Лука 20 - Бур Юӧр 2019

¹ Ӧтік лунӧ Исусыс велӧтіс Вежа Керкуас, висьтасис Бур Юӧрсӧ. Сы дынӧ сибӧтчисӧ аркирейез, Туйдӧтӧ велӧтіссез да бӧрйӧм пӧриссез.

² Нія Сылісь юалісӧ: «Висьтав миянлӧ, кытшӧм вынӧн Тэ сійӧ керан? Кин Тэнӧ сувтӧтіс сійӧ быдӧс керны?»

³ Исусыс нылӧ висьталіс: «Юала и Ме тіянлісь ӧтік йылісь. Висьталӧ Меным,

⁴ кытісь локтіс Иоанлӧн пыртчӧмыс. Енӧжсянь али мортсянь?»

⁵ Нія ас коласаныс пондісӧ баитны: «Висьталам кӧ, енӧжсянь пӧ, Сія шуас: "Мыля нӧ тійӧ сылӧ эдӧ веритӧ?"

⁶ Висьталам кӧ, мортсянь пӧ, сэк отирыс шупкаласӧ миянӧс иззэзӧн. Отирыс эд тӧдӧны Иоансӧ Енсянь юӧртісьӧн».

⁷ Сэк нія висьталісӧ: «Огӧ тӧдӧ, кинсянь».

⁸ Исусыс нылӧ висьталіс: «Сідз и Ме ог висьтав тіянлӧ, кытшӧм вынӧн быдӧс кера».

Виноград вӧдитіссез йылісь велӧтан висьт

⁹ Исусыс отирыслӧ пондіс висьтасьны велӧтан висьт: «Ӧтік морт аслас йӧрӧ сюйыштас винограддэз. Сэсся ассис йӧрсӧ сетас виноград вӧдитіссезлӧ кӧртымӧ. Ачыс сэтісь дыр кежӧ мунас.

¹⁰ Виноград ӧктан кадӧ Сія иньдас ассис рабсӧ виноград вӧдитіссез дынӧ, медбы босьтны воӧм виноградсис ассис пайсӧ. Виноград вӧдитіссес рабсӧ вартласӧ да ыстасӧ куш киӧн.

¹¹ Кӧзяиныс ыстас мӧдік рабӧс. Нія и сійӧ вартласӧ, сераласӧ сы вылын да бӧр ыстасӧ куш киӧн.

¹² Ыстас куимӧтӧс. Нія сійӧ дойдасӧ да вашӧтасӧ.

¹³ Сэк виноград йӧрыслӧн кӧзяиныс аслыс висьталас: "Мый меным керны? Ыста ассим дона зонӧс. Сійӧ нія озӧ лысьтӧ вӧрзьӧтны".

¹⁴ Виноград вӧдитіссес казяласӧ зонсӧ да ӧтамӧдныслӧ шуасӧ: "Сылӧ быдӧс пажытьыс вуджас. Виям сійӧ. Сэк быдӧс миянлӧ дӧнзяс".

¹⁵ Нія зонсӧ кутасӧ, петкӧтасӧ виноград йӧрсис да виясӧ. Мый керас ныкӧт виноград йӧрыслӧн кӧзяиныс?

¹⁶ Сія локтас да виноград вӧдитіссесӧ вияс. Виноград йӧрсӧ сетас мӧдіккезлӧ». Сійӧ кыліссес висьталісӧ: «Сэтшӧмыс ась оз жӧ ло!»

¹⁷ Отирыс вылӧ дзарнитӧмӧн Исусыс висьталіс: «Вежа Гижӧтсис эна кыввес мый йылісь висьталӧны? "Изыс, кӧдӧ керку лэбтіссес абутӧм туйӧ пуктісӧ, лоис пельӧс изӧн".

¹⁸ Быдыс, кин усяс сія из вылӧ, лыэсӧ чеглалас. Кин вылӧ сія усяс, сійӧ личкас».

¹⁹ Аркирейес Туйдӧтӧ велӧтіссескӧт сія кадӧ мӧдісӧ Исуссӧ кутны, но дзир отирсис полісӧ. Нія вежӧртісӧ: велӧтан висьтсӧ Сія висьтасис ны йылісь.

Вот вештӧм йылісь

²⁰ Сы сьӧрын видзӧтлікӧ нія ыстісӧ ылӧтлісь морттэзӧс да тшӧктісӧ нійӧ видзсьыны веськыта оліссезӧн, медбы кутны Исуссӧ баитӧмас. Сэсся тшӧктісӧ сетны Сійӧ Римсянь сувтӧтӧм веськӧтлісь киӧ.

²¹ Ыстӧм морттэс Исусыслісь юалісӧ: «Велӧтісь! Мийӧ тӧдам, Тэ веськыта баитан, велӧтан. Морт вылӧ видзӧттӧг Тэ быдсӧ ӧтмоз веськыта велӧтан Енлӧн туйӧ.

²² Висьтав, колӧ я вештыны вотсӧ Римись ӧксулӧ?»

²³ Сія нылісь ылӧтлӧмсӧ тӧдікӧ висьталіс: «Мый тійӧ Менӧ ылӧтлат?

²⁴ Мыччалӧ меным динарий. Кинлӧн сы вылын чужӧмыс да гижӧм нимыс?» Нія висьталісӧ: «Римись ӧксулӧн».

²⁵ Сія нылӧ висьталіс: «Сідзкӧ, ӧксулісь сетӧ ӧксулӧ, а Енлісь ─ Енлӧ».

²⁶ Нія отирыс одзын эзӧ вермӧ Исуссӧ кутны кылын. Сы висьталӧмсянь нійӧ диво кутіс, сэсся нія шы эзӧ сетӧ.

Ловзьӧм йылісь

²⁷ Исусыс дынӧ локтісӧ садукейез, кӧдна шуӧны, ловзьӧмыс пӧ абу. Нія Сылісь юалісӧ:

²⁸ «Велӧтісь, Моисей гижис миянлӧ: "Кулас кӧ кинлӧн вон да коляс иньсӧ челядьтӧг, ась мӧд воныс гӧтрасьӧ сы инь вылын, медбы чужис кага кулӧм воныс ним вылӧ".

²⁹ Вӧлісӧ сизим вон. Медодззаыс гӧтрасис, но куліс челядьтӧм.

³⁰ Сылісь иньсӧ сэсся босьтіс мӧдыс. Сія сідз жӧ куліс челядьтӧм.

³¹ Сійӧ босьтіс куимӧтыс. Сідз быдӧнныс сизимыс кулісӧ, эзӧ кольӧ челядьсӧ.

³² Медбӧрын куліс и инькаыс.

³³ Сизимнанныс сійӧ видзисӧ иньӧн. Ловзьӧм бӧрас кинлӧн сія лоас иньыс?»

³⁴ Исусыс нылӧ висьталіс: «Ӧння кадлӧн отирыс гӧтрасьӧны, петӧны жӧник сайӧ.

³⁵ Мукӧдыслӧ Еныс сетас адззывны мӧдік кад ─ кулӧммезісь ловзьӧм. Сэтчин озӧ гӧтрасьӧ, жӧник сайӧ озӧ петӧ.

³⁶ Нія лоасӧ ангеллэз кодьӧсь, кувны озӧ пондӧ. Нія ловзьӧмлӧн зоннэз, Енлӧн зоннэз.

³⁷ Кулӧммезісь ловзьӧмсӧ эд Моисейыс мыччаліс сотчан жельнӧг дынын. Моисейыс шуис, Медвылісьыс пӧ Авраамлӧн Ен, Исаклӧн Ен, Яковлӧн Ен.

³⁸ Еныс абу кулӧммезлӧн Ен, дзир ловьяэзлӧн. Сылӧн эд быдӧнныс ловьяӧсь».

³⁹ Сэтчӧ Туйдӧтӧ велӧтіссез коласісь мукӧдыс висьталісӧ: «Велӧтісь! Бура Тэ висьталін».

Кристос-Мездӧтісьыс кинлӧн зоныс?

⁴⁰ Сэсся юасьны Исуслісь мыйкӧ йылісь полісӧ. А Сія нылӧ висьталіс:

⁴¹ «Мыля шуӧны, Кристос-Мездӧтісьыс пӧ Давидлӧн зон?

⁴² Ачыс Давидыс Псалтырын висьталӧм: ─ Дӧсвидзись Ен висьталіс менам Дӧсвидзисьлӧ: "Пукав Мекӧт веськыт ладорам,

⁴³ кытчӧдз ог уськӧт кок увтат Тэ вылӧ лэбтісиссесӧ".

⁴⁴ Ачыс Давидыс Сійӧ шуӧ кӧ Дӧсвидзисьӧн, кыдз сэк Сія вермас лоны сы Зонӧн?»

Ылынжыка видзсьӧ Туйдӧтӧ велӧтіссес дынісь!

⁴⁵ Быдӧс отирыс кывзісӧ Исуссӧ. Сэк Сія висьталіс Аслас велӧтчиссезлӧ:

⁴⁶ «Ылынжыка видзсьӧ Туйдӧтӧ велӧтіссес дынісь. Нія радейтӧны ветлӧтны кузь паськӧмӧ пасьтасьӧмӧн. Нылӧ сьӧлӧмви, копыртчӧны кӧ ны одзын отир ӧксяніннэзын. Синагогаын да сёян дорын радейтӧны пукавны одзас.

⁴⁷ Нія дӧваэзлісь быдӧс мырддьӧны да асьнысӧ мыччалӧм могись дыр кеймӧны. Суд Лунас нія лоасӧ ӧддьӧн сьӧкыта мыжйӧмӧсь».