Лука 8 - Бур Юӧр 2019

¹ Сыбӧрын Исусыс ветлӧтіс каррезӧт да посаддэзӧт. Сія висьтасис Енлӧн Юралӧм йылісь Бур Юӧр. Даскык велӧтчисьыс ветлӧтісӧ Сыкӧт.

² Ӧтлаын вӧлісӧ инькаэз, кӧднӧ Исусыс веськӧтіс шогӧттэзісь да мездіс сэрпӧсь ловвезісь. Нія вӧлісӧ: Магдала Мария, кӧда пытшкись Исусыс вашӧтіс сизим сэрпӧсь лов,

³ Иоанна, сія Ирод керкуын веськӧтлісь Кузлӧн инь, Сусанна и уна мӧдіккез. Нія отсалісӧ Исусыслӧ быдӧсӧн, мый нылӧн вӧлі.

Кӧдзись йылісь велӧтан висьт

⁴ Исусыс дынӧ ӧксисӧ уна отир. Нія локтісӧ быд карись. Сія баитӧмсӧ пондӧтіс велӧтан висьтӧн:

⁵ «Кӧдзись петас кӧдзны. Кӧдзикас мукӧд кӧдзыс туссес усясӧ туй дорас. Нія тальсясӧ. Енӧжись кайез кокаласӧ нійӧ.

⁶ Кынымкӧ тусь усясӧ изъяинӧ, петаласӧ да ватӧг косьмасӧ.

⁷ Мукӧд туссес усясӧ йӧн коласӧ. Йӧныс быдмас да петассэсӧ пӧдтас.

⁸ Мукӧдыс усясӧ бур муӧ да петаласӧ. Нія ваясӧ сюсӧ кӧдзӧмысся сёись унажык». Висьтасьӧм бӧрын Исусыс горӧтчис: «Пеля мортыс ась кылӧ!»

Велӧтан висьтсӧ вежӧртӧтӧм

⁹ Велӧтчиссес Исуслісь юалісӧ: «Мый йылісь сія велӧтан висьтыс?»

¹⁰ Сія висьталіс: «Тіянлӧ Енлӧн Юралӧмись сетӧм тӧдны тӧдлытӧмсӧ. Мӧддэслӧ ─ велӧтан висьттэз пыр. Нія видзӧтӧны, да озӧ адззӧ, кылӧны, да озӧ вежӧртӧ.

¹¹ Сія висьтасьӧмыс лоӧ то мый: кӧдзысыс ─ Енлӧн Кыв.

¹² Туй дорӧ усьӧм кӧдзыс туссес ─ кывзіссез. Ны дынӧ сэсся локтӧ кульыс, сьӧлӧмсиныс нӧбӧтӧ Кывсӧ, медбы нія эзӧ веритӧ да эзӧ мезмӧ.

¹³ Изъяинӧ усьӧм кӧдзыс туссес ─ Кывсӧ кылікӧ сійӧ гажӧн босьтіссез. Вуджыс жӧ нылӧн абу. Кытшӧмкӧ кадӧдз веритӧны, сьӧкыт кадӧ бӧр керсьӧны.

¹⁴ Йӧн коласӧ усьӧммес ─ Кывсӧ кыліссес. Нія тӧждісьӧмнаныс, уна сьӧмнаныс да долыта му вылын олӧмнаныс пӧдтӧны Кывсӧ. Сэтӧн бур воӧмыс абу.

¹⁵ Бур муӧ усьӧммес ─ кылӧм Кывсӧ рам да бур сьӧлӧмын видзиссез. Нія вайӧны воӧмсӧ мыланыс быртӧг видзсьӧмӧн». Сідз висьталӧм бӧрын Исусыс горӧтчис: «Пеля мортыс ась кылӧ!»

Югдӧтӧм йылісь

¹⁶ «Некин ӧзтӧм бисӧ оз вевттьы дозӧн, оз сувтӧт топчан увтӧ. Бисӧ сувтӧтӧны бивидзан вылӧ, медбы пыриссесӧ буржыка югдӧтны.

¹⁷ Быд гусьӧна керӧмыс пондӧ тыдавны. Быдӧс дзебӧмыс ─ петӧ вевдӧрӧ.

¹⁸ Видзӧтӧ ас сьӧраныт, кыдз тійӧ кывзат. Кинлӧн эд эм, сылӧ сетасӧ. Кинлӧн абу, сылісь мырддясӧ и сійӧ, мый сія чайтіс босьтны».

Исуслӧн мам да воннэз

¹⁹ Исусыс дынӧ локтісӧ Сылӧн Мамыс да воннэс. Уна ӧксьӧм отир кузя Сы дынӧ сибӧтчыны эзӧ вермӧ.

²⁰ Исуслӧ висьталісӧ: «Мамыт воннэткӧт сулалӧны ӧтӧрас, мӧдӧны Тэнӧ адззывны».

²¹ Сія нылӧ висьталіс: «Менам мамӧ да воннэзӧ ─ Ен Кывсӧ кывзіссес да сы сьӧрті оліссес».

Ты вылын тӧв ӧлӧм

²² Ӧтік лунӧ Исусыс Аслас велӧтчиссезкӧт пырис пыжӧ да нылӧ висьталіс: «Вуджам ты мӧдӧрас». Нія вӧрзисӧ.

²³ Уйиканыс Исусыс онмӧссис. Ты вылас лэбтісис вына тӧв, васӧ вайӧтіс, койис ны вылӧ. Нія вермисӧ вӧйны.

²⁴ Велӧтчиссес саймӧтісӧ Сійӧ. Нія шуисӧ: «Велӧтісь! Велӧтісь! Вӧям эд!» Сія чеччис, ӧліс тӧвсӧ, васӧ. Тӧлыс да ваыс лӧньсисӧ.

²⁵ Сэк Сія велӧтчиссеслӧ висьталіс: «Кытӧн тіян веритӧмныт?» Нійӧ повзьӧмувьяныс диво кутіс. Нія ӧтамӧдныслӧ баитісӧ: «Кин Сія? Тӧлӧн, ваӧн веськӧтлӧ, и нія кывзісьӧны Сійӧ».

Сэрпӧсь ловвезӧс вашӧтӧм

²⁶ Исусыс велӧтчиссескӧт локтіс Гадара муӧ. Сія муыс куйлӧ Галилея весьтын.

²⁷ Му вылас петӧм бӧрын Исуссӧ панталіс карсис ӧтік морт. Сійӧ мортсӧ важынсянь видзӧмась-маитӧмась сэрпӧсь ловвез. Сія абу олӧм керкуын, олӧм керӧс гырккэзын, кытӧн дзебсьывлісӧ. Сія ветлӧтӧм пасьтӧг.

²⁸ Исуссӧ казялікӧ сія лёк горшӧн горӧтіс, уськӧтчис Сы одзӧ. Сія горӧтіс: «Мый Тэныт ме дорӧдз, Исус, Медвылісь Енлӧн Зон? Кеймися Тэныт, эн маит менӧ!»

²⁹ Сэрпӧсь лолыс сідз висьталіс, мыля Исусыс тшӧктіс сылӧ петны сія морт пытшкись. Мортыс ӧддьӧн дыр пессьӧм-мырсьӧм сэрпӧсь ловсянь. Мортсӧ домавлӧмась цеппезӧн, геззэзӧн, медбы сія эз пышшы. Но сія орлавлӧм домӧттэсӧ. Сэрпӧсь лолыс сійӧ вашӧтлӧм кушмуӧ.

³⁰ Исусыс юаліс: «Кыдз тэнӧ шуӧны?» Сія висьталіс: «Легион». Сэрпӧсь ловвес эд морт пытшкас пырӧмась ӧддьӧн уна.

³¹ Нія корисӧ Исуссӧ, медбы эз тшӧкты нылӧ мунны пыдӧстӧминас.

³² Нія корсисӧ пырны порссезӧ, кӧдна йирсисӧ сія керӧс вылын. Порссес вӧлісӧ ӧддьӧн уна. Исусыс лэдзис сэрпӧсь ловвеслӧ пырны ны пытшкӧ.

³³ Сэрпӧсь ловвес петісӧ мортыс пытшкись да пырисӧ порссес пытшкӧ. Порсь чукӧрыс керӧс вывсяняс уськӧтчис тыас да вӧйис.

³⁴ Лоӧмсӧ казялікӧ порссес сьӧрын видзӧтіссес сэтісь пышшисӧ. Нія быдӧс висьтасьӧмась карас да посаддэзас.

³⁵ Отирыс петісӧ видзӧтны лоӧмсӧ. Нія локтісӧ Исусыс дынӧ. Сы коккез дынісь казялісӧ мортсӧ, кӧдаись петісӧ сэрпӧсь ловвес. Мортыс вӧлі паськӧма, веськалӧм мывкыда. Сійӧ казялӧмсянь отирыс повзисӧ.

³⁶ Адззыліссес нылӧ висьтасисӧ, кыдз мортыс мезмис сэрпӧсь ловвес дынісь.

³⁷ Гадара мусис быдӧс отирыс корисӧ Исуссӧ ны дынісь мунны. Нія эд ӧддьӧн повзисӧ. Исусыс пырис пыжас да бертіс.

³⁸ Сэрпӧсь ловвез дынісь мездӧм мортыс корсис мунны Исусыскӧт. А Исусыс сійӧ ыстіс гортас да висьталіс:

³⁹ «Берт гортат да висьтась, мый тэныт керис Еныс». Сія мунӧм да карас быдӧнныслӧ висьтасьӧм, мый сылӧ керис Исусыс.

Иаирлісь нывсӧ ловзьӧтӧм да инькаӧс веськӧтӧм

⁴⁰ Исусыс бертіс. Сійӧ панталісӧ уна отир. Нія быдӧнныс видзчисьӧмась Сійӧ.

⁴¹ Сэтчӧ локтіс Иаир нима морт. Сія вӧлі синагогаын веськӧтлісь. Иаирыс уськӧтчис Исуслӧн коккезӧ да корис Сійӧ локны гортас.

⁴² Сылӧн вӧлӧм даскык вося ӧтік ныв, кӧда вӧлӧм куландорын. Исусыс муніс Иаирыскӧт, сы коста отирыс Сы гӧгӧрын дзескӧтчисӧ.

⁴³ Сэтӧн вӧлӧм даскык во сьӧрна вир ӧштан шогӧтӧн шогалісь инька. Веськӧтіссез вылӧ сія видзӧм быдӧс пажытьсӧ. Нія абу вермӧмась сійӧ веськӧтны.

⁴⁴ Инькаыс сибӧтчӧм бӧрсяняс, павкӧтчӧм Исуслӧн паськӧм бердӧ. Сэк вирыс сылӧн дугдӧм петны.

⁴⁵ Исусыс юаліс: «Кин павкӧтчис Ме бердӧ?» Быдӧнныс пондісӧ шуны, мийӧ пӧ эгӧ павкӧтчӧ. Сэк Петраыс да сэтісь мӧддэс висьталісӧ: «Велӧтісь, отирыс ӧксисӧ Тэ гӧгӧрӧ да дзескӧтчӧны. Тэ тай шуан: "Кин павкӧтчис Ме бердӧ?"».

⁴⁶ Сэк Исусыс висьталіс: «Кинкӧ Ме бердӧ павкӧтчис. Ме кылі вын петӧмӧс».

⁴⁷ Инькаыс казяліс, сія оз вермы сайӧвтчыны. Сія полӧмӧн сибӧтчис да уськӧтчис Исусыс одзӧ. Быдӧнныс одзын висьтасис, кытшӧм могӧн павкӧтчыліс Сы паськӧм бердӧ да кыдз сэтӧн жӧ веськаліс.

⁴⁸ Исусыс сылӧ висьталіс: «Эн пов, нылӧй! Тэнат веритӧмыт мездіс тэнӧ, мун лӧнь сьӧлӧмӧн».

⁴⁹ Сэтӧн баитӧм коста кинкӧ локтӧм веськӧтлісьыс керкуись. Сія Иаирыслӧ юӧртіс: «Тэнат нылыт куліс, эн ни падмӧтлы Велӧтісьсӧ».

⁵⁰ Юӧртӧмсӧ кылікӧ Исусыс сылӧ висьталіс: «Эн пов, дзир верит. Сэк нылыт лоас ловья».

⁵¹ Керку дынас локтікӧ Исусыс некинӧс эз лэдз пырны. Пырисӧ дзир Петра, Иоан, Яков и нылочкаыслӧн ай-мамыс.

⁵² Быдӧнныс горзісӧ, герьялісӧ сы понда. Исусыс висьталіс: «Эд горзӧ. Сія эз кув. Сія узьӧ».

⁵³ Сы вылын пондісӧ серавны. Нія эд тӧдісӧ: нылочкаыс куліс.

⁵⁴ Быдӧннысӧ керкусис ыстӧм бӧрын Исусыс босьтіс нылочкаыслісь кисӧ да висьталіс: «Нылӧй, чеччы!»

⁵⁵ Нылочкаыслӧн лолыс бертіс. Сія сэк жӧ чеччис. Исусыс тшӧктіс сійӧ вердны.

⁵⁶ Нылочкаыслісь ай-мамсӧ диво кутіс. Но Исусыс эз лэдз висьтасьны лоӧмыс йылісь.