Марк 13 - Бур Юӧр 2019

¹ Вежа Керкусис петӧм коста ӧтік велӧтчись Исусыслӧ шуис: «Велӧтісь, видзӧт, кытшӧмӧсь иззэс да кытшӧмӧсь керкуэс!»

² Исусыс сылӧ висьталіс: «Адззан этнӧ ыджыт керкуэсӧ? Нійӧ быдӧс разясӧ, эстӧн из вылын из оз кольччы».

³ Виягӧд керӧс вылын Вежа Керкулӧ паныт пукалікӧ Петра, Яков, Иоан да Ӧндрей юалісӧ Исусыслісь:

⁴ «Висьтав миянлӧ, кӧр эта быдӧс лоас? Мый сьӧрті позьӧ тӧдны сійӧ кадсӧ?»

⁵ Исусыс нылӧ пондіс баитны: «Видзӧтӧ, медбы тіянӧс некин эз ылӧт.

⁶ Уна локтасӧ Менам нимӧн да шуасӧ, сія пӧ Ме, да унаӧс ылӧтасӧ.

⁷ Тійӧ кылат тышкасьӧммез йылісь, уналаись кывсяс тышкасьӧмыс. Сэк тійӧ эд повзьӧ. Сідз и колӧ лоны. Но сія абу на векпон.

⁸ Отир отир вылӧ лэбтісяс, ӧксу ─ ӧксу вылӧ. Уналаын пондасӧ тшыгьявны. Уналаын муыс пондас зэгавны. Отирыс лоасӧ кыдз ӧшӧмӧсь. А эта эд дзир кага вайисьлӧн зубытыс пондӧтчӧ.

⁹ Тійӧ видзӧтӧ ас сьӧраныт. Тіянӧс пондасӧ вайӧтны судитаніннэзӧ, синагогаэзын тіянӧс пондасӧ вартлыны. Тіянӧс Ме понда сувтӧтасӧ юраліссез да ӧксуэз одзӧ, медбы тійӧ висьтасит нылӧ Ме йылісь.

¹⁰ Но сія кадӧдз колӧ Бур Юӧрсӧ висьтасьны быд отирпӧлӧслӧ.

¹¹ Кӧр тіянӧс вайӧтасӧ судитанінӧ, одзлань эд тӧждісьӧ, юраныт эд видзӧ, мый пондат баитны. Сія кадӧ тіянлӧ лоас сетӧм, мый висьтавны. Сэк тійӧ одӧ пондӧ баитны асьныт, тіян пытшкын пондас баитны Вежа Лолыс.

¹² Вон ассис вонсӧ сетас вийны, ай ─ ассис челядьсӧ. Челядь лэбтісясӧ ай-мамныс вылӧ да нійӧ виясӧ.

¹³ Ме понда тійӧ син вылӧ одӧ пондӧ ковны быдӧнныслӧ. Кин медбӧрӧдз вермас видзсьыны, сія мезмас».

Сьӧкыт кад йылісь

¹⁴ «Этія йылісь гижӧм Енсянь юӧртісь Даниил: ─ Лыддьӧтісьыс ась вежӧртӧ! ─ Тійӧ казялат сэрпӧсьтӧмсӧ сэтісь, кытӧн сылӧ оз туй лоны. Сія сэрпӧсьтӧмыс вайӧтас разьсьӧм-киссьӧмӧдз. Сэк Иудеяын оліссез ась пышшӧны керӧссэзӧ.

¹⁵ Кин лоас керку вылын, ась оз лэдзчы мыйкӧ босьтны керкусис.

¹⁶ Кин лоас ыб вылын, ась оз берт босьтны ассис паськӧмсӧ.

¹⁷ Нія луннэзӧ ӧддьӧн сьӧкыт лоас новйӧтчись да нимӧтчись инькаэзлӧ!

¹⁸ Кеймӧ, медбы эз ковсьы пышшыны тӧлӧн.

¹⁹ Сэк лоас ӧддьӧн сьӧкыт. Быдӧс аркмӧтӧмсянь ӧнӧдз сэтшӧмыс эз на вӧв да сэсся оз ни ло.

²⁰ Дӧсвидзисьыс оз кӧ джендӧт сійӧ кадсӧ, то ӧтік ловья морт оз кольччы. Но Аслас бӧрйӧммез понда сійӧ кадсӧ Еныс джендӧтас.

²¹ Висьталасӧ кӧ тіянлӧ: "Кристосыс татӧн", шуасӧ: "Кристосыс сэтӧн", эдӧ веритӧ.

²² Сэк локтасӧ отир, кӧдна асьнысӧ пондасӧ пуктыны Кристосӧ да Енсянь юӧртіссезӧ. Нія ыджыт пассэз да адззывлытӧммез пондасӧ керны, медбы и бӧрйӧммесӧ ылӧтны, вермасӧ кӧ.

²³ Видзӧтӧ, Ме тіянлӧ одзланься лоӧмсӧ висьталі».

Морт Зонлӧн локтӧм

²⁴ «Ӧддьӧн сьӧкыт луннэз бӧрын сэтӧн жӧ шондіыс пемдас. Тӧлісьыс кусас,

²⁵ енӧжсис кӧдзуввес усяласӧ, енӧжись выннэс зэгаласӧ.

²⁶ Сэк казяласӧ кымӧррез вылӧт ыджыт вынӧн да югьялӧмӧн Морт Зонлісь локтӧмсӧ.

²⁷ Сія иньдас Ассис ангеллэсӧ му вылас нёльнан ладорӧ. Нія ӧктасӧ Сылісь бӧрйӧммесӧ енӧж увтсис ӧт дорсянь мӧд дорӧдззас».

²⁸ Инжир пусянь велӧтчӧ. Сы уввез вылӧ видзӧттӧн тійӧ адззат: гаррез потӧны, мыччисьӧны листтэз. Сэк тійӧ тӧдат, гожумыс матын ни.

²⁹ Сідзкӧ, кӧр тійӧ казялат Менам кыввез сьӧрті керсьӧмсӧ, тӧдӧ: сія кадыс матын ни, ыбӧс дорас.

³⁰ Быльсӧ тіянлӧ висьтала: быдӧс лоас ӧння кадӧ оліссез дырни.

³¹ Муыс енӧжнас ӧшасӧ, а Менам кыввезӧ кольччасӧ вынаӧсь.

Лӧсьӧтчӧмӧн овны тшӧктӧм

³² «Этӧ лунсӧ да кадсӧ некин оз тӧд. Озӧ тӧдӧ енӧжын ангеллэс, оз тӧд Зоныс, тӧдӧ ӧтнас Айыс.

³³ Видзӧтӧ, лоӧ лӧсьӧтчӧмӧсь, кеймӧ, тійӧ эд одӧ тӧдӧ, кӧр локтас сія кадыс.

³⁴ Сія кадыс кыдз морт, кӧда петӧ туйӧ, ассис керкусӧ кольӧ раббез киӧ. Быдыслӧ сетӧ удж, а ыбӧс сьӧрын видзӧтісьлӧ оз тшӧкты и син куньны.

³⁵ Сідзкӧ, лоӧ лӧсьӧтчӧмӧсь! Тійӧ эд одӧ тӧдӧ, кӧр локтас кӧзяиныс: рытнас, ойшӧрнас, петук китсасикӧ али югдандорӧ.

³⁶ Видзчисьтӧг локтӧм коста ась оз адззы тіянӧс узиссезӧн!

³⁷ Мый тіянлӧ баита, сійӧ и быдӧнныслӧ висьтала: лоӧ лӧсьӧтчӧмӧсь!»