Лука 1 - Бур Юӧр 2019

Феофиллӧ гижӧт

¹ Унаӧн пондісӧ ӧктыны миян коласын лоӧмсӧ гижӧттэзӧ.

² Лоӧмсӧ миянлӧ висьтасисӧ Ен Кывлӧ кысъяліссез, одззасянь быдӧс адззыліссез.

³ Сідз и меным юрам пырис быдӧс бура тӧдмавны лоӧмыс йылісь. Ӧні вӧлись быдӧс лоӧмсӧ сьӧрсьӧн-бӧрсьӧн ӧтамӧд дынӧ тэчӧмӧн гижа тэныт, Феофил, дона морт.

⁴ Тэныт эд колӧ тӧдны: сія велӧтӧмыс, кӧдӧ тэныт юӧртісӧ, надейнӧй.

Иоанлӧн шогмӧм йылісь ангеллӧн юӧртӧм

⁵ Иудея муын юраліс Ирод ӧксу. Сія кадӧ оліс Закар нима вежауджалісь. Сія вӧлі Авия нима вежауджаліссез чукӧрись. Сылӧн Елизавета иньыс вӧлі Аарон увтырись.

⁶ Нія кыкнанныс олісӧ Ен сьӧрті веськыта. Быдӧс керисӧ Дӧсвидзисьлӧн велӧтӧммез, тшӧктӧммез сьӧрті.

⁷ Нія вӧлісӧ пӧрисьӧсь ни. Елизаветаыс эз вермы ваясьны. Сысянь нылӧн челядьныс эзӧ вӧлӧ.

⁸ Кыдзкӧ Закарыс аслас кадӧ уджаліс Ен одзын.

⁹ Вежауджаліссес пыравлісӧ Дӧсвидзисьлӧн Вежа Керкуӧ сы сьӧрті, кинлӧ усяс пырны. Сэк Закарыслӧ усис пырны Вежа Керкуас тшынӧтчыны чӧскыт руа берсянас.

¹⁰ Тшынӧтӧмыс коста ӧксьӧм отирыс кеймисӧ ӧтӧрас.

¹¹ Сэк тшынӧтчан пызан веськыт ладорас Закар одзӧ мыччисис Дӧсвидзисьлӧн ангел.

¹² Сійӧ казявтӧн Закарыс ӧшис, повзис.

¹³ Ангелыс сылӧ висьталіс: «Эн пов, Закар, Еныс кыліс тэнчит кеймӧмтӧ. Елизавета иньыт ваяс тэныт зонӧс. Сылӧ нимсӧ сетан Иоан.

¹⁴ Тэнат сьӧлӧм вылат лоас гаж, пондан гажӧтчыны. Уна отир сы шогмӧмсянь гажмасӧ.

¹⁵ Ыджыт морт сія лоас Дӧсвидзись одзын. Оз понды юны вина да кодззӧтан юаннэз. Мам кынӧмсянь сія лоас тырӧм Вежа Лолӧн.

¹⁶ Израиль зоннэз коласісь унаӧс бергӧтас Дӧсвидзись Енланьӧ.

¹⁷ Иллялӧн кодь лолӧн да вынӧн мунас Дӧсвидзись одзын. Мунас айезлісь сьӧлӧммезнысӧ бергӧтны челядьланьӧ, кывзісьтӧммеслӧ сетны мывкыдсӧ Ен сьӧрті веськыта оліссезлісь, медбы Дӧсвидзись одзӧ сувтӧтны туйдӧтӧм-лӧсьӧтӧм отирӧс».

¹⁸ Ангелыслісь Закарыс юаліс: «Мый сьӧрті ме сійӧ тӧда? Ме эд пӧрись, и иньӧ абу ни том».

¹⁹ Ангелыс висьталіс: «Ме Гавриил, сулала Ен одзын. Ме ыстӧм тэкӧт баитны, бур юӧр вайны тэныт.

²⁰ Менам кыввезӧ тэ эн верит, сійӧн тэ пондан чӧвны. Он понды вермыны баитны аскадӧ быдӧс лоӧмӧдз».

²¹ Сы коста отирыс видзчисисӧ Закарыслісь Вежа Керкусис петӧмсӧ. Нія дивуйтчисӧ, мыля сія сёрмӧтчис петны.

²² Петӧмыс бӧрсянь сія эз вермы баитны. Отирыс вежӧртісӧ, Вежа Керкуас сія пӧ адззыліс Енсянь мыччалӧм. Закарыс баитӧмыс туйӧ отирыслӧ мыччаліс киэзнас.

²³ Уджалан луннэз чулалӧм бӧрсянь Закарыс бертіс гортас.

²⁴ Нія луннэз бӧрын сылӧн Елизавета иньыс сьӧктіс. Сія чӧліс, эз мыччав сьӧктӧмсӧ вит тӧлісь. Сія баитіс:

²⁵ «Эна луннэзӧ быдӧс лоӧмсӧ меным керис Дӧсвидзисьыс. Сія казяліс менӧ да петкӧтіс отирыс одзын рожа кулянсис».

Мариялӧ юӧр

²⁶ Елизаветаыс новйӧтчис кватьӧт тӧлісь. Сэк Еныс ыстӧм вӧлі Гавриил ангелсӧ Галилея муись Назарет карӧ

²⁷ Мария нима ныв дынӧ. Сія вӧлі корасьӧм Давид увтырись Ӧсип сайӧ.

²⁸ Ангелыс пырис Сы дынӧ да горӧтчис: «Лӧнь олан Тэныт, Нылӧй! Дӧсвидзисьыс Тэкӧт! Иннез коласісь Сія Тэнӧ бласлӧвитіс!»

²⁹ Ангелсӧ казялӧмсянь, сы сёрнисянь Марияыс паймис. Нывкаыс юрас видзис, мый одзын пӧ сэтшӧм кыввесӧ сія висьталіс.

³⁰ Ангелыс горӧтчис: «Эн пов, Мария. Еныслӧн бурсетӧмыс дӧнзис Тэныт.

³¹ Тэ сьӧктан да ваян Зонӧс. Нимсӧ Сылӧ сетан Исус.

³² Ыджыт морт Сыись петас. Сійӧ пондасӧ шуны Медвылісьлӧн Зонӧн. Дӧсвидзись Ен Сылӧ сетас Давид айыслісь юралан пукӧссӧ.

³³ Яков увтырлӧ Сія Ӧксуӧн лоас пыр кежӧ. Сылӧн Юралӧмыс пондас кыссьыны пырся-пыр».

³⁴ Марияыс юаліс ангелыслісь: «Ме эд нывка, кыдз сія лоас?»

³⁵ Ангелыс висьталіс Сылӧ: «Вежа Лов локтас Тэ вылӧ. Медвылісьыслӧн выныс вевттяс Тэнӧ. Сійӧн шогмӧм вежа Кагасӧ пондасӧ шуны Ен Зонӧн.

³⁶ Сідз и Тэнат увтырись Елизаветаыс пӧрисьувьяс сьӧктіс зонӧн. Отирыс тай сійӧ шуисӧ кагатӧмӧн. Сія новйӧтчӧ кватьӧт тӧлісь ни.

³⁷ Еныс эд быдӧс вермӧ керны».

³⁸ Сэк Марияыс горӧтчис: «Ме Дӧсвидзисьлӧн раб. Ась лоӧ Меным тэнат висьталӧм сьӧрті». Сэсся ангелыс Сы дынісь муніс.

Мария Елизавета ордын

³⁹ Кынымкӧ лун бӧрті Марияыс тэрмасьӧмӧн муніс карӧ, кӧда вӧлі керӧса Иудея муын.

⁴⁰ Марияыс пырис Закар керкуӧ. Сія пантасис Елизаветаыскӧт.

⁴¹ Марияыслісь баитӧмсӧ кылікӧ Елизаветаыс кынӧмын кагаыс вӧрзьӧтчыштіс. Елизаветаыс тырис Вежа Лолӧн.

⁴² Гажувьяс сія горӧн висьталіс: «Иннез коласісь Тэ медбура бласлӧвитӧм! Бласлӧвитӧм и Тэ пытшкись Кагаыс!

⁴³ Кин ме сэтшӧмыс, Дӧсвидзисьлӧн Мамыс эд локтіс ме дынӧ?

⁴⁴ Дзир кыліс Тэнат баитӧмыт, кынӧмам кагаыс гажӧн вӧрзьӧтчис.

⁴⁵ Тэ шуда, веритін да, Тэныт аркмас Дӧсвидзисьлӧн висьталӧмыс».

Мариялӧн Енсӧ ошкӧм

⁴⁶ Марияыс висьталіс: ─ Менам сьӧлӧмӧ лэбтӧ, сьылӧтӧ Дӧсвидзисьсӧ.

⁴⁷ Енӧ понда, Мездӧтісьӧ понда гажмис Менам лолӧ.

⁴⁸ Ассис учӧтик рабсӧ Сія казяліс. Ӧнісянь Менӧ пондас шуны шудаӧн быд шогмӧм морт.

⁴⁹ Вынаыссянь Меным сэтшӧм ыджыт керӧмыс. Сылӧн нимыс Вежа!

⁵⁰ Сыись поліссез дынӧ Сія небыт сьӧлӧма увтырись увтырӧ.

⁵¹ Аслас вына киӧн Сія ыджыт удж керис. Асьнысӧ вылына лэбтіссесӧ юраныс пыртӧмнаныс ӧтмӧдӧрӧ резіс.

⁵² Вына юраліссесӧ пукӧссэз вывсиныс лэдзис, лэбтіс абутӧм туйӧ пуктӧммесӧ.

⁵³ Тшыгьяліссесӧ тыртіс бурнас. Аслыныс уна ӧктіссесӧ куш киӧн лэдзис.

^54-55 Локтіс отсавны Израильлӧ, Аслас кысъялісьлӧ. Сія тӧдвылас видзӧ небыт сьӧлӧмсянь айезнымлӧ кӧсйӧмсӧ, Авраамыслӧ да сы увтырлӧ пыр кежӧ.

⁵⁶ Марияыс Елизаветаыс ордын оліс куим тӧлісь гӧгӧр да бертіс гортас.

Пыртісь Иоанлӧн шогмӧм

⁵⁷ Елизаветалӧн локтіс ваян кад. Сія вайис зонӧс.

⁵⁸ Увтырыс да матын оліссес кылісӧ Дӧсвидзисьлісь небыт сьӧлӧмсянь Елизаветаыслӧ вына керӧмсӧ да гажӧтчисӧ сыкӧт.

⁵⁹ Кыкьямысӧт лунас локтісӧ вундыштыштны кагасӧ. Нимсӧ мӧдісӧ сетны айыслісь ─ Закар.

⁶⁰ Сэтчӧ сылӧн мамыс висьталіс: «Огӧ, сылӧ нимсӧ сетам Иоан».

⁶¹ Сылӧ шуисӧ: «Сэтшӧм нимаыс тіян увтырын некин абу».

⁶² Кинаныс ӧвтыштісӧ айыслань да юалісӧ, кыдз сія мӧдӧ шуны кагасӧ.

⁶³ Сія корис пӧвтор да гижис: «Сылӧн нимыс Иоан». Быдӧннысӧ диво кутіс.

⁶⁴ Сэтӧн Закарыс пондіс вермыны баитны. Сія пондіс ошкыны Енсӧ.

⁶⁵ Ны гӧгӧр быдӧс оліссесӧ полӧм кутіс. Лоӧмыс йылісь висьтасисӧ керӧса Иудея му пасьта.

⁶⁶ Быд кылісьыс эта лоӧм йылісь висьталӧмсӧ видзис аслас сьӧлӧмын. Отирыс баитісӧ: «Кин петас сія кагаись?» Дӧсвидзисьлӧн киыс эд вӧлі сы вылын.

Закарлӧн Енсянь юӧртӧм

⁶⁷ Кагаыслӧн Закар айыс тырис Вежа Лолӧн да пондіс Енсянь юӧртны:

⁶⁸ ─ Ошка Дӧсвидзисьсӧ, Израильлісь Енсӧ! Сія вовліс Аслас отир дынӧ. Аркмӧтіс сылӧ мезмӧмсӧ.

⁶⁹ Аслас кысъялісь Давид увтырись сувтӧтіс миянлӧ вына Мездӧтісьӧс.

⁷⁰ Еныс сідз кӧсйӧм вӧлі чулалӧм каддэзӧ Аслас вежа юӧртіссес пыр.

⁷¹ Сія кӧсйисьӧм миянӧс мездыны миян вылӧ лэбтісиссез дынісь, ны киэзісь, кинлӧ мийӧ син вылӧ огӧ колӧ.

⁷² Еныс кӧсйисьӧм лоны небыт сьӧлӧмаӧн миян айез дынӧ да видзны тӧдвылас Ассис вежа йитӧтсӧ.

⁷³ Миян Авраам айлӧ сетӧм кывсӧ Еныс видзас, кӧсйӧмсӧ сетас миянлӧ.

⁷⁴ Миян вылӧ лэбтісиссезлӧн киэзісь мездас миянӧс, медбы вермим повтӧг кысъявны Сылӧ,

⁷⁵ медбы Сы одзын вӧлім вежаӧсь да быд лун олім Сы сьӧрті веськыта.

⁷⁶ Тэнӧ, кага, пондасӧ шуны Медвылісьлӧн юӧртісьӧн. Дӧсвидзисьыс одзын тэ мунан лӧсьӧтны Сылӧ туйесӧ.

⁷⁷ Енлӧн отирлӧ юӧртан мезмӧмныс йылісь да умӧль керӧммезнысӧ проститӧм йылісь.

⁷⁸ Миян небыт сьӧлӧма Енным жалейтас миянӧс: вылісянь ыстас миянлӧ асывся Югытсӧ.

⁷⁹ Сія югдӧтас пемытінын, кулан вуджӧрын пукаліссесӧ. Иньдӧтас миянлісь коккезнымӧс лӧнь оланӧ.

⁸⁰ Кагаыс зорамис, вынсяліс ловнас. Израиль отир одзӧ петтӧдз сія оліс кушмуын.