Лука 21 - Бур Юӧр 2019

¹ Вежа Керкуас Исусыс видзӧтіс, кыдз сьӧм ӧктан дозӧ тэчисӧ сьӧмсӧ бура оліссес.

² Ны коласісь сія казяліс умӧля олісь дӧваӧс, кӧда пуктіс кык ыргӧн сьӧм.

³ Исусыс висьталіс: «Тіянлӧ быльсӧ висьтала: эта умӧля олісь дӧваыс пуктіс быдӧннысся унажык.

⁴ Еныслӧ козинсӧ быдӧнныс тэчисӧ унасиныс, а сія пуктіс ассис медбӧрьясӧ, мый сылӧн вӧлі сёян вылӧ».

Одзланься йылісь висьталӧм

⁵ Мукӧдыс баитісӧ Вежа Керкуыс йылісь, кытшӧм пӧ бура керӧм басӧк иззэзісь, ӧддьӧн баситӧм Енлӧ вайӧм дона козиннэзӧн. Сэтчӧ Исусыс висьталіс:

⁶ «Локтасӧ луннэз, эстісь быдӧс разясӧ, озӧ кольӧ из вылын из».

⁷ Сылісь юалісӧ: «Велӧтісь! Кӧр сія лоас? Мый сьӧрті позьӧ тӧдны сійӧ кадсӧ?»

⁸ Сія висьталіс: «Видзӧтӧ, медбы тіянӧс эзӧ ылӧтӧ. Уна локтасӧ Менам нимӧн да шуасӧ: "Ме ─ Сія" и "Кадыс локтіс ни". Ны сьӧрӧ эд мунӧ.

⁹ Тійӧ кылат тышкасьӧммез йылісь, отир лэбтісьӧм йылісь. Сэк тійӧ эд повзьӧ. Сідз быдӧслӧ одзжык эд и колӧ лоны. Но сія абу на векпон».

¹⁰ Сэк нылӧ висьталіс: «Отир отир вылӧ лэбтісяс, ӧксу ─ ӧксу вылӧ.

¹¹ Уналаын пондасӧ тшыгьявны. Уналаын муыс пондас зэгавны. Уна отир пӧрӧссэзсянь куласӧ. Енӧжас пондасӧ керсьыны быдкодь повзьӧтаннэз да вына мыччалан пассэз.

¹² Сія лоӧмӧдз отирыс лэбтасӧ тіян вылӧ кинысӧ: пондасӧ вашӧтлыны, кутасӧ тіянӧс, вайӧтасӧ синагогаэзӧ, ӧксуэз одзӧ, юраліссез одзӧ, пуксьӧтасӧ Менам ним понда.

¹³ Ны одзын тійӧ пондат вермыны висьтасьны Ме йылісь.

¹⁴ Юраныт одзлань эд видзӧ, кыдз пондат асьнытӧ дорйыны.

¹⁵ Ме сета тіянлӧ мывкыдсӧ да кывсӧ. Тіян вылӧ лэбтісиссеслӧ нем лоас висьтавны паныт, нія озӧ вермӧ тіянкӧт етшасьны.

¹⁶ Ай-мамныт, воннэзныт, увтырныт, ёрттэзныт тіянӧс вузаласӧ, мукӧдсӧ тіян коласісь виясӧ.

¹⁷ Менам ним понда тійӧ некинлӧ син вылӧ одӧ пондӧ ковны.

¹⁸ Но тіян юр вылісь эд и ӧтік юрси тылӧп оз ӧш.

¹⁹ Ыджыт мылаӧн видзсьӧмӧн тійӧ мездат ассиныт ловнытӧ».

Ерусалимлӧн разьсьӧм йылісь

²⁰ «Казялат кӧ, Ерусалимсӧ кытшӧвтісӧ тышкасян вынӧн, тӧдӧ: сибаліс сылӧн разьсьӧмыс.

²¹ Сы коста Иудеяын оліссез ась пышшӧны керӧссэзӧ. Кин лӧсялат карын, сэтісь петӧ. Лӧсялат кар сайын, сэтчӧ эд пырӧ.

²² Нія лоасӧ вештісян луннэз, сэк керсяс Вежа Гижӧтас висьталӧмыс.

²³ Нія луннэзӧ ӧддьӧн сьӧкыт лоас новйӧтчись да нимӧтчись инькаэзлӧ! Му вылас лоас ӧддьӧн сьӧкыт. Енлӧн лӧгыс усяс эта отир вылӧ.

²⁴ Унаӧс виясӧ шыпурттэзӧн. Мукӧдсӧ вынӧн нуӧтасӧ мӧдік муэзӧ. Ерусалимсӧ пондасӧ тальны ентӧдтӧм отир. Сідз лоас нылӧн кадныс чулавтӧдз».

Морт Зонлӧн локтӧм

²⁵ «Шондіын, тӧлісьын, кӧдзуввезын пондасӧ мыччасьны пассэз. Саридзыс пондас ӧддьӧн горӧн бергӧтны-соровтны. Сысянь му вылын отирыс пондасӧ тӧждісьны, нылӧн киэзныс усясӧ.

²⁶ Енӧжись выннэс зэгаласӧ. Умӧль лоӧмсӧ видзчисьӧмныс коста отирыс полӧмныссянь пондасӧ усьны садьтӧг.

²⁷ Сэк казяласӧ кымӧр вылӧт ыджытся-ыджыт вынӧн да югьялӧмӧн Морт Зонлісь локтӧмсӧ.

²⁸ Кӧр быдӧс висьталӧмӧ пондас аркмыны, веськӧтчӧ, лэбтӧ юррезнытӧ, сія тіян мезмӧмныт локтӧ».

²⁹ Сэтчӧ Сія висьтасис нылӧ велӧтан висьт: «Видзӧтӧ инжир пу вылӧ да мӧдік пуэз вылӧ.

³⁰ Асьныт эд тӧдат, гаррез кӧ потӧны, сибалӧ гожум.

³¹ Сідз и тійӧ, кӧр быдӧс висьталӧмӧ пондас керсьыны, тӧдӧ: Еныслӧн Юралӧмыс матын ни.

³² Быльсӧ тіянлӧ баита: сія быдӧс аркмас ӧння оліссез дырни.

³³ Муыс да енӧжыс ӧшасӧ, а Менам кыввезӧ озӧ ӧшӧ.

Лӧсьӧтчӧмӧн овны тшӧктӧм

³⁴ Видзӧтӧ ас сьӧраныт, медбы тіян сьӧлӧммезныт эзӧ вӧлӧ тырӧмӧсь быд лунся тӧждісьӧмӧн, уна сёйӧмӧн да кодалӧмӧн. Сія луныс ась оз лок тіян вылӧ видзчисьтӧг.

³⁵ Сія эд локтас кыдз пӧтка кыян му пасьта быд олісь вылӧ.

³⁶ Сідзкӧ, пыр лоӧ лӧсьӧтчӧмӧсь, кеймӧ, медбы эдӧ сюрӧ эта умӧльӧ да вермит сувтны Морт Зон одзӧ».

³⁷ Луннас Исусыс велӧтіс Вежа Керкуын, а ойесӧ чулӧтіс Виягӧд керӧс вылын.

³⁸ Асывсянь быдӧс отирыс вовлывлісӧ Вежа Керкуас кывзыны Исуссӧ.