Иоан 8 - Бур Юӧр 2019

¹ Исусыс муніс Виягӧд керӧсӧ.

² Асывнас Сія бӧра локтіс Вежа Керкуас. Отирыс быдӧнныс локтісӧ Сы дынӧ. Исусыс пуксис да пондіс нійӧ велӧтны.

³ Туйдӧтӧ велӧтіссес фарисейескӧт Исусыс дынӧ вайӧтісӧ инькаӧс, кӧда ветлӧтӧм жӧникыс сайсянь. Сійӧ сувтӧтісӧ быдӧнныс одзӧ.

⁴ Исусыслӧ висьталісӧ: «Велӧтісь! Этӧ инькасӧ кутӧмась жӧникыс сайсянь ветлӧтӧм понда.

⁵ Туйдӧтас Моисейыс висьталӧм: сэтшӧммесӧ пӧ колӧ кувтӧдз шупкавны иззэзӧн. А Тэ мый висьталан?»

⁶ Нія сідз баитісӧ Исуссӧ кутӧм могись, медбы сэсся вӧлі, мый висьтавны Сы вылӧ умӧльсӧ. Но Исусыс дзар эз кер ныланьӧ. Сія лажмыта мышкыртчӧмӧн гижис мыйкӧ му вылас чуньнас.

⁷ Мӧддэс орӧттӧг юасисӧ Сылісь. Сэк Сія лэбтіс юрсӧ да висьталіс: «Кинлӧн абу ӧтік умӧль керӧм, медодз ась сія шупкӧ изсӧ».

⁸ Сэсся бӧра мышкыртчис да пондіс гижны му вылас.

⁹ Исуслісь висьталӧмсӧ кылӧм бӧрын отирыс пондісӧ сьӧрсьӧн-бӧрсьӧн мунны. Нылӧн сьӧлӧммезныс уськӧтісӧ тӧдвыланыс умӧль керӧммезнысӧ. Медодз мунісӧ пӧрисьжыккес, сэсся мӧддэс. Мунісӧ быдӧнныс. Кольччис Исусыс да Сы одзын сулалісь инькаыс.

¹⁰ Исусыс лэбтіс юрсӧ: сэтӧн эз вӧв ӧтік морт, сулаліс дзир ӧтнас инькаыс. Исусыс шуис сылӧ: «Кытӧн тэ вылӧ умӧльсӧ баитіссес? Некин эз судит тэнӧ?»

¹¹ Инькаыс горӧтчис: «Эзӧ, Дӧсвидзись». Исусыс шуис сылӧ: «И Ме тэнӧ ог судит. Мун да сэсся эн ни кер умӧльсӧ».

Исус ─ отирлӧ югытыс

¹² Сыбӧрын Исусыс бӧра баитіс отирыскӧт. Сія нылӧ висьталіс: «Ме ─ отирлӧ югытыс. Ме сьӧрӧ мунісьыс оз понды ветлӧтны пемытын, сылӧн лоас олан сетісь югытыс».

¹³ Сэк фарисейес горӧтчисӧ Сылӧ: «Тэ Ас йывсит Ачыт баитан, сійӧн Тэнат кыввезлӧ оз туй веритны».

¹⁴ Сэтчӧ Исусыс нылӧ висьталіс: «Ась Ме и Ас йывсим баита, Ме быльсӧ висьтала. Ме эд тӧда, кытісь локті да кытчӧ муна. А тійӧ эд одӧ тӧдӧ, кытісь Ме да кытчӧ муна.

¹⁵ Тійӧ судитат отир моз. Ме некинӧс ог судит.

¹⁶ Ме кӧ судита, судита веськыта. Ме эд абу ӧтнам. Мекӧт ӧтлаын Менӧ ыстісь Айӧ.

¹⁷ Тіян Туйдӧтын гижӧм сідз: кык мортлӧн висьталӧмыс ─ быль.

¹⁸ Ме Ас йывсим Ачым висьтала, Ме йылісь висьталӧ и Менӧ ыстісь Айӧ».

¹⁹ Сэк Исусыслісь юалісӧ: «Кытӧн Тэнат Айыт?» Исусыс висьталіс: «Тійӧ одӧ тӧдӧ Менӧ, одӧ тӧдӧ Менчим Айӧс. Тӧдіт кӧбы Менӧ, сэк тӧдіт бы и Менчим Айӧс».

²⁰ Сідз Исусыс баитіс Вежа Керкуын, сьӧм ӧктан доз дынын велӧтӧм коста. Исуссӧ эзӧ кутӧ, Сылӧн кадыс эд эз на лок.

²¹ Исусыс нылӧ бӧра висьталіс: «Ме муна. Тійӧ Менӧ пондат кошшыны, но кулатӧ умӧльсӧ керӧммезныт кузя. Кытчӧ Ме муна, сэтчин тійӧ одӧ вермӧ локны».

²² Сэтчӧ иудейес горӧтчисӧ: «Оз я Сія мӧд Асьсӧ вийны, сідз кӧ баитӧ: "Кытчӧ Ме муна, сэтчин тійӧ одӧ вермӧ локны"».

²³ Исусыс нылӧ шуис: «Тійӧ уліссес коласісь, а Ме ─ выліссес коласісь. Тійӧ ─ эта му вылісь, Ме абу татісь.

²⁴ Сійӧн эд Ме и висьталі тіянлӧ: тійӧ кулатӧ умӧльсӧ керӧммезныт кузя. Одӧ кӧ пондӧ веритны висьталӧмам "Ме Сія, Кӧда эм", то кулатӧ умӧльсӧ керӧммезныт кузя».

²⁵ Сэк Сылісь юалісӧ: «Кин нӧ Тэ?» Исусыс нылӧ шуис: «Ме одззасянь ни тіянлӧ висьталі, кин Ме.

²⁶ Ме верма уна мый висьтавны тіян йылісь, уна понда верма судитны, но Менӧ Ыстісьыс висьталӧ быльсӧ. Ме отирыслӧ висьтала Сысянь кылӧмӧс».

²⁷ Исусыс баитіс Айыс йылісь, но мӧддэс Сійӧ эзӧ вежӧртӧ.

²⁸ Исусыс висьталіс нылӧ: «Кӧр Морт Зонсӧ лэбтат, сэк вӧлись вежӧртат: Ме ─ Сія, кинӧн Ачымӧс шуа. Ассяням Ме нем ог кер. Ме баита Айӧ велӧтӧм сьӧрті.

²⁹ Менӧ Ыстісьыс Мекӧт. Айӧ эз коль Менӧ ӧтнамӧс. Ме эд быдӧс кера Сы сьӧрті».

³⁰ Исуслісь этӧ висьталӧмсӧ кылӧм бӧрын унаӧн пондісӧ веритны Сылӧ.

Тіянӧс мездас быльыс

³¹ Сэк Исусыс висьталіс Сылӧ веритісь иудейеслӧ: «Пондат кӧ овны Менам кыв сьӧрті, сэк тійӧ былись Менам велӧтчиссез.

³² Сэк тійӧ пондат тӧдны быльсӧ, и быльыс тіянӧс мездӧтас».

³³ Нія висьталісӧ: «Мийӧ Авраамлӧн увтыр и некӧр эгӧ вӧлӧ раббезӧн. Мыля нӧ Тэ баитан: "Тійӧ мездӧтчат"?»

³⁴ Исусыс шуис: «Тіянлӧ быльсӧ веськыта висьтала: умӧльсӧ керисьыс раб умӧль керӧмыслӧн.

³⁵ Рабыс пыр кежӧ оз вермы кольччыны керкуас, а Зон пыр сэтӧн олӧ.

³⁶ Зоныс кӧ тіянӧс мездӧтас, сэк вӧлись тійӧ былись мездӧтчӧмӧсь лоат.

³⁷ Ме тӧда: тійӧ Авраамлӧн увтыр. Но мӧдат тай Менӧ вийны, Менам кыввезӧ озӧ тӧрӧ сьӧлӧманыт да.

³⁸ Ме тіянлӧ баита сы йылісь, мый Меным мыччаліс Айӧ. А тійӧ керат сійӧ, мый тіянлӧ висьталіс айныт».

³⁹ Сэтчӧ Сылӧ висьталісӧ: «Миян айным ─ Авраам». Исусыс шуис нылӧ: «Вӧлітӧ бы тійӧ челядьыс Авраамлӧн, сэк керит бы Авраамыс моз.

⁴⁰ Ме тіянлӧ висьталі Енсянь кылӧм быльсӧ, а тійӧ Менӧ мӧдат вийны. Авраамыс сідз эз керлы.

⁴¹ Тійӧ кератӧ айнытлісь уджсӧ». Сэтчӧ Сылӧ горӧтчисӧ: «Мийӧ эгӧ шогмӧ кыскасисьсянь. Миян ӧтік Айным ─ Ен».

⁴² Исусыс висьталіс нылӧ: «Вӧлі бы Еныс тіян Ай, сэк и Менӧ радейтіт бы. Ме Еныс дынсянь петі да локті. Ме эг лок Ассяням, Сія Менӧ ыстіс.

⁴³ Мыля одӧ вежӧртӧ Менчим баитӧмӧс? Одӧ вежӧртӧ сійӧн, мыля одӧ вермӧ кывзыны Менчим кыввезӧс.

⁴⁴ Тіян айныт куль, тійӧ керат сы тшӧктӧм сьӧрті. Сія одззасянь ни морт вийись вӧлі. Быльыс дынісь сія ылаліс, и сыын абу быльыс. Сія ассяняс висьталӧ бӧбӧтӧмӧн. Сія эд бӧбӧтчись и бӧбӧтчӧмыслӧн ай.

⁴⁵ Ме быльсӧ баита, но тійӧ Меным одӧ веритӧ.

⁴⁶ Вермас я кинкӧ тіян коласісь осудитны Менӧ умӧль керӧм понда? Ме кӧ баита быльсӧ, мыля Меным одӧ веритӧ?

⁴⁷ Кин Енсянь, сія кывзӧ Енлісь кыввесӧ. Тійӧ абу Енсянь, сійӧн и одӧ кывзӧ».

Авраам да Исус йылісь

⁴⁸ Сэтчӧ иудейес Исусыслӧ висьталісӧ: «Миян эта висьталӧмным абу я быль: Тэ Самарияись и Тэ пытшкын сэрпӧсь лов?»

⁴⁹ Исусыс нылӧ шуис: «Меын сэрпӧсь лолыс абу. Ме бурӧ пукта Ассим Айӧс, а тійӧ Менӧ умӧльтат.

⁵⁰ Ме ог кошшы Аслым ошкӧмсӧ. Мӧдік эм, Кӧда Меным кошшӧ ошкӧмсӧ. Сія веськыта судитӧ.

⁵¹ Тіянлӧ быльсӧ веськыта висьтала: Менам кыв сьӧрті олісьыс некӧр оз кув».

⁵² Иудейес Сылӧ висьталісӧ: «Ӧні мийӧ тӧдамӧ, Тэ пытшкын сэрпӧсь лов. Авраамыс куліс, Енсянь юӧртіссес кулісӧ. Тэ тай баитан: "Менам кыв сьӧрті олісьыс некӧр оз кув".

⁵³ Тэ мый, миян Авраам айся ыджытжык? Авраамыс куліс, Енсянь юӧртіссес кулісӧ. Кинӧ Тэ Асьтӧ пуктан?»

⁵⁴ Исусыс нылӧ висьталіс: «Ачымӧс кӧ Ме ошка, сія ошкӧмыс абутӧм туйӧ. Менӧ ошкӧ Айӧ, Кӧда йылісь тійӧ шуат, Сія пӧ тіян Ен.

⁵⁵ Тійӧ Сійӧ одӧ тӧдӧ, Ме Сійӧ тӧда. Висьтала кӧ, ог Ме Сійӧ тӧд, сэк лоа тіян кодь бӧбӧтчись. Ме тӧда Сійӧ и кера Сы кыв сьӧрті.

⁵⁶ Тіян Авраам айныт гажӧн мӧдіс пантавны Менчим локтан лунӧс. Сія адззыліс сійӧ лунсӧ да гажмис».

⁵⁷ Сэтчӧ иудейес Сылӧ висьталісӧ: «Тэныт эд абу на и витдас во и Тэ адззылін Авраамсӧ?»

⁵⁸ Исусыс шуис нылӧ: «Тіянлӧ быльсӧ веськыта висьтала: Авраам шогмытӧдз Ме вӧлі ни».

⁵⁹ Сэк нія босьтісӧ иззэз да мӧдісӧ Сійӧ шупкавны, но Исусыс сайӧвтчис да петіс Вежа Керкусис. Сія муніс иудейес коласӧт да иньдӧтчис одзлань.