Иоан 7 - Бур Юӧр 2019

¹ Сыбӧрын Исусыс ветлӧтіс Галилея муӧт. Иудея муӧттяс эз ни ветлӧт, иудейес Сійӧ мӧдісӧ вийны да.

² Иудейезлӧн сибаліс «Шалаш лэбтан» вежалун.

³ Сэк Исуслӧн воннэс шуисӧ Сылӧ: «Мун татісь Иудеяӧ, медбы и велӧтчиссет адззылісӧ Тэнчит керӧмметӧ.

⁴ Мортлӧ кӧ колӧ, медбы сы йылісь тӧдісӧ, сія нем оз кер гусьӧн, а Тэнат эттшӧм вынаӧсь керӧммет. Сідзкӧ, мыччав Асьтӧ отирыслӧ».

⁵ Нельки Исуслӧн воннэс Сылӧ эзӧ веритӧ.

⁶ Сэтчӧ Исусыс нылӧ висьталіс: «Менам кадӧ эз на лок, а тіянлӧ эд быд кадыс лӧсялӧ.

⁷ Тіян вылӧ отирыс озӧ вермы лӧгавны. Ме эд нылӧ син вылӧ ог ков, мыля висьтала лёк керӧммезныс йылісь.

⁸ Тійӧ мунӧ сія вежалун вылӧ, а Ме ог на мун. Менам кадӧ эз на лок».

⁹ Исусыс сідз висьталіс да кольччис Галилеяас.

«Шалаш лэбтан» вежалун

¹⁰ Исуслӧн воннэс локтісӧ вежалун вылӧ, а Ачыс Сія сэтчӧ локтіс гусьӧн, медбы некин эз тӧд Сы йылісь.

¹¹ Иудейес кошшисӧ Сійӧ вежалун коста да юасисӧ: «Кытӧн Сія?»

¹² Уна мый баитісӧ отирыс Сы йылісь. Ӧтіккез баитісӧ: Сія пӧ небыт сьӧлӧма. Мӧдіккез шуисӧ: абу пӧ Сія сэтшӧм, отирсӧ пӧ ылӧтлӧ.

¹³ Отирыс полісӧ иудейезлӧн веськӧтліссезісь, сійӧн баитісӧ Сы йылісь гусьӧн.

¹⁴ Чулаліс джын вежалуныс ни. Сэк Исусыс пырис Вежа Керкуас да пондіс велӧтны.

¹⁵ Иудейесӧ диво кутіс, нія баитісӧ: «Кытісь нӧ Сія велӧтчытӧг тӧдӧ Вежа Гижӧттэсӧ?»

¹⁶ Исус нылӧ висьталіс: «Ме ог велӧт Ассяням. Сія велӧтӧмыс Менӧ Ыстісьлӧн.

¹⁷ Кин лӧсьӧтчис керны Ен сьӧрті, сія вежӧртас, Енсянь я эта велӧтӧмыс, али Ассяням Ме баита.

¹⁸ Ассяняс баитісьыс кошшӧ аслыс ошкӧмсӧ. Кин ошкӧмсӧ кошшӧ Сійӧ Ыстісьлӧ, Сія быльсӧ висьталӧ, оз бӧбӧтчы.

¹⁹ Эз разь сет тіянлӧ Моисейыс Туйдӧтсӧ? Но тіян коласісь некин оз ов Туйдӧтыс сьӧрті. Сэк мый понда нӧ Менӧ мӧдат вийны?»

²⁰ Отирыс Сылӧ шуисӧ: «Сэрпӧсь лов Тэ пытшкын! Кин кошшӧ Тэнӧ вийны?»

²¹ Исусыс висьталіс: «Ӧтік удж Ме кери тіян одзын, и быдӧннытӧ диво кутіс.

²² Моисейыс тшӧктіс тіянлӧ ассиныт зоннэзнытӧ вундыштыштны. Кӧть эта тшӧктӧмыс эз вӧв Моисейлӧн, сія эд мунӧ кӧркӧсянь, айезнытсянь. Тійӧ вундыштыштат и шоччисян лунӧ.

²³ Моисейлӧн Туйдӧт сьӧрті керӧм понда тійӧ мортсӧ вундыштыштат шоччисян лунӧ. Сэк мыля нӧ Ме вылӧ лӧгалатӧ, шоччисян лунӧ мортсӧ веськӧті кӧ?

²⁴ Эдӧ судитӧ вывтсӧ видзӧтӧм сьӧрті, судитӧ веськыта».

Отирлӧн Исус йылісь баитӧм

²⁵ Сэтӧн Ерусалимын оліссез коласісь мукӧдыс шуисӧ: «Абу разь эта сія Мортыс, Кӧдӧ кошшӧны вийны?

²⁶ Сія эд быдӧнныс дырни баитӧ, а Сылӧ нем озӧ шуӧ. Натьтӧ, веськӧтліссес вежӧртісӧ: Сія былись Кристос-Мездӧтісьыс.

²⁷ Мийӧ эд тӧдамӧ, кытісь Сія. А кӧр локтас Мездӧтісьыс, мийӧ огӧ и пондӧ тӧдны, кытісь Сія».

²⁸ Сэк Исусыс Вежа Керкуас велӧттӧн горӧн висьталіс: «Тійӧ тӧдатӧ Менӧ. Тӧдатӧ, кытісь Ме. Ме эг лок Ассяням. Менӧ Ыстісьыс ─ Ачыс Быльыс. Тійӧ Сійӧ тай одӧ тӧдӧ,

²⁹ а Ме Сійӧ тӧда. Сія эд ыстіс Менӧ. Ме локті Сы дынсянь».

³⁰ Исуссӧ мӧдісӧ кутны, но ӧтік морт эз лэбты Сы вылӧ кисӧ, Сылӧн кадыс эд эз на лок.

³¹ Уна отир пондісӧ веритны Исусыслӧ. Нія баитісӧ: «Кристос-Мездӧтісьыс локтас да унажык я керас адззывлытӧммесӧ эта Мортся?»

Фарисейес аркирейескӧт мӧдӧны кутны Исуссӧ

³² Отирыслӧн Исусыс йылісь сідз баитӧмныс кывсис фарисейеслӧ. Сэк фарисейес аркирейескӧт ыстісӧ Вежа Керку сьӧрын видзӧтіссесӧ кутны Сійӧ.

³³ Исусыс шуис нылӧ: «Ме ог ни дыр ло тіянкӧт. Чожа муна Менӧ Ыстісь дынӧ.

³⁴ Менӧ пондатӧ кошшыны да одӧ адззӧ. Кытӧн Ме лоа, сэтчӧ тійӧ одӧ вермӧ локны».

³⁵ Сы коста иудейес баитісӧ ӧтамӧдныслӧ: «Кытчӧ Сія мӧдӧ мунны? Мийӧ пӧ Сійӧ нельки огӧ адззӧ? Оз я Сія мӧд мунны миян отир дынӧ, кӧдна олӧны греккез коласын, да велӧтны греккесӧ?

³⁶ Кыдз вежӧртны Сылісь кыввесӧ "Пондатӧ кошшыны Менӧ, да одӧ адззӧ. Кытӧн Ме лоа, сэтчӧ тійӧ одӧ вермӧ локны"?»

³⁷ Вежалунлӧн медбӧрья, медгажӧтчан лунас Исусыс сувтіс да горӧн висьталіс: «Кинлӧн косьмӧ горшыс, ась локтӧ Ме дынӧ да юӧ.

³⁸ Кин веритӧ Меным, сы пытшкись пондасӧ котӧртны ловья ва шоррез. Сідз висьталӧм Вежа Гижӧтын».

³⁹ Сія баитіс Вежа Лов йылісь, Кӧдӧ сетасӧ Исуслӧ веритіссезлӧ. Сэк Вежа Лолыс эд эз на вӧв ныкӧт, Исусыс сэк эз на лэбтісь югьялӧмас да.

⁴⁰ Отирыс коласісь унаӧн кылісӧ этнӧ кыввесӧ да висьталісӧ: «Сія эд былись Енсянь юӧртісь».

⁴¹ Мӧдіккез баитісӧ: «Сія ─ Кристос-Мездӧтісь». Мукӧдыс баитісӧ: «Вермас я Кристос-Мездӧтісьыс локны Галилеясис?

⁴² Абу разь висьталӧм Вежа Гижӧтас: Мездӧтісьыс пӧ локтас Давид увтырись, Вифлеем карись, Давидлӧн чужанінісь?»

⁴³ Сідз Исусыс йылісь отирыс коласын лэбтісис етшасьӧм.

⁴⁴ Ны коласісь мукӧдыс мӧдісӧ Сійӧ кутны, но ӧтік морт эз лэбты Сы вылӧ кисӧ.

⁴⁵ Сійӧн ыстӧммес ӧтнаныс бӧр локтісӧ аркирейес да фарисейес дынӧ. Мӧддэс нылісь юалісӧ: «Мыля Сійӧ эдӧ вайӧтӧ?»

⁴⁶ Нія висьталісӧ: «Эта Морт моз баитісьыс эз на вӧвлы».

⁴⁷ Фарисейес висьталісӧ нылӧ: «Эдӧ я и тійӧ бӧбасьӧ?

⁴⁸ Веськӧтліссес да фарисейес коласісь пондіс разь кинкӧ веритны Сылӧ?

⁴⁹ Эта отирыс тай озӧ тӧдӧ Туйдӧтсӧ. Нія ёрдӧмӧсь».

⁵⁰ Фарисейес коласын вӧлі Никодим нима морт. Сія вӧлі вовлӧм Исусыс дынӧ ойнас. Никодимыс шуис нылӧ:

⁵¹ «Миян Туйдӧт сьӧрті позьӧ я судитны мортсӧ сійӧ кывзытӧг да сылісь керӧмсӧ тӧдтӧг?»

⁵² Сэтчӧ сылӧ шуисӧ: «Абу я и тэ Галилеясис? Видзӧт буржыка, сэк казялан: Галилеясис Енсянь юӧртісьыс оз лок».

⁵³ Сыбӧрын быдӧнныс мунісӧ горттэзӧ.