Лука 12 - Бур Юӧр 2019

¹ Сы коста отирыс ӧксисӧ сюрс-мӧд ӧтамӧд бердӧ дзескӧтчӧмӧдз. Исусыс пондіс баитны велӧтчиссеслӧ: «Фарисейезлӧн нянь шӧмись ылына видзсьӧ, сія ылӧтлӧмӧн олӧм.

² Быдӧс сайӧвтӧмыс оссьӧ, быд гусьӧна керӧм йылісь пондӧны тӧдны.

³ Сійӧн пемытінын висьталӧмныт кывсяс югытінын. Мый баитіт пельӧ гусьӧник керку пытшкын, лоас висьталӧм керку вывсянь».

Кинісь колӧ повны?

⁴ «Висьтала тіянлӧ, Аслам ёрттэзлӧ: эд полӧ вывтырнытӧ вийиссезісь. Нія сэсся нем озӧ вермӧ керны.

⁵ Висьтала тіянлӧ, кинісь колӧ повны: полӧ Сыись, Кӧда вийӧм бӧрас вермас куслытӧм биӧ чапкыны. Тіянлӧ шуа: Сыись полӧ.

⁶ Озӧ я вит пышкай вузалӧ кык учӧт сьӧм вылӧ? Ны коласісь Еныс некӧдӧ абу вунӧтӧм.

⁷ Тіян эд и юрси тылӧппэзныт лыддьӧмӧсь. Сідзкӧ, эд полӧ, тійӧ эд пышкайесся донажыкӧсь».

Кристоссӧ тӧдӧмись суськисьӧм

⁸ «Висьтала тіянлӧ: кин отир одзын оз повзьы Менӧ тӧдӧм йылісь висьтасьны, сійӧ Морт Зоныс пуктас Аслас мортӧ Енлӧн ангеллэз одзын.

⁹ Кин отир одзын суськисяс Менӧ тӧдӧмись, сійӧ и Ме пукта тӧдтӧм мортӧ Енлӧн ангеллэз одзын.

¹⁰ Морт Зон вылӧ умӧль кыв висьталісь мортыс лоас проститӧм. Вежа Лов вылӧ умӧль кыв висьталісь мортыс оз ло проститӧм.

¹¹ Кӧр тіянӧс вайӧтасӧ синагогаэзӧ, юраліссез да веськӧтліссез одзӧ, эдӧ тӧждісьӧ, кыдз пондат асьнытӧ дорйыны, мый пондат баитны.

¹² Сія кадӧ Вежа Лолыс тіянӧс велӧтас, мый колӧ висьтавны».

Мывкыдтӧм бура олісь йылісь велӧтан висьт

¹³ Отирыс коласісь Исусыслӧ ӧтік висьталіс: «Велӧтісь! Тшӧкты вонӧс айӧсянь кольччӧм пажытьсӧ мекӧт янсӧтны».

¹⁴ Исусыс висьталіс сія мортлӧ: «Кин Менӧ сувтӧтіс судитісьнас, медбы тіян коласын бӧрйисьны?»

¹⁵ Сія быдӧнныслӧ висьталіс: «Видзӧтӧ, эд горшасьӧ. Уна пажыть ӧктӧмсянь мортлӧн оланыс эд оз видзсьы».

¹⁶ Сэтчӧ Сія висьтасис велӧтан висьт: «Ӧтік мортлӧн муыс уна сетас воӧмсӧ.

¹⁷ Сія аскӧттяс баитас: "Мый нӧ керны? Меным некытчӧ ӧктыны ыб вывсис быдӧс воӧмсӧ".

¹⁸ Сэк висьталас: "Тӧда, мый керны: разя ассим амбаррезӧс, лэбта ыджытжыккезӧ. Быдӧс ассим няньсӧ, быдӧс ассим бурсӧ ӧкта сэтчӧ.

¹⁹ Висьтала аслым: лолӧй, уна кад кежӧ куйлӧ тэнат ӧктӧмыт. Ӧні шоччись, сёй, ю, гажӧтчы!"

²⁰ А Еныс сылӧ висьталас: "Мывкыдтӧм! Эта ойӧ тэнчит ловтӧ босьтасӧ! Кинлӧ дӧнзяс тэнат ӧктӧмыт?"

²¹ Сідз овлӧ пажытьсӧ ас понда ӧктіссезкӧт, Ен понда кӧ озӧ ӧктӧ».

Тӧждісьтӧг овны велӧтӧм

²² Аслас велӧтчиссезлӧ Исусыс висьталіс: «Сійӧн шуа тіянлӧ: эдӧ тӧждісьӧ, мый сёйны, мый пасьтавны.

²³ Оланныт эд сёянся донажык, вывтырныт ─ паськӧмся.

²⁴ Видзӧтӧ ракаэз вылӧ. Нія озӧ кӧдзӧ, озӧ вундӧ. Абу нылӧн чоммез, амбаррез. Нійӧ Еныс вердӧ. А тійӧ эд кайесся унаӧн донажыкӧсь!

²⁵ Кин тіян коласісь аслас тӧждісьӧмӧн вермас содтыштны олан кадсӧ?

²⁶ Сідзкӧ, нельки учӧт торсӧ одӧ кӧ вермӧ керны, мый сэк тӧждісят мӧдік йылісь?

²⁷ Видзӧтӧ дзоридззез быдмӧм вылӧ. Нія озӧ уджалӧ, озӧ печкӧ. Висьтала тіянлӧ: нельки Соломон ӧксулӧн югьялан паськӧмыс абу вӧлӧм дзоридззез кодь басӧк.

²⁸ Еныс сэтшӧм басӧка пасьтӧтӧ талун видз вылын быдман турунсӧ, кӧда ашын лоас чапкӧм горӧ. А тіянӧс, умӧля веритіссесӧ, буржыка пасьтӧтас!

²⁹ Сідзкӧ, сёян-юан эд кошшӧ, сы понда эд тӧждісьӧ.

³⁰ Енсӧ тӧдтӧм отирыс быдӧс сійӧ и кошшӧны. Айныт эд тӧдӧ, тіянлӧ сія колӧ.

³¹ Кошшӧ Еныслісь Юралӧмсӧ, сэк и быдӧс коланаыс лоас тіянлӧ сетӧм.

³² Эд полӧ, учӧт чукӧр! Айныт шуис сетны тіянлӧ Юралӧм.

³³ Вузалӧ пажытьнытӧ, сеталӧ кориссезлӧ. Керӧ аслыныт бырлытӧм кӧичкаэз. Бырсьывлытӧм дона берсясӧ ӧктӧ енӧжас. Сэтчӧ гусясисьыс оз сибӧтчыв, сійӧ кор оз сёй.

³⁴ Дона берсяныт куйланінын и сьӧлӧмныт лоас».

Лӧсьӧтчӧмӧн видзчисьӧм йылісь

³⁵ «Пыр лоӧ лӧсьӧтчӧмӧсь: тіян коссэзныт йыалӧмӧсь, биэзныт ─ ӧзтӧмӧсь.

³⁶ Асьныт лоӧ раббез кодьӧсь, кӧдна кӧзяиннысӧ видзчисьӧны гӧтрасьӧм порйӧтан вылісь, ёркӧтчикас медбы сэк жӧ сылӧ осьтны.

³⁷ Шудаӧсь нія раббес, кӧзяинныс локтӧм коста нія видзчисьӧны кӧ сійӧ. Веськыта висьтала тіянлӧ: сія лӧсьӧтчас, пуксьӧтас нійӧ пызан сайӧ да пондас потшуйтны.

³⁸ Кӧзяиныс локтас кӧ нельки ойшӧрнас али асъяпоннас да казялас, нія сійӧ видзчисьӧны, шудаӧсь сэк нія раббес.

³⁹ Тійӧ тӧдат: гусясисьлісь локтан кадсӧ кӧзяиныс тӧдіс бы, сэк эз бы лэдз сійӧ сюрны керкуас.

⁴⁰ Сідз и тійӧ, пыр лоӧ лӧсьӧтчӧмӧсь. Морт Зоныс локтас видзчисьтӧг».

Бур да умӧль раббез йылісь велӧтан висьт

⁴¹ Сэк Петра Исусыслісь юаліс: «Дӧсвидзись! Миянлӧ сія велӧтан висьтыс али быдӧнныслӧ?»

⁴² Дӧсвидзисьыс сылӧ висьталіс: «Лоӧ надейнӧй, мывкыда раб кодьӧсь. Кӧзяиныс аслас керкуын сувтӧтас сійӧ аскадӧ сетавны уджаліссеслӧ сёян.

⁴³ Шуда сія рабыс, кӧзяиныс локтас кӧ да казялас: рабыс керӧ сы тшӧктӧм сьӧрті.

⁴⁴ Веськыта тіянлӧ висьтала: аслас керкуын быдӧс сьӧрын видзӧтны сувтӧтас сійӧ.

⁴⁵ Сія рабыс висьталас кӧ аслыс: "Менам кӧзяинӧ оз лок чожа", сэк сія пондас вартлыны мӧд раббесӧ, а ачыс пондас сёйны-юны, кодавны.

⁴⁶ Кӧзяиныс локтас видзчисьтӧг, тӧдтӧм кадӧ. Сійӧ рабсӧ кувтӧдз вартлас, и сылӧ дӧнзяс сія жӧ, мый и вериттӧммезлӧ.

⁴⁷ Рабыс кӧ тӧдӧ аслас кӧзяинлісь тшӧктӧмсӧ, но оз лӧсьӧтчы да оз кер сы тшӧктӧм сьӧрті, сійӧ ӧддьӧн вартласӧ.

⁴⁸ А кин тӧдтӧг керас умӧльсӧ, сія лоас вартлӧм етшажык. Кинлӧ уна сетӧм, сысянь уна и корасӧ. Уна кӧ морт кипод увтӧ сетӧм, сысянь унажык юаласӧ».

Би да янсӧтӧм

⁴⁹ «Ме локті му вылас би лэдзны. Ме видзчисьны ни ог вермы сылісь ӧзйӧмсӧ!

⁵⁰ Пыртчӧмӧн колӧ Меным пыртчыны. Сы аркмӧмӧдз Менам сьӧлӧмӧ ӧддьӧн пессьӧ.

⁵¹ Поди, шуат, Ме лӧнь олан вайи му вылын оліссезлӧ? Тіянлӧ шуа: абу сідз, янсӧтчӧм вайи.

⁵² Ӧнісянь керкуас вит олісьыс пондасӧ янсӧтчыны: куимыс лэбтісясӧ кыкыс вылӧ, кыкыс ─ куимыс вылӧ.

⁵³ Айыс лэбтісяс зоныс вылӧ, зоныс ─ айыс вылӧ, мамыс ─ нылыс вылӧ, нылыс ─ мамыс вылӧ, аньыс ─ моньыс вылӧ, моньыс ─ аньыс вылӧ».

Кадлӧн пассэз

⁵⁴ А отирыслӧ Исусыс висьталіс: «Рытвывсянь лэбтісян кымӧрсӧ казялікӧ шуат: "Зэрны пондас". Сідз и овлӧ.

⁵⁵ Лунланьсянь тӧв пӧльтікӧ шуат: "Пӧжны пондас". Сідз и лоӧ.

⁵⁶ Ылӧтліссез! Му да енӧж вылӧ видзӧттӧн тӧдатӧ, мый видзчисьны. Мыля нӧ одӧ вермӧ тӧдны ӧння кадсӧ?»

Суд вылӧ мунтӧн бурасьӧм

⁵⁷ «Мыля и асьныт одӧ ылӧстӧ, мый буржык?

⁵⁸ Тэнӧ кӧ нуӧтӧны суд вылӧ, туй вылас вынсьӧтчы бурасьны тэнӧ нуӧтіськӧт. Сэк сія оз вайӧт тэнӧ судитісь дынӧ. А судитісьыс тэнӧ оз сет пуксьӧтісь киӧ. Сэк тэнӧ озӧ пуксьӧтӧ.

⁵⁹ Висьтала тэныт: мӧдмоз кӧ керан, он пет сэтчинісь медбӧрья сьӧмтӧ сеттӧдз».