Лука 16 - Бур Юӧр 2019

¹ Исусыс висьталіс Аслас велӧтчиссезлӧ: «Ӧтік морт олас ӧддьӧн бура. Сія керкуас видзас веськӧтлісьӧс. Сылӧ висьталасӧ веськӧтлісьыс йылісь, сія пӧ гусьӧн видзӧ сылісь пажытьсӧ.

² Мортыс корас веськӧтлісьсӧ да висьталас: "Мый ме кыла тэ йылісь? Висьтась аслат удж йылісь. Ӧнісянь веськӧтлісьнас уджавны тэ он понды".

³ Сэк веськӧтлісьыс аслыс шуас: "Мый меным керны? Кӧзяинӧ менӧ оз лэдз уджавны гортас. Гарйыны ог вермы, корны ог лысьт.

⁴ Тӧда, мый колӧ керны, медбы менӧ лэдзисӧ мӧдік керкуэзӧ, ог кӧ понды уджавны керкуас веськӧтлісьӧн".

⁵ Сія кӧзяиныслісь одзӧсаліссесӧ ӧтікӧн корлас дынас. Одзза мортыслісь юалас: "Мымда тэ одзӧстін менам кӧзяинлісь?"

⁶ Мортыс висьталас: "Сё лыддян доз ви". Сэк сія висьталас сылӧ: "Босьт ассит гижӧттӧ, тэрмасьӧмӧн гиж ─ витдас".

⁷ Мӧдіклісь юалас: "Тэ мымда одзӧстін?" Сія висьталас: "Сё лыддян доз шогді". Сылӧ висьталас: "Босьт ассит гижӧттӧ, гиж ─ кыкьямысдас".

⁸ Кӧзяиныс ошкас умӧль веськӧтлісьсӧ адззисьӧмыс понда. Ӧння кадлӧн отирыс югытлӧн челядься чожажыка адззисьӧны, мый керны ас коддескӧт.

⁹ Ме тіянлӧ висьтала: адззӧ аслыныт ёрттэзнытӧ му вылісь быд берсянас, медбы босьтісӧ тіянӧс пырся оланінӧ, кӧр тіян нем оз ло».

Кык кӧзяинлӧ уджалӧм йылісь

¹⁰ «Кин етшанас надейнӧй, сія надейнӧй и унанас. Кин абу надейнӧй етшанас, сія и унанас абу надейнӧй.

¹¹ Тійӧ кӧ му вылісь быд берсянас эдӧ вӧлӧ надейнӧйӧсь, кин тіянлӧ сетас былись дона берсясӧ?

¹² Тіян киӧ оз кӧ туй сетны мӧдіклісь, кин тіянлӧ сетас ассиныт?

¹³ Некытшӧм кысъялісь оз вермы уджавны кык кӧзяинлӧ. Ӧтыс син вылӧ оз понды ковны, а мӧдсӧ пондас радейтны. Ӧтыслӧ быдӧс пондас бура керны, мӧдыс вылӧ и видзӧтны оз понды. Одӧ вермӧ уджавны Енлӧ да сьӧмлӧ».

¹⁴ Сійӧ быдӧс кылісӧ и сьӧм радейтісь фарисейез. Нія сералісӧ Исусыс вылын.

¹⁵ Исусыс нылӧ висьталіс: «Отир одзын тійӧ асьнытӧ мыччалат Ен сьӧрті веськыта оліссезӧн. Но Еныс эд тӧдӧ тіянлісь сьӧлӧммезнытӧ. Мый отирыслӧ дона, сія Еныслӧ сэрпӧсь».

Туйдӧт да Енлӧн Юралӧм

¹⁶ «Туйдӧтлӧн да Енсянь юӧртіссеслӧн кадыс вӧлі Иоан локтӧмӧдз. Ӧння кадсянь Енлӧн Юраланін йылісь Бур Юӧр паськалӧ, и быдыс сэтчин вынсьӧтчӧ пырны.

¹⁷ Туйдӧтас висьталӧмись эд ӧтік кырӧлок оз ӧш. Чожажык муыс да енӧжыс ӧшасӧ.

¹⁸ Аслас инькӧт янсӧтчӧм мортыс гӧтрасяс кӧ мӧдік вылын, сія кыскасьӧ иньыс сайсянь. Аслас жӧниккӧт янсӧтчӧм инькасӧ кин босьтас кӧ ас саяс, сія кыскасьӧ».

Бура олісь да Лазар корись

¹⁹ «Ӧтік морт оліс ӧддьӧн бура. Пасьтасис сія дона бур паськӧмӧ, быд луныс сылӧ вӧлі гажа вежалун.

²⁰ Сія кадӧ оліс и Лазар нима корись морт. Сія пукаліс бура олісь морт пыранін дынын. Сылӧн кучикыс быдсӧн вӧлі ӧдӧм.

²¹ Поннэс нювлісӧ сылісь дойманіннэсӧ. Лазарыс корліс сёйны бура олісьыс пызан вылісь усьӧм сёян торресӧ.

²² Корись мортыс куліс. Ангеллэс нуӧтісӧ сійӧ Авраам дынӧ. Куліс и бура олісьыс, сійӧ дзебісӧ.

²³ Адас маитчӧм коста сія лэбтіс синнэсӧ, ылісь казяліс Авраамсӧ да сыкӧт ордчӧн Лазарсӧ.

²⁴ Бура олісьыс горӧтіс: "Авраам айӧ! Небыт сьӧлӧмсянь бергӧтчы меланьӧ, иньдӧт ме дынӧ Лазарсӧ. Ась чуньпонсӧ кӧтӧтас ваас да сайкӧтас менчим кылӧс. Эстӧн би пытшкас ме ӧддьӧн маитча".

²⁵ Авраамыс сылӧ шуис: "Зонӧй, уськӧт тӧдвылат: тэ эд олікат босьтін ни ассит буртӧ. Лазарыслӧ дӧнзис умӧльыс. Ӧні сія эстӧн сьӧлӧмсӧ бурмӧтӧ, а тэ маитчан.

²⁶ Да и ӧні тіян коласын да миян коласын ыджыт пыдӧстӧмин. Сідзкӧ, кин бы мӧдіс татісянь вуджны тіян дынӧ, сія оз вермы. Сідз и тіян дынсянь татчӧ озӧ вуджӧ".

²⁷ Сэк мортыс шуис: "Сэк кора тэнӧ, айӧ, иньдӧт Лазарсӧ айӧ керкуӧ.

²⁸ Менам эд эмӧсь вит вон. Сія ась висьталӧ нылӧ: оз ков сюрны татчӧ мырсянінас".

²⁹ Авраамыс сылӧ висьталіс: "Нылӧн эмӧсь Моисей да Енсянь юӧртіссез, ась кывзӧны нійӧ".

³⁰ Сія висьталіс: "Озӧ нія кывзӧ, Авраам айӧ! Локтас кӧ кинкӧ кулӧммез коласісь, сэк нія умӧльсӧ керӧммезныс дынісь бергӧтчасӧ Енлань".

³¹ Авраамыс сылӧ шуис: "Озӧ кӧ нія кывзӧ Моисейсӧ да Енсянь юӧртіссесӧ, сэк нія и кулӧммес коласісь ловзьӧмыслӧ озӧ веритӧ"».