Лука 24 - Бур Юӧр 2019

¹ Шоччисян лун бӧрын асъяпоннас инькаэс локтісӧ дзебсяніныс дынӧ. Нія вайисӧ лӧсьӧтӧм чӧскыт руа мавтассэз.

² Инькаэс казялісӧ: дзебсянінас пыранінсӧ пӧдналан изыс вӧлі вештӧм.

³ Нія пырисӧ пытшкас. Дӧсвидзись Исуслісь шойсӧ эзӧ адззӧ

⁴ да ӧшисӧ, мый нӧ пӧ сэтшӧмыс лоис. Сэк ны одзын видзчисьтӧг мыччисисӧ свиттялан паськӧма кык морт.

⁵ Инькаэс повзьӧмувьяныс мышкыртісӧ юррезнысӧ. Морттэс нылӧ висьталісӧ: «Мый тійӧ кошшат ловьясӧ кулӧммес коласісь?

⁶ Сія татӧн абу. Сія ловзис. Уськӧтӧ тӧдвыланыт Галилеяас Сылісь баитӧмсӧ.

⁷ Сія тіянлӧ висьтавліс, Морт Зонсӧ пӧ сетасӧ умӧльсӧ кериссез киӧ, дорасӧ крест вылӧ, но куимӧт лунас Сія ловзяс».

⁸ Инькаэслӧ усисӧ тӧдвыланыс Исуслӧн кыввес.

⁹ Нія бертісӧ дзебсяніныс дынісь. Быдӧс юӧртісӧ дасӧтік апостоллӧ да мӧдіккезлӧ.

¹⁰ Нія инькаэс вӧлісӧ Магдала Мария, Иоанна да Яковлӧн Мария мамыс. Ныкӧт вӧлісӧ и мӧдіккез, кӧдна апостоллэслӧ висьталісӧ сійӧ жӧ.

¹¹ Нія инькаэслӧ эзӧ веритӧ, мый пӧ нія абутӧмсӧ баитӧны.

¹² Петраыс чеччис, котӧртіс дзебсяніныс дынӧ. Мышкыртчыштӧмӧн видзӧтіс пытшкас да казяліс дзир каттян дӧраэсӧ. Дивуйтчӧмӧн сія бертіс бӧр.

Эммаус туй вылын пантасьӧм

¹³ Сія лунӧ кык велӧтчись мунісӧ Эммаус посадӧ. Ерусалимсянь сэтчӧдз вӧлі кватьдас стадий гӧгӧр.

¹⁴ Нія баитісӧ быдӧс лоӧм йылісь.

¹⁵ Баитӧмныс-авйӧмныс коста Ачыс Исусыс сибӧтчис ны дынӧ да пондіс мунны ныкӧт.

¹⁶ Но нія вӧлісӧ жыв синтӧмӧсь, Сійӧ эзӧ тӧдӧ.

¹⁷ Исусыс нылісь юаліс: «Муніканыт мый йылісь тійӧ сідз баитат ас коласаныт? Мыля тійӧ сэтшӧм гажтӧмӧсь?»

¹⁸ Ӧтыслӧн нимыс вӧлі Клеопа. Сія Исусыслӧ висьталіс: «Ерусалимӧ локтӧммез коласісь Тэ, натьтӧ, ӧтнат он тӧд этна луннэзӧ татӧн лоӧм йылісь».

¹⁹ Исусыс юаліс: «Мый йылісь?» Мӧддэс Сылӧ висьталісӧ: «Мый лоис Назаретісь Исускӧт. Сія эд вӧлі Енсянь юӧртісь. Керӧмнас да кывнас Ен одзын да отир одзын Сія вӧлі вына.

²⁰ Аркирейес миян веськӧтліссезкӧт сетісӧ Сійӧ вийны. Сійӧ дорисӧ крест вылӧ.

²¹ Мийӧ надейтчим, Сія пӧ Израильсӧ мездас. А талун куимӧт лун ни мунӧ сія лоӧмсянь.

²² Миян инькаэз коласісь мукӧдыс миянӧс дивуйтчӧмӧдз вайӧтісӧ. Нія одз асывнас вӧлӧмась дзебсянін дынас.

²³ Сэтчинісь Исуслісь шойсӧ абу адззӧмась. Локтісӧ да висьталісӧ, адззылімӧ пӧ ангеллэзӧс. Ангеллэс инькаэслӧ висьталӧмась, Сія пӧ ловья.

²⁴ Миян коласісь мукӧдыс ветлісӧ дзебсяніныс дынӧ. Инькаэс висьталӧм сьӧрті пӧ и эм, а Исуссӧ Асьсӧ абу адззылӧмась».

²⁵ Сэк Исусыс нылӧ висьталіс: «Ылӧстӧммез, сьӧкыта тіянлӧ пырӧ юраныт Енсянь юӧртіссезлӧн висьталӧмныс.

²⁶ Эз разь ков Кристос-Мездӧтісьыслӧ сідз пессьыны-мырсьыны да пырны Аслас югьяланінӧ?»

²⁷ Сэк Исусыс Моисейлӧн да Енсянь юӧртіссезлӧн гижӧттэзсянь пондӧтчӧмӧн вежӧртӧтіс нійӧ, мый Сы йылісь гижӧм быдӧс Вежа Гижӧттэзын.

²⁸ Нія сибӧтчисӧ посадыс дынӧ. Исусыс мыччаліс, мӧдӧ пӧ мунны одзлань.

²⁹ Велӧтчиссес падмӧтісӧ Сійӧ, шуисӧ: «Кольччы миянкӧт, ӧтӧрас пемдӧ ни». Сія кольччис да пырис ныкӧт керкуӧ.

³⁰ Ӧтлаын пызан саяс пукалӧм коста Исусыс босьтіс нянь, бласлӧвитіс, чегӧтіс да сетіс нылӧ.

³¹ Велӧтчиссеслӧн сэк вӧлись оссисӧ синнэзныс. Нія тӧдісӧ Сійӧ, но Исусыс син одзсиныс ӧшис.

³² Сэк нія висьталісӧ ӧтамӧдныслӧ: «Туй вылӧттяс мунтӧн Сылӧн баитӧмыс эз разь вӧрзьӧт миянлісь сьӧлӧммезнымӧс Вежа Гижӧтсӧ вежӧртӧтӧм коста?»

³³ Нія сэк жӧ чеччисӧ да бертісӧ Ерусалимӧ. Сэтчин адззисӧ дасӧтік апостолсӧ да ныкӧт мӧд ӧксьӧммесӧ.

³⁴ Апостоллэс висьталісӧ: «Велӧтісьным пӧ быль ловзьӧм, Сія пантасьлӧм Симонкӧт».

³⁵ Кыкыс сідз жӧ висьтасисӧ туй вылас лоӧм йылісь да няньсӧ чегӧтӧм коста Исуссӧ тӧдӧм йылісь.

Исуслӧн велӧтчиссеслӧ мыччасьӧм

³⁶ Лоӧмыс йылісь баитӧм коста Ачыс Исусыс сувтіс ны коласӧ да висьталіс: «Лӧнь олан тіянлӧ!»

³⁷ Повзьӧмувьяныс нія юраныс видзисӧ, миянлӧ пӧ мыччасьӧ.

³⁸ Исусыс нылісь юаліс: «Мый повзит? Мыйлӧ сэтшӧмыс пырӧ юраныт?

³⁹ Видзӧтӧ Менчим киэзӧс, Менчим коккезӧс. Эстӧн Ме Ачым. Павкӧтчӧ Ме бердӧдз. Мыччасьӧмыслӧн лыыс, вывтырыс абу, а Менам эм».

⁴⁰ Сідз висьталӧм бӧрын нылӧ мыччаліс киэсӧ да коккесӧ.

⁴¹ Нійӧ гажувьяныс диво кутіс, эз и веритсьы. Сія юаліс нылісь: «Эстӧн тіян эм кытшӧмкӧ сёян?»

⁴² Нія сетісӧ Сылӧ пӧжалӧм чери да ма.

⁴³ Сія босьтіс да ны одзын сёйис.

⁴⁴ Нылӧ висьталіс: «Ӧні керсис сія, мый Ме баитлі, кӧр вӧлі тіянкӧт. Ме йылісь мый гижӧм Моисейлӧн Туйдӧтын, Енсянь юӧртіссез гижӧттэзын да псаломмезын, сія, мыся, быдӧс керсяс».

⁴⁵ Сія велӧтіс нійӧ вежӧртны Вежа Гижӧттэзын висьталӧмсӧ.

Медбӧрья ыджыт тшӧктӧм

⁴⁶ Исусыс велӧтчиссеслӧ висьталіс: «Вежа Гижӧттэзын висьталӧм сьӧрті Кристос-Мездӧтісьлӧ коліс пессьыны-мырсьыны, кувны, куимӧт лунас ─ ловзьыны.

⁴⁷ Ерусалимсянь пондӧтчӧмӧн колӧ Сы нимӧн юӧртны быд отирпӧлӧслӧ умӧль керӧммез дынісь бергӧтчӧм да нійӧ проститӧм йылісь.

⁴⁸ Тійӧ асьныт сійӧ лоӧмсӧ одззасянь медбӧрӧдз быдӧс адззыліт да кыліт.

⁴⁹ Айӧлісь кӧсйӧмсӧ Ме ыста тіянлӧ. Енӧжсянь сетӧм вынӧн вынсявтӧдз Ерусалимсис эд мунӧ».

Кристос Исуслӧн лэбтісьӧм

⁵⁰ Исусыс велӧтчиссесӧ карсис петкӧтіс Вифания дынӧдз, лэбтіс киэсӧ да бласлӧвитіс нійӧ.

⁵¹ Бласлӧвитӧм коста Сія пондіс янсӧтчыны ны дынісь да лэбтісьны енӧжӧ.

⁵² Нія копыртчисӧ Сылӧ да ӧддьӧн гажаӧсь бертісӧ Ерусалимӧ.

⁵³ Енсӧ ошкӧмӧн да бласлӧвитӧмӧн нія пыр вӧлісӧ Вежа Керкуын. Аминь.