Лука 4 - Бур Юӧр 2019

¹ Вежа Лолӧн тырӧм Исусыс Иордан ю дынсис бертіс. Сэк Вежа Лолыс нуӧтіс Сійӧ кушмуӧ.

² Сэтчин нёльдас лун сьӧрна кульыс пондыліс Исуссӧ ылӧтны. Сія кадӧ Исусыс нем эз сёй. Нія луннэз бӧрын Сылӧн пондіс симавны кынӧмыс.

³ Сэк кульыс Сылӧ висьталіс: «Тэ кӧ Енлӧн Зон, тшӧкты сія излӧ пӧртчыны няньӧ».

⁴ Исусыс сылӧ висьталіс: «Гижӧм: дзир ӧтік няньӧн оз ов мортыс, Енсянь петӧм быд кылӧн олӧ».

⁵ Сэк кульыс лэбтіс Исуссӧ вылын керӧс вылӧ. Чожа мыччаліс Сылӧ быдӧс олан муэсӧ.

⁶ Кульыс Сылӧ висьталіс: «Тэныт сета нійӧ муэсӧ быдсӧн басӧкнас да бурнас. Нія эд меным сетӧмӧсь. Ме нійӧ верма сетны, кинлӧ меным колӧ.

⁷ Сідзкӧ, Тэ кӧ копыртчан меным, быдӧс Тэнат лоас».

⁸ Исусыс висьталіс сылӧ: «Вешшы ме дынісь, сотана! Гижӧм: Аслат Дӧсвидзись Енлӧ копрась. Сылӧ ӧтнаслӧ кысъяв».

⁹ Сэк кульыс Исуссӧ нуӧтіс Ерусалимӧ. Сувтӧтіс Вежа Керку вылӧ. Сылӧ висьталіс: «Тэ кӧ Енлӧн Зон, уськӧтчы тасянь улӧ.

¹⁰ Гижӧм тай: "Ассис ангеллэсӧ тшӧктас видзӧтны Тэ сьӧрын.

¹¹ Киэз выланыс нуӧтасӧ Тэнӧ, коктӧ из бердӧ дойдӧмись видзасӧ"».

¹² Исусыс висьталіс: «Висьталӧм: "Дӧсвидзись Енлісь мыласӧ эн пешлы!"»

¹³ Кульыс Сійӧ дугдіс ылӧтлыны. Кытшӧмкӧ кадӧдз сія Исусыс дынісь муніс.

Исуслӧн велӧтны пондӧтчӧм

¹⁴ Вежа Ловсянь вынсялӧм Исус бертіс Галилеяӧ. Сы йылісь юӧрыс паськаліс гӧгӧр муэзӧт.

¹⁵ Исусыс велӧтіс синагогаэзын. Сійӧ быдӧнныс ошкисӧ.

Исусӧс Назарет карись вашӧтӧм

¹⁶ Исусыс локтіс Назаретӧ, кытӧн Сія быдмис. Шоччисян лунӧ одззамоз пырис синагогаӧ. Сія сувтіс лыддьӧтны Вежа Гижӧт.

¹⁷ Сылӧ сетісӧ Енсянь юӧртісь Исайлісь сераку. Сія путшӧтіс серакусӧ. Сэтісь Сія адззис сэтшӧм гижӧм кыввез:

¹⁸ ─ Дӧсвидзисьлӧн Лолыс Ме вылын. Сія сувтӧтіс Менӧ мавтӧмӧн, ыстіс висьтасьны кориссезлӧ Бур Юӧр, веськӧтны дойдӧм сьӧлӧммесӧ, домӧттэзын мырсиссезлӧ юӧртны мезмӧмсӧ, синтӧммезлісь осьтны синнэзнысӧ, мездӧтны отир кипод увтын маитчиссесӧ,

¹⁹ юӧртны Дӧсвидзисьлісь бур кад.

²⁰ Исусыс каттис серакусӧ, сетіс сэтӧн уджалісьлӧ да пуксис. Синагогаас отирыс быдӧнныс видзӧтісӧ Сы вылӧ.

²¹ Исусыс нылӧ пондіс баитны: «Ӧні, кывзӧмныт коста, аркмис Вежа Гижӧтас висьталӧм кыввез сьӧрті».

²² Быдӧнныс Сійӧ ошкисӧ, нійӧ диво кутіс Сы ӧмись петӧм бурсетан кыввезсянь. Нія баитісӧ: «Абу я Сія Ӧсиплӧн Зон?»

²³ Исусыс нылӧ висьталіс: «Ӧні тійӧ Меным сідз висьталат: "Веськӧтісь, веськӧт Ачыт Асьтӧ. Эстӧн, Аслат карын, мыччав Капернаум карсис кывсьӧм керӧмтӧ!"»

²⁴ Сэк Сія шуис: «Ме тіянлӧ быльсӧ висьтала: некытшӧм Енсянь юӧртісьӧс чужан карас озӧ кывзӧ.

²⁵ Тіянлӧ висьтала, кыдз вӧлі: Израиляс Илляыс кадӧ дӧваэс вӧлісӧ уна. Сэк енӧжсянь куим во да квать тӧлісь эз усь ӧтік зэр воть. Му вылас отирыс тшыгьявны пондісӧ.

²⁶ Ны коласісь ӧтік дынӧ эз вӧв ыстӧм Илляыс, дзир Сидон дын Сарептаись дӧва дынӧ.

²⁷ Енсянь юӧртісь Елисей дырни Израильын проказа шогӧтӧн вӧлі уна шогалісь. Ны коласісь ӧтік морт эз веськав, дзир Сирияись Нееман».

²⁸ Сэтшӧмсӧ кылӧмсянь синагогаас быдӧнныс лёксялісӧ.

²⁹ Нія чеччисӧ, Исуссӧ карсис вашӧтісӧ. Кайӧтісӧ Сійӧ керӧс йылас, кытӧн вӧлі лэбтӧм нылӧн карыс, Сійӧ мӧдісӧ чапкыны улӧ.

³⁰ Но Исусыс ны шӧрись петіс да муніс.

Сэрпӧсь лолӧс вашӧтӧм

³¹ Исусыс локтіс Галилея муын Капернаум карӧ. Шоччисян луннэзӧ велӧтіс отирсӧ.

³² Сы велӧтӧмсянь, вына юралісь моз баитӧмсянь нійӧ диво кутліс.

³³ Синагогаас вӧлі морт, кӧда пытшкын вӧлі сэрпӧсь лов. Сія ёна горӧтіс:

³⁴ «Эн вӧрӧт! Мый Тэныт миян дорӧдз, Назаретісь Исус? Тэ локтін миянӧс изводавны? Ме тӧда, кин Тэ: Тэ Енлӧн Вежаыс!»

³⁵ Исусыс ӧмаліс сійӧ, висьталіс: «Чӧв! Пет мортсис!» Сэрпӧсь лолыс уськӧтіс мортсӧ синагога шӧрас да сы пытшкись петіс. Сылӧ умӧльсӧ нем эз кер.

³⁶ Сэтӧн быдӧнныс повзисӧ. Отирыс ӧтамӧдныслӧ баитісӧ: «Мый сэтшӧмыс? Сія вына юралісь моз тшӧктӧ петны сэрпӧсь ловвеслӧ, и нія петӧны!»

³⁷ Исусыс йылісь юӧрыс паськаліс Капернаум гӧгӧр муэзӧт.

Шогаліссезӧс веськӧтӧм

³⁸ Синагогасис петӧм бӧрын Исусыс муніс Симон ордӧ. Симон иньлӧн мамыс ӧддьӧн шогаліс. Сія быдсӧн сотчис. Исуссӧ корисӧ отсавны инькаыслӧ.

³⁹ Исусыс локтіс Сы дынӧ да ӧліс шогӧтсӧ. Шогӧтыс сэк жӧ чулаліс. Инькаыс чеччис, пондіс лӧсьӧтны сёян-юан.

⁴⁰ Шонді пуксян кадӧ Исусыс дынӧ вайӧтісӧ быдкодь шогӧта отирӧс. Исусыс быд морт вылӧ киэсӧ пуктӧмӧн нійӧ веськӧтіс.

⁴¹ Уна отир пытшкись горӧтӧмӧн петісӧ сэрпӧсь ловвез. Нія баитісӧ: «Тэ Кристос, Енлӧн Зон!» Исусыс нійӧ ӧліс, эз лэдз висьтасьны Ас йывсис нылісь тӧдӧмсӧ. Нія эд тӧдісӧ: Сія ─ Кристос-Мездӧтісь.

⁴² Асывнас Исусыс петіс керкусис да муніс овтӧминӧ. Отирыс кошшисӧ Сійӧ. Нія локтісӧ Сы дынӧ да эзӧ пондӧ лэдзны ны дынісь мунны.

⁴³ Сія нылӧ висьталіс: «И мӧдік каррезын Меным колӧ висьтасьны Енлӧн Юралӧм йылісь Бур Юӧрсӧ. Ме эд сы понда и вӧлі ыстӧм».

⁴⁴ Сія ветлӧтліс Галилея муӧт да синагогаэзын висьтасис Бур Юӧрсӧ.