Лука 10 - Бур Юӧр 2019

¹ Сыбӧрын Дӧсвидзисьыс бӧрйис эшӧ сизимдас велӧтчисьӧс. Сія нійӧ кык мортӧн ыстіс каррезӧ, оланіннэзӧ. Ачыс сэтчин мӧдіс локны сёрӧнжык.

² Нылӧ висьталіс: «Вунданыс уна, а уджаліссес етша. Корӧ Кӧзяиныслісь, медбы ыстіс уджаліссесӧ Аслас вунданінӧ.

³ Мунӧ! Ме тіянӧс ыста дзеллезӧс моз кӧиннэз коласӧ.

⁴ Сьӧм, кӧзича, кӧмкӧт сьӧраныт эд босьтӧ. Туй вылас кинӧскӧ панталікӧ эд сувтчӧ, некинлӧ кинытӧ эд сетӧ.

⁵ Керкуас пырикӧ висьталӧ: "Лӧнь олан эта керкуын оліссезлӧ!"

⁶ Олӧ кӧ сэтчин лӧнь сьӧлӧма морт, тіян бласлӧвитӧмныт сылӧ кольччас. Абу кӧ мортыс лӧнь сьӧлӧма, висьталӧмныт тіянлӧ бертас.

⁷ Сія керкуын кольччӧ, юӧ, сёйӧ, мый сетасӧ. Уджалісьлӧ керӧм удж понда вештӧны. Керкуись керкуӧ эд ветлӧтӧ.

⁸ Карӧ локтікӧ тіянӧс кӧ лэдзасӧ, сёйӧ, мый одзаныт ваясӧ.

⁹ Сэтісь шогаліссесӧ веськӧтӧ да висьталӧ: "Енлӧн Юралӧмыс матын ни".

¹⁰ Локтат кӧ кытшӧм карӧ, кытчӧ тіянӧс озӧ лэдзӧ, петӧ ӧтӧрас да висьталӧ:

¹¹ "Коккезным бердӧ карсиныт лякасьӧм буссӧ пыркӧтам тіянлӧ. Но тӧдӧ: Енлӧн Юралӧмыс матын ни".

¹² Тіянлӧ баита: Содомыслӧ Суд Лунас лоас буржык сія карся, кӧдаӧ тіянӧс эзӧ лэдзӧ».

Вериттӧм каррезлӧ висьталӧм

¹³ «Ӧддьӧн умӧль лоас тэныт, Коразин кар! Ӧддьӧн умӧль лоас тэныт, Вифсаида! Тир да Сидон каррезын эзӧ адззылӧ тіянын мыччалӧм адззывлытӧм керӧммесӧ. Сэтчин оліссес адззылісӧ бы нійӧ, сэк, натьтӧ, важын ни бы пасьталісӧ чорыт паськӧм, пӧимӧн киськалісӧ юрнысӧ да пондісӧ тӧждісьны асланыс умӧль керӧммез кузя.

¹⁴ Тир да Сидон каррезын оліссезлӧ Суд Лунас лоас тіянся буржык.

¹⁵ Тэ, Капернаум кар, енӧжӧдз мӧдан лэбтісьны? Тэ адӧдз усян.

¹⁶ Кин тіянӧс кывзӧ, сія Менӧ кывзӧ. Кин тіянӧс абутӧмӧ пуктӧ, сія Менӧ абутӧмӧ пуктӧ. Менӧ абутӧмӧ пуктісьыс Менӧ Ыстісьсӧ абутӧмӧ пуктӧ».

Сизимдас велӧтчисьлӧн бертӧм

¹⁷ Гажаӧсь бертісӧ сизимдас велӧтчисьыс. Нія баитісӧ: «Велӧтісь! Тэнат нимӧн тшӧктам кӧ, сэрпӧсь ловвес кывзісьӧны».

¹⁸ Исусыс висьталіс нылӧ: «Ме адззылі енӧжсис сотанаыслісь чарньӧв моз усьӧмсӧ.

¹⁹ Сідз и эм: Ме сета тіянлӧ вын тальны кыйезӧс да скорпионнэзӧс и вермыны миян вылӧ лэбтісьӧм быд лёк вынсӧ. Нем умӧльыс тіянлӧ оз ло.

²⁰ Тіянӧс сэрпӧсь ловвес кывзісьӧны кӧ, сысянь эд гажӧтчӧ. Гажӧтчӧ сысянь: тіян ниммезныт эд гижӧмась енӧжас».

Исуслӧн Айсӧ ошкӧм

²¹ Сэтӧн Исусыс Вежа Лолыссянь гажмис. Сія висьталіс: «Ошка Тэнӧ, Айӧ, енӧжын да му вылын Дӧсвидзись! Тэ сійӧ быдӧс сайӧвтін мывкыдаэз да уна тӧдіссез шогья, осьтін челядь коддезлӧ. Сідз эд, Айӧ! Сэтшӧма керны эд Тэнат и вӧлі бур лӧсьӧтӧмыт».

²² Велӧтчиссеслӧ Сія висьталіс: «Айӧ быдӧс сетіс Меным. Дзир Айыс тӧдӧ, кин Зоныс. Дзир Зоныс тӧдӧ, кин Айыс. Тӧдӧ и сія, кинлӧ Зоныс осьтас».

²³ Велӧтчиссеслань бергӧтчӧмӧн дзир нылӧ висьталіс: «Шудаӧсь нія, кӧдна асланыс синнэзӧн адззӧны, мый тійӧ адззат.

²⁴ Висьтала Тіянлӧ: Енсянь юӧртіссез ӧксуэзкӧт унаӧн мӧдісӧ адззывны ӧні тіянлісь адззылӧмнытӧ, да эзӧ адззылӧ. Мӧдісӧ кывны кылӧмнытӧ, да эзӧ кылӧ».

Самарияись небыт сьӧлӧма морт йылісь

²⁵ Ӧтік Туйдӧтӧ велӧтісь чеччис да Исуссӧ кутӧм могись юаліс: «Велӧтісь! Мый меным керны пырся оланӧ пырӧм понда?»

²⁶ Исусыс сылісь юаліс: «Туйдӧтас мый гижӧм? Мый сэтісь лыддьӧтан?»

²⁷ Мӧдыс висьталіс: «Радейт ассит Дӧсвидзись Ентӧ быдсӧн сьӧлӧмнат, быдсӧн ловнат, быдсӧн выннат, быдсӧн мывкыднат. Ассит матісьтӧ радейт асьтӧ моз».

²⁸ Исусыс сылӧ висьталіс: «Бура тэ висьталін. Сідз кер, сэк пондан овны».

²⁹ Асьсӧ дорйӧм могись сія юаліс Исусыслісь: «Кин менам матісьыс?»

³⁰ Исусыс сэтчӧ висьталіс: «Ерусалимсянь Ериконӧ мунӧм коста ӧтік морт шедас лёк кериссезлӧ. Нія чӧвтасӧ сы вылісь паськӧмсӧ, вартласӧ сійӧ да мунасӧ. Колясӧ сійӧ садьтӧг.

³¹ Сы коста сія туй вылӧт мунас ӧтік вежауджалісь. Вартлӧм мортсӧ казялӧм бӧрын мунас туй мӧдӧрӧттяс.

³² Сідз и левит сэті мунтӧн сибӧтчас, видзӧтас, мунас одзлань.

³³ Самарияись ӧтік морт мунас сія туй вылӧт. Сія казялас вартлӧм мортсӧ да сійӧ жалейтас.

³⁴ Сія сибӧтчас сы дынӧ, дойманіннэсӧ мавтас винаӧн да виӧн, каттяс. Сэсся пуксьӧтас сійӧ аслас осёл вылӧ да вайӧтас сувтчан керкуӧ. Видзӧтас сы сьӧрын.

³⁵ Мӧд лунас мунтӧнняс кыскас кык динарий, сетас сувтчан керку видзисьлӧ да висьталас: "Видзӧт мортыс сьӧрын. Видзан кӧ унажык, ме бертікам вешта тэныт".

³⁶ Тэ шуанӧн, вартлӧм мортыслӧ куимнанныс коласісь кин вӧлі матісьыс?»

³⁷ Сія висьталіс: «Сылӧ небыт сьӧлӧмсянь отсалісьыс». Сэк Исусыс сылӧ шуис: «Мун, и тэ кер сы моз».

Марфа да Мария ордын

³⁸ Мунтӧнняс Исусыс локтіс ӧтік посадӧ. Сэтӧн Сійӧ Марфа нима инька рочаліс гортас.

³⁹ Сылӧн вӧлі Мария нима сой. Марияыс Исусыс коккез дынӧ пуксьӧмӧн кывзіс Сылісь баитӧмсӧ.

⁴⁰ Марфаыс лӧсьӧтіс уна сёян-юан. Сія сибӧтчис да висьталіс: «Дӧсвидзись! Он разь адззы, сойӧ менӧ ӧтнамӧс колис лӧсьӧтны сёян-юансӧ. Висьтав Марияыслӧ, медбы меным отсаліс».

⁴¹ Исусыс сылӧ висьталіс: «Марфа! Марфа! Тэ котрасян, тӧждісян уна понда.

⁴² Дзир ӧтікӧ колӧ. Марияыс бӧрйис буржыксӧ. Сійӧ сылісь озӧ мырддьӧ».