Лука 14 - Бур Юӧр 2019

¹ Шоччисян лунӧ Исусыслӧ лӧсяліс ӧтік юралісь фарисей ордӧ локны сёйны. Быдӧнныс бура нёджжалісӧ Исусыс сьӧрын.

² Сы одзӧ сувтіс ва пыкӧсӧн шогалісь морт.

³ Туйдӧтӧ велӧтіссеслісь да фарисейеслісь Исусыс юаліс: «Позьӧ я веськӧтны шоччисян лунӧ?»

⁴ Нія шы эзӧ сетӧ. Мортыс бердӧ павкӧтчӧмӧн Исусыс сійӧ веськӧтіс да ыстіс гортас,

⁵ а нылӧ висьталіс: «Тіян коласісь кинлӧнкӧ осёл али пороз усяс кӧ юкмӧсӧ, одӧ разь сійӧ кыскӧ кӧть и шоччисян лунӧ?»

⁶ Нія Сылӧ нем эзӧ вермӧ висьтавны.

Фарисей ордын ӧксьӧм отирӧс велӧтӧм

⁷ Исусыс казяліс, корӧммес тэрмасисӧ пуксьыны одзлань. Сійӧн Сія висьталіс велӧтан висьт:

⁸ «Корас кӧ тэнӧ кин гӧтрасьӧм порйӧтны, одзас эн пуксьы. Корӧммес коласын вермас лоны морт, кӧдӧ пуктӧны тэсся вылынжыка.

⁹ Тэнӧ да сійӧ корисьыс сэк сибӧтчас тэ дынӧ да висьталас: "Лэдз сійӧ этчӧ пуксьыны". Тэныт сэк ковсяс пуксьыны медбӧрас да гӧрдӧтны отир одзын.

¹⁰ Корасӧ кӧ, тэ лок да пуксьы медбӧрас. Сэк тэнӧ корисьыс локтас да висьталас: "Ёрт, пуксьы одзлань!" Тэныт сэк бур лоас тэкӧт пукалісь отир одзын.

¹¹ Асьсӧ быд вылына лэбтісьыс лоас лэдзӧм. Асьсӧ учӧтӧ пуктісьыс лоас лэбтӧм».

¹² Исусыс Сійӧ корисьлӧ висьталіс: «Лунӧн я, рытӧн я лӧсьӧтӧм сёян дорӧ эн кор ассит ёрттэтӧ, воннэтӧ, ассит увтыртӧ, ордчӧн бура оліссетӧ. Вештісьӧм могись и нія тэнӧ вермасӧ корны.

¹³ Керан кӧ вежалунтӧ, сёян дорас кор дойдӧммесӧ, кориссесӧ, чотіссесӧ, синтӧммесӧ.

¹⁴ Тэ лоан шуда, нія эд немӧн озӧ вермӧ тэныт вештісьны. Тэныт вештасӧ Ен сьӧрті веськыта оліссезлӧн ловзьӧм коста».

Рочалӧммез йылісь велӧтан висьт

¹⁵ Сійӧ кылікӧ Сыкӧт пукаліссез коласісь кинкӧ висьталіс Исусыслӧ: «Шуда сія, кин Енлӧн Юраланінын пуксяс пызан сайӧ!»

¹⁶ Исусыс сылӧ висьталіс: «Ӧтік морт ӧктас ыджыт пызан да унаӧс рочалас.

¹⁷ Сибалас пызан сайӧ пуксян кад. Ассис рабсӧ сія ыстас висьтавны корӧммеслӧ: локтӧ, быдӧс эд лӧсьӧтӧм ни.

¹⁸ Жыв баитчӧмӧн быдӧнныс пондасӧ бӧр керсьыны. Одззаыс висьталас сылӧ: "Ме босьті му. Меным колӧ ветлыны видзӧтны сійӧ. Кора тэнӧ, эн видз ме вылӧ лӧгтӧ".

¹⁹ Мӧдыс висьталас: "Ме босьті дас пороз. Ме муна видзӧтны нійӧ уджын. Кора тэнӧ, эн видз ме вылӧ лӧгтӧ".

²⁰ Куимӧтыс висьталас: "Ме гӧтраси, сійӧн ог вермы локны".

²¹ Рабыс бертас, быдӧс висьтасяс аслас кӧзяинлӧ. Сэк кӧзяиныс лӧгасяс да висьталас аслас раблӧ: "Тэрмасьӧмӧн мун карас да уличаэзісь, туйвежжезісь вайӧт татчӧ кориссесӧ, дойдӧммесӧ, коктӧммесӧ, синтӧммесӧ".

²² Рабыс локтас да висьталас: "Кӧзяин! Кери тэнат тшӧктӧм сьӧрті, а пызан саяс лабиччес эшӧ эмӧсь".

²³ Кӧзяиныс висьталас аслас раблӧ: "Мун туйезӧт, йӧр доррезӧт и быдӧннысӧ, кинӧс панталан, тшӧкты локны, медбы менам керкуӧ тырис.

²⁴ Висьтала тіянлӧ: одзжык корӧммез коласісь некин оз понды сёйны менчим сёянсӧ". Уна корӧммес, да етша бӧрйӧммес».

Исус сьӧрӧ мунісьлӧ

²⁵ Исускӧт муніс уна отир. Ныланьӧ бергӧтчӧмӧн Исусыс висьталіс:

²⁶ «Ме дынӧ локтісьлӧ ай-мамыс, воннэс-сойес, иньыс, челядьыс да аслас оланыс Месся донажыкӧсь кӧ, сія оз вермы лоны Менам велӧтчисьӧн.

²⁷ Ме сьӧрӧ локтісьыс ассис крестсӧ оз кӧ нуӧт, сія оз вермы лоны Менам велӧтчисьӧн.

²⁸ Кин тіян коласісь ыджыт керку лэбтӧм одзын оз пуксьы да лыддьы, мымда сэтчӧ мунас сьӧмыс? Тырмас я сылӧн сьӧмыс керкусӧ быдсӧн лэбтыны?

²⁹ Увтсӧ керас да оз кӧ вермы быдсӧн лэбтыны, сэк пондасӧ сы вылын серавны.

³⁰ Отирыс шуасӧ, мортыс пондӧтчис пӧ да эз вермы быдсӧн лэбтыны».

Ӧксу йылісь

³¹ «Ӧксулӧ колӧ петны тышкасьны мӧдік ӧксукӧт. Тышкасьӧм одззас оз разь сія пуксьы баитчыны, тырмас я сылӧн выныс? Вермас я сія дас сюрсӧн лэбтісьны тышкасьны сы вылӧ кыкдас сюрс локтӧм йӧзкӧт?

³² Оз кӧ тырмы выныс, сэк мӧд ӧксуыс кытчӧдз ылын, ыстас ассис отирсӧ баитчыны бурасьӧм йылісь.

³³ Сідзкӧ, быдыс тіян коласісь, кин оз коль быдӧс, мый сылӧн эм, оз вермы лоны Менам велӧтчисьӧн».

Сов йылісь

³⁴ «Сов ─ буртор, но ӧштас кӧ сія солалан вынсӧ, мыйӧн сійӧ бӧр керан соланас?

³⁵ Сэтшӧмыс муӧ, назёмӧ оз туй. Сійӧ сэк чапкӧны ылӧжык. Пеля мортыс ась кылӧ!»