Иуда 1 - Бур Юӧр 2019

¹ Гижӧ Иуда, Кристос Исуслӧн раб, Яковлӧн вон. Гижӧмӧс ыста Енлӧн корӧммезлӧ. Ен Айным керис тіянӧс вежа отирӧн, а Кристос Исусыс видзӧ тіянӧс.

² Еныслӧн бурсетӧмыс, лӧнь оланыс да радейтӧмыс тіян ась содасӧ!

Ылӧтісь велӧтіссез

³ Донаэзӧ! Ме ӧддьӧн мӧді гижны миян ӧтлаын мезмӧмным йылісь. Но шуи, коланажык лоас, велӧта кӧ тіянӧс дорйыны веритӧмнытӧ. Сійӧ Еныс ӧтпыр сетӧм вӧлі вежа отирлӧ.

⁴ Тіян коласӧ эд казявтӧг пырисӧ Ентӧг оліссез. Миян Енным отирыс дынӧ небыт сьӧлӧма, сійӧн нія шуӧны, лэдзчисьӧмӧдз пӧ быдӧс позьӧ керны. Ӧтік Юралісь Енсӧ да миянлісь Дӧсвидзись Кристос Исуссӧ нія абутӧм туйӧ пуктӧны. Кӧркӧсянь эд вӧлі гижӧм: сэтшӧм отирсӧ лӧсьӧтӧмась Енлӧн суд вылын мыжйыны.

⁵ Тійӧ этӧ тӧдатӧ. Ме мӧда тіянлӧ дзир казьмӧтны. Дӧсвидзисьыс Израиль отирсӧ Египет мусис петкӧтӧм. Ны коласісь мукӧдыс абу веритӧмась. Сійӧн нылісь оланнысӧ Сія бӧрынжык орӧтӧм.

⁶ Тӧдат и ангеллэз йылісь. Нія вӧлісӧ вылына пуктӧмӧсь, но нылӧ сетӧмсӧ нія абу видзӧмась да кольӧмась ассиныс оланіннысӧ. Дӧсвидзисьыс нійӧ пемытінас видзӧ пырся домӧттэзын ыджыт Суд Лунӧдз.

⁷ Тійӧ тӧдатӧ и Содомын, Гоморраын да ны гӧгӧр каррезын оліссез йылісь. Кывзісьтӧм ангеллэс моз нія олӧмась лэдзчисьӧмӧн: мужиккез мужиккезкӧт кыскасьӧмась. Эта понда нійӧ сотӧмась куслытӧм биӧн. Ны йылісь гижӧмыс миянӧс велӧтӧ.

⁸ Сідз петас и этнакӧт, вӧтын моз оліссескӧт. Нія эд сэрпӧсьтӧны ассиныс вывтырнысӧ. Юралӧмсӧ абутӧм туйӧ пуктӧны, енӧжись выннэсӧ видӧны.

⁹ Микаил Аркангелыс кульыскӧт Моисейыс вывтыр понда вермасьӧм. И сія абу лысьтӧм кульсӧ ӧмавны-видны. Сія висьталӧм: Дӧсвермисьыс ась ӧлӧ-падмӧтӧ тэнӧ.

¹⁰ А этна эд умӧльсӧ баитӧны сы йылісь, мый озӧ тӧдӧ. Нылӧ шогмӧмсянь сетӧм тӧдны мукӧдсӧ мывкыдтӧм подалӧ моз. Этӧн нія асьнысӧ изводалӧны.

¹¹ Ӧддьӧн умӧль нылӧ лоас! Нія мунӧны Каиныс сьӧрӧ. Сьӧмыс кузя нія ылалісӧ Валаамыс моз. Корейыс моз асныралӧмныс кузя асьнысӧ вийсьӧмӧдз вайӧтӧны.

¹² Ӧксьывлӧммезныт коста сэтшӧм отирыс тіян коласын кыдз ляккез. Радейтӧмӧн сёян дорын рытъялӧмныт коста нія тіянкӧт ӧтлаын повтӧг сёйӧны-юӧны, дзир ас йывсиныс тӧждісьӧны. Нія кыдз тӧлӧн новйӧтан зэртӧм кымӧррез. Нія кыдз арся пуэз, кӧдна нем эзӧ сетӧ воӧмсӧ, вудж сорнас шедтӧмӧсь, кыкись кулӧмӧсь.

¹³ Нія саридз вылын лёк тӧлӧн койӧм ва кодьӧсь, нятьӧсь быгыс моз сэрпнысӧ лэбтӧны. Нія енӧжись кӧдзуввез кодьӧсь, кӧдна туй вывсис ӧшӧмась. Нылӧ эд пыр кежӧ лӧсьӧтӧм пемытіныс.

¹⁴ Енокыс Адамсянь сизимӧт ай. Сія одзланьсясӧ висьтавлӧм сідз: «Видзӧт! Локтӧ Дӧсвидзисьыс Аслас лыдтӧм вежа ангеллэзкӧт.

¹⁵ Сія локтӧ чулӧтны судсӧ быдӧнныс вылын, медбы осьтны умӧль керӧмнысӧ Ентӧг оліссеслісь, мыжйыны нійӧ умӧльсӧ керӧмныс понда да Сы йылісь лёк кылӧн баитӧмныс понда».

¹⁶ Нія пыр боньгӧны да норасьӧны. Керӧны дзир асланыс ӧзйӧтчӧм сьӧрті: Ентӧг олӧны, Сылісь Туйдӧтсӧ абутӧм туйӧ пуктӧны, баитӧмнаныс асьнысӧ лэбтӧны. Колӧ кӧ мыйкӧ мортыссянь, сійӧ бура ошкӧны. Нысянь эд эм мый босьтны.

Туйдӧтӧммез

¹⁷ Тійӧ, менам донаэзӧ, видзӧ тӧдвыланыт миян Дӧсвидзись Кристос Исуслӧн апостоллэзлісь одзланьсяыс йылісь висьталӧмсӧ.

¹⁸ Нія тіянлӧ висьтавлісӧ, медбӧрья кадас пӧ лоасӧ згальниккез. Нія пондасӧ керны умӧльсӧ асланыс ӧзйӧтчӧм сьӧрті.

¹⁹ Ны кузя веритіссес пондасӧ янсӧтчыны. Нія олӧны вывтырныс сьӧрті, Енлӧн Лолыс ны пытшкын абу.

²⁰ Донаэзӧ, тійӧ кеймиканыт ӧтлаасьӧ Вежа Лолыскӧт, вежа веритӧмас асьнытӧ вынсьӧтӧ!

²¹ Видзсьӧ Енлӧн радейтӧмын. Видзчисьӧ сійӧ кадсӧ, кӧр миян Дӧсвидзись Кристос Исусным Аслас небыт сьӧлӧмсянь вайӧтас миянӧс пырся оланӧ.

²² Мукӧдыслӧ небыт сьӧлӧмсянь отсалӧ, но бура авйӧмӧн-видзӧтӧмӧн.

²³ Мукӧдсӧ мездӧтӧ повзьӧтлӧмӧн, кыскӧ нійӧ бисис. Висьталӧ умӧль керӧммезныс йылісь, но полӧмӧн видзӧтчӧ. Брезгуйтӧ нельки паськӧмнысӧ, кӧда сэрпӧсьмис вывтырныссянь.

Енсӧ ошкӧм

²⁴ Ошкӧ Сійӧ, Кин вермас видзны тіянӧс усьӧмись. Еныс вермас тіянӧс вайӧтны Аслас югьяланінӧ сӧстӧммезӧн да гажӧтчиссезӧн.

²⁵ Ошкӧ адззывлытӧм мывкыда ӧтка Енсӧ! Сія эд миянӧс мездіс Дӧсвидзись Кристос Исусным пыр. Сылӧ ошкӧм-сьылӧтӧмыс! Сылӧн выныс да юралӧмыс кадыс пондӧтчӧмсянь, ӧні да пырся-пыр! Аминь.