Лука 15 - Бур Юӧр 2019

¹ Вот ӧктіссес да мӧдік умӧльсӧ керись отир сибӧтчывлісӧ кывзыны Исуссӧ.

² Фарисейес Туйдӧтӧ велӧтіссескӧт лӧгӧн баитісӧ: «Сія сибӧтӧ дынас умӧльсӧ кериссесӧ да сёйӧ ныкӧт».

³ Сэк Исусыс нылӧ висьталіс сэтшӧм велӧтан висьт:

⁴ «Шуам, кинлӧнкӧ тіян коласісь эм сё баля чукӧр. Сэтісь ӧтік ӧшас. Оз разь мортыс коль ӧкмысдас ӧкмыс балясӧ овтӧминас, медбы кошшыны ӧшӧмсӧ? Сія пондас кошшыны балясӧ адззытӧдз.

⁵ Адззас сійӧ, гажмас, пуктас пельпон вылас.

⁶ Гортас локтӧм бӧрын корас ёрттэсӧ матын оліссескӧт да висьталас: "Гажӧтчӧ мекӧт! Ме адззи ассим ӧшӧм баляӧс".

⁷ Висьтала тіянлӧ: енӧжас ӧддьӧн ыджыт гаж овлӧ, бергӧтчас кӧ Енлань ӧтік умӧльсӧ керись морт. Сэтшӧм гажыс оз овлы ӧкмысдас ӧкмыс Ен сьӧрті веськыта олісь понда. Нылӧ эд оз ков бергӧтчыны умӧль керӧммезныс дынісь».

Ӧшӧм сьӧм йылісь велӧтан висьт

⁸ «Кытшӧм инька дас эзысь сьӧмись ӧтікӧ ӧштас кӧ, оз ӧзты би, оз понды чышкыны джоджсӧ да бура кошшыны сійӧ адззытӧдз?

⁹ Адззас сьӧмсӧ, корас модзанкаэсӧ матын олісь инькаэскӧт да висьталас: "Гажӧтчӧ мекӧт, ме адззи ӧшӧм сьӧмӧс".

¹⁰ Тіянлӧ висьтала: ӧтік морт понда овлӧ сэтшӧм жӧ гажыс Енлӧн ангеллэзлӧн, бергӧтчас кӧ мортыс умӧль керӧммес дынісь Енлань».

Ылалӧм зон йылісь велӧтан висьт

¹¹ Исусыс эшӧ висьталіс: «Ӧтік мортлӧн вӧлӧмась кык зон.

¹² Ны коласісь учӧтжык зоныс айыслӧ висьталас: "Айӧ, пажытьсис вай менчим пайӧс". Айыс пажытьсӧ кыкнан зоныслӧ янсӧтас.

¹³ Кынымкӧ лун бӧрті учӧтжык зоныс аслас пайӧн мунас ылісь муэзӧ. Сэтчин лэдзчисьӧмӧн овтӧнняс быдӧс, мый сылӧн вӧлі, видзыштас.

¹⁴ Сэк сія муын отирыс ёна пондасӧ тшыгьявны. Зонкалӧ овны лоас ӧддьӧн сьӧкыт.

¹⁵ Сія локтас сэтчин олісь дынӧ медасьны. Мӧдыс ыстас зонкасӧ ыб вылӧ видзӧтны порссез сьӧрын.

¹⁶ Зонкаыс ӧддьӧн мӧдӧм порсь сёяннас тыртны кынӧмсӧ. Сылӧ и сійӧ некин оз сет.

¹⁷ Зонкаыс вежӧрсялас да шуас: "Айӧлӧн уджаліссес пӧттӧдз сёйӧны, да няньыс эшӧ кольччӧ, а ме тшыгйӧн кула!

¹⁸ Чечча, муна айӧ дынӧ. Сылӧ висьтала: Айӧ! Ме кери умӧльсӧ енӧж одзын и тэ одзын.

¹⁹ Менӧ оз ни позь шуны тэнат зонӧн. Босьт менӧ медалӧм уджалісьӧн".

²⁰ Зонка чеччас да мунас айыс дынӧ. Айыс ылісянь казялас зонсӧ. Сылӧ жаль лоас сія. Сія котӧртас паныт, кутчисяс голя бердас, окалас зонсӧ.

²¹ Зоныс висьталас сылӧ: "Айӧ! Ме кери умӧльсӧ енӧж одзын и тэ одзын. Менӧ оз ни позь шуны тэнат зонӧн".

²² Айыс висьталас раббеслӧ: "Вайӧ буржык паськӧм, пасьтӧтӧ сійӧ. Киас кышалӧ чунькытш. Коккезас ─ кӧмкӧт.

²³ Вайӧтӧ ёнжык кукань да начкылӧ. Пондам сёйны да гажӧтчыны!

²⁴ Эта зонӧ менам вӧлі кулӧм да ловзис, ӧшліс да адззисис". Быдӧнныс пондасӧ гажӧтчыны.

²⁵ Сылӧн пӧрисьжык зоныс вӧлӧм ыб вылын. Сія бертікас, горт дынас локтікӧ ни, кылас сьылӧм да гажӧтчӧм.

²⁶ Дынас корас ӧтік рабӧс да юалас: "Мый сэтшӧмыс?"

²⁷ Рабыс сылӧ висьталас: "Тэнат воныт локтіс. Айыт начкыліс ён куканьӧс, зоныс эд сы дынӧ локтіс ловья".

²⁸ Пӧрисьжык зоныс лӧгасяс, нельки керкуас оз пыр. Айыс петас да сійӧ корас.

²⁹ Мӧдыс айыслӧ висьталас: "Кыным во ме тэныт уджала, пыр кера тэнат тшӧктӧм сьӧрті, но тэ меным ёрттэзӧкӧт гажӧтчыны и кӧзапиянӧс эн сет.

³⁰ Зоныт локтіс куш киӧн, лэдзчисьӧм инькаэзкӧт быдӧс видзыштӧм бӧрсянь. Тэ тай сы понда начкылін ён куканьӧс".

³¹ Айыс сылӧ висьталас: "Зонӧ! Тэ пыр мекӧт. Быдӧс, мый менам эм, сія тэнат.

³² Воныт понда эд колӧ гажмыны да гажӧтчыны. Сія вӧлі кулӧм да ловзис, ӧшліс да адззисис"».