӧзяиныс кодьӧн лоны. Керкусис кӧзяинсӧ шуисӧ кӧ вельзевулӧн, сылісь гортіссесӧ эшӧ умӧльжыка нимкодяласӧ».

Повтӧг овны велӧтӧм

²⁶ «Но тійӧ эд полӧ тіянӧс умӧльӧ пуктіссезісь. Быдӧс сайӧвтӧмыс оссьӧ, быд гусьӧна керӧм йылісь пондӧны тӧдны.

²⁷ Мый Ме тіянлӧ висьтала пемытӧн, тійӧ висьталӧ югытӧн. Пеллезаныт шушкӧмсӧ отирлӧ висьтасьӧ керку вывсянь.

²⁸ Эд полӧ вывтыр вийиссезісь, ловнытӧ эд нія вийны озӧ вермӧ. Полӧ Сыись, Кин вермӧ лов и вывтыр куслытӧм биын сотны.

²⁹ Оз я вузалӧ кык учӧт пышкайӧс ӧтік учӧт сьӧм вылӧ? Пышкайес коласісь нельки ӧтікыс оз усь му вылас, оз кӧ лэдз Айныт.

³⁰ А тіян и юрси тылӧппэзныт лыддьӧмӧсь.

³¹ Сідзкӧ, эд полӧ: тійӧ эд пышкайезся донажыкӧсь!

Ассит крест босьтӧм йылісь

³² Кин отир одзын оз повзьы Менӧ тӧдӧм йылісь висьтасьны, сійӧ Ме пукта Аслам мортӧ енӧжись Айӧ одзын.

³³ Йӧз одзын кин суськисяс Менӧ тӧдӧмись, сійӧ и Ме енӧжись Айӧ одзын пукта тӧдтӧм мортӧ».

³⁴ «Юраныт эд видзӧ, Ме пӧ локті вайны му вылӧ лӧнь олан. Ме локті вайны не лӧнь олан, но шыпурт.

³⁵ Ме локті янсӧтны зонсӧ айкӧт, нывсӧ мамкӧт, моньсӧ анькӧт.

³⁶ Мортыс вылӧ лэбтісясӧ гортіссес.

³⁷ Мортыс ассис ай-мамсӧ радейтӧ кӧ Месся буржыка, Меным сія абу туяна морт. Кин ассис нывсӧ али зонсӧ радейтӧ кӧ Месся буржыка, Меным сія абу туяна морт.

³⁸ Кин ме бӧрсянь мунӧ Ассис крестсӧ босьттӧг кӧ, Меным сія абу туяна морт.

³⁹ Кин мӧдӧ видзны ассис олансӧ, сійӧ ӧштас. Кин Ме понда ӧштас ассис олансӧ, сійӧ адззас».

Козин сетӧм йылісь

⁴⁰ «Кин тіянӧс гортас лэдзӧ, сія Менӧ лэдзӧ. Кин Менӧ лэдзӧ, сія лэдзӧ Менӧ Ыстісьсӧ.

⁴¹ Кин Енсянь юӧртісьсӧ гортас лэдзӧ кыдз Енсянь юӧртісьӧс, сія козинсӧ босьтас кыдз Енсянь юӧртісь. Ен сьӧрті веськыта олісьӧс гортас лэдзисьлӧ лоас козиныс кыдз Ен сьӧрті веськыта олісьлӧ. Сія эд тӧдіс, мортыс Ен сьӧрті веськыта олісь да лэдзис гортас.

⁴² Быльсӧ висьтала тіянлӧ: кин кӧдзыт ваӧн юкталас учӧтӧ пуктӧм мортсӧ кыдз Менчим велӧтчисьӧс, сія козинтӧг оз кольччы».