Лука 19 - Бур Юӧр 2019

¹ Исусыс локтіс Ериконӧ, муніс карӧттяс.

² Сэтчин бура оліс вот ӧктіссезлӧн Заккей нима веськӧтлісь.

³ Заккейыс мӧдіс видзӧтны Исуссӧ, кин Сія сэтшӧмыс. Ачыс сія вӧлі учӧт мыгӧра. Отирыс вӧлі ӧддьӧн уна, сійӧн сія эз вермы видзӧтны Исуссӧ.

⁴ Заккейыс котӧртіс одзлань. Исуссӧ казялӧм могись сія кайис сикомор пу вылӧ, кӧда дынӧт Исусыслӧ коліс мунны.

⁵ Исусыс сибӧтчис пуыс дынӧ. Сія видзӧтіс вывлань да шуис: «Заккей, чожажык лэдзчы! Меным талун колӧ сувтчыны тэ ордын».

⁶ Заккейыс гажмис, перыта лэдзчис, Исуссӧ вайӧтіс гортас.

⁷ Отирыс сійӧ адззылісӧ да лӧгӧн пондісӧ баитны: «Сія пырис умӧльсӧ керись морт ордӧ».

⁸ Заккейыс Исусыслӧ висьталіс: «Велӧтісь, быдӧс пажытьсим джынсӧ сета корись отирлӧ. Кинлісь босьті колӧмся унажык, сылӧ сета нёльпӧв».

⁹ Исусыс сылӧ висьталіс: «Талун эта керкуӧ локтіс мезмӧмыс, и сія эд Авраамлӧн зон.

¹⁰ Морт Зон эд локтіс адззыны да мездыны ӧшӧммесӧ».

Дас сьӧм йылісь велӧтан висьт

¹¹ Отирыс кывзісӧ Исуссӧ. Нія вӧлісӧ Ерусалим дынын матын ни. Сійӧн нія юраныс пыртісӧ, чожа пӧ лоас Енлӧн Юралӧмыс. Сэк Исусыс висьтасис велӧтан висьт.

¹² Сія висьталіс: «Ӧтік бур увтырись морт лӧсьӧтчас мунны ылісь муэзӧ. Сэтчин сія мӧдӧм сувтны ӧксуӧн да бертны бӧр.

¹³ Сія корас дынас дас рабӧс. Нылӧ сетас уна сьӧм: дас мина. Берттӧдззас сьӧмсӧ тшӧктас лэдзны уджӧ бергавны, медбы вӧлі содтӧт.

¹⁴ Аслас отирлӧ сія син вылӧ абу колӧм, сійӧн сьӧрсяняс ыстӧмась отирӧс висьтавны, оз пӧ ков сія миянлӧ ӧксунас.

¹⁵ Сія мортыс бертас ӧксуӧн. Тшӧктас корны раббесӧ, кӧдналӧ сетіс эзысьсӧ. Сія мӧдӧм тӧдны, кин мымда шедтіс.

¹⁶ Локтас одзза рабыс, висьталас: "Кӧзяин! Тэнат эзысьыт вайис дасісь унажык".

¹⁷ Мӧдыс висьталас: "Тэ бур, рам раб! Тэ етшаас вӧлін надейнӧй. Эта понда тэнӧ сувтӧта веськӧтлісьӧн дас карын".

¹⁸ Локтас мӧдік раб, висьталас: "Кӧзяин! Тэнат эзысьыт вайис витісь унажык".

¹⁹ Висьталас и сія раблӧ: "Тэнат кипод увтӧ сета вит кар".

²⁰ Локтас куимӧтыс, висьталас: "Кӧзяин! Босьт эзысьтӧ. Ме сійӧ видзи чышьянӧ каттьӧмӧн.

²¹ Ме полі тэись. Тэ мортыс сьӧлӧмтӧм: босьтан пуктытӧмтӧ, вундан кӧдзтӧмтӧ".

²² Кӧзяиныс сылӧ висьталас: "Тэнат кыввез сьӧрті лоас тэныт, ылӧтлісь раб! Тэ тӧдін: ме мортыс сьӧлӧмтӧм, босьта пуктытӧмӧс, вунда кӧдзтӧмӧс.

²³ Мыля тэ эзысьсӧ эн сет сьӧм вежиссезлӧ, медбы локтӧм бӧрам ме босьті сійӧ содтӧтӧн?"

²⁴ Сэтӧн сулаліссезлӧ висьталас: "Босьтӧ сылісь эзысьсӧ да сетӧ сылӧ, кӧдалӧн дас мина".

²⁵ Сылӧ висьталасӧ: "Кӧзяин! Сылӧн эд сідз ни дас мина".

²⁶ Кӧзяиныс шуас: "Тіянлӧ висьтала: быдыслӧ, кинлӧн эм, сетасӧ. Кинлӧн абу, сылісь босьтасӧ и сійӧ, мый эм.

²⁷ Лёк кериссесӧ, кӧдна эзӧ мӧдӧ менӧ сувтӧтны ас вылын ӧксуӧн, вайӧтӧ татчӧ. Вийӧ нійӧ ме одзын"».

Исуслӧн Ерусалимӧ пырӧм

²⁸ Этӧ висьтасьӧм бӧрын Исусыс муніс одзлань, Ерусалимлань.

²⁹ Сія локтіс Виффагия да Вифания дынӧ. Нія посаддэс сулалісӧ Виягӧд керӧс увтын. Исусыс кык велӧтчисьӧс ыстіс одзлань.

³⁰ Нылӧ висьталіс: «Мунӧ паныт сулалан посадӧ. Сэтчин пырат да казялат дом йылын осёл чаньӧс. Сы вылӧ морт эз на пуксьыв. Домӧтсӧ пӧрччалӧ, вайӧтӧ сійӧ ме дынӧ.

³¹ Кинкӧ пондас кӧ юасьны, мыйлӧ пӧрччалат, висьталӧ, сія пӧ колӧ Дӧсвидзисьлӧ».

³² Велӧтчиссес мунісӧ да казялісӧ: быдӧс лоис Исуслӧн висьталӧм сьӧрті.

³³ Осёлыслісь домӧтсӧ пӧрччалӧм коста кӧзяиннэс юалісӧ: «Мыйлӧ тійӧ осёлсӧ мездӧтат?»

³⁴ Мӧддэс висьталісӧ: «Сія колӧ Дӧсвидзисьлӧ».

³⁵ Осёл чаньсӧ вайӧтісӧ Исусыс дынӧ. Ассиныс паськӧмнысӧ пуктісӧ осёлыс вылӧ да пуксьӧтісӧ Исуссӧ.

³⁶ Исусыс муніс верзьӧмӧн, отирыс сы одзӧ туй вылас ольсалісӧ паськӧмнысӧ.

³⁷ Исусыс сибӧтчис Виягӧд керӧс вылісь лэдзчанінӧ. Сэк унася-уна велӧтчись гажувьяныс горӧн пондісӧ ошкыны Енсӧ адззывлытӧммесӧ мыччалӧм понда.

³⁸ Нія баитісӧ: ─ Бласлӧвитӧм Дӧсвидзись нимӧн локтісь Ӧксуыс! Енӧжын лӧнь олан, ошкӧм Медвылісь Енлӧ!

³⁹ Отирыс коласісь мукӧд фарисейес висьталісӧ Сылӧ: «Велӧтісь! Ӧв ассит велӧтчиссетӧ».

⁴⁰ Исусыс нылӧ висьталіс: «Тіянлӧ висьтала: нія пӧдналасӧ кӧ ӧмнысӧ, сэк иззэс пондасӧ горӧтны».

Исус тӧждісьӧ Ерусалим понда

⁴¹ Исусыс локтіс Ерусалим дынӧ. Карыс вылӧ видзӧттӧн Сія пондіс горзыны карыс понда

⁴² да висьталіс: «Кӧть талун бы тэ вежӧртін, мый вайӧ тэныт лӧнь олансӧ! Но ӧні тэнат синнэт сійӧ озӧ вермӧ адззыны.

⁴³ Локтасӧ луннэз, сэк лёк керись йӧз тэнӧ кытшӧвтасӧ, тэнат из йӧр гӧгӧрӧ мусӧ лэбтасӧ, быд ладорсянь дзескӧтасӧ.

⁴⁴ Тэнӧ быдсӧн разясӧ, тэнчит челядьтӧ виясӧ. Карас из вылын из озӧ кольӧ сійӧн, мыля тэ эн тӧд сійӧ кадсӧ, кӧр вовліс тэ дынӧ Еныс».

Вежа Керкуись вузасиссезӧс вашӧтӧм

⁴⁵ Исус пырис Вежа Керкуӧ. Сія пондіс сэтчинісь вашӧтны вузасиссесӧ да небиссесӧ.

⁴⁶ Нылӧ висьталіс: «Менам керкуӧ ─ кейман керку, а тійӧ сійӧ пӧртіт лёк кериссеслӧ позӧ!»

⁴⁷ Исусыс быд лун велӧтіс Вежа Керкуас. Аркирейес, Туйдӧтӧ велӧтіссес да бӧрйӧм пӧриссес пондісӧ баитчыны, кыдз бы сійӧ вийны.

⁴⁸ Но нія эзӧ тӧдӧ, мый Сыкӧт керны. Исуссӧ кывзісь отирыс эд кальк эз керсьывлы Сы дынісь.