Марк 4 - Бур Юӧр 2019

¹ Исусыс бӧра велӧтіс ты дорын. Сы дынӧ ӧксис ӧддьӧн уна отир. Сійӧн сія пуксис пыжӧ, а быдӧс отирыс вӧлісӧ ва дорас.

² Исусыс уна велӧтіс нійӧ велӧтан висьттэзӧн. Велӧтікас Сія баитіс:

³ «Кывзӧ. Кӧдзись петас кӧдзны.

⁴ Кӧдзтӧнняс мукӧд кӧдзыс туссес усясӧ туй дорӧ. Сэтчӧ пуксясӧ кайез да нійӧ кокаласӧ.

⁵ Мукӧдыс усясӧ изъяинӧ, кытӧн муыс вӧлӧм етша. Лажмыт муас петассэс чожа петаласӧ.

⁶ Вуджныс тай нылӧн вӧлӧм жеб. Шондісяняс нія рушмасӧ да чожа мыйись косьмасӧ.

⁷ Мукӧд туссес усясӧ йӧн коласӧ. Йӧныс быдмас да петассэсӧ пӧдтас. Ны вылын шеппес озӧ быдмӧ.

⁸ Мукӧдыс усясӧ бур муӧ, петаласӧ, быдмасӧ да сетасӧ кӧдзыс: ӧтіккез ─ куимдаспӧв, мӧдіккез ─ кватьдаспӧв, куимӧттэз ─ сёпӧв унажык».

⁹ Сэтчӧ висьталіс: «Пеля мортыс ась кылӧ!»

Мыйлӧ колӧ велӧтан висьт?

¹⁰ Отирыс мунісӧ. Кольччисӧ Исуслӧн велӧтчиссес да кӧдна пыр вӧлісӧ Сыкӧт. Нія юалісӧ велӧтан висьтыс йылісь.

¹¹ Исусыс шуис нылӧ: «Енлӧн Юралӧмись тӧдлытӧмсӧ тіянлӧ сетӧм тӧдны, а мӧдіккес кылӧны велӧтан висьттэзісь.

¹² Нія асланыс синнэзӧн видзӧтӧны, да озӧ адззӧ, асланыс пеллезӧн кывзӧны, да озӧ вежӧртӧ. Озӧ бергӧтчӧ Енлань, и Еныс оз простит нылісь умӧль керӧммезнысӧ».

Кӧдзись йылісь висьтсӧ вежӧртӧтӧм

¹³ Исусыс юаліс нылісь: «Одӧ вежӧртӧ этӧ велӧтан висьтсӧ? Кыдз нӧ мӧдат вежӧртны быдӧс велӧтан висьттэсӧ?

¹⁴ Кӧдзисьыс кӧдзӧ Енлісь Кыв.

¹⁵ Туй дорӧ усьӧм кӧдзысыс висьталӧ ны йылісь, кӧдна кылӧны Кывсӧ, но сэк жӧ локтӧ сотана да гусялӧ ны сьӧлӧмӧ усьӧм Кывсӧ.

¹⁶ Изъяинӧ усьӧм кӧдзысыс висьталӧ ны йылісь, кӧдна кылӧны Кывсӧ да сэк жӧ гажӧн босьтӧны.

¹⁷ Но нылӧн эд абу вуджныс, сійӧн озӧ дыр веритӧ. Кӧр локтӧ сьӧкыт кад да Кыв понда вашӧтлӧм, нія дугдӧны веритны.

¹⁸ Йӧн коласӧ усьӧм кӧдзысыс висьталӧ ны йылісь, кӧдна кылӧны Кывсӧ,

¹⁹ но нылӧн быд лунся тӧждісьӧмныс да унажык сьӧм шедтӧмныс пӧдтӧны Кывсӧ. Сійӧн сэтӧн абу бур воӧмыс.

²⁰ А бур муӧ кӧдзӧм кӧдзысыс висьталӧ ны йылісь, кӧдна кывзӧны Кывсӧ, босьтӧны сійӧ. Сэтшӧммес уна воӧмсӧ вайӧны: ӧтіккез ─ сёпӧв, мӧдіккез ─ кватьдаспӧв, куимӧттэз ─ куимдаспӧв унажык».

Югдӧтан йылісь велӧтан висьт

²¹ Исусыс висьталіс нылӧ: «Сы понда разь ӧзтӧны бисӧ, медбы сюйыштны сійӧ гырнич увтӧ али топчан увтӧ? Ӧзтӧм бисӧ сувтӧтӧны бивидзан вылӧ.

²² Быд гусьӧна керӧмыс оссьӧ. Быдӧс дзебӧмыс петӧ вевдӧрӧ.

²³ Пеля мортыс ась кылӧ!»

²⁴ Исусыс висьталіс нылӧ: «Мый кылатӧ, босьтӧ тӧдвыланыт. Тіянлӧ меряйтасӧ асланыт меряйтӧм сьӧрті да и содтасӧ.

²⁵ Кинлӧн эм, сылӧ сетасӧ. Кинлӧн абу ─ сылісь босьтасӧ и сійӧ, мый эм».

Нянь быдмӧм йылісь велӧтан висьт

²⁶ Исусыс висьталіс: «Енлӧн Юралӧмыс сэтшӧм: мортыс муӧ кӧдзӧ кӧдзыс.

²⁷ Сія ойнас узьӧ, луннас кок вылас, а кыдз сюыс петалӧ да быдмӧ, сія оз тӧд.

²⁸ Муыс ачыс сетӧ петассэз, сэсся шеп, сэсся шепас сюсӧ.

²⁹ Кӧр сюыс воӧ, мортыс сэк жӧ ыстӧ вундіссезӧс, локтіс эд вундан кад».

Горчига тусь йылісь велӧтан висьт

³⁰ Исусыс шуис: «Мый вылӧ вачкисьӧ Енлӧн Юралӧмыс? Кытшӧм велӧтан висьтӧн мыччавны сійӧ?

³¹ Сія муӧ кӧдзӧм горчига тусь кодь. Кӧдзысӧн сія медпоснит.

³² Кӧдзӧм бӧрас мӧдік быдмассэзся вылынжыка быдмӧ, лоӧ пу кодь. Сэтӧн нельки кайез поздісьӧны».

³³ Исусыс уна сэтшӧм висьттэзӧн висьтасис отирлӧ Енлісь Кывсӧ, мымда нія вермисӧ вежӧртны.

³⁴ Сія пыр баитіс велӧтан висьттэзӧн, а бӧрынжык велӧтчиссеслӧ ӧтнаныслӧ быдӧс вежӧртӧтліс.

Вына тӧв ӧлӧм

³⁵ Сія рытӧ Исусыс висьталіс велӧтчиссеслӧ: «Вуджам ты мӧдӧрас».

³⁶ Велӧтчиссес ыстісӧ отирсӧ да пуксисӧ Исусыс дынӧ пыжас. Сэтӧн вӧлісӧ и мӧдік пыжжез.

³⁷ Лэбтісис вына тӧв, васӧ вайӧтіс, койис ны вылӧ. Пыжсӧ пондіс тыртны ванас.

³⁸ Исусыс пыж бӧрас мыйкӧ пуктӧм юр увтас да онмӧссьӧм. Велӧтчиссес саймӧтісӧ Сійӧ да шуисӧ: «Велӧтісь! Мый, Тэныт и шог абу, мийӧ эд вӧям?»

³⁹ Сія чеччис, ӧліс тӧвсӧ да висьталіс тыыслӧ: «Ӧвсьы, дугды!» Сэк жӧ тӧлыс лӧньсис. Лоис шы не тӧв.

⁴⁰ Исусыс велӧтчиссеслӧ висьталіс: «Мыля тійӧ сідз полат? Мыля тіян абу веритӧмныт?»

⁴¹ Нія ӧддьӧн повзисӧ да ас коласаныс баитісӧ: «Кин Сія, нельки тӧлыс да тыыс Сійӧ кывзісьӧны?»