Лука 23 - Бур Юӧр 2019

¹ Ӧксьӧммес быдӧнныс чеччисӧ, Исуссӧ нуӧтісӧ Пилат дынӧ.

² Пондісӧ шувлыны Исусыс вылӧ: «Мийӧ адззам: Сія отирсӧ умӧляс велӧтӧ, Римись ӧксулӧ оз тшӧкты вештыны вотсӧ. Асьсӧ пуктӧ Кристос-Мездӧтісьӧ да Ӧксуӧ».

³ Пилатыс юаліс Исусыслісь: «Тэ иудейезлӧн Ӧксу?» Исусыс горӧтчис: «Тэ висьталін».

⁴ Пилатыс аркирейеслӧ да отирыслӧ висьталіс: «Нем умӧльсӧ ме эг адззы эта Мортісь».

⁵ Мӧддэс бӧбись пондісӧ висьтавлыны: «Сія Иудеяыс пасьта Аслас велӧтӧмӧн гудыртӧ. Галилеясянь татчӧдз ни локтіс».

⁶ Галилеясӧ кылікӧ Пилатыс юаліс: «Сія мый, Галилеяись?»

⁷ Пилатыс кыліс, Сія пӧ Ирод кипод увтын муись, сэк ыстіс Исуссӧ Ирод дынӧ. Иродыс эд нія луннэзӧ вӧлі Ерусалимас.

Исус Ирод одзын

⁸ Исуссӧ казялӧмсянь Иродыс гажмис. Сылӧ уна мый кывсьӧм Исусыс йылісь. Сійӧн сія важын ни мӧдӧм адззывны Исуссӧ. Иродыс видзчисис, Исусыс пӧ мыйкӧ адззывлытӧмӧ мыччалас.

⁹ Иродыс уна мый юасис Исуслісь, но Сія шы эз сет.

¹⁰ Аркирейес Туйдӧтӧ велӧтіссескӧт сулавтӧнняныс орӧттӧг висьтавлісӧ Сы вылӧ умӧльсӧ.

¹¹ Иродыс аслас воиннэзкӧт пӧттӧдз умӧльтіс Исуссӧ, Сійӧ абутӧм туйӧ пуктіс. Сэсся сія тшӧктіс Исуссӧ пасьтӧтны дона басӧк паськӧмӧ да бӧр ыстіс Пилатыс дынӧ.

¹² Одзжык Пилатыс Иродыскӧт лӧгалӧмась, но сія лунсянь нія лоӧмась ёрттэзӧн.

Исусӧс вийны сетӧм

¹³ Пилатыс корис дынас аркирейесӧ, веськӧтліссесӧ да отирсӧ.

¹⁴ Сія нылӧ висьталіс: «Тійӧ вайӧтіт этӧ мортсӧ, кыдз отирсӧ умӧляс велӧтісьӧс. Уна мый умӧльсӧ Сы вылӧ висьтавліт. Ме тіян одзын Сылісь быдӧс юаси и нем умӧльсӧ эг адззы.

¹⁵ Ме Исуссӧ ыстылі Ирод дынӧ. Сідз и сія нем Сыись эз адззы, мый понда Сійӧ коліс бы вийны.

¹⁶ Сідзкӧ, тшӧкта Сійӧ виззьыны-шулявны да лэдза».

¹⁷ Сылӧ и колӧм вӧлі Ыджыт лун коста пукаліссез коласісь ӧтікӧс лэдзны.

¹⁸ Быдӧс отирыс пондісӧ горӧтлыны: «Вийны Сійӧ! Лэдз миянлӧ Вараввасӧ!»

¹⁹ Вараввасӧ пуксьӧтӧмась вӧлі карас зык лэбтӧм понда да морт вийӧм понда.

²⁰ Пилатыс бӧра баитіс отирыслӧ, сія Исуссӧ мӧдіс лэдзны.

²¹ Отирыс горӧтлісӧ: «Дор Сійӧ крест вылӧ, дор!»

²² Пилатыс куимӧтісь висьталіс нылӧ: «Мый Сія керис умӧльсӧ? Ме нем умӧльсӧ эг адззы Сыись, медбы сійӧ вийны. Сійӧн виззьӧм-шулялӧм бӧрсянь Сійӧ лэдза».

²³ Отирыс дугдывтӧг горӧтлісӧ, корисӧ Исуссӧ дорны. Аркирейеслӧн да отирлӧн горӧтлӧмныс вермис.

²⁴ Пилатыс керис ны корӧм сьӧрті.

²⁵ Нылӧ лэдзис корӧмныс сьӧрті зык лэбтӧм да морт вийӧм понда пукалісьӧс, а Исуссӧ сетіс дорны крест вылӧ.

«Юр лы» керӧс вылӧ туй

²⁶ Исуссӧ нуӧтісӧ дорны. Сійӧ нуӧтіссес кутісӧ Киринеяись Симон нима мортӧс. Сія локтӧ вӧлі ыб вывсянь. Сійӧ тшӧктісӧ нӧбӧтны крестсӧ Исусыс сьӧрын.

²⁷ Сы сьӧрын муніс ӧддьӧн уна отир. Инькаэс горзісӧ, герьялісӧ Сы понда.

²⁸ Исусыс ныланьӧ бергӧтчӧмӧн висьталіс: «Ерусалимись ныввез, эд горзӧ Ме понда, горзӧ ас пондасиныт да челядьныт понда.

²⁹ Локтасӧ луннэз, сэк висьталасӧ: "Шудаӧсь кагатӧммес, ваясьтӧм гырккес, нимӧттӧм мороссэс!"

³⁰ Сэк керӧссэзлӧ пондасӧ шуны: "Усьӧ миян вылӧ!" Мыссэзлӧ шуасӧ: "Вевттьӧ миянӧс!"

³¹ Листа пуыскӧт кӧ сідз керӧны, мый сэк кӧсыскӧт лоас».

³² Исусыскӧт тшӧтш нуӧтісӧ дорны кык лёк керисьӧс.

³³ Нійӧ вайӧтісӧ «Юр лы» нима керӧс вылӧ. Сэтӧн Исуссӧ дорисӧ крест вылӧ. Ӧт лёк керисьсӧ дорисӧ веськыт ладорас, мӧдсӧ ─ шульга ладорас.

³⁴ Исусыс висьталіс: «Айӧ, простит нійӧ. Нія эд озӧ тӧдӧ, мый керӧны». Исуссӧ крест вылас дориссес Сылісь паськӧмсӧ янсӧтісӧ ас коласаныс кыскӧм сьӧрті, кинлӧ мый шедіс.

³⁵ Отирыс сулалісӧ да видзӧтісӧ. Веськӧтліссес сералісӧ Исусыс вылын. Нія шувлісӧ: «Мӧдіккесӧ мездывліс, ӧні ась Ачыс Асьсӧ мездӧ, Сія кӧ Енлӧн бӧрйӧм Кристос-Мездӧтісь».

³⁶ Сідз и воиннэс сералісӧ Сы вылын. Нія сибӧтчисӧ удны Сылӧ шӧма вина

³⁷ да шувлісӧ: «Тэ кӧ иудейезлӧн Ӧксу, мезды Ачыт Асьтӧ».

³⁸ Исусыс юр вевдӧрын иудей, грек да латин кыввез вылын вӧлі гижӧм: «Сія иудейезлӧн ӧксу».

³⁹ Дорӧммес коласісь ӧт лёк керисьыс видіс Исуссӧ. Сія шувліс: «Тэ кӧ Кристос-Мездӧтісь, мезды Асьтӧ да и миянӧс».

⁴⁰ Мӧд дорӧм мортыс сійӧ ӧліс: «Он я пов Енсис, ачыт эд Сы моз жӧ дорӧм?

⁴¹ Мийӧ асланым лёк керӧм понда дорӧмӧсь, шедтӧмнымӧс и босьтім, а Сія эд умӧльсӧ нем эз кер».

⁴² Сэсся Исусыслӧ висьталіс: «Уськӧт менӧ тӧдвылат, кӧр локтан Аслат Юраланінӧ».

⁴³ Исусыс сылӧ висьталіс: «Быльсӧ тэныт висьтала: тэ талун жӧ лоан Мекӧт райын».

Исуслӧн кулӧм

⁴⁴ Кадыс вӧлі луншӧр гӧгӧр. Сэк быдсӧн муыс пасьта лоис пемыт. Пемытыс сулаліс куим часӧдз.

⁴⁵ Шондіыс пемдіс, Вежа Керкуас Вежася-вежаинсӧ сайӧвтан дӧраыс косясьӧм вылісянь улӧдз кык тор вылӧ.

⁴⁶ Исусыс горӧн висьталіс: «Айӧ! Тэнат киӧ сета Ассим лолӧс». Сідз висьталӧм бӧрсянь Исуслӧн лолыс петіс.

⁴⁷ Сё воинӧн веськӧтлісьыс этӧ быдӧс адззылӧм бӧрсянь ошкис Енсӧ. Сія висьталіс: «Былись эд эта мортыс вӧлӧм Ен сьӧрті веськыта олісь».

⁴⁸ Быдӧс лоӧмсӧ адззылісь отирыс бертісӧ гортаныс моросаныс сӧталӧмӧн.

⁴⁹ Исуссӧ тӧдіссес да Галилеяись Сыкӧт локтӧм инькаэс ылісянь видзӧтісӧ быдӧс лоӧмсӧ.

Исусӧс дзебӧм

^50-51 Сэтчин оліс Ӧсип нима морт, кӧда вӧлі Иудея муын Аримафея карись. Сія бур, Ен сьӧрті веськыта олісьыс видзчисис Енлісь Юралӧмсӧ. Ӧсипыс вӧлі судитан чукӧрись, но Исуссӧ кутіссес дор сія эз вӧв.

⁵² Сія локтіс Пилат дынӧ да корис Исуслісь шойсӧ.

⁵³ Ӧсипыс лэдзис Исуссӧ крест вывсис, каттис дӧраэзӧ да пуктіс дзебсянінӧ, кӧда вӧлі кералӧм из керӧсын. Сэтӧн некин эз на куйлы.

⁵⁴ Сія вӧлі шоччисян лун одзын рытӧн.

⁵⁵ Ӧсипыс сьӧрын мунісӧ инькаэз, кӧдна локтісӧ Исускӧт Галилеясянь. Нія видзӧтісӧ, кыдз Исуслісь шойсӧ пуктісӧ дзебсянінас.

⁵⁶ Дзебсянінсис бертӧм бӧрсянь нія лӧсьӧтісӧ чӧскыт руа мавтассэз. Туйдӧтас тшӧктӧм сьӧрті шоччисян лунас шоччисисӧ.