Марк 9 - Бур Юӧр 2019

¹ Исусыс висьталіс нылӧ: «Быльсӧ висьтала тіянлӧ: эстӧн сулаліссез коласын эмӧсь нія, кӧдна кувтӧдззаныс адззыласӧ Енлӧн Юралӧмлісь вына локтӧмсӧ».

Исуслӧн вежсьӧм

² Квать лун бӧрті Исусыс босьтіс сьӧрас Петраӧс, Яковӧс да Иоанӧс. Сія ныкӧт ӧтнаныскӧт кайис вылын керӧсӧ. Велӧтчиссез син одзын Исусыс вежсис.

³ Сылӧн паськӧмыс пондіс свиттявны, лоис син гусялана лым кодь чочком. Му вылас сідз некин оз вермы чочкомтны дӧрасӧ.

⁴ Ны одзӧ мыччисисӧ Моисей да Илля. Нія баитісӧ Исусыскӧт.

⁵ Петра Исусыслӧ висьталіс: «Велӧтісь, миянлӧ татӧн ӧддьӧн бур. Керам татчӧ куим шалаш: ӧтікӧ Тэныт, ӧтікӧ Моисейлӧ да ӧтікӧ Иллялӧ».

⁶ Петраыс эз тӧд, мый и баитӧ, нія эд ӧддьӧн повзисӧ.

⁷ Сэтӧн мыччисис кымӧр да быдӧннысӧ вевттис, и сэтчинсянь кыліс баитан шы: «Сія Менам дона Зонӧ, Сійӧ кывзӧ!»

⁸ Сэк жӧ велӧтчиссес дзарнитісӧ, но некинӧс эзӧ казялӧ, Исусыс вӧлі ӧтнас.

⁹ Керӧсісь лэдзчытӧнняс Исусыс висьталіс: «Морт Зонлӧн кулӧмись ловзьӧмӧдз адззылӧмныт йылісь некинлӧ эд висьтасьӧ».

¹⁰ Нія кывнысӧ видзисӧ, но ӧтамӧдныслісь юасисӧ, кыдз вежӧртны «кулӧмись ловзьӧмсӧ».

¹¹ Велӧтчиссес юалісӧ Исусыслісь: «Мыля Туйдӧтӧ велӧтіссес шуӧны, Мездӧтісься одзжык Иллялӧ пӧ колӧ локны?»

¹² Сія нылӧ висьталіс: «Былись, Илляыслӧ ковсяс локны одзжык да быдӧс лӧсьӧтны. А Морт Зон йылісь гижӧм, Сылӧ пӧ ковсяс уна пессьыны-мырсьыны. Сійӧ пӧ ӧддьӧн умӧльтасӧ.

¹³ Ме висьтала тіянлӧ: Илляыс локтіс ни, сыкӧт отирыс керисӧ сідз, кыдз нылӧ коліс. Сідз и вӧлі гижӧм сы йылісь».

Зонка пытшкись сэрпӧсь лолӧс вашӧтӧм

¹⁴ Исус, Петра, Яков да Иоан локтісӧ мӧд велӧтчиссес дынӧ. Ны дынӧ ӧксьӧм вӧлі уна отир. Сэтӧн вӧлісӧ Туйдӧтӧ велӧтіссез, кӧдна етшасисӧ ныкӧт.

¹⁵ Кӧр отирыс казялісӧ Исуссӧ, нійӧ диво кутіс. Отирыс котӧртісӧ пантавны Сійӧ.

¹⁶ Исусыс юаліс Туйдӧтӧ велӧтіссеслісь: «Мый йылісь етшасят?»

¹⁷ Отирыс коласісь ӧтік морт висьталіс: «Велӧтісь, ме вайӧті Тэ дынӧ ассим зонӧс. Сія оз вермы баитны, сы пытшкын сэрпӧсь лов.

¹⁸ Кӧр сэрпӧсь лолыс кутӧ сійӧ да чапкӧ му вылас, сэк зонӧ лэдзӧ ӧмсис быг, йирӧ пиннесӧ да тувдӧ. Ме кори тэнчит велӧтчиссетӧ вашӧтны сэрпӧсь ловсӧ, но нія эзӧ вермӧ».

¹⁹ Исусыс горӧтчис: «Вериттӧм отир! Кытчӧдз Ме лоа тіянкӧт? Дыр я Меным видзӧтны тіян вылӧ? Вайӧтӧ зонкасӧ Ме дынӧ».

²⁰ Сійӧ вайӧтісӧ Исусыс дынӧ. Кӧр сэрпӧсь лолыс казяліс Исуссӧ, сія зэгнитіс зонкасӧ. Мӧдыс усис му вылас, туплясис да лэдзис ӧмсис быг.

²¹ Исусыс юаліс зонкаыс айлісь: «Важын я эттшӧмыс сыкӧт лоис?» Сія шуис: «Челядь кадсянь.

²² Унаись сэрпӧсь лолыс чапкывліс зонӧс биӧ да ваӧ, медбы вийны сійӧ. Верман кӧ, жалейт миянӧс, отсав миянлӧ».

²³ Исусыс висьталіс сылӧ: «Веритан кӧ, быдӧс позьӧ керны веритісьлӧ».

²⁴ Сэк жӧ зонкаыслӧн айыс синвасорӧн горӧтіс: «Верита, Дӧсвидзись! Отсав меным веритны!»

²⁵ Исусыс казяліс, сэтчӧ котӧрӧн чукӧртчӧ отир. Сэк Сія ӧліс сэрпӧсь ловсӧ: «Кыв гусялісь да пеллез тупкалісь сэрпӧсь лов, Ме тшӧкта тэныт петны зонкаыс пытшкись. Сэсся эн пыр сы пытшкӧ».

²⁶ Сэрпӧсь лов горӧтіс, ойтӧлӧн бура пиньӧвтіс зонкасӧ да петіс. Зонкаыс куйліс шой кодь. Отирыс шуисӧ: «Сія куліс».

²⁷ Но Исусыс кутіс зонкасӧ киӧттяс да лэбтіс, мӧдыс чеччис.

²⁸ Керкуӧ пырӧм бӧрын Исуслӧн велӧтчиссес Сылісь юалісӧ: «Мыля мийӧ эгӧ вермӧ вашӧтны сэрпӧсь ловсӧ?»

²⁹ Исусыс висьталіс нылӧ: «Эттшӧммесӧ верман вашӧтны дзир Енлӧ кеймӧмӧн да кӧслуналӧмӧн».

Исус бӧра висьталӧ Аслас кулӧм йылісь

³⁰ Исусыс велӧтчиссескӧт петіс сэтчинісь да муніс Галилеяӧт. Сылӧ коліс, медбы некин эз тӧд Сылісь мунӧмсӧ.

³¹ Сылӧ эд коліс велӧтны Ассис велӧтчиссесӧ. Исусыс висьталіс нылӧ: «Морт Зонсӧ сетасӧ отир киэзӧ. Нія Сійӧ виясӧ, но куим лун бӧрті Сія ловзяс».

³² Велӧтчиссес эзӧ вежӧртӧ висьталӧмсӧ, а юасьны Сылісь полісӧ.

Кин ыджытжык?

³³ Нія локтісӧ Капернаум карӧ. Керкуас Исусыс юаліс велӧтчиссеслісь: «Мый йылісь тійӧ баитіт туй вылас?»

³⁴ Нія шы эзӧ сетӧ. Туй вылас эд нія етшасисӧ, кин пӧ ны коласын ыджытжыкыс.

³⁵ Исусыс пуксис, корис дынас даскыкнан велӧтчисьсӧ да шуис нылӧ: «Кин мӧдӧ лоны медодззаӧн, ась лоӧ быдӧнныс коласын медбӧрьяӧн да быдӧнныслӧ кысъялісьӧн».

³⁶ Сія босьтіс кага да сувтӧтіс сійӧ ны шӧрӧ. Кагасӧ кутыштіс да нылӧ шуис:

³⁷ «Кин Менам нимӧн босьтӧ дынас эттшӧм ӧтік кага, сія босьтӧ Менӧ. Кин босьтӧ Менӧ, сія Мекӧт босьтӧ и Менӧ Ыстісьсӧ».

Кин тіян дор

³⁸ Иоан шуис: «Велӧтісь! Мийӧ адззылім Тэнат нимӧн сэрпӧсь ловвесӧ вашӧтлісь мортӧс. Мийӧ сійӧ падмӧтім, миянкӧт оз ветлӧт да».

³⁹ Исусыс висьталіс: «Мортсӧ эд падмӧтӧ. Менам нимӧн мортыс керис кӧ адззывлытӧмсӧ, сія оз вермы сэк жӧ Менӧ видны.

⁴⁰ Кин тіян вылӧ оз лэбтісь, сія тіян дор.

⁴¹ Быльсӧ висьтала тіянлӧ: кин юкталас тіянӧс ваӧн, кыдз Кристослісь мортӧс, сія оз кольччы козинтӧг».

Ылӧтӧм йылісь висьталӧм

⁴² «Кин ылӧтас эттшӧм ӧтік учӧтӧс, кӧда веритӧ Меным, сылӧ вӧлі бы буржык, кӧбы кышалісӧ голяас изын да шентісӧ сійӧ саридзӧ.

⁴³ Киыт кӧ тэнӧ ылӧтӧ керны умӧльсӧ, орӧт сійӧ. Буржык эд пӧв киаӧн пырны пырся оланас, нежели сюрны кык киаӧн адӧ, куслытӧм биӧ.

⁴⁴ Адас "гагыс оз кувлы да биыс оз куслы".

⁴⁵ Кокыт кӧ тэнӧ ылӧтӧ керны умӧльсӧ, орӧт сійӧ. Буржык тэныт пӧв кокӧн пырны оланас, нежели кык кокаӧн сюрны адӧ.

⁴⁶ Адас "гагыс оз кувлы да биыс оз куслы".

⁴⁷ Синыт кӧ тэнӧ ылӧтӧ керны умӧльсӧ, сійӧ кыскы да чапкы. Буржык тэныт Енлӧн Юраланінӧ пырны пӧв синаӧн, нежели кык синаӧн лоны шупкӧмӧн биа адӧ.

⁴⁸ Адас "гагыс оз кувлы да биыс оз куслы".

⁴⁹ Быдсӧ сӧстӧмтасӧ биӧн, кыдз езъялан козинсӧ солӧн.

⁵⁰ Солыс ─ буртор. Но лоас кӧ солыс дуб, мыйӧн сійӧ керан соланас? Солыс ась лоӧ тіян пытшкын, ас коласаныт олӧ лӧсялӧмӧн».