Лука 6 - Бур Юӧр 2019

¹ Ыджыт лун бӧрын шоччисян лунӧ Исусыс велӧтчиссескӧт муніс сюа ыббез вылӧт. Велӧтчиссес нетшкисӧ шеппесӧ, зыртісӧ киэз коласаныс да сёйисӧ туссесӧ.

² Фарисейес коласісь мукӧдыс висьталісӧ нылӧ: «Мыля тійӧ сідз кератӧ? Оз туй этӧ керны шоччисян лунӧ!»

³ Исусыс нылӧ висьталіс: «Эдӧ я тійӧ лыддьӧтлӧ Давидыс йылісь, мый сія керӧм аслас отиркӧт кынӧмныс сималӧм коста?

⁴ Сія пырӧм Енлӧн Вежа Керкуӧ, босьтӧм Енлӧ вайӧм няньсӧ. Сійӧ няньсӧ туйис сёйны дзир вежауджаліссезлӧ. Давидыс ачыс сёйӧм да сетӧм аслас отирлӧ».

⁵ Исусыс фарисейеслӧ висьталіс: «Морт Зон и шоччисян лун вылын кӧзяин!»

Косьмӧм киа мортӧс веськӧтӧм

⁶ Лӧсяліс и мӧд шоччисян лунас Исуслӧ пырны синагогаӧ да велӧтны. Сэтчин вӧлі морт, кӧдалӧн веськыт киыс вӧлі косьмӧм.

⁷ Туйдӧтӧ велӧтіссес фарисейескӧт видзӧтісӧ Исусыс сьӧрын, оз я Сія веськӧт косьмӧм киа мортсӧ шоччисян лунӧ. Нія мӧдісӧ Исуссӧ мыйынкӧ кутны.

⁸ Нылісь юраныс видзӧмсӧ тӧдӧмӧн Сія висьталіс кӧс киа мортлӧ: «Чеччы, пет шӧрас». Сія чеччис да петіс шӧрас.

⁹ Исусыс сэк юаліс: «Висьталӧ меным, мый позьӧ керны шоччисян лунӧ: бурсӧ али умӧльсӧ? Мездыны мортсӧ али вийны?» Нія шы эзӧ сетӧ.

¹⁰ Быдӧнныс вылӧ видзӧтӧм бӧрын Исусыс висьталіс сія мортлӧ: «Нюжӧт китӧ». Кӧс киаыс сідз и керис. Сылӧн киыс веськаліс, лоис мӧдыс кодь.

¹¹ Туйдӧтӧ велӧтіссес фарисейескӧт лёксялісӧ, баитісӧ ӧтамӧдныскӧт, мый бы керны Исускӧт.

Даскык велӧтчисьӧс бӧрйӧм

¹² Сія луннэзӧ Исусыс кайис керӧс вылӧ кеймыны. Еныслӧ Сія кеймис ойбыт.

¹³ Луннас Сія дынас корис Ассис велӧтчиссесӧ. Ны коласісь бӧрйис даскык мортӧс, кӧднӧ пондіс шуны апостоллэзӧн.

¹⁴ Нія вӧлісӧ: Симон, кӧдалӧ Исусыс сетіс Петра ним, сылӧн Ӧндрей воныс, Яков, Иоан, Филип, Варфоломей,

¹⁵ Матвей, Фома, Алфейлӧн Яков, Симон, кӧдалӧн нимкодьыс вӧлі Зилот,

¹⁶ Яковлӧн Иуда да Искариот Иуда, кӧда сэсся вузаліс Исуссӧ.

Исус веськӧтӧ шогаліссесӧ

¹⁷ Исусыс ныкӧт керӧссис лэдзчис да сувтіс волькытінын. Сэтӧн ӧксьӧмась Сылӧн уна велӧтчись да ӧддьӧн уна отир. Нія локтӧмась Иудеяись быдласянь, Ерусалимись, Тир да Сидон саридз дор муэзісь.

¹⁸ Нія локтісӧ кывзыны Исуссӧ да веськӧтчыны асланыс шогӧттэзісь. Веськалісӧ и сэрпӧсь ловвезсянь пессись-мырсиссес.

¹⁹ Ӧксьӧммес быдӧнныс мӧдісӧ павкӧтчыны Исусыс бердӧ. Сыись петан выныс эд веськӧтліс быдӧннысӧ.

Кин шуда

²⁰ Исусыс видзӧтіс Аслас велӧтчиссез вылӧ да пондіс баитны: «Шудаӧсь ловныслӧ кориссез: Енӧжись Юралӧм тіян.

²¹ Шудаӧсь ӧні тшыгьяліссез, тійӧ пӧтатӧ. Шудаӧсь тійӧ, ӧні горзіссез, тійӧ пондат серавны.

²² Шудаӧсь тійӧ, кӧр Морт Зон понда син вылӧ одӧ пондӧ ковны, кӧр тіянӧс вашӧтасӧ, пондасӧ видны, тіянлісь нимнытӧ нятьнас тыртасӧ.

²³ Нылӧн айезныс сідз керлӧмась Енсянь юӧртіссеслӧ. Гажмӧ-гажӧтчӧ сія лунӧ, тіянлӧ эд енӧжас ыджыт козин лӧсьӧтӧм.

²⁴ Но ӧддьӧн умӧль лоас тіянлӧ, бура оліссез! Тійӧ эд сьӧлӧмнытӧ бурмӧтіт ни.

²⁵ Ӧддьӧн умӧль лоас тіянлӧ, ӧні быдӧсӧн пӧттэз! Тійӧ тшыгьявны пондат. Ӧддьӧн умӧль лоас тіянлӧ, ӧні сераліссез! Тійӧ бӧрдны-горзыны пондат.

²⁶ Ӧддьӧн умӧль лоас тіянлӧ, быдыс кӧ тіян йылісь бура баитӧ! Сідз эд керлӧмась нылӧн айезныс бӧбӧтчиссеслӧ, асьнысӧ Енсянь юӧртіссезӧ пуктіссеслӧ».

Радейтны велӧтӧм

²⁷ «Тіянлӧ баита, Менӧ кывзіссеслӧ: радейтӧ тіян вылӧ лэбтісиссесӧ. Бурсӧ керӧ нылӧ, кӧдна тіян вылӧ синӧн озӧ вермӧ видзӧтны.

²⁸ Тіянӧс ёрдіссесӧ бласлӧвитӧ. Кеймӧ тіянӧс умӧльтіссез понда.

²⁹ Пельбокат сӧтісьыслӧ бергӧт мӧдтӧ. Вылісь паськӧмтӧ мырддисьсӧ лэдз босьтны и йӧрнӧстӧ.

³⁰ Тэнчит быд корисьлӧ сет. Тэнчит босьтісьыслісь сетӧмтӧ бӧр эн кор.

³¹ Мый тійӧ видзчисят отирсянь, сійӧ и асьныт керӧ нылӧ.

³² Радейтат кӧ тіянӧс радейтіссесӧ, мый сэк тіянӧс сы понда буркывтны? И умӧльсӧ кериссес эд радейтӧны нійӧ радейтіссесӧ.

³³ Тіянлӧ бурсӧ керисьлӧ бурсӧ кӧ керат, мый сэк тіянӧс сы понда буркывтны? И умӧльсӧ кериссес эд сідз жӧ керӧны.

³⁴ Тійӧ одзӧсӧн сетат кӧ нылӧ, кинсянь видзчисят бӧр босьтны, мый сэк тіянӧс сы понда буркывтны? И умӧльсӧ кериссес эд сетӧны одзӧсӧн ӧтамӧдныслӧ, медбы бӧр босьтны сымда жӧ.

³⁵ А тійӧ радейтӧ тіян вылӧ лэбтісиссесӧ, отсалӧ, одзӧсӧн сеталӧ, нем эд видзчисьӧ нысянь. Сэк лоас тіянлӧ ыджыт козин. Тійӧ Медвылісьыслӧ лоатӧ челядьӧн. Сія эд небыт сьӧлӧма и честь тӧдтӧммескӧт да лӧггескӧт.

³⁶ Айныт моз лоӧ небыт сьӧлӧмаӧсь».

Судитӧм йылісь

³⁷ «Некинӧс эд судитӧ, и тіянӧс озӧ судитӧ. Некинӧс эд осудитӧ, и тіянӧс озӧ осудитӧ. Проститӧ, и тіянӧс проститасӧ.

³⁸ Сеталӧ, сэк и тіянлӧ сетасӧ. Сетасӧ меряйтан дозас дзобӧтӧмӧн, чукӧр тэчӧмӧн. Тіянлӧ меряйтасӧ асланыт меряйтӧм сьӧрті».

³⁹ Исусыс висьталіс нылӧ велӧтан висьт: «Вермас я синтӧм новйӧтны синтӧмсӧ? Озӧ разь кыкнанныс усьӧ гӧпӧ?

⁴⁰ Оз овлы, медбы велӧтчисьыс вӧлі пуктӧм велӧтісься вылынжыка. Быдыс лоас аслас велӧтісь кодь дзир велӧтчӧм бӧрын.

⁴¹ Мый тэ видзӧтан воныт синын ёгок вылӧ, аслат синісь кӧ керсӧ он кыв?

⁴² Кыдз тэ верман висьтавны аслат вонлӧ: "Вай кыска синсит ёгсӧ"? Ачыт тай аслат синісь керсӧ он адззы. Ылӧтчись морт! Одзжык кыскы аслат синісь керсӧ. Сэк казялан, кыдз кыскыны ёгоксӧ воныт синісь».

Бур да умӧль воӧм

⁴³ «Умӧль пу вылас оз вермы лоны бур воӧмыс. Бур пу вылас оз вермы лоны умӧль воӧмыс.

⁴⁴ Быд пусӧ тӧдӧны сы вылын воӧм сьӧрті. Оз ӧктӧ инжир жельнӧг вылісь, виноград ─ понуль вылісь.

⁴⁵ Бур сьӧлӧмись бур мортыс петкӧтӧ бурсӧ. Лӧг мортыс аслас лӧг сьӧлӧмись петкӧтӧ лӧгсӧ. Мый мортлӧн сьӧлӧмас, сія и кыв вылас».

Кык керку лэбтӧм йылісь

⁴⁶ «Мый тійӧ Менӧ коратӧ: "Дӧсвидзись, Дӧсвидзись", а Менам баитӧм сьӧрті одӧ керӧ?

⁴⁷ Висьтала тіянлӧ, кин кодь сія мортыс, кӧда локтӧ Ме дынӧ, кывзӧ Менчим кыввезӧс да ны сьӧрті олӧ.

⁴⁸ Сія керку лэбтісь морт кодь, кӧда керку лэбтанінсӧ гарйис-пыдынсьӧтіс изӧдз. Из вылас тэчис керку увтсӧ, лэбтіс керкусӧ. Ваыс паськаліс, локтіс сія керку вылӧ, эз вермы сійӧ вӧрзьӧтны. Керкуыс эд вӧлі лэбтӧм из вылӧ.

⁴⁹ А Менчим кыввезӧс кылісьыс оз кӧ ов висьталӧмыс сьӧрті, сэк сія керкусӧ увттӧг лэбтісь морт кодь. Сія ассис керкусӧ эз лэбты из вылӧ, сувтӧтіс му вылӧ. Локтіс сы вылӧ ыджыт ва, керкуыс быдсӧн разьсис».