Лука 3 - Бур Юӧр 2019

¹ Дасвитӧт во Римын юраліс Тиверий ӧксу. Сы кипод увтісь муэзын сэк веськӧтлісӧ: Иудея муын ─ Понтий Пилат, Галилеяын ─ Ирод, сылӧн Филип воныс Итурея да Траконит муэзын, Лисаний ─ Авилинеяын.

² Сэк аркирейес вӧлісӧ Аннас да Каиаф. Закарлӧн Иоан зоныс оліс кушмуын. Сія кадӧ сылӧ локтіс Енсянь кыв.

³ Сы бӧрсянь сія пондіс ветлӧтны Иордан гӧгӧрись муэзӧт. Сія юӧртіс: «Умӧль керӧммезныт дынісь бергӧтчӧ Енлань да пыртчӧ, медбы Еныс проститіс тіянлісь умӧль керӧммезнытӧ».

⁴ Енсянь юӧртісь Исай небӧгын этія йылісь гижӧм сідз: ─ Горӧтісьлӧн шыыс кылӧ кушмуын: «Лӧсьӧтӧ туйсӧ Дӧсвидзисьлӧ, Сы понда туйесӧ веськӧтӧ!

⁵ Ась быд кырасыс лоас тыртӧм. Быд керӧсыс мысыскӧт лэдзчисясӧ, чукыллес веськаласӧ. Гӧпья туйес волькамасӧ.

⁶ Сэк быдыс пондас адззыны, кыдз Еныс мездӧтӧ отирсӧ».

⁷ Иоаныс сы дынӧ пыртчыны локтӧм отирыслӧ висьтавліс: «Кыйсянь шогмӧммез! Кин тіянӧс велӧтіс пышшыны локтан лӧгсис?

⁸ Мыччалӧ керӧммезнаныт Енлань бергӧтчӧмнытӧ. Эд баитӧ аслыныт: миян айным Авраам. Тіянлӧ баита: эна иззэзісь Еныс вермас Авраамыслӧ сувтӧтны челядьсӧ.

⁹ Черыс куйлӧ ни пу вуджыс бердын. Быд пусӧ, кӧда оз вай бур воӧмсӧ, кералӧны, чапкӧны биӧ».

¹⁰ Отирыс Иоаныслісь юасисӧ: «Мый миянлӧ керны?»

¹¹ Сія нылӧ висьталіс: «Кинлӧн кык паськӧм, сет пасьтӧмыслӧ. Кинлӧн эм сёян, сет тшыгыслӧ».

¹² Пыртчыны локтісӧ вот ӧктіссес да юалісӧ: «Велӧтісь, мый миянлӧ керны?»

¹³ Сія нылӧ висьталіс: «Вотсӧ босьтӧ дзир сымда, мымда колӧ, унажык эд корӧ».

¹⁴ Воиннэз сылісь юасисӧ: «А миянлӧ мый керны?» Сія нылӧ висьталіс: «Повзьӧтлӧмӧн да бӧбӧтлӧмӧн отирлісь нем эд мырддьӧ. Олӧ дзир асланыт удж понда босьтӧм сьӧмӧн».

¹⁵ Отирыс видзчисисӧ Мездӧтісьсӧ. Сійӧн Иоаныс йылісь юраныс видзисӧ, абу я пӧ сія Кристос-Мездӧтісьыс?

¹⁶ Иоаныс быдӧнныслӧ баитіс: «Ме тіянӧс пырта ваӧн. Но локтӧ месся Вынажык. Ме абу туяна морт нельки пӧрччавны Сы кӧмкӧтісь домӧтсӧ. Сія пондас тіянӧс пыртны Вежа Лолӧн да биӧн.

¹⁷ Ассис зырсӧ Сія видзӧ киас. Гунасӧ Сія весӧтас: шогдісӧ тӧлӧтас да чукӧртас сусекӧ, йикисӧ куслытӧм биын сотас».

¹⁸ Уна и мӧдік кыввезӧн Иоаныс велӧтіс отирсӧ, висьтасис нылӧ Бур Юӧрсӧ.

¹⁹ Сія Ирод ӧксулӧ чорыта висьтавліс воныслісь Иродиада иньсӧ ас саяс босьтӧм йылісь да и мӧдік умӧль керӧммез йылісь.

²⁰ Иродыс содтіс ассис умӧль керӧммесӧ: Иоансӧ пуксьӧтіс.

Исусӧс пыртӧм

²¹ Быдӧс отирыс пыртчӧм коста пыртчис и Исусыс. Сэтӧн Исуслӧн кеймӧм коста енӧжыс оссис.

²² Вежа Лолыс лэдзчисис Сы вылӧ дуді кодь вывтырын. Енӧжсянь кыліс баитан шы: «Тэ Менам дона Зонӧ, олан гажӧ».

Исуслӧн увтыр

²³ Аслыс Исусыслӧ уджсӧ пондӧтікӧ вӧлі куимдас во. Отирыс чайтісӧ: сія пӧ зоныс Ӧсиплӧн. Ӧсипыс вӧлі Иллялӧн.

²⁴ А Иллялӧн Матфат айсянь бӧрланьӧ кӧ видзӧтны вӧлісӧ айес: Левий, Мелхий, Ианнай, Ӧсип,

²⁵ Маттафия, Амос, Наум, Еслим, Наггей,

²⁶ Мааф, Маттафия, Семей, Ӧсип, Иуда,

²⁷ Иоаннан, Рисай, Зоровавель, Салафиль, Нирий,

²⁸ Мелхий, Аддий, Косам, Елмодам, Ир,

²⁹ Иосия, Елиезер, Иорим, Матфат, Левий,

³⁰ Симеон, Иуда, Ӧсип, Ионан, Елиаким,

³¹ Мелеай, Маинан, Маттафай, Нафан, Давид,

³² Иессей, Овид, Вооз, Салмон, Наассон,

³³ Аминадав, Арам, Есром, Фарес, Иуда,

³⁴ Яков, Исак, Авраам, Фарра, Нахор,

³⁵ Серух, Рагав, Фалек, Евер, Сал,

³⁶ Каинан, Арфаксад, Сим, Ной, Ламех,

³⁷ Мафусал, Енок, Иаред, Малелеил, Каинан,

³⁸ Енос, Сиф, Адам, Ен.