Марк 6 - Бур Юӧр 2019

¹ Исусыс локтіс аслас карӧ. Сы сьӧрын мунісӧ Сылӧн велӧтчиссес.

² Шоччисян лунӧ Исусыс пондіс велӧтны синагогаын. Кывзіссес коласісь унаӧн дивуйтчӧмӧн баитісӧ: «Кысянь Сылӧн эта? Кытшӧм сэтшӧм уна мывкыд Сылӧ сетӧм? Кыдз эттшӧм адззывлытӧммесӧ керӧ Аслас киэзӧн?

³ Абу разь Сія черӧн уджалісь, Мариялӧн зон? Абу разь Сія Яковлӧн, Иосиялӧн, Иудалӧн да Симонлӧн вон? Озӧ разь олӧ миян коласын Сылӧн сойес?» И нія эзӧ веритӧ Сылӧ.

⁴ Исусыс нылӧ висьталіс: «Енсянь юӧртісьӧс быдлаын бурӧ пуктӧны, озӧ дзир аслас карын, ас увтырын да ас гортын».

⁵ Сія эз вермы керны сэтчин адззывлытӧммесӧ, дзир кынымкӧ шогалісь вылӧ киэсӧ пуктылӧмӧн веськӧтіс нійӧ.

⁶ Исуссӧ диво кутіс, мыля нія эзӧ веритӧ. Исусыс ветлӧтіс матісь посаддэзӧт да велӧтіс.

Велӧтчиссезӧс ысталӧм

⁷ Сія корис дынас даскык велӧтчисьсӧ. Нылӧ сетіс сэрпӧсь ловвезӧс вашӧтан вын. Сэсся кык мортӧн пондіс ыставны нійӧ велӧтны отирсӧ.

⁸ Туйӧ петікӧ ӧтік бедься сьӧраныс нем эз тшӧкты босьтны. Висьталіс: «Нянь, кӧзича, сьӧм,

⁹ вежан кӧмкӧт да паськӧм эд босьтӧ».

¹⁰ Исусыс нылӧ висьталіс: «Кытшӧм керкуӧ пырат, одзлань мунтӧдз олӧ сэтӧн.

¹¹ Кытчӧ тіянӧс озӧ лэдзӧ да кытӧн озӧ кывзӧ, сэтісь петтӧн пыркӧтӧ коккезсиныт буссӧ. Суд Лунас сія лоас ны вылӧ висьталӧм. Ме тіянлӧ быльсӧ висьтала: нылӧ Суд Лунас лоас сьӧкытжык Содом да Гоморра каррезся».

¹² Велӧтчиссес мунісӧ да висьтасисӧ, медбы отирыс асланыс умӧль керӧммез дынісь бергӧтчисӧ Енлань.

¹³ Уна сэрпӧсь лолӧс нія вашӧтісӧ отирись да виӧн мавтӧмӧн веськӧтісӧ уна шогалісьӧс.

Пыртісь Иоанлӧн кулӧм

¹⁴ Исусыс йылісь баитісӧ быдлаын. Кывсьӧм и Ирод ӧксулӧ. Отирыс шуисӧ: «Сія Пыртісь Иоан ловзьӧм. Сійӧн Сія вермӧ керны уна адззывлытӧмсӧ».

¹⁵ Мӧдіккез баитісӧ: «Сія Илля». Мукӧдыс шуисӧ: «Сія кӧркӧся кодь Енсянь юӧртісь».

¹⁶ Иродыс кыліс этӧ да шуис: «Сія Иоаныс ловзьӧм, кӧдалісь ме орӧті юрсӧ».

¹⁷ Иродыс эд кӧркӧ тшӧктӧм вӧлі кутны Иоансӧ да пуксьӧтны Иродиада понда, кӧда вӧлӧм Иродыс Филип вонлӧн инь. Иродыс гӧтрасьӧм сы вылын.

¹⁸ Иоаныс жӧ баитлӧм Иродыслӧ: «Оз позь тэныт овны аслат вонлӧн инькӧт».

¹⁹ Сысянь Иродиадаыс лӧгасьӧм Иоаныс вылӧ и мӧдӧм сійӧ вийны, но абу вермӧм нем керны.

²⁰ Иродыс тӧдӧм: Иоаныс Ен сьӧрті веськыта олісь да вежа морт. Сія полӧм Иоансис да сійӧ дорйӧм. Сія уна керӧм Иоанлӧн висьталӧм сьӧрті. Иродлӧ гленитчӧм кывзыны сійӧ.

²¹ Иродиадалӧ лӧсяліс сэтшӧм луныс, кӧр позис вийны Иоансӧ. Иродыс порйӧтны ассис чужан лунсӧ рочалӧм юраліссесӧ, воиннэзӧн веськӧтліссесӧ да Галилеяись бӧрйӧм пӧриссесӧ.

²² Иродиадаыслӧн нылыс локтӧм ны дынӧ да йӧктӧм. Йӧктӧмыс гленитчӧм Иродыслӧ да сыкӧт пукаліссезлӧ. Ӧксу нывкаыслӧ висьталӧм: «Кор менчим, мый тэныт колӧ, ме сета тэныт».

²³ Иродыс сетӧм сылӧ кыв: «Сета тэныт быдӧс, мый коран, аслам юраланінісь нельки джын мусӧ».

²⁴ Нывкаыс петӧм да юалӧм мамыслісь: «Мый корны?» Мӧдыс висьталӧм: «Пыртісь Иоанлісь юрсӧ».

²⁵ Нывкаыс сэк жӧ перыта мунӧм ӧксуыс дынӧ да корӧм: «Ӧні жӧ вай меным бекӧрын Пыртісь Иоанлісь юрсӧ».

²⁶ Иродсӧ гажтӧмыс кутӧм, но отир одзын сетӧм кыв кузя абу керсьӧм бӧрлань.

²⁷ Сэк жӧ ӧксуыс ыстӧм мортӧс да тшӧктӧм вайны Иоанлісь юрсӧ.

²⁸ Мӧдыс мунӧм да сылісь юрсӧ орӧтӧм, вайӧм сійӧ бекӧрын да сетӧм нывкаыслӧ. Нывкаыс юрсӧ сетӧм аслас мамлӧ.

²⁹ Иоанлӧн велӧтчиссес кылӧмась лоӧмыс йылісь. Нія локтӧмась, босьтӧмась сылісь шойсӧ да дзебӧмась.

Вит сюрс мортӧс вердӧм

³⁰ Апостоллэс бертісӧ Исус дынӧ да висьтасисӧ быдӧс, мый керисӧ да мыйӧ велӧтісӧ отирсӧ.

³¹ Сія нылӧ висьталіс: «А ӧні мунӧ ӧтнаныт, кытӧн некин абу, да шоччисьыштӧ». Ныкӧт пыр вӧлі уна отир, ӧтіккез мунлісӧ, мӧдіккез вовлісӧ, сійӧн нія эзӧ ештӧ нельки сёйны.

³² Нія ӧтнаныс уйисӧ пыжын овтӧминӧ.

³³ Уна отир тӧдісӧ нійӧ да казялісӧ нылісь уйӧмсӧ. Быдӧс каррезісь отир котӧртісӧ овтӧминас да локтісӧ сэтчин нысся одзжык.

³⁴ Исусыс чеччис пыжсис да казяліс отирсӧ. Сылӧ жаль вӧлі отирсӧ, нія эд вӧлісӧ кыдз баля чукӧр, кӧдналӧн абу видзӧтісьныс. Сія нійӧ пондіс унаӧ велӧтны.

³⁵ Дыр мыйись велӧтчиссес сибӧтчисӧ Исусыс дынӧ да шуисӧ: «Кадыс уна ни, а эстӧн овтӧмин.

³⁶ Ысты отирсӧ матісь посаддэзӧ да оланіннэзӧ небны аслыныс сёянсӧ».

³⁷ Сія нылӧ висьталіс: «Тійӧ сетӧ нылӧ сёйны». Велӧтчиссес Сылӧ шуисӧ: «Вермам разь ветлыны да небны няньсӧ сымда отирыслӧ? Сьӧмыс эд колӧ кык сё динарий, медбы вердны быдӧннысӧ!»

³⁸ Исусыс нылісь юаліс: «Мымда тіян няньныт? Мунӧ видзӧтӧ». Нія видзӧтісӧ да висьталісӧ: «Вит нянь да кык чери».

³⁹ Исусыс тшӧктіс пуксьӧтны быдӧннысӧ зелёнӧй турун вылас чукӧррезӧн.

⁴⁰ Отирыс пуксисӧ лёдззезӧ сёӧн да витдас мортӧн.

⁴¹ Исусыс босьтіс вит няньсӧ кык черинас. Енӧжӧ видзӧтӧмӧн бласлӧвитіс сёянсӧ, чеглаліс няньсӧ да сетіс велӧтчиссеслӧ, а нія ─ отирыслӧ. Кык черисӧ Сія торйӧтіс быдӧнныслӧ.

⁴² Отирыс сёйисӧ пӧттӧдз.

⁴³ Кольӧм нянь торресӧ да чери торресӧ ӧктісӧ даскык куд тырйӧн.

⁴⁴ Сёйиссес вӧлісӧ вит сюрс гӧгӧр ай морт.

Исуслӧн ва кузя мунӧм

⁴⁵ Сэк жӧ Исусыс тшӧктіс ассис велӧтчиссесӧ пуксьыны пыжӧ да вуджны ты мӧдӧрас Вифсаидаӧ, а Ачыс кольччис лэдзны отирсӧ.

⁴⁶ Исусыс лэдзӧм отирсӧ да кайӧм керӧс вылӧ кеймыны.

⁴⁷ Рытнас пыжыс вӧлі ты шӧрас, Исусыс му вылас вӧлі ӧтнас.

⁴⁸ Сія казялӧм, велӧтчиссеслӧн садьныс бырис сынны тӧв паныт. Асъяпоннас Сія иньдӧтчис подӧн ты вылӧттяс. Исусыс сибаліс велӧтчиссес дынӧ да мӧдіс орддьыны нійӧ.

⁴⁹ Велӧтчиссес казялісӧ Сійӧ ва вылас. Нія юраныс пыртісӧ, миянлӧ пӧ мыччасьӧ. Нія пондісӧ горӧтны.

⁵⁰ Сійӧ казялӧмсянь быдӧнныс повзисӧ. Сэк жӧ Исусыс пондіс баитны ныкӧт: «Лӧньсьӧ, эд полӧ, этӧ Ме».

⁵¹ Сія пуксис ны дынӧ пыжас, и тӧлыс лӧньсис. Велӧтчиссесӧ ӧддьӧнжык диво кутіс.

⁵² Чорзьӧм сьӧлӧмныс кузя эд няньнас адззывлытӧма вердӧмыс нійӧ немӧ эз велӧт.

Шогаліссезӧс веськӧтӧм

⁵³ Исусыс да велӧтчиссес вуджисӧ тысӧ да локтісӧ Генисарет муӧ.

⁵⁴ Кӧр нія чеччисӧ пыжсис, отирыс сэк жӧ тӧдісӧ Исуссӧ.

⁵⁵ Нія котӧрӧн кытшӧвтісӧ быдӧс матісь оланіннэсӧ да висьталісӧ, кытӧн Исусыс. Сы дынӧ отирыс пондісӧ ольпассез вылын вайӧтны шогаліссесӧ.

⁵⁶ Кытчӧ бы Сія эз лок ─ посадӧ, карӧ, быд оланінӧ, ─ быдлаын шогаліссесӧ водтӧтлісӧ ӧтӧрас да корисӧ Сійӧ, медбы лэдзис нылӧ павкӧтчыны кӧть паськӧм подув бердас. Исус бердӧ павкӧтчиссес веськавлісӧ.